Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 12

Sho se Yu Bisin bɔt di We Aw Ɔda Pipul dɛn De Fil

Sho se Yu Bisin bɔt di We Aw Ɔda Pipul dɛn De Fil

“Una ɔl . . . fɔ gɛt sɔri at fɔ una kɔmpin.”—1 PIT. 3:​8.

SIŊ 90 Lɛ Wi De Ɛnkɔrej Wisɛf

WETIN WI GO LAN? *

1. Frɔm wetin de na Pita In Fɔs Lɛta 3:​8, wetin mek wi kin gladi fɔ de arawnd pipul dɛn we bisin bɔt aw wi de fil ɛn aw wi de du?

WI KIN gladi fɔ de arawnd pipul dɛn we bisin bɔt aw wi de fil ɛn aw wi de du. Dɛn kin tray fɔ fil wetin wi de fil ɛn fɔ no wetin wi de tink. Dɛn kin tray fɔ tink bifo tɛm wetin wi nid ɛn du sɔntin fɔ ɛp wi, ilɛksɛf wi nɔ aks dɛn. Wi kin gladi ɛn lɛk pipul dɛn we de sho “sɔri at” * fɔ wi.—Rid Pita In Fɔs Lɛta 3:​8.

2. Wetin mek wi nid fɔ tray tranga wan fɔ sho sɔri-at fɔ ɔda pipul dɛn?

2 As Kristian dɛn, wi ɔl want fɔ sho sɔri-at, ɔ bisin bɔt aw ɔda pipul dɛn de fil. Bɔt fɔ tru, i nɔ kin izi fɔ lɛ wi du dat. Wetin mek? Wan rizin na bikɔs wi nɔ pafɛkt. (Rom 3:​23) Na nɔmal tin fɔ lɛ wi de tink bɔt wisɛf nɔmɔ. So wi fɔ tray tranga wan fɔ tink bɔt ɔda pipul dɛn. Dɔn bak, i nɔ kin izi fɔ sɔm pan wi fɔ sho sɔri-at bikɔs dɛn nɔ mɛn wi da we de ɔ sɔntin bin dɔn apin to wi. Ɛn i go bi se, di we aw di pipul dɛn we de arawnd wi de biev de mek wi nɔ sho sɔri-at. Insay dis las dez, bɔku pipul dɛn nɔ de tink bɔt di we aw ɔda pipul dɛn de fil. Bifo dat, pipul dɛn “go de mɛmba dɛnsɛf nɔmɔ.” (2 Tim. 3:​1, 2) Wetin go ɛp wi fɔ bisin bɔt di we aw ɔda pipul dɛn de fil pan ɔl we wi gɛt prɔblɛm dɛn we de mek i nɔ izi fɔ du dat?

3. (a) Aw wi kin ebul sho mɔ sɔri-at fɔ ɔda pipul dɛn? (b) Wetin wi go tɔk bɔt insay dis atikul?

3 Wi kin ebul fɔ sho mɔ sɔri-at if wi falamakata Jiova Gɔd ɛn in Pikin Jizɔs Krays. Jiova na Gɔd we gɛt lɔv, ɛn  i de sɛt di bɛst ɛgzampul fɔ sho se i bisin bɔt ɔda pipul dɛn. (1 Jɔn 4:​8) Jizɔs bin falamakata in Papa in kwaliti dɛn fayn fayn wan. (Jɔn 14:​9) We i bin de na dis wɔl, i bin sho aw mɔtalman kin sho sɔri-at. Insay dis atikul, wi go tɔk fɔs bɔt aw Jiova ɛn Jizɔs dɔn sho se dɛn bisin bɔt aw ɔda pipul dɛn de fil. Dɔn, wi go tɔk bɔt aw wi go falamakata dɛn ɛgzampul dɛn.

DI ƐGZAMPUL WE JIOVA SƐT FƆ BISIN BƆT ƆDA PIPUL DƐN

4. Aw wetin de na Ayzaya 63:​7-9 (NW) sho se Jiova bisin bɔt di we aw in savant dɛn de fil?

4 Di Baybul tich wi se Jiova bisin bɔt di we aw in savant dɛn de fil. Fɔ ɛgzampul, lɛ wi tink bɔt di we aw Jiova bin fil fɔ di Izrɛlayt dɛn we bin de trade trade di tɛm we dɛn bin de sɔfa difrɛn prɔblɛm dɛn. Di Baybul se Jiova “bin de fil am ɔl di tɛm we dɛn kin de pan prɔblɛm.” (Rid Ayzaya 63:​7-9, NW.) Leta, Jiova bin yuz in prɔfɛt Zɛkaraya fɔ tɔk se we dɛn de trit in pipul dɛn bad, i tan lɛk se na in dɛn de trit bad. Jiova bin tɛl in savant dɛn se: “If ɛnibɔdi ambɔg dɛn, nain dɛn ambɔg bikɔs dɛn nain bɔlyay.” (Zɛk. 2:​8) Dis na wɔndaful we we Jiova sho se i bisin bɔt in pipul dɛn!

