Go dayrɛkt to di men tin

Go dayrɛkt to di say we di difrɛn difrɛn atikul dɛn de

Fɔ Du Gud Aw Wi Go Ebul Gɛt Dis Kwaliti?

Fɔ Du Gud Aw Wi Go Ebul Gɛt Dis Kwaliti?

Wi ɔl want ɔda pipul dɛn fɔ tink bɔt wi as gud pɔsin. Bɔt i nɔ izi fɔ bi gud pɔsin tide. Wan rizin na bikɔs bɔku pipul dɛn “nɔ go lɛk ɛnitin we gud.” (2 Tim. 3:​3) Dɛn nɔ de fala Jiova in lɔ dɛn. Di tin dɛn we Jiova se gud, na in dɛn de si as “bad” ɛn wetin i se bad, na in dɛn de si as “gud.” (Ayz. 5:​20) I nɔ izi bak fɔ du gud bikɔs wi nɔ pafɛkt ɛn sɔntɛm sɔntin bad bin dɔn apin to wi we go mek i nɔ izi fɔ wi fɔ du gud. So wi go fil lɛk wan sista we nem An,  * we dɔn sav Jiova fɔ lɔng tɛm. Dis sista bin tɔk se: “I nɔ bin rili izi fɔ mi fɔ biliv se a go bi gud pɔsin.”

Di gud nyuz na dat wi ɔl kin bi gud pɔsin. Fɔ du gud na kwaliti we Gɔd in oli spirit de gi, ɛn in oli spirit rili pawaful pas ɛni bad we aw pipul dɛn na di wɔl ɛn arawnd wi de biev, ɛn i pawaful bak pas di sin we wi gɛt ɛn di bad tin we bin dɔn apin to wi. Lɛ wi lan wetin i min fɔ du gud ɛn aw wi kin sho se wi gɛt dis kwaliti.

WETIN I MIN FƆ DU GUD?

Fɔ du gud min fɔ biev fayn ɛn nɔ fɔ du bad. Di gud we wi de du kin sho bay aw i de bɛnifit ɔda pipul dɛn. Gud pɔsin kin fɛn we ɔltɛm fɔ ɛp ɔda pipul dɛn ɛn du gud tin fɔ dɛn.

Yu go mɔs dɔn si se sɔm pipul dɛn kin gladi fɔ du gud tin dɛn fɔ dɛn famili ɛn padi dɛn, bɔt yu tink se na to dɛn nɔmɔ wi fɔ du gud? Na tru se nɔn pan wi nɔ de we de du gud ɔltɛm, bikɔs di Baybul se: “Nɔbɔdi nɔ de na [di] wɔl we de du wetin PAPA GƆD want ɔltɛm ɛn nɔ de ɛva sin.” (Ɛkli. 7:​20) Di apɔsul Pɔl bin tɔk se: “A no se nɔ gud tin nɔ de na mi at, bikɔs mi na mɔtalman.” (Rom 7:​18) So dis sho klia wan se if wi want fɔ bi gud pɔsin, wi nid fɔ lan frɔm Jiova.

‘JIOVA NA GUD GƆD’

Na Jiova de tɛl wi wetin gud. Di Baybul tɔk bɔt Jiova se: “Yu na PAPA GƆD we gud, so na gud yu de du [,] tich mi bɔt yu lɔ.” (Sam 119:​68) Lɛ wi tɔk bɔt tu we dɛn we Jiova de du gud we dɛn tɔk bɔt na da vas de.

Jiova na gud Gɔd. Bikɔs Jiova na gud Gɔd, na dat mek i nɔ pɔsibul fɔ am fɔ lɛ i nɔ du gud. Ɛn ɔl in ɔda kwaliti dɛn gɛt sɔntin fɔ du wit di gud we i gud. Tink bɔt wetin bin apin we Jiova tɛl Mozis se: “A go mek ɔl mi gudnɛs de bifo yu.” As Jiova in glori ɛn in gudnɛs de pas, Mozis bin yɛri dɛn wɔd dɛn ya: “Mi, GƆD [“Jiova,” NW], di PAPA GƆD we gud ɛn de sho masi, we nɔ gɛt shɔtat, we in lɔv nɔ de fel, ɛn PAPA GƆD we pɔsin kin put in op ɛn trɔs pan. A de sho lɔv to tawzin pan tawzin pipul dɛn ɛn de fɔgiv udat du bad, udat brok lɔ ɛn udat kɔmit sin; bɔt a nɔ de fɔgɛt fɔ pɔnish dɛn wan we de du bad.” (Ɛks. 33:​19; 34:​6, 7) Dis sho klia wan se Jiova gud pan ɔl wetin i de du. Pan ɔl we Jizɔs bin gud lɛk aw mɔtalman fɔ bi, i bin tɔk se: “Nɔbɔdi nɔ de we gud, na Gɔd in wangren gud.”—Lyuk 18:​19.

