Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 26

Ɛp Ɔda Pipul dɛn fɔ Bia We Dɛn Gɛt Strɛs

Ɛp Ɔda Pipul dɛn fɔ Bia We Dɛn Gɛt Strɛs

“Una ɔl gɛt wanwɔd, ɛn wan at; una fɔ lɛk unasɛf lɛkɛ brɔda ɛn sista, una fɔ gɛt sɔri at fɔ una kɔmpin ɛn una nɔ fɔ de mek prawd pan una kɔmpin.”—1 PIT. 3:​8.

SIŊ 107 Di We Aw Gɔd Want Wi fɔ Sho Lɔv

WETIN WI GO LAN? *

1. Aw wi go falamakata wi Papa, Jiova?

JIOVA rili lɛk wi. (Jɔn 3:​16) Wi want fɔ falamakata wi Papa we lɛk wi. So wi de tray fɔ ‘lɛk wisɛf lɛkɛ brɔda ɛn sista, [ɛn] fɔ gɛt sɔri at’ fɔ ɔlman bɔt mɔ fɔ “wi kɔmpin Kristiɛn.” (1 Pit. 3:​8; Gal. 6:​10) We wi brɔda ɔ sista dɛn insay di kɔngrigeshɔn gɛt siriɔs prɔblɛm we de mɔna dɛn, wi want fɔ du ɔl wetin wi ebul fɔ ɛp dɛn.

2. Wetin wi go tɔk bɔt insay dis atikul?

2 Ɔl di wan dɛn we want fɔ de na Jiova in famili go gɛt prɔblɛm dɛn we go mɔna dɛn. (Mak 10:​29, 30) Wi go gɛt fɔ bia wit bɔku prɔblɛm dɛn as wi de nia di tɛm fɔ lɛ dis wɔl dɔn. Aw wi go ɛp wisɛf we wi gɛt prɔblɛm dɛn? Lɛ wi tɔk bɔt wetin wi go lan frɔm Lɔt, Job, ɛn Naomi dɛn ɛgzampul. Wi go tɔk bak bɔt sɔm prɔblɛm dɛn we wi brɔda ɛn sista dɛn de gɛt tide, ɛn wi go si aw wi go ɛp dɛn fɔ bia wit dɛn prɔblɛm dɛn de.

NA FƆ PESHƐNT

3. Frɔm wetin de na Pita In Sɛkɛn Lɛta 2:​7, 8, us bad tin Lɔt bin disayd fɔ du? Wetin bin apin?

3 Lɔt bin disayd fɔ du di rɔŋ tin bay we i bin go de na Sɔdɔm wit pipul dɛn we bin de du mami ɛn dadi biznɛs di we aw Gɔd nɔ want. (Rid Pita In Sɛkɛn Lɛta 2:​7, 8.) Di ples bin rili fayn, bɔt Lɔt bin gɛt bɔku prɔblɛm dɛn bikɔs i bin disayd fɔ go de de. (Jɛn. 13:​8-13; 14:​12) Sɔntɛm Lɔt in wɛf bin dɔn rili lɛk di siti ɔ sɔm pan di pipul dɛn we bin de de, ɛn dat bin mek i nɔ obe Jiova.  Lɔt in wɛf bin day di tɛm we Gɔd bin mek faya ɛn sɔlfɔ kɔmɔt na ɛvin lɛk ren ɛn kil ɔl di pipul dɛn na Sɔdɔm. Dɔn tink bɔt Lɔt in tu galpikin dɛn. Tu man dɛn bin dɔn ɛngej dɛn, ɛn dɛn man dɛn de bin day na Sɔdɔm. Lɔt bin lɔs in os, in prɔpati dɛn, ɛn di tin we bin sɔri pas ɔl, na we i lɔs in wɛf. (Jɛn. 19:​12-14, 17, 26) Insay dis tɛm we tin nɔ bin rili izi fɔ Lɔt, yu tink se Jiova bin stɔp fɔ peshɛnt wit am? Nɔ, i nɔ bin du dat.

