Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 10

Wetin De Mek A Nɔ Baptayz?

Wetin De Mek A Nɔ Baptayz?

“Dɛn tu go insay di wata ɛn Filip baptayz am.”—DI APƆSUL DƐN WOK [AKT] 8:​38.

SIŊ 52 Gi Yu Layf to Gɔd

WETIN WI GO LAN? *

1. Wetin Adam ɛn Iv bin lɔs? Wetin bin apin?

UDAT yu tink se fɔ tɛl yu wetin gud ɛn wetin bad? We Adam ɛn Iv bin it di frut frɔm di tik we de sho gud ɛn bad, dɛn mek am klia se dɛn nɔ abop pan Jiova ɛn dɛn nɔ want am fɔ tɛl dɛn wetin gud ɛn bad. Dɛn disayd fɔ dɛnsɛf wetin gud ɛn wetin bad. (Jɛn. 3:​22) Bɔt tink bɔt wetin dɛn lɔs. Dɛn lɔs dɛn padi biznɛs wit Jiova. Dɛn lɔs bak di chans fɔ de sote go, ɛn dɛn mek dɛn pikin dɛn bigin sin ɛn day. (Rom 5:​12) Wetin Adam ɛn Iv disayd fɔ du bin briŋ trɔbul na di wɔl.

Afta di Itiopian bigman gri wit wetin i lan bɔt Jizɔs, i bin want fɔ baptayz wantɛm wantɛm (Luk na paregraf 2 ɛn 3)

2-3. (a) Wetin di Itiopian bigman bin du we Filip prich to am? (b) Us blɛsin dɛn wi go gɛt if wi baptayz? Us kwɛstyɔn dɛn wi go tɔk bɔt?

2 Kɔmpia di we aw Adam ɛn Iv bin biev wit di we aw di Itiopian bigman bin biev we Filip prich to am. Di bigman bin rili gladi fɔ wetin Jiova ɛn Jizɔs dɔn du fɔ am, so dat bin mek i baptayz wantɛm wantɛm. (Akt 8:​34-38) We wi gi wi layf to Gɔd ɛn baptayz jɔs lɛk da Itiopian bigman, wi de mek ɔlman no klia wan wetin wi dɔn disayd. Wi de sho se wi rili gladi fɔ wetin Jiova ɛn Jizɔs dɔn du fɔ wi. Wi de sho bak se wi abop pan Jiova ɛn wi no se na in fɔ sho wi wetin gud ɛn wetin bad.

3 Tink bɔt di blɛsin dɛn we wi de gɛt we wi de sav Jiova! Wan pan dɛn na dat wi gɛt di chans fɔ gɛt ɔl wetin Adam ɛn Iv bin lɔs, ivin di chans fɔ de sote go. Bikɔs wi gɛt fet pan Jizɔs Krays, Jiova de fɔgiv wi mistek dɛn ɛn i de  gi wi klin kɔnshɛns. (Mat. 20:​28; Akt 10:​43) Wi gɛt di chans bak fɔ bi Jiova in savant dɛn we de na in famili ɛn we dɛn tumara bambay go wɔndaful. (Jɔn 10:​14-16; Rom 8:​20, 21) Bɔt pan ɔl dɛn bɛnifit dɛn ya, sɔm pipul dɛn we dɔn kam fɔ no Jiova kin fred fɔ falamakata di Itiopian bigman in ɛgzampul. Wetin kin mek dɛn nɔ want fɔ baptayz? Wetin dɛn go du fɔ mek di prɔblɛm dɛn we dɛn gɛt nɔ stɔp dɛn fɔ baptayz?

PRƆBLƐM DƐN WE KIN MEK SƆM PIPUL DƐN NƆ WANT FƆ BAPTAYZ

Prɔblɛm dɛn we sɔm pipul dɛn kin gɛt bifo dɛn disayd fɔ baptayz

Dɛn nɔ gɛt kɔnfidɛns (Luk na paregraf 4-5) *

4-5. Us prɔblɛm we wan yɔŋ man we nem Avri ɛn wan yɔŋ uman we nem Ana bin de gɛt?

4 Dɛn nɔ gɛt kɔnfidɛns. Avri in mama ɛn papa na Jiova Witnɛs dɛn. Pipul dɛn sabi in papa as pɔsin we kia fɔ in famili ɛn ɛlda we sabi du in wok. Bɔt Avri bin de fred fɔ baptayz. Wetin mek? Avri tɔk se: “A nɔ bin tink se a go ebul fɔ bi gud pɔsin lɛk mi papa.” I bin de tink bak se i nɔ go ebul fɔ du di wok dɛn we dɛn go gi am tumara bambay. Avri bin tɔk bak se: “A kin wɔri se if a baptayz dɛn go aks mi fɔ pre na pɔblik, fɔ gi tɔk, ɔ fɔ lid di grup na fil savis.”