Sɔri-at bin mek Jiova fri di Izrɛlayt dɛn we dɛn bin de as slev na Ijipt (Luk na paregraf 5)

5. Gi wan ɛgzampul bɔt aw Jiova dɔn ɛp in savant dɛn we bin de sɔfa.

5 Jiova nɔ de jɔs sho sɔri-at fɔ in savant dɛn we de sɔfa. I de du sɔntin fɔ ɛp dɛn. Fɔ ɛgzampul, we di Izrɛlayt dɛn bin de sɔfa as slev na Ijipt, Jiova bin ɔndastand di pen we dɛn bin de fil ɛn dat bin mek i du sɔntin fɔ fri dɛn. Jiova bin tɛl Mozis se: “A dɔn si aw mi pipul dɛn de sɔfa . . . , A dɔn yɛri we dɛn de kray . . . A no ɔl bɔt aw dɛn de sɔfa. So a dɔn disayd fɔ pul dɛn kɔmɔt na di Ijipshian dɛn an.” (Ɛks. 3:​7, 8) Bikɔs Jiova bin fil sɔri fɔ in pipul dɛn, dat bin mek i fri dɛn as slev. Leta, afta lɔng tɛm we dɛn dɔn de na di land we Gɔd bin dɔn prɔmis dɛn, dɛn ɛnimi dɛn bin de atak dɛn. Wetin Jiova bin du? I bin “sɔri fɔ dɛn we dɛn kin de kray we dɛn ɛnimi dɛn kin de trit dɛn bad.” Dɔn bak, di sɔri-at we Jiova bin gɛt fɔ in pipul dɛn bin mek i du sɔntin fɔ ɛp dɛn. I sɛn jɔj dɛn fɔ sev di Izrɛlayt dɛn frɔm dɛn ɛnimi dɛn.—Jɔj 2:​16, 18.

6. Gi wan ɛgzampul we de sho aw Jiova bisin bɔt di we aw pɔsin we nɔ de tink di rayt we de fil.

 6 Jiova de sho se i bisin bɔt aw in pipul dɛn de fil, ilɛksɛf dɛn nɔ de tink di rayt we ɔltɛm. Tink bɔt Jona in ɛgzampul. Jiova bin sɛn dis prɔfɛt fɔ go prich wan jɔjmɛnt mɛsej to di pipul dɛn na Ninivɛ. We di pipul dɛn bin ripɛnt, Gɔd bin disayd nɔ fɔ dɔnawe wit dɛn. Bɔt Jona nɔ bin gladi bɔt wetin Gɔd bin disayd fɔ du. I bin “vɛks bad bad wan” bikɔs wetin i bin tɔk se go apin nɔ apin. Bɔt Jiova bin peshɛnt wit Jona ɛn ɛp am fɔ kɔrɛkt di we aw i bin de tink. (Jona 3:​10–4:​11) As tɛm de go, Jona bin ɔndastand wetin Jiova bin de tray fɔ tich am, ɛn I bin ivin yuz am fɔ rayt dis fɔ wi yon bɛnifit.—Rom 15:​4. *

7. Di we aw Jiova de du tin wit in savant dɛn de mek wi biliv wetin?

7 Di we aw Jiova de du tin wit in pipul dɛn de mek wi biliv tranga wan se i de sɔri fɔ in savant dɛn. I sabi di pen ɛn di sɔfa we wi ɔl de sɔfa. Jiova “no wetin de na mɔtalman at.” (2 Kro. 6:​30) I ɔndastand wetin wi de tink, di we aw wi de fil, ɛn wetin wi nɔ ebul fɔ du. Ɛn i “nɔ go mek [wi] fil fɔ du ɛni bad tin we [wi] nɔ go gɛt pawa fɔ lɛf.” (1 Kɔr. 10:​13) Dis prɔmis de rili mek wi fil fayn!

JIZƆS SƐT ƐGZAMPUL BƆT AW FƆ BISIN BƆT ƆDA PIPUL DƐN

8-10. Wetin-ɛn-wetin go dɔn ɛp Jizɔs fɔ sho se i bisin bɔt ɔda pipul dɛn?