Jiova sho sɔri-at bay we i sɛn enjɛl dɛn fɔ go sev Lɔt ɛn in famili (Luk na paregraf 4)

4. Aw Jiova bin peshɛnt wit Lɔt? (Luk di pikchɔ na di frɔnt pej.)

4 Pan ɔl we Lɔt bin disayd fɔ de na Sɔdɔm, Jiova bin sho se i sɔri fɔ am bay we i sɛn in enjɛl dɛn fɔ sev in ɛn in famili. Bɔt bifo Lɔt obe we di enjɛl dɛn bin de tɛl am fɔ lɛf Sɔdɔm wantɛm wantɛm, i “bigin drɛg fut.” Di enjɛl dɛn bin ol Lɔt in an ɛn ɛp in ɛn in famili fɔ rɔnawe kɔmɔt na di siti. (Jɛn. 19:​15, 16) Di enjɛl dɛn bin tɛl am fɔ rɔnawe go ɔp di mawnten. Bɔt bifo Lɔt obe Jiova, i bin aks am fɔ mek i alaw am fɔ go na di tɔŋ we de nia. (Jɛn. 19:​17-20) Jiova bin peshɛnt wit Lɔt ɛn lisin to am, dɔn I bin alaw am fɔ go na di tɔŋ. Leta, Lɔt bin fred fɔ de na di tɔŋ so i bin muf go ɔp na di mawnten we Jiova bin dɔn tɛl am fɔ go. (Jɛn. 19:​30) Dis na wɔndaful we aw Jiova bin sho se i peshɛnt! Aw wi go falamakata am?

5-6. Aw wi go du wetin de na Fɔs Lɛta fɔ Tɛsalonayka 5:​14 (NW) we wi de falamakata Gɔd?

5 Jɔs lɛk Lɔt, sɔmbɔdi insay wi kɔngrigeshɔn go disayd fɔ du di rɔŋ tin ɛn dat go mek i gɛt siriɔs prɔblɛm dɛn. If dat apin, wetin wi go du? Wi go want fɔ tɛl am se na wetin i plant na in i de avɛst, ɛn sɔntɛm na tru. (Gal. 6:​7) Bɔt wi kin du fayn tin pas dat if wi du ɔl wetin wi ebul fɔ ɛp di pɔsin jɔs lɛk aw Jiova bin ɛp Lɔt. Aw wi go du dat?

6 Jiova nɔ bin jɔs sɛn di enjɛl dɛn fɔ go wɔn Lɔt, bɔt na fɔ lɛ dɛn ɛp am bak fɔ rɔnawe kɔmɔt na Sɔdɔm so dat i go sev. Jɔs lɛk Jiova, wisɛf nid fɔ wɔn wi brɔda if wi si am de du sɔntin we go mek i gɛt prɔblɛm. Bɔt wi fɔ rɛdi bak fɔ ɛp am. Ivin if i nɔ de fala di advays dɛn we i de gɛt frɔm di Baybul wantɛm wantɛm, wi nid fɔ peshɛnt wit am. Na fɔ tan lɛk di tu enjɛl dɛn. Wi fɔ kɔntinyu fɔ ɛp wi brɔda ɛn nɔ lɛf am. Wi go ɛp am bay di tin dɛn we wi de du nɔto jɔs bay wetin wi de tɔk. (1 Jɔn 3:​18) Wi go nid fɔ ol in an, we min se wi go nid fɔ ɛp am fɔ fala di gud advays we i de gɛt frɔm di Baybul.—Rid Fɔs Lɛta fɔ Tɛsalonayka 5:​14, NW.

