Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 3

Una Valyu to Jiova Una Gɔd!

Una Valyu to Jiova Una Gɔd!

“Nain na di wan we de mɛmba wi wɛn wi de dɔŋ.”—SAM 136:​23.

SIŊ 33 Lɛf Yu Prɔblɛm to Jiova

WETIN WI GO LAN? *

1-2. Us prɔblɛm dɛn bɔku pan Jiova in pipul dɛn kin gɛt? Aw dat kin afɛkt dɛn?

TINK bɔt dɛn tri ɛgzampul dɛn ya: Wan dɔktɔ bin tɛl wan yɔŋ brɔda se i gɛt wan bad bad sik we go mek i go de fil wik mɔ ɛn mɔ. Wan brɔda we dɔn pas 50 ia lɔs in wok, ɛn pan ɔl we i de tray tranga wan fɔ fɛn ɔda wok, i stil nɔ ebul fɔ gɛt. Wan fetful sista we dɔn ol nɔ ebul fɔ du tin lɛk aw i bin de du trade fɔ sav Jiova.

2 If yu gɛt ɛniwan pan dɛn kayn prɔblɛm dɛn ya, sɔntɛm yu go de fil se yu nɔ gɛt wan valyu igen. Dɛn kayn prɔblɛm dɛn ya kin mek yu nɔ gladi, i kin mek yu fil bad bɔt yusɛf, ɛn i kin ambɔg yu padi biznɛs wit ɔda pipul dɛn.

3. Aw Setan ɛn di wan dɛn we i de kɔntrol de si mɔtalman layf?

3 Di we aw pipul dɛn na di wɔl de si mɔtalman layf de sho aw Setan de si mɔtalman layf. Setan de trit mɔtalman ɔltɛm lɛk se dɛn nɔ gɛt wan valyu. I nɔ bin gɛt wan sɔri-at we i tɛl Iv se i go fri if i nɔ obe Gɔd pan ɔl we i bin no gud gud wan se Iv go day if i nɔ obe Gɔd. Na Setan dɔn de kɔntrol pɔlitiks, rilijɔn, ɛn di kayn we aw pipul dɛn de du biznɛs ɔlsay na dis wɔl. So wi nɔ sɔprayz fɔ si se bɔku biznɛsman dɛn, pipul dɛn we de pan pɔlitiks, ɛn di bigman dɛn pan rilijɔn nɔ gɛt wan valyu ɔ rɛspɛkt fɔ mɔtalman layf ɛn dɛn nɔ bisin bɔt aw pipul dɛn de fil.

4. Wetin wi go tɔk bɔt insay dis atikul?

 4 Bɔt Jiova want wi fɔ no se wi gɛt valyu, ɛn i de ɛp wi we wi gɛt prɔblɛm na layf we de mek wi fil se wi nɔ gɛt wan valyu. (Sam 136:​23; Rom 12:​3) Dis atikul go tɔk bɔt aw Jiova go ɛp wi: (1) We wi sik, (2) we i nɔ izi fɔ wi fɔ gɛt mɔni, ɛn (3) we ol ej de mek wi fil se wi nɔ ebul fɔ du bɛtɛ tin fɔ sav Jiova. Bɔt fɔs, wi go lan wetin mek wi fɔ biliv tranga wan se Jiova valyu wi ɔl wan bay wan.

JIOVA VALYU WI

5. Wetin sho se mɔtalman valyu to Jiova?

5 Pan ɔl we na di dɔti we de na grɔn Jiova yuz fɔ mek mɔtalman, wi stil gɛt valyu fa fawe pas dɔti. (Jɛn. 2:​7) Jɔs tink bɔt sɔm pan di rizin dɛn we mek wi no se wi valyu to Jiova. I mek mɔtalman di kayn we aw wi go ebul fɔ falamakata in kwaliti dɛn. (Jɛn. 1:​27) Dis tin we i du mek wi bɛtɛ pas ɔl di ɔda tin dɛn we i mek na dis wɔl, ɛn i dɔn put wi oba ɔltin ɛn ivin di animal dɛn.—Sam 8:​4-8.

