Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 27

Rɛdi Yusɛf Naw fɔ di Tɛm We Dɛn Go Mek Yu Sɔfa

Rɛdi Yusɛf Naw fɔ di Tɛm We Dɛn Go Mek Yu Sɔfa

“Pipul go fɛt ɔl dɛn wan we gɛt wanwɔd wit Jizɔs Krays, we want fɔ liv dɛn layf lɛkɛ aw Gɔd want dɛn fɔ liv am.”—2 TIM. 3:​12.

SIŊ 129 Wi Go Kɔntinyu fɔ Bia

WETIN WI GO LAN? *

1. Wetin mek wi nid fɔ rɛdi wisɛf fɔ di tɛm we pipul dɛn go mek wi sɔfa?

DI NƐT bifo dɛn kil wi Masta, Jizɔs, i bin tɔk se pipul dɛn go et ɔl di wan dɛn we disayd fɔ bi in disaypul dɛn. (Jɔn 17:​14) Frɔm da tɛm de te to wi yon tɛm, pipul dɛn we nɔ de wɔship Jiova dɔn de mek fetful Kristian dɛn sɔfa. (2 Tim. 3:​12) As di tɛm de nia fɔ lɛ dis wɔl dɔn, wi no se wi ɛnimi dɛn go mek wi sɔfa mɔ ɛn mɔ.—Mat. 24:​9.

2-3. (a) Wetin wi fɔ no bɔt fred? (b) Wetin wi go tɔk bɔt insay dis atikul?

2 Wetin wi fɔ du naw so dat wi go rɛdi fɔ bia di tɛm we dɛn go mek wi sɔfa? Wi nɔ nid fɔ tray fɔ tink bɔt ɔl di bad tin dɛn we go apin to wi. If wi du dat, wi go fred ɛn wɔri mɔ ɛn mɔ. If wi de tink bɔt ɔl di bad tin dɛn we go apin to wi, wi go fred pasmak ɛn wi go stɔp fɔ sav Jiova ivin bifo ɛni prɔblɛm mit wi. (Prɔv. 12:​25; 17:​22) Fɔ fred na wan pawaful wɛpɔn we “Setan we de fɛt [wi],” de tray fɔ yuz pan wi. (1 Pit. 5:​8, 9) So wetin wi go du naw fɔ rɛdi wisɛf fɔ bia di tɛm we dɛn go mek wi sɔfa?

3 Insay dis atikul, wi go tɔk bɔt wetin wi go du fɔ mek wi gɛt tayt padi biznɛs wit Jiova, ɛn wetin mek i rili impɔtant fɔ lɛ wi du dat naw. Wi go tɔk bak bɔt wetin wi go du fɔ lɛ wi go gɛt maynd mɔ ɛn mɔ. Dɔn, wi go tɔk bɔt wetin wi go du we pipul dɛn et wi.

WETIN YU GO DU FƆ MEK YU GƐT TAYT PADI BIZNƐS WIT JIOVA?

4. Frɔm wetin de na Di Ibru Pipul Dɛn 13:​5, 6, wetin wi fɔ biliv tranga wan? Wetin mek?

4 Na fɔ biliv tranga wan se Jiova lɛk yu ɛn i nɔ go ɛva lɛf yu. (Rid Di Ibru Pipul Dɛn 13:​5, 6.) Trade trade, Di Wachtawa bin tɔk se: “Di pɔsin we no Gɔd gud gud wan  go abop pan am wit ɔl in at di tɛm we dɛn de mek i sɔfa.” Dis na tru! Fɔ lɛ wi go kɔntinyu fɔ bia we dɛn de mek wi sɔfa, wi fɔ lɛk Jiova ɛn abop pan am wit ɔl wi at, dɔn wi nɔ fɔ ɛva dawt se i lɛk wi.—Mat. 22:​36-38, NW; Jems 5:​11.