7. Aw wi go falamakata di we aw Jiova bin fil bɔt Lɔt?

7 Jiova bin fɔ dɔn pe atɛnshɔn pan Lɔt in mistek dɛn, bɔt i nɔ bin du dat. Bifo dat, I bin tɛl apɔsul Pita fɔ rayt bɔt Lɔt se in na bin man we bin de du wetin rayt na Gɔd in yay. Wi gladi we Jiova de fɔgiv wi fɔ di mistek dɛn we wi de mek! (Sam 130:​3) Yu tink se wi go ebul falamakata di kayn we aw Jiova bin fil bɔt Lɔt? Yɛs, wi go ebul. If wi pe atɛnshɔn pan di gud kwaliti dɛn we wi brɔda ɛn sista dɛn gɛt, dat go ɛp wi fɔ peshɛnt wit dɛn mɔ ɛn mɔ. Ɛn dat go mek i izi fɔ lɛ dɛn gri fɔ lɛ wi ɛp dɛn.

SHO SƆRI-AT

8. Wetin sɔri-at go mek wi du?

8 Job nɔ bin sɔfa bikɔs i disayd fɔ du di rɔŋ tin lɛk Lɔt. Bɔt i bin gɛt siriɔs  prɔblɛm dɛn, i bin lɔs in prɔpati dɛn, i bin lɔs in pozishɔn, ɛn in wɛlbɔdi. Ɛn di tin we bad pas ɔl, na we in ɛn in wɛf lɔs ɔl dɛn pikin dɛn. Dɔn, Job in tri fek padi dɛn bin tɔk lay lay tin dɛn bɔt am. Wetin mek Job in tri fek padi dɛn we kam fɔ ɛnkɔrej am nɔ bin sho se dɛn gɛt sɔri-at fɔ am? Na bikɔs dɛn nɔ bin tray fɔ ɔndastand wetin rili bin de apin to Job. Dat bin mek dɛn tink bɔt Job di rɔŋ we ɛn nɔ jɔj am fayn. Aw wi go avɔyd fɔ mek di sem mistek? Wi fɔ no se na Jiova wangren no ɔltin bɔt wetin de apin to di pɔsin. Tek tɛm lisin to wetin di pɔsin we de sɔfa de tɔk. Nɔto fɔ jɔs lisin to wetin i de tɔk nɔmɔ, bɔt na fɔ tray bak fɔ fil di pen we i de fil. Na da we de nɔmɔ go mek yu ebul fɔ sho se yu rili gɛt sɔri-at fɔ yu brɔda ɔ sista.

9. If wi gɛt sɔri-at, wetin dat go ɛp wi fɔ avɔyd? Wetin mek?

9 Sɔri-at go mek wi nɔ de kongosa di pɔsin to ɔda pipul dɛn bɔt di prɔblɛm dɛn we i de gɛt. Pɔsin we de kongosa nɔ de mek wanwɔd de insay di kɔngrigeshɔn, bɔt i de skata di kɔngrigeshɔn. (Prɔv. 20:​19; Rom 14:​19) I nɔ de tɔk gud wɔd ɛn i nɔ de tink bifo i tɔk, dɔn di wɔd dɛn we i de tɔk de mek di pɔsin we de sɔfa in at pwɛl mɔ ɛn mɔ. (Prɔv. 12:​18; Ɛfi. 4:​31, 32) I rili fayn we wi de luk fɔ di gud kwaliti dɛn we di pɔsin gɛt, ɛn tink bɔt aw wi go ɛp am fɔ bia wit di prɔblɛm dɛn we i gɛt.

Tek tɛm lisin we yu brɔda ɔ sista de tɔk ilɛksɛf i de tɔk tin we nɔ fayn, ɛn ɛnkɔrej am di rayt tɛm (Luk na paregraf 10 ɛn 11) *

