Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 29

“Una Go. . . Mek Pipul dɛn Bi Mi Disaypul”

“Una Go. . . Mek Pipul dɛn Bi Mi Disaypul”

“Una go ɛn mek pipul dɛn bi mi disaypul na ɔl di neshɔn dɛn.”—MAT. 28:​19, NW.

SIŊ 60 Dɛn Go Gɛt Layf

WETIN WI GO LAN? *

1-2. (a) Frɔm di kɔmand we Jizɔs bin gi we de na Matyu 28:​18-20 (NW), us men wok we ɔlman na di Kristian kɔngrigeshɔn gɛt? (b) Us kwɛstyɔn dɛn wi go tɔk bɔt insay dis atikul?

DI APƆSUL dɛn bin rili gladi we dɛn bin gɛda ɔp wan mawnten. Jɔs afta we Jizɔs bin gɛt layf bak, i bin tɛl in disaypul dɛn fɔ mit am na da say de. (Mat. 28:​16) I go bi se na da tɛm de Jizɔs bin “sho insɛf to pipul dɛn we pas fayv ɔndrɛd.” (1 Kɔr. 15:​6) Wetin mek Jizɔs bin tɛl in disaypul dɛn fɔ go mit am na da say de? Na fɔ gi dɛn dis kɔmand: “Una go ɛn mek pipul dɛn bi mi disaypul na ɔl di neshɔn dɛn.”—Rid Matyu 28:​18-20, NW.

2 Di disaypul dɛn we bin yɛri dɛn wɔd ya we Jizɔs bin tɔk na dɛn bin mekɔp di fɔstɛm Kristian kɔngrigeshɔn. Di men wok we di kɔngrigeshɔn bin gɛt na fɔ lɛ mɔ pipul dɛn bi Krays in disaypul dɛn. * Tide, tru Kristian dɛn gɛt bɔku bɔku kɔngrigeshɔn dɛn ɔlsay na di wɔl, ɛn di sem wok we di fɔstɛm Kristian dɛn bin gɛt na in dɛn kɔngrigeshɔn dɛn ya gɛt. Wi go tɔk bɔt 4 kwɛstyɔn dɛn insay dis atikul. Di kwɛstyɔn dɛn na: Wetin mek fɔ mek disaypul dɛn na tin we rili impɔtant? Wetin-ɛn-wetin fɔ du fɔ mek mɔ disaypul dɛn? Fɔ se na ɔlman we na Kristian fɔ du dis wok? Ɛn wetin mek wi nid fɔ peshɛnt we wi de mek disaypul dɛn?

 WETIN MEK FƆ MEK DISAYPUL DƐN NA TIN WE RILI IMPƆTANT?

3. Frɔm wetin de na Jɔn 14:​6 ɛn 17:​3, wetin mek fɔ mek disaypul dɛn na tin we rili impɔtant?

3 Wetin mek fɔ mek disaypul dɛn na tin we rili impɔtant? Na bikɔs na Krays in disaypul dɛn nɔmɔ go bi Gɔd in padi dɛn. Dɔn bak, di wan dɛn we de fala Krays de liv bɛtɛ layf naw, ɛn dɛn gɛt di op fɔ ɛnjɔy layf we go de sote go tumara bambay. (Rid Jɔn 14:​6; 17:​3.) Fɔ tru, Jizɔs dɔn gi wi wan impɔtant wok we wi fɔ du, bɔt wi nɔ de du dis wok bay wisɛf. Di apɔsul Pɔl bin rayt bɔt insɛf ɛn in ɔda tayt padi dɛn se: “Wi na Gɔd in kɔmpin wokman dɛn.” (1 Kɔr. 3:​9, NW) Dis na big ɔnɔ we Jiova dɔn gi mɔtalman!

