Go dayrɛkt to di men tin

Go dayrɛkt to di say we di difrɛn difrɛn atikul dɛn de

Aw Wi Go Protɛkt Wisɛf Frɔm Wan pan Setan in Trap Dɛn?

Aw Wi Go Protɛkt Wisɛf Frɔm Wan pan Setan in Trap Dɛn?

WE DI Izrɛlayt dɛn trade bin de tray fɔ krɔs di Jɔdan Riva fɔ go na di land we Gɔd bin dɔn prɔmis dɛn, sɔm pipul dɛn bin kam fɛn dɛn. Di wan dɛn we kam fɛn dɛn na bin uman dɛn we nɔto Izrɛlayt dɛn, ɛn dɛn invayt di man dɛn fɔ go wan pati. I bin tan lɛk se na wɔndaful ɛn spɛshal chans dɛn bin gɛt. Dɛn go ebul fɔ mek nyu padi dɛn, dans, ɛn fɔ it gud it ɛn dis na tin we go rili fayn. Pan ɔl we di uman dɛn kɔstɔm dɛn ɛn di we aw dɛn de liv dɛn layf difrɛn frɔm wetin Gɔd bin tɛl di Izrɛlayt dɛn, sɔm pan di Izrɛlayt man dɛn go dɔn tink se: ‘Wi nɔ go alaw wetin dɛn de du fɔ afɛkt wi. Wi go tek tɛm.’

 Wetin bin apin? Di Baybul tɛl wi se: “Di tɛm we di Izrɛlayt dɛn bin tap na di Akeshia vali di man dɛn bin bigin gɛt biznɛs [“mami ɛn dadi biznɛs,” NW] wit di Moabayt uman dɛn.” Fɔ tru, di uman dɛn bin want di Izrɛlayt man dɛn fɔ wɔship lay lay gɔd dɛn. Ɛn dɛn bin du am! Na dat mek “PAPA GƆD [“Jiova,” NW] vɛks bad bad wan pan dɛn.”—Nɔm. 25:​1-3.

Tu we dɛn de we di Izrɛlayt dɛn pwɛl Gɔd in Lɔ: Dɛn butu to lay lay gɔd dɛn, ɛn dɛn du mami ɛn dadi biznɛs di we aw Gɔd nɔ want. Bɔku bɔku pipul dɛn bin day bikɔs dɛn nɔ obe Gɔd. (Ɛks. 20:​4, 5, 14; Dit. 13:​6-9) Wetin mek di tin we dɛn bin du bin rili sɔri? Na di tɛm we i apin. If dɛn man dɛn ya nɔ bin fɔ dɔn pwɛl Gɔd in Lɔ, i nɔ bin fɔ te, dɛn bɔku bɔku Izrɛlayt dɛn fɔ dɔn krɔs di Jɔdan Riva fɔ go na di land we Gɔd bin prɔmis dɛn.—Nɔm. 25:​5, 9.

Pɔl bin tɔk bɔt dɛn tin dɛn we bin apin, i bin tɔk se: “Dɛn tin ya apin to dɛn as ɛgzampul fɔ wi, ɛn dɛn rayt dɛn fɔ wɔn wi we de liv naw we di tɛm de dɔn.” (1 Kɔr. 10:​7-11, NW) Wi no se Setan bin rili gladi we sɔm pan di Izrɛlayt dɛn bin sin siriɔs wan agens Jiova, ɛn dat bin mek dɛn nɔ bin go na di land we Gɔd bin prɔmis dɛn. I mek sɛns fɔ lɛ wi lan frɔm dɛn mistek bikɔs wi no se Setan go rili gladi if wi nɔ go insay Gɔd in nyu wɔl!

WAN BAD BAD TRAP

Setan want fɔ du bad tin to Kristian dɛn tide, ɛn fɔ du dis i de yuz kɔni kɔni we dɛn we i bin dɔn de yuz we dɔn wok fayn. Jɔs lɛk aw wi dɔn lan bɔt wetin Setan du wit di Izrɛlayt dɛn, i de yuz mami ɛn dadi biznɛs di we aw Gɔd nɔ want. Insay wi yon tɛm, mami ɛn dadi biznɛs di we aw Gɔd nɔ want stil na bad bad trap. Wan pawaful trap we i kin yuz na fɔ lɛ wi luk dɛn rud rud pikchɔ ɔ fim dɛn.