10. Wetin Job 6:​2, 3, tich wi?

10 Rid Job 6:​2, 3Sɔntɛnde Job bin de mek “shɔtat” we min se i bin vɛks ɛn i nɔ bin de tɔk gud wɔd dɛn. Bɔt leta i bin gri  se sɔm pan di tin dɛn we i bin tɔk bin rɔŋ. (Job 42:​6) Jɔs lɛk Job, pɔsin we gɛt siriɔs prɔblɛm go tɔk tin dɛn we i nɔ rili min ɛn tin dɛn we i go rigrɛt leta. Wetin wi go du? Bifo wi fɛn fɔlt pan di pɔsin, i go fayn fɔ lɛ wi sho sɔri-at fɔ am. Mɛmba se Jiova nɔ want ɛniwan pan wi fɔ gɛt di prɔblɛm dɛn ɛn strɛs we wi de gɛt tide. So na dat mek wi nɔ fɔ fil bad if wan pan Jiova in fetful savant we rili strɛs tɔk wɔd dɛn we nɔ gud. Ilɛksɛf di pɔsin nɔ tɔk di kɔrɛkt tin bɔt Jiova ɔ bɔt wi, wi nɔ fɔ vɛks kwik kwik wan ɔ jɔj am fɔ dat.—Prɔv. 19:​11.

11. Aw di ɛlda dɛn go falamakata Ilayu we dɛn de gi advays?

11 Sɔntɛnde, di pɔsin we gɛt siriɔs prɔblɛm go nid sɔm advays ɔ di ɛlda dɛn go ɛp am fɔ ajɔst di kayn we aw i de tink. (Gal. 6:​1) Aw di ɛlda dɛn go du dat? Dɛn fɔ falamakata Ilayu we bin sho sɔri-at we i bin de lisin to Job. (Job 33:​6, 7) Ilayu bin gi advays to Job afta we i ɔndastand aw Job bin de tink. Di ɛlda dɛn we de falamakata Ilayu in ɛgzampul go tek tɛm lisin to wetin di pɔsin de tɔk ɛn tray fɔ ɔndastand di tin dɛn we de apin to am. Dɔn da tɛm de, di advays we dɛn de gi di pɔsin, go rili tɔch in at.

TƆK FAYN WAN

12. Aw Naomi in man ɛn in tu bɔypikin dɛn day wan bin afɛkt am?

12 Naomi na bin fetful uman we lɛk Jiova. Bɔt afta we in man ɛn in tu bɔypikin dɛn day, i bin want fɔ chenj in nem frɔm Naomi to “Mara,” we min “bita.” (Ruth 1:​3, 5, 20, futnot, 21) Naomi in dɔtɛnlɔ we nem Rut bin kɔntinyu fɔ de wit am wit ɔl di prɔblɛm dɛn we i bin gɛt. Rut nɔ bin de ɛp Naomi fɔ gɛt di tin dɛn we dɛn nid nɔmɔ, bɔt i bin de tɔk bak fayn wan to am. Rut bin sho se i rili lɛk Naomi ɛn i de sɔpɔt am bay di fayn wɔd dɛn we i bin de tɛl am frɔm in at.—Ruth 1:​16, 17.

13. Wetin mek di wan dɛn we dɛn wɛf ɔ man dɔn day nid wi sɔpɔt?

13 We wan pan wi brɔda ɔ sista na di kɔngrigeshɔn lɔs in man ɔ in wɛf, i kin rili nid wi sɔpɔt. Maredman ɛn in wɛf kin tan lɛk tu tik dɛn we de gro nia nia. As tɛm de go, di tu tik dɛn rut dɛn kin tangul tangul. If wan pan di tik dɛn day ɔ dɛn rut am kɔmɔt, dat go afɛkt di ɔda tik siriɔs wan. Semweso, we pɔsin we mared lɔs in man ɔ in wɛf, in at kin rili pwɛl fɔ lɔng tɛm. Wan sista we nem Pɔla, * we in man bin day jɔs lɛk dat, bin tɔk se: “Mi layf bin tɔnoba, ɛn a fil lɛk se a nɔ gɛt wan trɛnk. A lɔs mi bɛst padi. A kin tɔk to mi man bɔt ɔltin. I kin de wit mi di tɛm we a gladi ɛn i kin sɔpɔt mi we tin nɔ rili izi fɔ mi. I kin lisin to mi ɔltɛm we a de tɛl am bɔt mi prɔblɛm dɛn. I tan lɛk se dɛn dɔn kɔt mi midul.”