4. Wetin wi lan frɔm Ayvan ɛn Matilde dɛn ɛgzampul?

4 Fɔ mek disaypul na wok we de mek wi rili gladi. Fɔ ɛgzampul, tink bɔt wetin bin apin to Ayvan we de na Kolombia ɛn in wɛf Matilde. Dɛn bin prich to wan yɔŋman we nem Davie, we bin tɛl dɛn se: “A want fɔ chenj di we aw a de liv mi layf, bɔt a nɔ ebul.” Davie na bin bɔksa we bin de tek drɔgs, drink pasmak, ɛn i bin de na os wit in galfrɛn we nem Ɛrika. Ayvan bin tɔk se: “Wi bigin fɔ stɔdi di Baybul wit am na in vilej we de fa fa say, so wi bin de rayd wi baysikul dɛn fɔ lɔng tɛm na pɔtɔpɔtɔ rod. Afta we Ɛrika bin notis se Davie in abit ɛn di we aw i de biev dɔn bigin fɔ chenj, insɛf bin stat fɔ stɔdi.” As tɛm de go, Davie bin stɔp fɔ tek drɔgs, fɔ drink, ɛn fɔ du bɔksin. Dɔn i mared Ɛrika ligal wan. Matilde bin tɔk se: “We Davie ɛn Ɛrika bin baptayz insay 2016, wi bin mɛmba wetin Davie kin tɔk we i kin se, ‘A want fɔ chenj, bɔt a nɔ ebul.’ Wi bin rili gladi ɛn wata rɔn wi yay.” Fɔ tru, wi kin rili gladi we wi de ɛp pipul dɛn fɔ bi Krays in disaypul dɛn.

WETIN-ƐN-WETIN FƆ DU FƆ MEK MƆ DISAYPUL DƐN?

5. Wetin na di fɔs tin we wi nid fɔ du fɔ mek disaypul dɛn?

5 Di fɔs tin we wi nid fɔ du fɔ mek disaypul dɛn na fɔ “fɛn” pipul dɛn we rɛdi fɔ lan bɔt Jiova. (Mat. 10:​11) We wi de tɛl ɔlman bɔt Jiova, wi de sho se wi na Jiova Witnɛs dɛn. Wi go sho se wi na tru Kristian dɛn bay we wi de obe Krays in kɔmand fɔ prich.

6. Wetin wi go du so dat pipul dɛn go lisin to wetin wi de tɔk?

6 Sɔm pipul dɛn kin rili want fɔ no di tru tin dɛn we de na di Baybul di fɔstɛm we wi mit dɛn, bɔt bɔku ɔda wan dɛn de we kin mek lɛk se dɛn nɔ bisin. I go fayn fɔ lɛ wi ɛnkɔrej dɛn fɔ lan mɔ. Fɔ lɛ wi go ebul fɔ du wi prichin wok fayn fayn wan, wi nid fɔ pripia gud gud wan. Pik tɔpik dɛn we di pipul dɛn we yu de tɔk to go lɛk fɔ yɛri. Dɔn, plan aw yu go introdyus ɛniwan pan di tɔpik dɛn.

7. Aw yu go stat fɔ tɔk to pɔsin? Wetin mek yu tink se i impɔtant fɔ lisin ɛn sho rɛspɛkt to pɔsin?

7 Fɔ ɛgzampul, yu kin aks di pɔsin we yu de prich to se: “Yu nɔ maynd fɔ lɛ a aks yu wan kwɛstyɔn bɔt sɔntin? Bɔku pan di prɔblɛm dɛn we de mit wi tide de afɛkt plɛnti pipul dɛn ɔlsay na di wɔl. Yu tink se wi go nid mɔtalman gɔvmɛnt fɔ sɔlv di prɔblɛm dɛn we de na dis wɔl?” Dɔn, yu kin rid ɛn tɔk bɔt wetin de na Daniɛl 2:​44. Ɔ yu kin aks sɔmbɔdi se: “Wetin yu tink se na di bɛst we fɔ mɛn pikin dɛn fɔ lɛ dɛn gɛt gud trenin? A go lɛk fɔ yɛri wetin yu tink.” Dɔn, yu kin  rid ɛn ɛksplen wetin de na Ditarɔnɔmi 6:​6, 7. Ilɛk us tɔpik yu disayd fɔ tɔk bɔt, tink bɔt di pipul dɛn we yu gɛt fɔ tɔk to. Tink bɔt aw dɛn go bɛnifit if dɛn lan di tin dɛn we di Baybul de tich. We yu de tɔk to dɛn, i rili impɔtant fɔ lɛ yu lisin to dɛn ɛn rɛspɛkt wetin dɛn tink. Dat go mek yu ɔndastand dɛn fayn fayn wan ɛn dɛn go rɛdi fɔ lisin to yu.