8 We Jizɔs bin de na dis wɔl as mɔtalman, i bin rili bisin bɔt ɔda pipul dɛn. Tri tin dɛn bin de we mek Jizɔs bin du dat. Fɔs, frɔm wetin wi bin dɔn lan, Jizɔs bin falamakata in Papa in kwaliti dɛn fayn fayn wan. Jizɔs lɛk pipul dɛn jɔs lɛk in Papa. Pan ɔl we i bin de gladi wit ɔl di tin dɛn we i bin de ɛp Jiova fɔ mek, na “mɔtalman [i] bin lɛk mɔ.” (Prɔv. 8:​31, NW) Na lɔv bin mek Jizɔs bisin bɔt aw ɔda pipul dɛn de fil.

9 Sɛkɔn, jɔs lɛk Jiova, Jizɔs ebul fɔ no wetin de na pɔsin in at. I ebul fɔ no aw pɔsin de fil ɛn di rizin we mek i du sɔntin. (Mat. 9:​4; Jɔn 13:​10, 11) So we Jizɔs bin si se pipul dɛn at rili pwɛl, di we aw i bisin bɔt ɔda pipul dɛn bin mek i ɛp dɛn.—Ayz. 61:​1, 2; Lyuk 4:​17-21.

10 Tɔd, Jizɔs insɛf bin gɛt sɔm pan di prɔblɛm dɛn we di pipul dɛn bin de gɛt. Fɔ ɛgzampul, Jizɔs bin mɛn na famili we po. We Jizɔs bin de wok wit in papa we mɛn am we na Josɛf, i bin lan fɔ du tranga wok dɛn. (Mat. 13:​55; Mak 6:​3) Dɔn bak, i go bi se Josɛf bin day bifo Jizɔs dɔn fɔ prich na dis wɔl. So Jizɔs bin fil di pen we pɔsin kin gɛt we pɔsin we i lɛk day. Ɛn Jizɔs bin no wetin i min fɔ de na famili usay ɔlman gɛt wetin i biliv we i kam pan rilijɔn. (Jɔn 7:​5) Dɛn tin ya we bin apin to Jizɔs ɛn plɛnti ɔda tin dɛn go dɔn ɛp am fɔ ɔndastand di prɔblɛm dɛn we pipul dɛn de gɛt ɛn aw dɛn kin fil.

Jizɔs de pul wan man we dɛf kɔmɔt na di krawd bifo i de mɛn am (Luk na paregraf 11)

11. Ustɛm mɔ wi kin si di we aw Jizɔs bin bisin bɔt ɔda pipul dɛn? Ɛksplen. (Luk di pikchɔ na di frɔnt pej.)

11 Wi kin si di we aw Jizɔs bisin bɔt ɔda pipul dɛn frɔm di we aw i bin de pafɔm mirekul dɛn. Jizɔs nɔ bin de pafɔm mirekul dɛn jɔs bikɔs na in wok. Jizɔs bin de “sɔri” fɔ di wan dɛn we de sɔfa. (Mat. 20:​29-34; Mak 1:​40-42) Fɔ ɛgzampul, tink bɔt aw Jizɔs bin fil we i bin pul wan man we dɛf na di krawd fɔ go mɛn am, ɔ aw i bin fil we i bin gi layf  bak to wan uman we in man dɔn day in wangren pikin. (Mak 7:​32-35; Lyuk 7:​12-15) Jizɔs bin sɔri fɔ dɛn pipul dɛn de ɛn i bin want fɔ ɛp dɛn.

12. Aw Jɔn 11:​32-35 sho se Jizɔs bin bisin bɔt aw Mata ɛn Meri bin de fil?

12 Jizɔs bin sho se i rili bisin bɔt aw Mata ɛn Meri bin de fil. “Jizɔs kray” we i si di we aw dɛn bin de kray fɔ dɛn brɔda Lazarɔs we day. (Rid Jɔn 11:​32-35.) I nɔ bin kray jɔs bikɔs i nɔ go de wit in tayt padi igen. Infakt, i bin no se i de kam gi am layf bak. Bɔt i kray bikɔs i ɔndastand di pen we in padi dɛn de fil.