5. Wetin go ɛp yu fɔ no se Jiova rili lɛk yu?

5 Rid di Baybul ɛvride ɛn gɛt di gol fɔ kam nia Jiova. (Jems 4:​8) We wi de rid di Baybul, i go fayn fɔ lɛ wi pe atɛnshɔn pan Jiova in fayn fayn kwaliti dɛn lɛk lɔv, sɔri-at, ɛn fɔ du gud. Tray fɔ ɔndastand di kayn we aw i lɛk yu we yu de rid bɔt wetin i tɔk ɛn du. (Ɛks. 34:​6) I nɔ kin izi fɔ lɛ sɔm pipul dɛn biliv se Gɔd lɛk dɛn bikɔs ɔda pipul dɛn nɔ wande sho lɔv to dɛn. If yu de fil dis kayn we, ɛvride na fɔ tray fɔ mɛmba di we dɛn aw Jiova de sho se i de sɔri fɔ yu ɛn du gud to yu. (Sam 78:​38, 39; Rom 8:​32) We yu de tink bɔt wetin bin dɔn apin to yu, ɛn yu de tek tɛm tink gud gud wan bɔt wetin yu dɔn rid na di Baybul, dat go mek yu ebul fɔ rayt bɔku tin dɛn we Jiova dɔn du fɔ yu. If yu rili gladi fɔ ɔl di tin dɛn we Jiova dɔn du fɔ yu, dat go mek yu padi biznɛs wit am tayt mɔ ɛn mɔ.—Sam 116:​1, 2.

6. Frɔm wetin de na Sam 94:​17-19, aw di pre we yu de pre wit ɔl yu at go ɛp yu?

6 Pre ɔltɛm. Imajin se wan papa ɔg in bɔypikin. Di bɔbɔ rili fil sef ɛn i nɔ de fred fɔ tɛl in papa ɔl di gud ɛn bad tin dɛn we apin to am da de de. Yusɛf kin ɛnjɔy da sem padi biznɛs de wit Jiova if yu kam nia am bay we yu de pre to am wit ɔl yu at ɛvride. (Rid Sam 94:​17-19.) We yu de pre to Jiova, “ɛmpti yu at lɛk wata” ɛn tɛl am ɔl di tin dɛn we yu de fred ɛn we de mek yu wɔri. (Lam. 2:​19) Wetin go apin we yu du dis? Di Baybul se yu go gɛt “kol at, we mɔtalman nɔ ebul ɔndastand.” (Fil. 4:​6, 7) Di mɔ we yu de pre to Jiova, na di mɔ yu de kam nia am.—Rom 8:​38, 39.

Wi go ebul fɔ gɛt maynd we wi gɛt strɔng fet pan Jiova ɛn di Kiŋdɔm mɛsej

Stanli Jons bin ɛp insɛf fɔ gɛt mɔ fet bay we i biliv tranga wan se Gɔd in Kiŋdɔm rial (Luk na paregraf 7)

7. Wetin mek yu fɔ biliv tranga se di tin dɛn we Gɔd dɔn prɔmis bɔt in Kiŋdɔm go mɔs bi?

7 Na fɔ biliv tranga wan se ɔl di blɛsin dɛn we Gɔd in Kiŋdɔm prɔmis go mɔs bi. (Nɔm. 23:​19) If yu nɔ biliv se di tin dɛn we Gɔd dɔn prɔmis go mɔs bi, dat go mek am izi fɔ Setan ɛn di wan dɛn we i de kɔntrol fɔ mek yu fred. (Prɔv. 24:​10; Ibru 2:​15) So wetin yu go du naw fɔ mek yu biliv tranga wan pan Gɔd in Kiŋdɔm? Na fɔ tek tɛm stɔdi Gɔd in prɔmis dɛn bɔt in Kiŋdɔm ɛn wetin mek yu fɔ biliv tranga wan se di tin dɛn we i dɔn prɔmis go bi. Aw dat go ɛp yu? Tink bɔt wan wi brɔda we nem Stanli Jons in ɛgzampul. Dɛn bin put Brɔda Jons na jel fɔ sɛvin ia fɔ wetin i biliv. * Wetin bin ɛp am fɔ bia te  ɔltin dɔn? I bin tɔk se: “Mi fet bin strɔng bikɔs a bin no bɔt Gɔd in Kiŋdɔm ɛn di tin dɛn we in Kiŋdɔm go du, ɛn a nɔ bin ɛva gɛt wan dawt bɔt dat. So nɔbɔdi nɔ go mek a lɛf Jiova.” If yu biliv tranga wan pan di tin dɛn we Gɔd dɔn prɔmis, yu go ebul fɔ go nia Jiova, ɛn yu nɔ go alaw fred fɔ mek yu stɔp fɔ sav am.—Prɔv. 3:​25, 26.