8. Wetin mek wi nɔ fɔ stɔp fɔ de mek ritɔn visit dɛn?

8 Bifo sɔmbɔdi go disayd fɔ stɔdi di Baybul, yu go nid fɔ yuz yu tɛm fɔ mek ritɔn visit dɛn. Wetin mek? Na bikɔs pipul dɛn nɔ kin de na os di nɛks tɛm we wi go go fɛn dɛn. Dɔn bak, yu go nid fɔ go to di pɔsin bɔku tɛm bifo i go fil fri wit yu ɛn gri fɔ stɔdi di Baybul. Mɛmba se, fɔ lɛ plant gro, yu nid fɔ de wata am ɔltɛm. Semweso, fɔ lɛ pipul dɛn go kɔntinyu fɔ lɛk Jiova ɛn Krays, wi ɛn dɛn go nid fɔ de tɔk bɔt Gɔd in Wɔd ɔltɛm.

FƆ SE NA ƆLMAN WE NA KRISTIAN FƆ DU DIS WOK?

Jiova Witnɛs dɛn ɔlsay na di wɔl de fɛn pipul dɛn we rili want fɔ lan bɔt Gɔd (Luk na paregraf 9 ɛn 10) *

9-10. Wetin mek wi se ɔlman we na tru Kristian de ɛp fɔ fɛn di wan dɛn we want fɔ bi Krays in disaypul dɛn?

9 Ɔlman we na tru Kristian gɛt fɔ ɛp fɔ fɛn pipul dɛn we rili want fɔ lan bɔt Gɔd. Dis wok tan lɛk we pipul dɛn de fɛn pikin we dɔn lɔs. Aw? Lɛ wi tink bɔt wetin bin apin to wan tri ia ol bɔbɔ we bin lɔs. Na lɛk 500 pipul dɛn bin jɔyn an fɔ luk fɔ am. Leta, afta 20 awa, wan pan di pipul dɛn bin fɛn di bɔbɔ na wan fil usay dɛn de plant kɔn. Di man we bin fɛn di pikin nɔ bin want pipul dɛn fɔ prez am. I bin tɔk se: “Na bɔku bɔku pipul dɛn bin jɔyn an togɛda fɔ fɛn di bɔbɔ.”

 10 Bɔku pipul dɛn tan lɛk da pikin we bin lɔs. Dɛn nɔ gɛt wan op, bɔt dɛn want pipul dɛn fɔ ɛp dɛn. (Ɛfi. 2:​12) Wi pas et milyɔn we de wok togɛda fɔ fɛn dɛn pipul dɛn we rili want fɔ no bɔt Gɔd ɛn gɛt layf we go de sote go. Sɔntɛm yu nɔ go ebul fɔ fɛn pɔsin we go rɛdi fɔ mek yu stɔdi am di Baybul. Bɔt ɔda pɔblisha dɛn we de prich na di sem tɛritri go fɛn pɔsin we want fɔ lan di tru tin dɛn we de na Gɔd in Wɔd. We wan brɔda ɔ sista ebul fɔ ɛp sɔmbɔdi fɔ bi Krays in disaypul, na ɔl di wan dɛn we ɛp fɔ prich na da tɛritri de go gladi.

11. Us we dɛn yu go ɛp fɔ mek disaypul dɛn ilɛksɛf yu nɔ de kɔndɔkt Baybul stɔdi?

11 Ilɛksɛf yu nɔ de kɔndɔkt Baybul stɔdi naw, yu kin stil ebul fɔ ɛp fɔ mek disaypul dɛn difrɛn we dɛn. Fɔ ɛgzampul, yu kin wɛlkɔm di nyu wan dɛn we de kam na Kiŋdɔm Ɔl ɛn mek dɛn padi. We yu du dat, yu go ɛp dɛn fɔ si se na lɔv de mek pipul dɛn no se wi na tru Kristian dɛn. (Jɔn 13:​34, 35) Ilɛk yu gi shɔt ansa dɛn na mitin, yu de tich di nyu wan dɛn aw fɔ tɔk bɔt wetin dɛn biliv frɔm dɛn at ɛn wit rɛspɛkt. Dɔn bak, yu kin wok wit di nyu pɔblisha dɛn na fil savis fɔ ɛp dɛn fɔ no aw fɔ yuz di Skripchɔ dɛn we dɛn de prich to pipul dɛn. We yu du dat, yu de tich dɛn fɔ falamakata Krays.—Lyuk 10:​25-28.