6. Us ɔda pruf wi gɛt fɔ se Jiova valyu mɔtalman pan ɔl we wi nɔ pafɛkt?

6 Ivin afta we Adam bin sin, Jiova bin stil kɔntinyu fɔ valyu mɔtalman. I rili valyu wi, ɛn na dat mek i gi in Pikin we i lɛk as sakrifays fɔ day fɔ wi sin dɛn. (1 Jɔn 4:​9, 10) Di day we Jizɔs day fɔ wi sin dɛn dɔn mek am pɔsibul fɔ lɛ Jiova gi layf bak to ɔl di wan dɛn we dɔn day bikɔs ɔf Adam in sin. I go gi layf bak to “di wan dɛn we du wetin rayt ɛn di wan dɛn we nɔ du wetin rayt.” (Akt 24:​15, NWT) Di Baybul sho se wi valyu to am ilɛksɛf wi sik, po, ɔ dɔn ol.—Akt 10:​34, 35.

7. Us ɔda rizin dɛn mek Gɔd in savant dɛn biliv tranga wan se Jiova valyu dɛn?

7 Wi gɛt ɔda rizin dɛn we mek wi biliv se Jiova valyu wi. I dɔn mek wi kam nia am, ɛn i dɔn si di tin dɛn we wi du we wi yɛri di gud nyuz. (Jɔn 6:​44) As wi bigin fɔ kam nia Jiova, insɛf bin kam nia wi. (Jems 4:​8) Dɔn bak, Jiova de tek tɛm tich wi fɔ sho se wi valyu to am. I no di kayn pɔsin we wi bi rayt naw ɛn di kayn pɔsin we wi go bi tumara bambay. Ɛn i de kɔrɛkt wi bikɔs i lɛk wi. (Prɔv. 3:​11, 12) Dis na wɔndaful tin dɛn we de sho se Jiova valyu wi!

8. Aw di wɔd dɛn we de na Sam 18:​27-29 go afɛkt di we aw wi de tink bɔt wi prɔblɛm dɛn?

8 Sɔm pipul dɛn bin de tink se Kiŋ Devid nɔ gɛt wan valyu, bɔt Devid bin no se Jiova lɛk am ɛn i de sɔpɔt am. Da kayn we aw Devid bin de tink bin ɛp am fɔ tink di rayt we as i de bia wit in prɔblɛm dɛn. (2 Sam. 16:​5-7) Ɛnitɛm we wi at pwɛl ɔ we wi gɛt prɔblɛm dɛn, Jiova kin ɛp wi fɔ si tin difrɛn we ɛn i kin ɛp wi fɔ bia ɛni prɔblɛm we mit wi. (Rid Sam 18:​27-29.) We Jiova de sɔpɔt wi, natin nɔ de we go stɔp wi fɔ lɛ wi nɔ sav am wit gladi-at. (Rom 8:​31) Naw, lɛ wi tɔk bɔt dɛn tri prɔblɛm dɛn ya we kin mit wi we fɔ rili mek wi mɛmba se Jiova lɛk wi ɛn valyu wi.

WE WI DE SƆFA BIKƆS WI SIK

We wi de rid di Baybul, dat go ɛp wi fɔ bia wit di bad we aw wi kin fil we wi sik (Luk na paregraf 9 to 12)

9. Aw sik kin afɛkt di we aw wi de fil bɔt wisɛf?

9 Sik kin afɛkt di we aw wi de fil, ɛn i kin mek wi fil se wi nɔ gɛt wan valyu igen. Wi kin shem we pipul dɛn notis se sɔntin rɔng wit wi ɔ wi ɔbop pan ɔda pipul dɛn fɔ ɛp wi. Ilɛk ɔda pipul dɛn nɔ no se wi sik, wi kin stil shem bikɔs wi nɔ  ebul fɔ du di tin dɛn we wi bin de du trade. Na dɛn tɛm dɛn ya we wi at pwɛl Jiova kin ɛnkɔrej wi. Aw?