8. Wetin wi go no bɔt wisɛf we wi chɛk di we aw wi de fil bɔt wi mitin dɛn? Ɛksplen.

8 Na fɔ de atɛnd di mitin dɛn ɔltɛm. Di mitin dɛn de ɛp wi fɔ go nia Jiova mɔ ɛn mɔ. Di we aw wi de fil bɔt di mitin dɛn de sho di kayn we aw wi go ebul fɔ bia we pipul dɛn gɛt fɔ mek wi sɔfa tumara bambay. Wetin mek wi se so? If wi alaw smɔl smɔl tin dɛn fɔ stɔp wi fɔ lɛ wi nɔ atɛnd mitin dɛn naw, wetin wi go du tumara bambay if di gɔvmɛnt dɛn stɔp wi fɔ mit wit wi Kristian brɔda ɛn sista dɛn? Bɔt if wi mekɔp wi maynd fɔ de atɛnd di mitin dɛn, dat go mek wi nɔ givɔp if pipul dɛn tray fɔ stɔp wi fɔ lɛ wi nɔ mit togɛda wit wi brɔda ɛn sista dɛn. Naw na di tɛm fɔ lɛ wi lɛk fɔ de atɛnd wi mitin dɛn. We wi lɛk fɔ de atɛnd wi mitin dɛn, natin nɔ go stɔp wi, ivin di lɔ we di gɔvmɛnt go mek nɔ go stɔp wi fɔ obe Gɔd.—Akt 5:​29.

We yu kram skripchɔ dɛn ɛn Kiŋdɔm siŋ dɛn naw, yu go ebul fɔ mɛmba dɛn di tɛm we pipul dɛn go mek yu sɔfa ɛn dɛn go ɛp yu fɔ bia (Luk na paregraf 9) *

9. Wetin mek we wi kram skripchɔ dɛn na fayn we dat fɔ pripia fɔ di tɛm we dɛn go mek wi sɔfa?

9 Na fɔ kram di skripchɔ dɛn we yu lɛk. (Mat. 13:​52) Yu nɔ go ebul fɔ mɛmba ɔltin, bɔt Jiova go yuz in pawaful oli spirit fɔ ɛp yu fɔ mɛmba dɛn skripchɔ dɛn de. (Jɔn 14:​26) Notis wetin wan brɔda we dɛn bin put na prizin na Ist Jamani ɛn we na in wangren bin de na in sɛl bin tɔk. I bin se: “A bin rili gladi we a bin dɔn kram pas 200 skripchɔ dɛn. Pan ɔl we na mi wangren bin de, a bin de kip misɛf bizi bay we a de tink bɔt bɔku tɔpik dɛn na di Baybul.” Dɛn skripchɔ dɛn de bin ɛp wi brɔda fɔ kɔntinyu fɔ de nia Jiova mɔ ɛn mɔ ɛn fɔ bia fetful wan.