12. Yu tink se wi nid spɛshal kwaliti dɛn fɔ mek disaypul dɛn? Ɛksplen.

12 Wi nɔ fɔ tink se wi nid spɛshal kwaliti dɛn fɔ tich ɔda pipul dɛn fɔ lɛ dɛn bi Jizɔs in disaypul dɛn. Wetin mek? Lɛ wi tɔk bɔt wan sista we nem Fɔstina we de na Bolivia. I nɔ bin sabi fɔ rid di fɔstɛm we Jiova Witnɛs dɛn bin stat fɔ stɔdi wit am. Naw i dɔn sabi aw fɔ rid smɔl. I dɔn baptayz, ɛn i lɛk fɔ tich ɔda pipul dɛn. Bɔku tɛm, i kin kɔndɔkt fayv Baybul stɔdi dɛn ɛni wik. Pan ɔl we Fɔstina nɔ sabi rid lɛk aw bɔku pan in Baybul stɔdi dɛn de rid, i dɔn ɛp siks pipul dɛn fɔ baptayz.—Lyuk 10:​21.

13. Wetin na sɔm pan di blɛsin dɛn we wi go gɛt we wi de mek disaypul dɛn pan ɔl we wi bizi?

13 Plɛnti Kristian dɛn rili bizi bikɔs dɛn gɛt bɔku wok dɛn we dɛn de du. Bɔt pan ɔl dat, dɛn ebul fɔ fɛn tɛm fɔ kɔndɔkt Baybul stɔdi dɛn ɛn dɛn kin gladi we dɛn de du am. Lɛ wi tɔk bɔt Mɛlani we de na Alaska in ɛgzampul. Na in wan de mɛn in et ia ol galpikin. Dɔn i gɛt wok we i de du we de tek bɔku pan in tɛm ɛn i de kia fɔ in papa we gɛt kansa. Na Mɛlani wangren na bin Jiova Witnɛs na di tɔŋ we i de. Bikɔs i rili want fɔ fɛn sɔmbɔdi we i go ebul fɔ stɔdi di Baybul wit, i kin pre ɔltɛm fɔ lɛ Jiova gi  am di trɛnk fɔ go prich pan ɔl we di ples kol. Leta, i bin mit Sara we bin rili gladi fɔ lan se Gɔd gɛt nem. Afta sɔm tɛm, Sara bin gri fɔ stɔdi di Baybul. Mɛlani bin tɔk se: “Frayde ivintɛm a kin taya pasmak, bɔt mi ɛn mi galpikin kin bɛnifit we wi kin go kɔndɔkt da Baybul stɔdi de. Wi kin gladi fɔ du risach fɔ fɛn ansa to Sara in kwɛstyɔn dɛn, ɛn wi bin rili gladi we i bi Jiova in padi.” Sara bin gɛt maynd fɔ bia we pipul dɛn bin de agens am, i bin lɛf in chɔch, ɛn baptayz.

WETIN MEK WI NID FƆ PESHƐNT WE WI DE MEK DISAYPUL DƐN?

14. (a) Aw di wan dɛn we de prich tan lɛk fishaman dɛn? (b) Aw di wɔd dɛn we Pɔl bin rayt na Sɛkɛn Lɛta To Timoti 4:​1, 2 dɔn afɛkt yu?

14 Ilɛksɛf yu nɔ gɛt pɔsin yet we want fɔ bi disaypul, na fɔ kɔntinyu fɔ de luk fɔ pipul dɛn we want fɔ lan bɔt Jiova. Mɛmba se Jizɔs bin se di wan dɛn we de mek disaypul dɛn tan lɛk fishaman dɛn. Fishaman dɛn kin wok fɔ lɔng tɛm bifo dɛn kech fish. Bɔku tɛm, dɛn kin wok let na nɛt ɔ ali mɔnin, ɛn sɔntɛnde dɛn kin travul go fa say. (Lyuk 5:​5) Semweso, sɔm pipul dɛn we de prich kin spɛn plɛnti tɛm de “fishin” na difrɛn say dɛn ɛn difrɛn tɛm dɛn. Wetin mek? Na fɔ lɛ dɛn go gɛt di chans fɔ mit pipul dɛn. Di wan dɛn we kin tray tranga wan fɔ du dis kin mit pipul dɛn we kin want fɔ lisin to wi mɛsej. Yu tink se yu go ebul fɔ prich di tɛm we yu tink se yu go mit pipul dɛn ɔ fɔ go na say usay yu go mit dɛn?—Rid Sɛkɛn Lɛta To Timoti 4:​1, 2.