10. Frɔm wetin de na Prɔvabs 12:​25 (NWT), wetin go ɛp wi we wi sik?

10 “Gud wɔd” kin ɛnkɔrej wi we wi sik. (Rid Prɔvabs 12:​25, NWT.) Insay di Baybul, Jiova gɛt bɔku gud wɔd dɛn we de mɛmba wi se wi valyu to am pan ɔl we wi sik. (Sam 31:​19; 41:​3) If wi rid di Baybul wan tɛm ɔ tu tɛm ɛn ivin pas dat, Jiova go ɛp wi fɔ bia wit di bad we aw wi de fil bikɔs wi sik.

11. Aw Jiova bin ɛp wan brɔda?

11 Tink bɔt wetin bin apin to wan brɔda we nem Jɔj. As yɔŋman, Jɔj bin gɛt wan bad bad sik we bin wɔs pan am kwik kwik wan ɛn mek i fil se i nɔ gɛt wan valyu. I bin tɔk se: “A nɔ bin rɛdi fɔ di kayn we aw mi sik bin de mek a fil ɔ di we aw a bin de shem bikɔs di sik bin de mek pipul dɛn wach mi. Mi sik bin wɔs, a bin de tink bɔt aw mi layf go chenj. Mi at bin pwɛl pasmak ɛn a beg Jiova fɔ ɛp mi.” Aw Jiova bin ɛp am? Jɔj bin tɔk se: “Bikɔs i nɔ bin izi fɔ mi fɔ pe atɛnshɔn tumɔs pan sɔntin, dɛn bin ɛnkɔrej mi fɔ go de rid tu-tri vas dɛn na di Baybul buk we nem Sam we de sho se Jiova bisin bɔt in savant dɛn. A bin de rid dɛn skripchɔ dɛn de bɔku tɛm ɛnide, ɛn a si se dɛn bin de rili ɛnkɔrej mi. As tɛm de go, ɔda pipul dɛn bigin fɔ notis se a de smayl bɔku tɛm. Dɛn bin ivin tɔk se di kayn we aw a gladi de ɛnkɔrej dɛn. A bin kam fɔ si se Jiova dɔn ansa mi prea dɛn! I dɔn ɛp mi fɔ chenj di we aw a bin de fil bɔt misɛf. A bigin fɔ pe atɛnshɔn mɔ pan wetin in Wɔd se bɔt di we aw i de si mi pan ɔl we a sik.”

12. Wetin yu go du fɔ lɛ Jiova ɛp yu if yu sik?

 12 If yu sik, na fɔ no se Jiova no wetin de apin to yu. Beg am fɔ ɛp yu so dat yu go lan fɔ tink di rayt we bɔt wetin de apin to yu. Dɔn, rid di Baybul fɔ si di gud wɔd dɛn we Jiova dɔn mek dɛn rayt de fɔ yu. Pe atɛnshɔn mɔ pan di vas dɛn we de sho aw Jiova valyu in savant dɛn. We yu du dat, yu go si se Jiova gud to ɔl di wan dɛn we de sav am fetful wan.—Sam 84:​11.

WE I NƆ IZI FƆ YU FƆ GƐT MƆNI

We wi de mɛmba se Jiova go gi wi wetin wi nid, dat go ɛp wi fɔ bia ilɛksɛf i nɔ izi fɔ wi fɔ fɛn wok (Luk na paregraf 13 to 15)

13. Aw pɔsin we de oba in famili kin fil we i lɔs in wok?

13 Ɔl di wan dɛn we de oba dɛn famili want fɔ gɛt wetin dɛn famili nid fɔ liv. Bɔt lɛ wi se wan brɔda lɔs in wok pan ɔl we i nɔ du ɛni bad tin. Ɛn pan ɔl we i de tray tranga wan fɔ fɛn ɔda wok, i stil nɔ gɛt wok. Di brɔda go fil se i nɔ gɛt wan valyu bikɔs dis kayn tin dɔn apin to am. If i pe atɛnshɔn mɔ pan di tin dɛn we Jiova dɔn prɔmis, aw dat go ɛp am?