5 Ana we ol 18 ia, nɔ bin rili gɛt kɔnfidɛns. In mama ɛn papa de sav Jiova. Bɔt pan ɔl dat, i bin de dawt if i go ɛva ebul du wetin Jiova want. Wetin mek? Ana bin de tink se in nɔto bɛtɛ pɔsin. Sɔntɛnde, i kin rili fil bad bɔt insɛf, so i kin de du bad to insɛf bay wilful. Dis bin de mek in prɔblɛm de wɔs. Ana bin tɔk se: “A nɔ ɛva tɛl ɛnibɔdi wetin a de du, ivin mi mama ɛn papa. Ɛn a bin de imajin se Jiova nɔ go ɛva lɛk mi fɔ wetin a bin de du to misɛf.”

Di padi dɛn we wi gɛt (Luk na paregraf 6) *

6. Wetin bin de stɔp Vanɛsa nɔ fɔ baptayz?

6 Di padi dɛn we wi gɛt. Vanɛsa we ol 22 ia bin tɔk se, “A bin gɛt wan mi tayt padi we a bin dɔn sabi fɔ lɛk tɛn ia so.” Bɔt Vanɛsa in padi nɔ bin want fɔ sav Jiova ɛn i nɔ bin de ɛp am fɔ du tin we go mek i baptayz. Dat bin mek Vanɛsa in at pwɛl, ɛn i bin tɔk se: “I nɔ bin izi fɔ mi fɔ mek padi, ɛn a bin de wɔri se if a stɔp wi padi biznɛs, a nɔ go ɛva ebul fɔ gɛt ɔda tayt padi.”

Fɔ fred se yu go mek mistek (Luk na paregraf 7) *

7. Wetin bin mek wan yɔŋ uman we nem Makayla bin de fred fɔ baptayz?

7 Fɔ fred se yu go mek mistek. Makayla bin ol fayv ia we dɛn disfɛloship in brɔda. As i de gro ɔp, i si di we aw di tin we in brɔda du bin afɛkt in mama ɛn papa. Makayla tɔk se: “A bin de fred se if a baptayz, a go mek mistek, dɛn go  disfɛloship mi, ɛn dat go mek mi mama ɛn papa dɛn at pwɛl mɔ ɛn mɔ.”

Fɔ fred se ɔda pipul dɛn nɔ go gladi wit wi (Luk na paregraf 8) *

8. Wetin wan yɔŋ man we nem Mayls bin de fred?

8 Fɔ fred se ɔda pipul dɛn nɔ go gladi wit wi. Mayls in papa ɛn in stɛp-mama bin de sav Jiova, bɔt in mama nɔ bin de sav Jiova. Mayls tɔk se: “A bin de wit mi mama fɔ 18 ia, ɛn a bin de fred fɔ tɛl am se a want fɔ baptayz. A bin dɔn si di we aw i bin biev we mi papa bi Jiova Witnɛs. A bin de fred se i go kɔz prɔblɛm fɔ mi.”

WETIN YU GO DU FƆ MEK DI PRƆBLƐM WE YU GƐT NƆ STƆP YU FƆ BAPTAYZ?

9. Wetin go apin we yu lan bɔt aw Jiova peshɛnt ɛn lɛk wi?

9 Adam ɛn Iv bin disayd nɔ fɔ sav Jiova bikɔs dɛn nɔ bin rili lɛk am. Bɔt pan ɔl dat, Jiova bin alaw dɛn fɔ liv lɔng so dat dɛn go bɔn pikin dɛn ɛn disayd fɔ dɛnsɛf aw dɛn go mɛn dɛn. Di tin we bin apin we Adam ɛn Iv disayd fɔ kɔmɔt biɛn Jiova sho klia wan se dɛn nɔ bin gɛt sɛns. Dɛn fɔs bɔypikin kil in inosɛnt brɔda, ɛn as tɛm de go mɔtalman dɛn bin jɔs bisin bɔt dɛnsɛf ɛn dɛn bin lɛk fɔ fɛt. (Jɛn. 4:​8; 6:​11-13) Bɔt Jiova gɛt we fɔ sev Adam ɛn Iv dɛn pikin dɛn we want fɔ sav am. (Jɔn 6:​38-40, 57, 58) As yu de lan mɔ bɔt aw Jiova peshɛnt ɛn aw i lɛk wi, na di mɔ yu go lɛk am. Yu nɔ go want fɔ du wetin Adam ɛn Iv dɛn bin du, ɛn yu go gi yu layf to Jiova.