Tide, pɔsin kin wach rud rud pikchɔ ɔ fim dɛn we ɔda pɔsin nɔ go no se i dɔn de wach dɛn. Trade, if pɔsin want fɔ luk rud rud tin dɛn, i go nid fɔ go na say usay dɛn de ple dɛn rud fim dɛn ɔ go bay dɛn rud rud buk dɛn. Sɔntɛm bɔku pipul dɛn nɔ kin go na dɛn say dɛn de bikɔs dɛn de shem se ɔda pipul dɛn go si dɛn. Bɔt naw, pipul dɛn kin ebul go na di Intanɛt ɛn luk dɛn rud rud pikchɔ ɔ fim dɛn na dɛn wokples ɔ ivin if dɛn de insay dɛn motoka. Insay bɔku kɔntri dɛn, man ɔ uman go wach rud rud pikchɔ ɔ fim dɛn ivin na in os.

Nɔto dande nɔmɔ, fon ɔ tablɛt dɛn sɛf kin mek am izi fɔ wach dɛn rud rud pikchɔ ɔ fim dɛn. As pipul dɛn de waka na strit ɔ dɛn de insay bɔs ɔ motoka, dɛn kin wach dɛn rud rud pikchɔ ɔ fim dɛn na dɛn fon ɔ tablɛt.

Bikɔs i izi fɔ wach dɛn rud rud pikchɔ ɔ fim dɛn ɛn fɔ ayd we pɔsin de wach dɛn, dat dɔn ambɔg bɔku bɔku pipul dɛn tide pas aw i bin de ambɔg dɛn trade. Bɔku pipul dɛn we de wach rud rud pikchɔ ɔ fim dɛn kin pwɛl dɛn mared-os, dɛn dɔn lɔs dɛn rɛspɛkt, ɛn dɛn nɔ gɛt klin kɔnshɛns. Wetin bad pas ɔl, dɛn de pwɛl dɛn padi biznɛs wit Gɔd. Wi shɔ se rud rud pikchɔ ɔ fim dɛn de ambɔg dɛn wan dɛn we de wach am. Bɔku tɛm, i kin rili briŋ pen insay pɔsin in at. Dɛn pen dɛn de go mɛn smɔl smɔl, bɔt yu go stil de mɛmba di tin we yu dɔn wach ɛn sɔntɛnde yu nɔ go ebul pul dɛn bad bad tin dɛn de we yu dɔn wach na yu maynd.

Wi fɔ no se Jiova de protɛkt wi frɔm dɛn trap dɛn we Setan de sɛt. If wi want fɔ lɛ Jiova protɛkt wi, wi fɔ du wetin di Izrɛlayt man dɛn nɔ bin gri fɔ du, dat na fɔ “obe” Jiova. (Ɛks. 19:​5) Wi nid fɔ no se Gɔd rili et we pɔsin de wach rud rud pikchɔ ɔ fim dɛn. Wetin mek wi se so?

ET AM LƐK AW JIOVA ET AM

Tink bɔt dis: Di lɔ dɛn we Gɔd bin gi di Izrɛlayt dɛn bin difrɛn frɔm di lɔ dɛn we ɔda neshɔn dɛn bin gɛt da tɛm de. Di lɔ dɛn we Gɔd bin gi di Izrɛlayt dɛn, bin tan lɛk wɔl we de protɛkt dɛn frɔm di bad bad tin dɛn we di ɔda neshɔn dɛn bin de du. (Dit. 4:​6-8) Dɛn lɔ dɛn de bin mek am klia se: Jiova  et we pɔsin de du mami ɛn dadi biznɛs di we aw I nɔ want.

Jiova bin tɛl di Izrɛlayt dɛn bɔt dɛn tin dɛn we dɛn ɔda neshɔn dɛn bin de du we i kam to mami ɛn dadi biznɛs di we aw i nɔ want. I bin se: “Nɔto di sem tin dɛn fɔ du ɛn dɛn nɔ fɔ ivin fala fɔ du wetin di Kenanayt, usay dɛn de go, de du. . . . Di land insɛf nɔ klin na PAPA GƆD yay, we go mek PAPA GƆD pɔnish di land fɔseka di bad tin dɛn we dɛn du.” To di Izrɛlayt dɛn oli Gɔd, di we aw di Kenanayt dɛn bin de liv bin rili bad ɛn dɛn bin de du mami ɛn dadi biznɛs di we aw Gɔd nɔ want we mek usay dɛn bin de liv nɔ klin na in yay.—Lɛv. 18:​3, 25.