(Luk na paregraf 10) *

10. Wetin mek wi fɔ kram wi siŋ dɛn?

10 Kram ɛn siŋ siŋ dɛn fɔ prez Jiova. We Pɔl ɛn Saylas bin de na prizin na Filipay, dɛn bin de siŋ di siŋ dɛn we dɛn bin dɔn kram fɔ prez Jiova. (Akt 16:​25) Semweso, aw di brɔda dɛn bin kɔntinyu fɔ gɛt trɛnk di tɛm we di Sɔviɛt Yuniɔn bin sɛn dɛn na Sayberia? Wan sista we nem Mariya Fiduɛn bin tɔk se: “Wi bin de siŋ ɔl di siŋ dɛn we wi no we de insay wi  siŋbuk.” Di sista bin se dɛn siŋ dɛn de bin de ɛnkɔrej dɛn ɔl ɛn ɛp dɛn fɔ kam nia Jiova mɔ ɛn mɔ. Yu kin fil lɛk se yu de gɛt mɔ trɛnk we yu de siŋ di siŋ dɛn we de na wi siŋbuk ɛn na wi wɛbsayt? If na so i bi, na fɔ kram dɛn siŋ dɛn de naw!—Luk di bɔks we gɛt di taytul, “ Ɛp Mi Mek A Gɛt Maynd.”

WETIN YU GO DU FƆ GƐT MAYND MƆ ƐN MƆ?

11-12. (a) Frɔm wetin de na Fɔs Samiɛl 17:​37, 45-47, wetin mek Devid bin gɛt maynd? (b) Us impɔtant lɛsin wi lan frɔm Devid in ɛgzampul?

11 Yu nid maynd fɔ lɛ yu go kɔntinyu fɔ bia we pipul dɛn de mek yu sɔfa. Wetin yu go du if yu fil se yu na pɔsin we nɔ gɛt maynd? Mɛmba se fɔ gɛt maynd nɔ gɛt ɛnitin fɔ du wit pɔsin in sayz, di trɛnk we i gɛt, ɔ wetin i sabi du. Tink bɔt Devid in ɛgzampul di tɛm we i bin go fɛt Golaya. If yu kɔmpia Devid wit di jayant, Devid bin smɔl, i nɔ bin gɛt bɛtɛ trɛnk, ɛn i nɔ bin gɛt tin dɛn fɔ fɛt. Devid nɔ bin ivin gɛt sɔd. Bɔt i bin rili gɛt maynd. Devid bin gɛt maynd fɔ rɔn go bifo di prawd jayant ɛn fɛt am.

12 Wetin mek Devid bin rili gɛt maynd? I bin biliv tranga wan se Jiova de wit am. (Rid Fɔs Samiɛl 17:​37, 45-47.) Devid nɔ bin de pe atɛnshɔn pan di kayn we aw Golaya bin big we i kɔmpia insɛf wit am. Bifo dat, i bin pe atɛnshɔn to di kayn we aw Golaya kenkeni we i kɔmpia am to Jiova. Wetin wi lan frɔm dis stori? Wi go rili gɛt maynd if wi biliv tranga wan se Jiova de wit wi, ɛn if wi biliv se di wan dɛn we de mek wi sɔfa dɛn kenkeni we yu kɔmpia dɛn to di Ɔlmayti Gɔd. (2 Kro. 20:​15; Sam 16:​8) Wetin wi go du naw fɔ mek wi go gɛt maynd mɔ ɛn mɔ bifo di tɛm rich we pipul dɛn go mek wi sɔfa?

13. Wetin wi go du fɔ gɛt maynd? Ɛksplen.

13 Wi go gɛt maynd naw bay we wi de prich to ɔda pipul dɛn di gud nyuz bɔt Gɔd in Kiŋdɔm. Wetin mek? Na bikɔs we wi de prich, wi go lan fɔ abop pan Jiova ɛn nɔ fred mɔtalman. (Prɔv. 29:​25) Jɔs lɛk aw wi bɔdi de strɔng we wi de ɛksasayz, na so wi go gɛt maynd mɔ ɛn mɔ we wi de prich frɔm os to os, na say usay bɔku pipul dɛn kin de, we wi de prich ɔda say apat frɔm os to os, ɛn say dɛn we pipul dɛn de du biznɛs. If wi gɛt maynd fɔ de prich naw, dat go mek wi rɛdi fɔ prich ivin if di gɔvmɛnt ban wi prichin wok.—1 Tɛs. 2:​1, 2.

Nansi Yuɛn nɔ bin gri fɔ stɔp fɔ prich di gud nyuz (Luk na paregraf 14)

14-15. Us lɛsin wi lan frɔm Nansi Yuɛn ɛn Valɛntina Ganɔvskaya?