Wi de si se Jiova gud frɔm di tin dɛn we i mek

 Jiova in wok dɛn gud. Ɔl di tin dɛn we Jiova de du de sho se i gud. Di Baybul se: “PAPA GƆD [“Jiova,” NW] gud to ɔlman; I gɛt sɔri-at fɔ ɔl udat i mek.” (Sam 145:​9) Jiova nɔ de pik-ɛn-chuz udat i de du gud to, na dat mek i gi layf to ɔl mɔtalman ɛn wetin dɛn go nid fɔ kɔntinyu fɔ de alayf. (Akt 14:​17) Jiova de sho bak se i gud bay we i de fɔgiv wi. Wan pan di man dɛn we bin rayt di Sam buk bin tɔk se: “Yu na gud PAPA GƆD [“Jiova,” NW] ɛn yu de fɔgiv.” (Sam 86:​5) Wi fɔ biliv tranga wan se Jiova “nɔ go se i nɔ de gi wi gud tin dɛn wans i nɔ fɛn fɔlt pan wetin wi de du.”—Sam 84:​11.

“LAN FƆ DU GUD”

Jiova mek wi lɛk aw i tan, so wi ebul fɔ bi gud pipul dɛn ɛn fɔ du gud tin dɛn. (Jɛn. 1:​27) Bɔt dis nɔ kin apin wantɛm wantɛm. Na dat mek Jiova de tɛl wi fɔ “lan fɔ du gud.” (Ayz. 1:​17) Bɔt aw wi go lan fɔ du gud? Lɛ wi tɔk bɔt tri we dɛn aw wi go du dis.

Fɔs, wi fɔ pre fɔ oli spirit, we go ɛp Kristian dɛn fɔ bi gud pɔsin na Gɔd in yay. (Gal. 5:​22, NW) Fɔ tru, Gɔd in spirit go ɛp wi fɔ lan fɔ lɛk wetin gud ɛn et wetin bad. (Rom 12:​9) Di Baybul tɔk se Jiova go mek wi “du ɛn tɔk ɔl wetin gud.”—2 Tɛs. 2:​16, 17.

Sɛkɔn, wi fɔ rid Gɔd in Wɔd. We wi de rid di Baybul, Jiova de tich wi “wetin gud” ɛn pripia wi “fɔ du ɔl kayn gud wok.” (Prɔv. 2:​9; 2 Tim. 3:​17) We wi rid di Baybul ɛn tink gud gud wan bɔt wetin wi de rid, wi de fulɔp wi at wit gud tin dɛn bɔt Gɔd ɛn wetin i want. Wi at tan lɛk bɔks usay wi de put valyu tin dɛn. We wi de rid di Baybul ɛn tink gud gud wan bɔt wetin wi de rid, wi de put gud tin dɛn insay wi at, we tan lɛk se wi de fulɔp wi bɔks usay wi de put valyu tin dɛn we go ɛp wi tumara bambay.—Lyuk 6:​45; Ɛfi. 5:​9.

Tɔd, wi fɔ tray wi bɛst fɔ de falamakata wetin “gud.” (3 Jɔn 11) Insay di Baybul, wi go fɛn ɛgzampul dɛn we wi go falamakata. Fɔ tru, di bɛst ɛgzampul dɛn na Jiova ɛn Jizɔs. Bɔt wi go tink bak bɔt ɔda pipul dɛn we wi no se dɛn gud. Di tu pipul dɛn we wi go tink bɔt na Tabita ɛn Banabas. (Akt 9:​36; 11:​22-24) Yu kin bɛnifit frɔm dɛn fayn ɛgzampul if yu stɔdi wetin di Baybul tɔk bɔt dɛn. We yu de stɔdi, tray fɔ si wetin dɛn bin du fɔ ɛp ɔda pipul dɛn. Tink bɔt wetin yu go du fɔ ɛp ɔda pipul dɛn na yu famili ɔ na di kɔngrigeshɔn. Dɔn bak, tray fɔ tink bɔt di gud tin dɛn we bin apin to Tabita ɛn Banabas fɔ we dɛn bin du gud to ɔda pipul dɛn. Yusɛf kin bɛnifit da kayn we de.

 Wi kin tink bak bɔt pipul dɛn tide we de du wetin gud. Fɔ ɛgzampul, tink bɔt di ɛlda dɛn we de wok tranga wan na di kɔngrigeshɔn ɛn we ‘lɛk fɔ du wetin gud.’ Tink bak bɔt di fetful sista dɛn we de sɛt fayn ɛgzampul bay wetin dɛn de tɔk ɛn du “fɔ de lan pipul dɛn tin we gud.” (Taytɔs 1:​8; 2:​3) Wan sista we nem Roslin bin tɔk se: “Mi padi kin tray tranga wan fɔ ɛp ɛn ɛnkɔrej ɔda pipul dɛn na di kɔngrigeshɔn. I kin tink bɔt wetin de apin to dɛn ɛn bɔku tɛm, i kin gi dɛn smɔl smɔl gift dɛn fɔ sho se i de tink bɔt dɛn. A kin tink bɔt am as pɔsin we rili gud.”

Jiova de ɛnkɔrej in pipul dɛn fɔ du wetin “gud.” (Emɔs 5:​14) If wi du dat, dat go ɛp wi fɔ lɛk wetin Jiova se i gud, ɛn i go ɛp wi bak fɔ rili want fɔ du wetin gud.