Na fɔ peshɛnt we yu de ɛp yu Baybul stɔdi dɛn fɔ sabi, lɛk, ɛn obe Jiova (Luk na paregraf 15 ɛn 16) *

15. Wetin mek wi nid fɔ peshɛnt we wi de kɔndɔkt Baybul stɔdi?

 15 Wetin mek wi nid fɔ peshɛnt we wi de kɔndɔkt Baybul stɔdi? Wan rizin na dat wi nid fɔ ɛp wi Baybul stɔdi fɔ lan di tru tin dɛn we de na di Baybul ɛn fɔ lɛk wetin dɛn de lan. Dɔn bak, wi nid fɔ ɛp am fɔ no ɛn lɛk di Wan we gi wi di Baybul, we na Jiova. Apat frɔm di tich we wi de tich wi Baybul stɔdi dɛn fɔ no wetin Jizɔs want in disaypul dɛn fɔ du, wi nid fɔ ɛp dɛn fɔ no aw fɔ liv dɛn layf lɛk tru Kristian. Wi fɔ peshɛnt fɔ ɛp dɛn we dɛn de tray fɔ fala di prinsipul dɛn we de na di Baybul. Sɔm kin ebul fɔ chenj dɛn abit dɛn ɛn di we aw dɛn de tink insay shɔt tɛm. Ɔda wan dɛn nid fɔ tek lɔng tɛm fɔ du dat.

16. Wetin yu lan frɔm Raul in ɛkspiriɛns?

16 Wan ɛkspiriɛns we bin apin to wan mishɔnari brɔda we bin de na Pɛru de sho di bɛnifit we wi de gɛt we wi peshɛnt. Di brɔda bin tɔk se: “A dɔn fɔ stɔdi tu buk dɛn wit wan mi Baybul stɔdi we nem Raul. Bɔt i nɔ bin izi fɔ mek i du wetin i bin dɔn de lan na di Baybul. I bin de gɛt siriɔs prɔblɛm dɛn na in mared-os, i bin de yuz bad bad wɔd dɛn, ɛn in pikin dɛn nɔ bin de rɛspɛkt am bikɔs i nɔ bin de biev fayn. I bin de atɛnd di mitin dɛn ɔltɛm, so dat bin de mek a kɔntinyu fɔ go fɛn am fɔ ɛp in ɛn in famili. Afta lɛk tri ia, i bin baptayz.”

17. Wetin wi go tɔk bɔt insay di nɛks atikul?

17 Jizɔs bin tɛl wi fɔ ‘go mek pipul dɛn bi in disaypul na ɔl di neshɔn dɛn.’ Fɔ du dis, bɔku tɛm wi kin tɔk to pipul dɛn we nɔ de tink di sem we lɛk aw wi de tink, ivin di wan dɛn we nɔ de na ɛni rilijɔn ɔ we nɔ biliv se Gɔd de. Insay di nɛks atikul, wi go tɔk bɔt aw wi go prich di gud nyuz to dɛn kayn pipul dɛn de.

SIŊ 68 Wi De Ɛp Pipul dɛn fɔ No di Tru

^ par. 5 Ɔlman na di Kristian kɔngrigeshɔn gɛt di wok fɔ ɛp pipul dɛn fɔ bi Krays in disaypul dɛn. Dis atikul go sho wi fayn pɔynt dɛn we go ɛp wi fɔ du dis wok.

^ par. 2 WƆD WE DƐN ƐKSPLEN: Krays in disaypul dɛn nɔ jɔs de lan wetin Jizɔs de tich dɛn. Dɛn de du di tin dɛn we dɛn de lan. Dɛn de tray fɔ falamakata Jizɔs in futmak ɔ ɛgzampul gud gud wan.—1 Pit. 2:​21, NW.

^ par. 52 SMƆL TIN BƆT DI PIKCHƆ DƐN: Wan man we de go ɔlide tek wan trakt frɔm di Witnɛs dɛn na iapɔt. Leta, we i de ɔlide, i si ɔda Witnɛs dɛn we de du pɔblik prichin. Afta we i go bak na in os, tu brɔda dɛn mit am ɛn prich to am.

^ par. 54 SMƆL TIN BƆT DI PIKCHƆ DƐN: Di sem man gri fɔ stɔdi di Baybul. Afta sɔm tɛm, i baptayz.