Aw wi go sɔpɔt di wan dɛn we dɛn man ɔ wɛf dɔn day? (Luk na paregraf 14 ɛn 15) *

14-15. Aw wi go ɛnkɔrej pɔsin we in man ɔ wɛf dɔn day?

14 Aw wi go ɛnkɔrej pɔsin we in man ɔ in wɛf dɔn day? Wan impɔtant tin we wi fɔ du na fɔ tɔk to am, pan ɔl we wi nɔ no wetin fɔ tɔk ɔ wi nɔ de fil fayn fɔ tɔk. Pɔla we wi bin tɔk bɔt fɔs, bin tɔk se: “A no se day kin mek pipul dɛn nɔ fil fayn. Dɛn kin wɔri se dɛn go tɔk sɔntin we go mek di pɔsin fil bad mɔ ɛn mɔ. Bɔt wetin wɔs pas ɔl na we pipul dɛn nɔ tɔk natin.” Di pɔsin we in man ɔ wɛf dɔn day nɔ de tink se wi go tɔk sɔntin we mek sɛns. Pɔla bin tɔk se: “A kin rili gladi we  mi padi dɛn de tɛl mi se, ‘Ɔsh ya, a rili fil am fɔ yu.’”

15 Wan brɔda we nem Wiliam we in wɛf dɔn day fɔ sɔm tɛm naw, bin tɔk se: “A kin gladi we ɔda pipul dɛn kin tɛl mi di gud tin dɛn we dɛn mɛmba bɔt mi wɛf; dat kin mek a biliv tranga wan se dɛn bin lɛk am ɛn rɛspɛkt am. Dis kayn sɔpɔt bin rili ɛp mi. Dɛn wɔd dɛn de we pipul dɛn kin tɛl mi kin rili ɛnkɔrej mi, bikɔs a bin valyu mi wɛf ɛn i bin rili impɔtant to mi.” Wan uman we nem Bianka we in man dɔn day bin ɛksplen se: “A kin rili fil fayn we ɔda pipul dɛn de pre wit mi, ɛn rid wan ɔ tu skripchɔ wit mi. We pipul dɛn de tɔk bɔt mi man ɛn we dɛn de lisin to mi we a de tɔk bɔt am, dat kin rili ɛnkɔrej mi.”

16. (a) Wetin wi fɔ du fɔ sɔmbɔdi we di pɔsin we i lɛk dɔn day? (b) Frɔm wetin de na Jems 1:​27, us wok wi gɛt?

16 Jɔs lɛk aw Rut bin kɔntinyu fɔ de wit Naomi, na so wisɛf nid fɔ kɔntinyu fɔ de sɔpɔt di wan dɛn we dɛn pɔsin we dɛn lɛk dɔn day. Pɔla we wi bin tɔk bɔt bin tɔk se: “Jɔs afta we mi man day, bɔku pipul dɛn bin kam fɔ ɛp mi ɛn ɛnkɔrej mi. Bɔt afta sɔm tɛm, dɛn bin bizi wit dɛn yon wok dɛn. Bɔt mi layf dɔn rili chenj. I kin rili fayn we ɔda pipul dɛn no se sɔmbɔdi we di pɔsin we i lɛk day nid wi sɔpɔt ɔltɛm, ivin afta sɔm mɔnt ɔ ia dɔn pas.” Na tru se ɔlman difrɛn. Sɔm pipul dɛn kin ajɔst to dɛn nyu layf kwik kwik wan. Bɔt fɔ ɔda pipul dɛn i nɔ izi fɔ dɛn bikɔs ɛnitɛm dɛn du di  tin dɛn we dɛn ɛn di pɔsin we dɛn lɛk we dɔn day bin de du togɛda, dat kin mek dɛn at rili pwɛl. Pipul dɛn gɛt difrɛn we aw dɛn kin kray fɔ di pɔsin we dɛn lɛk we dɔn day. Lɛ wi mɛmba se Jiova dɔn gi wi di wok ɛn di chans fɔ kia fɔ di wan dɛn we dɛn man ɔ wɛf dɔn day.—Rid Jems 1:​27.