Pan ɔl we Jiova bin pɔnish di Kenanayt dɛn, ɔda pipul dɛn kɔntinyu fɔ du mami ɛn dadi di we aw Gɔd nɔ want. Afta 1,500 ia pas, Pɔl bin tɔk se di pipul dɛn we bin de na di neshɔn dɛn usay di Kristian dɛn bin de nɔ bin “de fil bad igen we dɛn du bad tin.” Infakt, “dɛn jɔs de du dɛn tin we de sho se dɛn nɔ gɛt wan shem ɛn rɛspɛkt, dɛn jɔs de du dɛn dɔti dɔti tin dɛn ɛn dɛn want fɔ du am mɔ ɛn mɔ.” (Ɛfi. 4:​17-19, NW) Tide bak, bɔku pipul dɛn nɔ gɛt wan shem we i kam pan mami ɛn dadi biznɛs di we aw Gɔd nɔ want, ɛn dɛn prawd bɔt am. I bɛtɛ fɔ mek Gɔd in savant dɛn avɔyd fɔ de wach tin dɛn we gɛt fɔ du wit mami ɛn dadi biznɛs di we aw Gɔd nɔ want na dis wɔl.

Fɔ wach rud rud pikchɔ ɔ fim dɛn de rili sho se pɔsin nɔ gɛt wan rɛspɛkt fɔ Gɔd. Gɔd mek mɔtalman lɛk aw i tan ɛn i gi wi di sɛns fɔ no wetin rayt ɛn wetin rɔŋ. Gɔd bin gɛt gud rizin we mek i put lɔ dɛn bɔt mami ɛn dadi biznɛs we sho se i gɛt sɛns. I mek mami ɛn dadi biznɛs fɔ mek mared pipul dɛn ɛnjɔy am. (Jɛn. 1:​26-28; Prɔv. 5:​18, 19) Bɔt wetin wi go se bɔt di wan dɛn we de mek ɔ sɛl dɛn rud rud pikchɔ ɔ fim dɛn ya? Dɛn rili nɔ de rɛspɛkt Gɔd in lɔ dɛn bɔt mami ɛn dadi biznɛs. Fɔ tru, pipul dɛn we de mek dɛn rud rud pikchɔ ɔ fim dɛn nɔ gɛt wan rɛspɛkt fɔ Jiova. Gɔd go jɔj di wan dɛn we no bɔt in lɔ dɛn bɔt stil de mek ɔ sɛl dɛn rud rud tin dɛn de.—Rom 1:​24-27.

Bɔt wetin wi go se fɔ dɛn pipul dɛn we de rid dɛn rud rud buk dɛn ɔ wach dɛn rud rud pikchɔ ɔ fim dɛn bay wilful? Sɔm pipul dɛn  fil se da kayn ɛnjɔymɛnt de nɔ bad. Bɔt dɛn rili de sɔpɔt di wan dɛn we de pwɛl Gɔd in lɔ dɛn. I go bi se dɛn nɔ bin min fɔ wach rud rud pikchɔ ɔ fim dɛn. Bɔt stil di Baybul mek am klia se dɛn wan dɛn we de wɔship Gɔd fɔ et fɔ wach rud rud pikchɔ ɔ fim dɛn. I se: “Lɛ ɔl udat se i lɛk PAPA GƆD [“Jiova,” NW] et bad.”—Sam 97:​10.

Ivin di wan dɛn we want fɔ avɔyd fɔ luk rud rud pikchɔ ɔ fim dɛn kin si am se i nɔ izi fɔ dɛn fɔ du so. Wi nɔ pafɛkt, ɛn so wi go nid fɔ tray tranga wan fɔ lɛf fɔ fil fɔ du mami ɛn dadi biznɛs di we aw Gɔd nɔ want. (Jɛr. 17:​9) Bɔt bɔku pipul dɛn we dɔn kam fɔ bi Kristian dɔn win dis wɔ ya. We yu dɔn no dis, dat go mek yu gɛt mɔ kɔnfidɛns se yusɛf go ebul avɔyd fɔ wach rud rud pikchɔ ɔ fim dɛn. Notis aw Gɔd in Wɔd go ɛp yu fɔ avɔyd Setan in trap dɛn we i kam pan rud rud pikchɔ ɔ fim dɛn.