 14 Wi kin lan bɔku tin frɔm tu fetful sista dɛn ɛgzampul we bin sho se dɛn rili gɛt maynd. Nansi Yuɛn in ayt na bin lɛk fayv fit (1.5 mita), bɔt i nɔ bin de fred. * I nɔ bin gri fɔ stɔp fɔ prich di gud nyuz bɔt Gɔd in Kiŋdɔm. Dat bin mek dɛn put am na prizin fɔ lɛk 20 ia. Di ɔfisa dɛn we bin de aks am kwɛstyɔn dɛn bin tɔk bɔt am se i “trangayes pas ɔlman” na dɛn kɔntri!

Valɛntina Ganɔvskaya bin biliv tranga wan se Jiova de wit am (Luk na paregraf 15)

15 Semweso, dɛn bin put Valɛntina Ganɔvskaya na prizin insay Rɔshia tri tɛm, so i bin spɛn 21 ia na prizin. * Wetin mek? Na bikɔs i bin dɔn rili mekɔp in maynd se i go kɔntinyu fɔ prich, ɛn dat bin mek di ɔfisa dɛn bin de kɔl am “bad bad kriminal.” Wetin bin mek dɛn tu fetful sista dɛn ya rili gɛt maynd? Dɛn bin biliv tranga wan se Jiova de wit dɛn.

16. Wetin na di men tin we go mek wi rili gɛt maynd?

16 Jɔs lɛk aw wi bin dɔn tɔk, fɔ lɛ wi ebul fɔ gɛt maynd mɔ ɛn mɔ, wi nɔ nid fɔ abop pan di trɛnk we wi gɛt ɛn di tin dɛn we wi ebul fɔ du. Bifo dat, wi fɔ biliv se Jiova de wit wi, ɛn na in de fɛt fɔ wi. (Dit. 1:​29, 30; Zɛk. 4:​6) Dat na di men tin we go mek wi rili gɛt maynd.

WETIN YU GO DU WE PIPUL DƐN ET YU?

17-18. Frɔm wetin de na Jɔn 15:​18-21, us wɔnin Jizɔs bin gi wi? Ɛksplen.

17 Wi kin gladi we pipul dɛn rɛspɛkt wi, bɔt dat nɔ min se wi fɔ tink se wi nɔ gɛt wan valyu if pipul dɛn nɔ lɛk wi. Jizɔs bin tɔk se: “Una gɛt blɛsin wɛn mɔtalman nɔ lɛk una ɛn dɛn nɔ want gɛt ɛnitin fɔ du wit una, ɛn wɛn dɛn de kɔs una ɛn tɔk bad bɔt una, bikɔs una biliv Mɔtalman Pikin ɛn una de fala am!” (Lyuk 6:​22) Wetin Jizɔs bin min?

18 Jizɔs nɔ bin de tɔk se tru Kristian dɛn go gladi we ɔda pipul dɛn et dɛn. Bifo dat, i bin de wɔn wi bɔt wetin go apin to wi. Wi nɔ tan lɛk di pipul dɛn na  di wɔl. Wi de fala di tin dɛn we Jizɔs de tich, ɛn wi de prich di mɛsej we i bin de prich. So na dat mek di pipul dɛn na di wɔl et wi. (Rid Jɔn 15:​18-21.) Wi want fɔ du tin we go mek Jiova gladi. If pipul dɛn et wi bikɔs wi lɛk Jiova, dat na dɛn yon prɔblɛm.

19. Aw wi go falamakata di apɔsul dɛn ɛgzampul?

19 Nɔ ɛva alaw di tin dɛn we mɔtalman de tɔk ɔ du fɔ mek yu shem fɔ bi Jiova Witnɛs. (Mayk. 4:​5) Wi kin ebul fɔ stɔp fɔ fred mɔtalman bay we wi de tink bɔt wetin di apɔsul dɛn bin du na Jerusɛlɛm jɔs afta we dɛn bin kil Jizɔs. Dɛn bin no se di bigman dɛn na di Ju rilijɔn rili et dɛn. (Akt 5:​17, 18, 27, 28) Bɔt ɛvride, dɛn bin de go na di tɛmpul ɛn mek ɔlman no se dɛn na Jizɔs in disaypul dɛn bay we dɛn de prich. (Akt 5:​42) Dɛn nɔ bin gri fɔ fred mɔtalman ɛn stɔp. Wi bak kin stɔp fɔ fred mɔtalman bay we wi mek pipul dɛn no se wi na Jiova Witnɛs we wi de na wokples, na skul, ɛn na di eria we wi de.—Akt 4:​29; Rom 1:​16.