13. Wetin mek wi gladi fɔ no se Jizɔs bin gɛt sɔri-at fɔ pipul dɛn?

13 We wi de lan se Jizɔs bin gɛt sɔri-at fɔ pipul dɛn, dat de rili ɛnkɔrej wi. Na tru se wi nɔ pafɛkt lɛk am. Bɔt wi lɛk am bikɔs i bin de trit ɔda pipul dɛn wit sɔri-at. (1 Pit. 1:​8) Wi rili gladi fɔ no se i de rul naw as Kiŋ na Gɔd in Kiŋdɔm. I nɔ go te igen, Jizɔs go pul ɔl di tin dɛn we de mek wi sɔfa. Bikɔs Jizɔs bin dɔn de na dis wɔl as mɔtalman, na in na di bɛst pɔsin we go sɔlv ɔl di prɔblɛm dɛn we Setan dɔn put pan mɔtalman. Fɔ tru, na big big blɛsin wi gɛt fɔ gɛt Rula we “ɔndastand ɔltin we traŋa fɔ wi.”—Ibru 2:​17, 18; 4:​15, 16.

FALAMAKATA DI ƐGZAMPUL WE JIOVA ƐN JIZƆS SƐT

14. Frɔm wetin Lɛta Fɔ Ɛfisɔs 5:​1, 2, se, wetin wi kin want fɔ du?

14 We wi tink bɔt di ɛgzampul we Jiova ɛn Jizɔs dɔn sɛt, wi bak go want fɔ sho se wi bisin bɔt aw ɔda pipul dɛn de fil. (Rid Lɛta Fɔ Ɛfisɔs 5:​1, 2.) Wi nɔ ebul fɔ no wetin de na pipul dɛn at lɛk dɛn. Pan ɔl dat, wi go tray fɔ ɔndastand di we aw pipul dɛn de fil ɛn wetin dɛn nid. (2 Kɔr. 11:​29) Ilɛksɛf di pipul dɛn na di wɔl jɔs bisin bɔt dɛnsɛf, wi de tray fɔ bi pipul dɛn we nɔ de jɔs ‘mɛmba dɛnsɛf nɔmɔ, bɔt wi fɔ de mɛmba ɔda pipul dɛn.’—Fil. 2:​4.

(Luk na paregraf 15 to 19) *

15. Udat dɛn mɔ nid fɔ sho se dɛn bisin bɔt aw ɔda pipul dɛn de fil?

15 Na di ɛlda dɛn mɔ nid fɔ sho se dɛn rili bisin bɔt aw ɔda pipul dɛn de fil. Dɛn no se na dɛn Jiova go aks bɔt di we aw dɛn de kia fɔ in ship dɛn. (Ibru 13:​17) Di ɛlda dɛn nid fɔ ɔndastand wetin de apin to dɛn brɔda ɛn sista dɛn so dat dɛn go ɛp dɛn. Aw di ɛlda dɛn go sho se dɛn rili bisin bɔt aw ɔda pipul dɛn de fil?

16. Wetin ɛlda we gɛt sɔri-at go du? Wetin mek dis impɔtant?

16 Ɛlda we gɛt sɔri-at de spɛn tɛm wit in Kristian brɔda ɛn sista dɛn. I de aks dɛn kwɛstyɔn dɛn ɛn i de peshɛnt ɛn tek tɛm lisin to dɛn. Dat rili impɔtant mɔ if wan pan Jiova in ship dɛn want fɔ tɛl am wetin de na in at ɛn di we aw i de fil bɔt i nɔ no aw fɔ tɔk am. (Prɔv. 20:​5) We ɛlda spɛn tɛm wit in brɔda dɛn, di padi biznɛs bitwin dɛn go strɔng, dɛn go lɛk dɛnsɛf mɔ, ɛn dɛn go trɔst dɛnsɛf.—Akt 20:​37.

17. Wetin bɔku brɔda ɛn sista dɛn se dɛn lɛk mɔ bɔt di ɛlda dɛn? Gi wan ɛgzampul.

17 Bɔku brɔda ɛn sista dɛn kin tɔk se di kwaliti we dɛn lɛk mɔ bɔt ɛlda dɛn, na we dɛn de sho se dɛn bisin bɔt aw ɔda pipul dɛn de fil. Wetin mek? Wan sista we nem Adiled bin tɔk se: “Dis kwaliti de mek i izi fɔ tɔk to dɛn, bikɔs yu no se dɛn de ɔndastand yu. Yu kin si se dɛn rili bisin bɔt aw yu de fil bay di we aw dɛn de ansa we yu de tɔk to dɛn.” Wan brɔda we gladi fɔ di we aw wan ɛlda bin trit am bin tɔk se: “A si we kray wata sidɔm na di  ɛlda in yay as a bin de tɛl am bɔt wetin apin to mi. A go kɔntinyu fɔ de mɛmba dat sote go.”—Rom 12:​15.