NƆ DE TINK FƆ DU MAMI ƐN DADI BIZNƐS DI WE AW GƆD NƆ WANT

As wi bin tɔk fɔs, bɔku pan di Izrɛlayt dɛn bin alaw dɛnsɛf fɔ fil fɔ de du bad tin te dɛn du sɔntin we bin mek bad tin apin. Di sem tin go apin tide. Jizɔs in brɔda Jems bin ɛksplen di denja we i se: “Na di bad we de na pɔsin in at de mek pɔsin want fɔ du bad. Na di bad we de na pɔsin at de mek di pɔsin want sin.” (Jems 1:​14, 15) If pɔsin alaw insɛf fɔ de fil fɔ du mami ɛn dadi biznɛs di we aw Gɔd nɔ want, sɔntɛm as tɛm de go da pɔsin de go sin. So wi nid fɔ fos wisɛf fɔ mek wi nɔ de tink bɔt tin dɛn we gɛt fɔ du wit mami ɛn dadi biznɛs.

If yu notis se yu dɔn de tink bɔt tin dɛn we gɛt fɔ du wit mami ɛn dadi biznɛs di we aw Gɔd nɔ want, i go fayn fɔ du sɔntin bɔt dat wantɛm wantɛm. Jizɔs bin se: “If yu an ɔ fut mek yu sin, kɔt am kɔmɔt ɛn trowe am. . . . Ɛn if yu yay mek yu sin, pul am kɔmɔt ɛn trowe am.” (Mat. 18:​8, 9, NW) Jizɔs nɔ bin de se wi fɔ pwɛl pwɛl wi bɔdi. I bin de yuz ɛgzampul fɔ ɛp wi fɔ ɔndastand se wi nid fɔ no wetin de mek wi de tink bɔt bad tin dɛn ɛn tray fɔ chenj di we aw wi de tink. Wetin wi go du bɔt da advays de we i kam to fɔ wach rud rud pikchɔ ɔ fim dɛn?

If yu mistek si rud rud pikchɔ ɔ fim, nɔ tink se, ‘A sabi wetin fɔ du.’ Luk ɔda say wantɛm wantɛm. Ɔt di tɛlivishɔn wantɛm  wantɛm. Ɔt di kɔmpyuta, di fon, ɔ di tablɛt wantɛm wantɛm. Tray fɔ tink bak bɔt tin dɛn we klin. We yu du dis, i go ɛp yu fɔ kɔntrol di we aw yu de tink bifo yu alaw di bad we aw yu de fil fɔ kɔntrol yu.

WETIN WI GO DU IF WI KƆNTINYU FƆ DE TINK BƆT RUD RUD PIKCHƆ Ɔ FIM DƐN WE WI BIN DƆN WACH?

Wetin go apin if yu bin dɔn lɛf fɔ wach rud rud pikchɔ ɔ fim dɛn, bɔt sɔntɛnde yu stil de mɛmba wetin yu bin dɔn wach? Pɔsin kin mɛmba dɛn rud rud pikchɔ ɔ fim dɛn we i bin dɔn wach, ɔ de tink bɔt dɛn fɔ lɔng tɛm. Dis kin apin ɛnitɛm. If dat apin, sɔntɛm yu go fil fɔ du sɔntin we nɔ fayn, lɛk fɔ ple ple wit yusɛf. So no se i izi fɔ mek yu jɔs tink bɔt dat, bɔt na fɔ pripia fɔ fɛt agens dɛn.

Yu rili nid fɔ mekɔp yu maynd fɔ tink ɛn du tin jɔs di we aw Gɔd want yu fɔ du. Falamakata di apɔsul Pɔl we bin gri fɔ “sɔfa [in] bɔdi ɛn trit am lɛk slev.” (1 Kɔr. 9:​27, NW) Nɔ alaw di bad we aw yu de fil fɔ kɔntrol yu. ‘Yu fɔ chenj bay we yu chenj di we aw yu de tink, so dat yu go pruv to yusɛf wetin gud, wetin Gɔd de tek, ɛn di pafɛkt tin we Gɔd want.’ (Rom 12:​2, NW) Mɛmba se yu nɔ go gladi if yu du tin dɛn we gɛt fɔ du wit mami ɛn dadi biznɛs di we aw Gɔd nɔ want, bɔt yu go gladi if yu tink ɛn du tin dɛn di we aw Gɔd want.