20. Wetin mek di apɔsul dɛn bin gladi pan ɔl we ɔda pipul dɛn bin et dɛn?

20 Wetin mek di apɔsul dɛn bin gladi? Dɛn bin no di rizin we mek pipul dɛn et dɛn, ɛn dɛn bin si am se na big big ɔnɔ dɛn gɛt fɔ lɛ pipul dɛn trit dɛn bad bikɔs dɛn de du wetin Jiova want. (Lyuk 6:​23; Akt 5:​41, NW) Di apɔsul Pita bin rayt se: “Ivin if una fɔ sɔfa bikɔs una de du wetin rayt, una gladi.” (1 Pit. 2:​19-21, NW; 3:​14, NW) We wi no se pipul dɛn et wi bikɔs wi de du wetin rayt, dat go mek wi nɔ ɛva stɔp fɔ sav Jiova.

YU GO BƐNIFIT WE YU RƐDI YUSƐF

21-22. (a) Wetin yu dɔn disayd fɔ du fɔ rɛdi yusɛf fɔ di tɛm we pipul dɛn go mek yu sɔfa? (b) Wetin wi go tɔk bɔt insay di nɛks atikul?

21 Wi nɔ no ustɛm pipul dɛn go stat fɔ mek wi sɔfa ɔ ustɛm di gɔvmɛnt go ban wi wok. Bɔt wi no se wi go rɛdi wisɛf naw bay we wi du wetin go mek wi gɛt tayt padi biznɛs wit Jiova, bay we wi de gɛt maynd mɔ ɛn mɔ, ɛn bay we wi de lan fɔ bia we pipul dɛn et wi. Di tin dɛn we wi de du fɔ rɛdi wisɛf naw go ɛp wi fɔ tinap tranga wan tumara bambay.

22 Bɔt wetin wi go du if dɛn ban wi wok? Insay di nɛks atikul, wi go tɔk bɔt Baybul prinsipul dɛn we go ɛp wi fɔ kɔntinyu fɔ sav Jiova ilɛk dɛn ban wi wok.

SIŊ 118 “Gi Wi Mɔ Fet”

^ par. 5 Wi nɔ want lɛ pipul dɛn et wi. Bɔt i nɔ go te igen, dɛn go mek wi ɔl sɔfa. Dis atikul go ɛp wi fɔ gɛt maynd ɛn rɛdi wisɛf fɔ di tɛm we dɛn go mek wi sɔfa.

^ par. 7 Luk di Disɛmba 15, 1965 Wachtawa, pej 756 to pej 767.

^ par. 14 Luk di Julay 15, 1979, Wachtawa pej 4 to pej 7. Luk bak di fim we gɛt di taytul, Ɔlman Go Sabi Jiova in Nem, na JW TV®. Luk ɔnda di say we se INTAVYU ƐN ƐKSPIRIƐNS DƐN.

^ par. 15 Luk di 2008 Yearbook of Jehovah’s Witnesses, pej 191 ɛn 192.

^ par. 67 SMƆL TIN BƆT DI PIKCHƆ DƐN: Wan mama ɛn papa de yuz kad dɛn we dɛn rayt skripchɔ dɛn pan we dɛn de du famili wɔship fɔ ɛp dɛn pikin dɛn fɔ kram skripchɔ dɛn.

^ par. 70 SMƆL TIN BƆT DI PIKCHƆ DƐN: Wan famili de praktis Kiŋdɔm siŋ dɛn na motoka we dɛn de go na mitin.