17. Wetin mek di wan dɛn we dɛn man ɔ dɛn wɛf dɔn lɛf dɛn nid wi fɔ sɔpɔt dɛn?

17 Sɔm mared pipul dɛn kin rili strɛs we dɛn man ɔ wɛf lɛf dɛn. Jɔys we in man lɛf am fɔ ɔda uman bin tɔk se: “Di pen we a fil we mi ɛn mi man dayvɔs bin wɔs pas di pen we a bin fɔ dɔn fil if i bin day. If i bin day pan aksidɛnt ɔ pan sik, a fɔ dɔn no se na sɔntin we nɔto in disayd. Bɔt na mi man bin disayd fɔ lɛf mi. Na bin disgres ɛn a bin rili shem.”

18. Wetin wi go du fɔ ɛp di wan dɛn we dɛn man ɔ wɛf dɔn lɛf dɛn?

18 We wi de du smɔl smɔl gud to pɔsin we in man ɔ uman dɔn lɛf am, wi de mek i no se wi rili lɛk am. Naw we na dɛn wangren de, dɛn kin rili nid tru tru padi dɛn. (Prɔv. 17:​17) Aw yu go sho se yu na dɛn padi? Yu kin invayt dɛn na os fɔ it wit yu. Ɛn yu kin spɛn tɛm wit dɛn na fil savis ɔ du ɔda tin fɔ ɛnjɔy unasɛf. Sɔntɛnde, yu kin invayt dɛn fɔ jɔyn yu pan yu famili wɔship. If yu du dat, yu go mek Jiova gladi, bikɔs “PAPA GƆD de nia ɔl udat fil se i dɔn dɔn fɔ am” ɛn “i de protɛkt di uman dɛn we dɛn man dɛn dɔn day.”—Sam 34:​18; 68:​5.

19. Wetin Pita In Fɔs Lɛta 3:​8 tɛl wi fɔ du?

19 I nɔ go te igen we Gɔd in Kiŋdɔm go de rul di wɔl, ɔlman go “fɔgɛt di trɔbul dɛn we dɔn pas.” Wi rili de wet fɔ di tɛm we “nɔbɔdi nɔ go mɛmba di fɔstɛm tin dɛm ɔ ivin kam na dɛn maynd.” (Ayz. 65:​16, 17) Te da tɛm de rich, lɛ wi kɔntinyu fɔ sɔpɔt wisɛf ɛn sho se wi rili lɛk wisɛf bay di we aw wi de tɔk ɛn du tin insay di kɔngrigeshɔn.—Rid Pita In Fɔs Lɛta 3:​8.

SIŊ 111 Tin dɛn we De Mek Wi Gladi

^ par. 5 Lɔt, Job, ɛn Naomi na bin pipul dɛn we bin de sav Jiova fetful wan, bɔt dɛn bin stil nid fɔ bia wit di prɔblɛm dɛn we dɛn bin de gɛt. Dis atikul go tɔk bɔt di tin dɛn we wi go lan frɔm wetin bin apin to dɛn. Dɔn bak, wi go lan wetin mek i impɔtant fɔ lɛ wi kɔntinyu fɔ peshɛnt ɛn tɔk fayn to wi brɔda ɛn sista dɛn we gɛt prɔblɛm dɛn.

^ par. 13 Dɛn dɔn chenj sɔm nem dɛn na dis atikul.

^ par. 57 SMƆL TIN BƆT DI PIKCHƆ DƐN: Wan brɔda vɛks ɛn i nɔ de tɔk fayn tin dɛn ɛn di ɛlda de tek tɛm lisin to am. Leta, afta we di brɔda in at dɔn kol, di ɛlda de gi am fayn advays.

^ par. 59 SMƆL TIN BƆT DI PIKCHƆ DƐN: Wan maredman ɛn in wɛf de spɛn tɛm wit wan brɔda we in wɛf jɔs day. Dɛn de tɔk bɔt sɔm fayn fayn tin dɛn we dɛn mɛmba bɔt di uman.