Fɔ tink bɔt wetin Gɔd want ɛn fɔ du am go mek yu rili gladi pas fɔ du di bad tin dɛn we yu bɔdi want yu fɔ du

Tray fɔ kram sɔm Baybul vas dɛn. Dɔn we yu want fɔ tink bɔt bad tin, fos yusɛf fɔ tink bɔt dɛn skripchɔ dɛn de. Sɔm Skripchɔ dɛn we go ɛp yu fɔ si tin jɔs lɛk aw Jiova de si tin we i kam to fɔ wach rud rud pikchɔ ɔ fim dɛn, ɛn we go ɛp yu fɔ ɔndastand wetin Jiova want yu fɔ du na: Sam 119:​37; Ayzaya 52:​11; Matyu 5:​28; Lɛta fɔ Ɛfisɔs 5:​3, (NW); Lɛta Fɔ Kɔlɔse 3:​5; ɛn Fɔs Lɛta Fɔ Tɛsalonayka 4:​4-8.

Wetin yu fɔ du if yu fil se yu nɔ go ebul fɔ lɛf fɔ luk ɔ tink bɔt mami ɛn dadi biznɛs di we aw Gɔd nɔ want? Tek tɛm falamakata Jizɔs we bin sɛt fayn ɛgzampul fɔ wi. (1 Pit. 2:​21, NW) Afta we Jizɔs bin baptayz, Setan bin kɔntinyu fɔ tɛmt am. Wetin Jizɔs bin du? I nɔ bin alaw am. Jizɔs bin kot difrɛn skripchɔ dɛn fɔ stɔp Setan we i bin de tɛmt am. I bin se: “Kɔmɔt na ya Setan!” ɛn Setan lɛf am. Jɔs lɛk aw Jizɔs nɔ bin ɛva alaw Setan, na so wisɛf nɔ fɔ alaw am. (Mat. 4:​1-11, NW) Setan ɛn in wɔl go tray fɔ mek yu go de tink bɔt tin dɛn we gɛt fɔ du wit mami ɛn dadi biznɛs di we aw Gɔd nɔ want, bɔt nɔ giv-ɔp fɔ tray fɔ du wetin Gɔd want. Yu go ebul win di wɔ agens rud rud pikchɔ ɔ fim dɛn. Jiova go ɛp yu fɔ win dis ɛnimi.

PRE TO JIOVA, ƐN OBE AM

Kɔntinyu fɔ pre to Jiova ɛn aks am fɔ ɛp yu. Pɔl bin tɔk se: “Una de pre ɛn rili beg am ɛn tɛl am tɛnki, ɛn di pis we Gɔd de gi we mɔtalman nɔ ebul ɔndastand go gayd una at ɛn maynd tru Krays Jizɔs.” (Fil. 4:​6, 7, NW) Gɔd go gi yu pis we go ɛp yu fɔ mek yu nɔ du wetin bad. If yu kam nia Jiova, ‘i go kam nia yu.’—Jems 4:​8.

If wi gɛt tayt padi biznɛs wit di Wan we gɛt pawa pas ɔl na di wan ol wɔl, I go protɛkt wi frɔm Setan in trap dɛn. Jizɔs bin se: “Setan we de rul dis wɔl de kam, bɔt i nɔ gɛt pawa oba mi.” (Jɔn 14:​30) Wetin mek Jizɔs bin shɔ bɔt dis? I ɛksplen se: “Di wan we sɛn mi de wit mi, i nɔ lɛf mi to misɛf bikɔs ɔltɛm a de du dɛn tin we i lɛk.” (Jɔn 8:​29) If yu tray fɔ mek Jiova gladi pan ɛnitin we yu de du, yu go biliv tranga wan se Jiova nɔ go ɛva lɛf yu. Avɔyd di trap fɔ wach rud rud pikchɔ ɔ fim dɛn, ɛn Setan nɔ go ebul fɔ kech yu na in trap.