Wetin go ɛp yu nɔ fɔ fred dɛn prɔblɛm dɛn de

(Luk na paregraf 9-10) *

10. Wetin mek we yu tink bɔt wetin de na Sam 19:​7 go ɛp yu fɔ sav Jiova?

10 Kɔntinyu fɔ lan bɔt Jiova. Di mɔ we yu de lan bɔt Jiova, na di mɔ yu go biliv tranga wan se yu go ebul sav am fayn fayn wan. Avri we wi bin tɔk bɔt fɔs tɔk se: “A bin gɛt kɔnfidɛns bay we a de rid ɛn tink gud wan bɔt di prɔmis we de na Sam 19:​7.” (Rid.) We Avri si aw Jiova du wetin i bin dɔn prɔmis, dat mek i lɛk Gɔd mɔ ɛn mɔ. Lɔv nɔ de jɔs mek pɔsin gɛt kɔnfidɛns, bɔt i de ɛp wi bak fɔ pe atɛnshɔn pan Jiova ɛn pan wetin i want. Ana we wi bin tɔk bɔt fɔs bin tɔk se: “We a bin de rid di Baybul ɛn stɔdi  am fɔ misɛf, a kam fɔ no se we a de du bad tin to misɛf, a bin de du tin we de mek Jiova nɔ gladi.” (1 Pit. 5:​7, NW) Ana bin kam fɔ bi pɔsin we de “du wetin Gɔd in wɔd se.” (Jems 1:​22) Wetin bin apin we i du dat? Ana tɔk se: “We a si di we aw fɔ obe Jiova de bɛnifit mi, dat mek a lɛk am mɔ ɛn mɔ. Naw a shɔ se Jiova go gayd mi ɛnitɛm we a nid am.” Ana bin ebul fɔ stɔp fɔ de du bad to insɛf. I bin gi in layf to Jiova ɛn i bin baptayz.

(Luk na paregraf 11) *

11. Wetin Vanɛsa bin du fɔ mek gud padi dɛn? Wetin wi kin lan frɔm dis?

11 Yuz sɛns we yu de pik yu padi dɛn. As tɛm de go, Vanɛsa we wi bin dɔn tɔk bɔt bin kam fɔ si se na in padi bin de mek i nɔ bin de sav Jiova. So i bin stɔp dɛn padi biznɛs. Bɔt ɔda tin dɛn de we Vanɛsa bin du. I bin tray tranga wan fɔ mek nyu padi dɛn insay di kɔngrigeshɔn. I tɔk se di ɛgzampul we Noa ɛn in famili bin sɛt bin ɛp am. Vanɛsa tɔk se: “Di pipul dɛn we bin de arawnd Noa ɛn in famili nɔ bin lɛk Jiova, bɔt Noa ɛn in famili bin gɛt gud padi biznɛs wit dɛnsɛf.” Afta Vanɛsa baptayz, i bigin fɔ payɔnia. Naw Vanɛsa se: “Dis dɔn ɛp mi fɔ mek gud padi dɛn nɔto jɔs insay mi kɔngrigeshɔn bɔt ivin na ɔda kɔngrigeshɔn dɛn.” Yusɛf go ebul mek gud padi dɛn bay we yu du di wok we Jiova dɔn gi wi fɔ du.—Mat. 24:​14.

(Luk na paregraf 12-15) *

12. Uskayn we Adam ɛn Iv nɔ bin fred? Wetin bin apin?

12 Lan fɔ fred di rayt we. Sɔm kayn we dɛn de we wi kin fred we gud fɔ wi. Fɔ ɛgzampul, i fayn fɔ lɛ wi de fred fɔ du sɔntin we go mek Jiova vɛks. (Sam 111:​10) If Adam ɛn Iv bin fred Gɔd da kayn we de, dɛn nɔ bin fɔ dɔn tɔn dɛn bak pan Jiova. Bɔt na dat dɛn du. We dɛn du dat, dɛn kam fɔ no se dɛn dɔn sin. Na sin ɛn day nɔmɔ dɛn go ebul pas to dɛn pikin dɛn. We dɛn kam fɔ si wetin dɔn apin to dɛn, dat bin mek dɛn shem bikɔs dɛn nekɛd ɛn dɛn fɛn sɔntin fɔ kɔba dɛnsɛf.—Jɛn. 3:​7, 21.