Wi de tray fɔ bi gud pipul dɛn ɛn fɔ du gud tin dɛn

Fɔ bi gud pɔsin, dat nɔ min se wi fɔ gi tin to ɔda pipul dɛn we go mek ɔlman kɔle ɔ gi dɛn dia dia gift dɛn. Fɔ ɛgzampul, yu tink se pɔsin we de plant go jɔs wata in plant wangren tɛm wit bɔku bɔku wata? Nɔ, i nɔ go du dat, bifo dat, fɔ mek di plant gro fayn, i go nid fɔ de wata am bɔku bɔku tɛm wit smɔl wata. Semweso, if wi de du bɔku smɔl smɔl tin dɛn fɔ ɛp ɔda pipul dɛn, dis go sho se wi na gud pɔsin.

Di Baybul tɛl wi se wi fɔ pripia ɛn “rɛdi” fɔ du gud. (2 Tim. 2:​21; Tay. 3:​1) If wi de pe atɛnshɔn to wetin de apin to ɔda pipul dɛn, wi go ebul fɛn we fɔ “du wetin gud” fɔ ɛp sɔmbɔdi, so dat i go “biliv pan Krays gud.” (Rom 15:​2) Dat min se wi nid fɔ gi ɔda pipul dɛn wetin wi gɛt. (Prɔv. 3:​27) Fɔ ɛgzampul, wi kin invayt pɔsin na wi os fɔ smɔl it ɔ fɔ ɛnkɔrej am. If wi no se pɔsin sik, wi kin sɛn kad fɔ am, go fɛn am, ɔ kɔl am na in fon. Fɔ tru, wi kin fɛn bɔku we dɛn fɔ tɔk “wɔd we go ɛp ɔda pipul,” so dat wetin wi de tɔk go “du gud fɔ di pipul dɛn we de yɛri am.”—Ɛfi. 4:​29.

Jɔs lɛk Jiova, wi de fɛn we fɔ du gud to ɔlman. Wi de tray fɔ trit ɔlman di sem we. Wan pan di bɛst we we wi go du dis na fɔ prich di gud nyuz bɔt di Kiŋdɔm to ɔlman. Jɔs lɛk aw Jizɔs bin tɔk, wi de fɛn we fɔ du gud ivin to di wan dɛn we et wi. (Lyuk 6:​27) I nɔ bad fɔ du gud to ɔda pipul dɛn, bikɔs “no lɔ nɔ de we de agens dɛn tin ya.” (Gal. 5:​22, 23, NW) We wi du gud ilɛksɛf dɛn de trit wi bad ɔ mek wi sɔfa, dat go mek wi ɛp ɔda pipul dɛn fɔ lan di trut ɛn gi glori to Gɔd.—1 Pit. 3:​16, 17.

WI GO BƐNIFIT WE WI DU GUD

Di Baybul tɔk se gud pɔsin “go gɛt in yon pe.” (Prɔv. 14:​14) Wetin na sɔm pan di bɛnifit dɛn? We wi de du gud to ɔda pipul dɛn, dɛn go du gud to wi bak ɛn trit wi fayn. (Prɔv. 14:​22) Ivin if ɔda pipul dɛn nɔ de trit wi fayn, wi fɔ kɔntinyu fɔ du gud tin to dɛn. As tɛm de go, dat go mek dɛn chenj di we aw dɛn de biev ɛn trit wi fayn.—Rom 12:​20.

We wi de du gud ɛn stɔp fɔ de du wetin bad, wi de bɛnifit wisɛf bak. Bɔku brɔda ɛn sista dɛn se dis dɔn apin to dɛn. Lɛ wi tɔk bɔt Nansi in ɛkspiriɛns. Nansi tɔk se: “We a bin de gro ɔp, a bin wayl, a bin de du mami ɛn dadi biznɛs di we aw Gɔd nɔ want, ɛn a nɔ bin gɛt wan rɛspɛkt fɔ ɔda pipul dɛn. Bɔt as a de lan wetin Jiova se gud ɛn obe am, a bigin fɔ gɛt gladi-at. Naw a gɛt rɛspɛkt.”

Di men rizin we fɔ mek wi tray fɔ bi gud pɔsin na bikɔs we wi de du am, wi de mek Jiova gladi. Ilɛksɛf bɔku pipul dɛn nɔ de si wetin wi de du, Jiova in de si. I kin no ɛnitɛm we wi du gud tin dɛn ɛn we wi tink bɔt gud tin dɛn. (Ɛfi. 6:​7, 8) Aw Jiova de blɛs wi? Di Baybul se: “PAPA GƆD [“Jiova,” NW] de blɛs dɛn wan we gud.” (Prɔv. 12:​2) So lɛ wi kɔntinyu fɔ du wetin gud. Jiova prɔmis wi se ɛnibɔdi we de du wetin gud go gɛt “prez, ɔna, ɛn kol at.”—Rom 2:​10.

^ par. 2 Dɛn dɔn chenj sɔm nem dɛn na dis atikul.