18. Aw wi go sho se wi rili bisin bɔt aw ɔda pipul dɛn de fil?

18 Bɔt nɔto di ɛlda dɛn nɔmɔ nid fɔ sho se dɛn bisin bɔt aw ɔda pipul dɛn de fil. Wi ɔl nid fɔ gɛt dis kwaliti. Aw? Tray fɔ ɔndastand di prɔblɛm dɛn we pipul dɛn na yu famili ɛn ɔda brɔda ɛn sista dɛn de gɛt. Sho se yu bisin bɔt di pikin dɛn we dɔn pas twɛlv ia na di kɔngrigeshɔn, di wan dɛn we sik, di ol wan dɛn, ɛn di wan dɛn we pɔsin we dɛn lɛk dɔn day. Aks dɛn aw dɛn de du. Tek tɛm lisin to dɛn we dɛn de tɛl yu aw dɛn de fil. Ɛp dɛn fɔ si se yu rili ɔndastand wetin de apin to dɛn. Tɛl dɛn se yu rɛdi fɔ ɛp dɛn ɛni we we yu ebul. We wi du dis, wi de sho se wi rili lɛk dɛn.—1 Jɔn 3:​18.

19. Wetin mek wi nid fɔ ajɔst wisɛf we wi de ɛp ɔda pipul dɛn?

19 Wi nid fɔ ajɔst di we aw wi de du tin we wi de tray fɔ ɛp ɔda pipul dɛn. Wetin mek? Na bikɔs we pipul dɛn gɛt prɔblɛm, dɛn kin biev difrɛn we dɛn. Sɔm kin rili want fɔ tɔk, bɔt ɔda pipul dɛn nɔ kin lɛk fɔ tɔk bɔt dɛn prɔblɛm dɛn. So wi want fɔ ɛp dɛn, bɔt wi fɔ avɔyd fɔ aks dɛn kwɛstyɔn dɛn we go mek dɛn shem ɔ fil bad. (1 Tɛs. 4:​11) Ilɛk we ɔda pɔsin de tɛl wi bɔt in prɔblɛm, nɔto ɔltɛm wi go gri wit wetin dɛn se. Bɔt wi nid fɔ no se na so dɛn de fil. Wi want fɔ kwik fɔ lisin ɛn slo fɔ tɔk.—Mat. 7:​1; Jems 1:​19.

20. Wetin wi go tɔk bɔt na di nɛks atikul?

20 Nɔto jɔs insay di kɔngrigeshɔn wi fɔ sho se wi bisin bɔt aw ɔda pipul dɛn de fil, wi want fɔ sho dis fayn kwaliti bak we wi de prich. Aw wi go sho se wi bisin bɔt aw ɔda pipul dɛn de fil we wi de mek disaypul? Wi go tɔk bɔt dat na di nɛks atikul.

SIŊ 130 Lɛ Wi De Fɔgiv

^ par. 5 Jiova ɛn Jizɔs bisin bɔt di we aw ɔda pipul dɛn de fil. Dis atikul go tɔk bɔt wetin wi kin lan frɔm dɛn ɛgzampul dɛn. Wi go tɔk bak bɔt wetin mek wi nid fɔ sho sɔri-at ɛn aw wi go du am.

^ par. 1 WƆD WE DƐN ƐKSPLEN: Fɔ sho “sɔri at” min se wi de tray fɔ ɔndastand aw ɔda pipul dɛn de fil ɛn fɔ fil da sem we de. (Rom 12:​15) Insay dis atikul, “sɔri at” ɛn “fɔ bisin” min di sem tin.

^ par. 6 Jiova bin sho bak se i bisin bɔt aw ɔda fetful savant dɛn bin de fil. Tink bɔt di stori bɔt Ana (1 Sam. 1:​10-20), Ilayja (1 Kiŋ 19:​1-18), ɛn Ebɛdmɛlɛk (Jɛr. 38:​7-13; 39:​15-18).

^ par. 65 SMƆL TIN BƆT DI PIKCHƆ DƐN: Di mitin dɛn we wi kin gɛt na Kiŋdɔm Ɔl kin gi wi plɛnti chans fɔ sho se wi bisin bɔt ɔda pipul dɛn. Wi si (1) wan ɛlda de tɔk fayn to wan yɔŋ pɔblisha ɛn in mama, (2) wan papa ɛn in galpikin de ɛp wan ol sista fɔ go insay di motoka, ɛn (3) tu ɛlda dɛn de tek tɛm lisin to wan sista we nid advays.