13-14. (a) Frɔm wetin de na Pita In Fɔs Lɛta 3:​21, wetin mek wi nɔ rili nid fɔ fred day? (b) Us rizin dɛn wi gɛt fɔ lɛk Jiova?

 13 Pan ɔl we wi nid fɔ fred fɔ du tin we go mek Jiova vɛks, wi nɔ nid fɔ fred fɔ day. Jiova dɔn mek we fɔ wi fɔ gɛt layf we go de sote go. If wi kɔmit sin bɔt wi rili ripɛnt, Jiova go fɔgiv wi sin. I go fɔgiv wi bikɔs wi gɛt fet pan di day we in Pikin day fɔ fri wi frɔm sin ɛn day. Wan impɔtant we we wi go sho se wi gɛt fet na bay we wi gi wi layf to Gɔd ɛn baptayz.—Rid Pita In Fɔs Lɛta 3:​21.

14 Wi gɛt bɔku rizin fɔ lɛk Jiova. Jiova nɔ de jɔs gi wi gud tin dɛn fɔ ɛnjɔy layf ɛnide bɔt i de tich wi di tru bɔt insɛf ɛn wetin in want. (Jɔn 8:​31, 32) I dɔn gi wi di kɔngrigeshɔn fɔ gayd ɛn sɔpɔt wi. I de ɛp wi fɔ bia wit wi prɔblɛm dɛn naw, ɛn i dɔn prɔmis fɔ mek wi de sote go na di nyu wɔl tumara bambay. (Sam 68:​19, NW; Rɛv. 21:​3, 4) We wi tink bɔt ɔl wetin Jiova dɔn du fɔ sho se i lɛk wi, dat de mek wi lɛk am. Ɛn we wi lɛk Jiova, wi kin lan fɔ fred am di rayt we. Wi go fred fɔ du sɔntin we go mek di Wan we wi rili lɛk fil bad.

15. Wetin bin ɛp Makayla fɔ stɔp fɔ fred se i nɔ go ebul du di rayt tin?

15 Makayla we wi bin tɔk bɔt fɔs, bin stɔp fɔ fred se i nɔ go ebul du di rayt tin we i kam fɔ ɔndastand di we aw Jiova de fɔgiv. Makayla tɔk se: “A kam fɔ no se wi ɔl nɔ pafɛkt ɛn wi go mek mistek dɛn. Bɔt a kam fɔ ɔndastand bak se Jiova lɛk wi, ɛn i go fɔgiv wi bikɔs Jizɔs Krays gi in layf fɔ fri wi frɔm sin ɛn day.” Di we aw Makayla bin lɛk Jiova bin mek i gi in layf to am ɛn baptayz.

(Luk na paregraf 16) *

16. Wetin bin ɛp Mayls fɔ lɛ i stɔp fɔ fred se in mama nɔ go gladi bikɔs i disayd fɔ baptayz?

16 Mayls we bin de fred se in mama nɔ go gladi bikɔs i disayd fɔ baptayz bin aks di sakit ovasia fɔ advays. Mayls tɔk se: “Di sakit ovasia insɛf bin gro ɔp na os usay na in papa nɔmɔ na Jiova Witnɛs. I bin ɛp mi fɔ tink bɔt wetin a fɔ tɛl mi mama fɔ mek i gri se na mi disayd fɔ baptayz nɔto mi papa fos mi fɔ du am.” Mayls in mama nɔ bin gladi fɔ wetin i yɛri. Leta, Mayls bin muf kɔmɔt na in mama in os, bɔt i bin du wetin i dɔn disayd fɔ du. Mayls bin tɔk bak se: “We a lan bɔt di gud tin dɛn we Jiova dɔn du fɔ mi, dat bin rili tɔch mi at. Dɔn we a tink gud gud wan bɔt di day we Jizɔs Krays day fɔ fri wi frɔm sin ɛn day, a kam fɔ no aw Jiova lɛk mi. Dat mek a gi mi layf to Jiova ɛn baptayz.”

DU WETIN YU DƆN DISAYD FƆ DU

Wi go ebul sho se wi gladi fɔ wetin Jiova dɔn du fɔ wi (Luk na paregraf 17)

17. Us chans wi ɔl gɛt?

17 We Iv bin it di frut frɔm di tik we bin de na di gadin we de na Idɛn, dat bin sho  se i nɔ want fɔ obe in Papa. We Adam bin jɔyn am, dat bin sho se i nɔ gɛt wan tɛnki ɔ i nɔ gladi fɔ ɔl di gud tin dɛn we Jiova dɔn du fɔ am. Wi ɔl gɛt di chans fɔ sho se wi nɔ tan lɛk Adam ɛn Iv. Bɔt wi rili gladi fɔ ɔl di tin dɛn we Jiova dɔn du fɔ wi. We wi baptayz, wi de sho Jiova se na in gɛt di rayt fɔ tɛl wi wetin fɔ du ɛn wetin rayt ɛn rɔŋ. Wi de sho se wi lɛk wi Papa ɛn wi abop pan am.

18. Aw yu go ebul fɔ sav Jiova?

18 Afta we wi dɔn baptayz, wi nid fɔ kɔntinyu fɔ du wetin Jiova want wi fɔ du, nɔto wetin wi want. Bɔku bɔku pipul dɛn de liv da we de. Yu go tan lɛk dɛn if yu kɔntinyu fɔ ɔndastand mɔ tin dɛn frɔm Gɔd in Wɔd, di Baybul; if yu kɔntinyu fɔ kip kɔmpin wit yu brɔda ɛn sista dɛn na di kɔngrigeshɔn; ɛn if yu kɔntinyu fɔ prich wit zil bɔt wetin yu dɔn lan bɔt yu Papa we lɛk yu. (Ibru 10:​24, 25) We yu want fɔ disayd fɔ du sɔntin, lisin to di advays we Jiova de yuz in Wɔd ɛn in ɔganayzeshɔn fɔ gi yu. (Ayz. 30:​21) Da tɛm de, yu go go bifo pan ɛnitin we yu de du.—Prɔv. 16:​3, 20.

19. Wetin yu fɔ kɔntinyu fɔ tink bɔt? Wetin mek?

19 We yu kɔntinyu fɔ notis di we aw yu de bɛnifit frɔm di we aw Jiova de gayd yu, yu go kam fɔ lɛk am mɔ ɛn lɛk bak wetin i want. Dɔn, Setan nɔ go ebul gi yu ɛnitin we go mek yu stɔp fɔ sav Jiova. Imajin yusɛf wan tawzin ia frɔm naw. We yu go tink bak bɔt di disayd we yu disayd fɔ baptayz, yu go si se na di bɛst tin yu bin disayd fɔ du!

SIŊ 28 Bi Jiova in Padi

^ par. 5 Di tin we yu go disayd fɔ du we impɔtant pas ɔl, na fɔ disayd if yu go baptayz ɔ if yu nɔ go baptayz. Wetin mek na tin we impɔtant? Dis atikul go ansa da kwɛstyɔn de. I go ɛp bak di wan dɛn we de tink fɔ baptayz fɔ no aw dɛn go stil baptayz ilɛksɛf dɛn gɛt sɔntin we de mek dɛn nɔ want fɔ baptayz.

^ par. 56 SMƆL TIN BƆT DI PIKCHƆ DƐN: Kɔnfidɛns: Wan yɔŋ man de fred fɔ kɔmɛnt.

^ par. 58 SMƆL TIN BƆT DI PIKCHƆ DƐN: Padi dɛn: Wan yɔŋ Witnɛs we de kip kɔmpin wit bad padi de shem we i si in kɔmpin Jiova Witnɛs dɛn.

^ par. 60 SMƆL TIN BƆT DI PIKCHƆ DƐN: Fɔ fred se yu go mek mistek: We dɛn disfɛloship wan yɔŋ sista in brɔda ɛn in brɔda kɔmɔt na os, dis sista bin de fred se insɛf go mek mistek.

^ par. 62 SMƆL TIN BƆT DI PIKCHƆ DƐN: Fɔ fred se ɔda pipul dɛn nɔ go gladi wit yu: Wan bɔbɔ de fred fɔ pre we in mama we nɔto Jiova Witnɛs de luk am.

^ par. 65 SMƆL TIN BƆT DI PIKCHƆ DƐN: Kɔnfidɛns: Wan yɔŋ man de tray fɔ stɔdi mɔ fɔ insɛf.

^ par. 67 SMƆL TIN BƆT DI PIKCHƆ DƐN: Padi dɛn: Wan yɔŋ Witnɛs lan nɔ fɔ shem fɔ se in na Jiova Witnɛs.

^ par. 69 SMƆL TIN BƆT DI PIKCHƆ DƐN: Fɔ fred se yu go mek mistek: Wan yɔŋ sista ɔndastand di trut ɛn i baptayz.

^ par. 71 SMƆL TIN BƆT DI PIKCHƆ DƐN: Fɔ fred se ɔda pipul dɛn nɔ go gladi wit yu: Wan bɔbɔ gɛt maynd fɔ ɛksplen wetin i biliv to in mama.