14. Wetin mek Jiova de du di tin dɛn we i dɔn prɔmis?

14 Jiova kin du wetin i dɔn prɔmis ɔltɛm. (Jɔs. 21:​45; 23:​14) I kin du dat fɔ bɔku rizin dɛn. Wan rizin na bikɔs dat kin afɛkt di gudnem we i gɛt, ɛn i nɔ want fɔ gɛt badnem. Jiova dɔn prɔmis wi se i go kia fɔ in fetful savant dɛn, ɛn i want fɔ du wetin i dɔn prɔmis. (Sam 31:​1-3) Dɔn bak, Jiova no se wi at go pwɛl if i nɔ kia fɔ di wan dɛn we de na in famili. I dɔn prɔmis se i go gi wi wetin wi nid fɔ liv ɛn wetin wi nid fɔ sav am fetful wan, ɛn natin nɔ go stɔp am fɔ du wetin i dɔn prɔmis!—Mat. 6:​30-33; 24:​45, NWT.

15. (a) Us prɔblɛm bin mit di fɔstɛm Kristian dɛn? (b) Wetin Sam 37:​18, 19 ɛp wi fɔ biliv tranga wan?

 15 We wi mɛmba wetin mek Jiova de du di tin dɛn we i dɔn prɔmis, dat de mek wi biliv tranga wan se i go ɛp wi di tɛm we i nɔ rili izi fɔ wi fɔ gɛt mɔni. Tink bɔt di fɔstɛm Kristian dɛn ɛgzampul. We dɛn bin de mek di Kristian dɛn na Jerusɛlɛm sɔfa bad bad wan, “ɔl di disaypul dɛn bin skata na difrɛn say dɛn . . . na di apɔsul dɛn nɔmɔ bin lɛf.” (Akt 8:​1, NWT) Tink bɔt wetin dat bin min fɔ wi brɔda dɛn. Tin bin tranga! I go mɔs bi se di Kristian dɛn bin lɔs dɛn os dɛn ɛn di biznɛs we dɛn bin de du. Bɔt pan ɔl dat, Jiova nɔ bin lɛf dɛn; ɛn dɛn nɔ bin lɔs di gladi-at we dɛn bin gɛt. (Akt 8:​4; Ibru 13:​5, 6; Jems 1:​2, 3) Jiova bin sɔpɔt dɛn fetful Kristian dɛn de, ɛn i go sɔpɔt wi bak.—Rid Sam 37:​18, 19.

WE WI NƆ EBUL FƆ DU TIN LƐK AW WI BIN DE DU TRADE BIKƆS WI DƆN OL

We wi pe atɛnshɔn mɔ pan wetin wi ebul fɔ du, ivin we wi dɔn ol, dat go mek wi biliv tranga wan se Jiova valyu wi ɛn di tin dɛn we wi de du fɔ sav am fetful wan (Luk na paregraf 16 to 18)

16. Wetin kin mek wi tink se wi wɔship nɔ impɔtant igen to Jiova?

16 As wi de ol, wi go bigin fɔ fil se wi nɔ gɛt bɛtɛ tin igen fɔ du fɔ Jiova. I go mɔs bi se Kiŋ Devid bin de wɔri bay we i bin de fil dis sem kayn we as i bin de ol. (Sam 71:​9) Aw Jiova kin ɛp wi?

17. Wetin wi lan frɔm wan sista we nem Jɛri in ɛkspiriɛns?

17 Tink bɔt wetin bin apin to wan sista we nem Jɛri. Dɛn bin invayt am fɔ atɛnd wan mitin usay dɛn de tren di wan dɛn we de ɛp fɔ mek di say dɛn we kin pwɛl na di Kiŋdɔm Ɔl, bɔt i nɔ bin want fɔ go. I bin tɔk se: “A dɔn ol, mi man dɔn day, ɛn a nɔ no aw fɔ du ɛnitin we go ɛp fɔ du dis wok. A nɔ gɛt wan valyu.” Di nɛt bifo dɛn du di  trenin, Jɛri bin pre ɛn tɛl Jiova ɔl wetin de na in at. We i go na di Kiŋdɔm Ɔl di nɛks de, i bin de stil wɔnda if i rili nid fɔ de de. As dɛn de du di trenin, wan pan di brɔda dɛn we de tren dɛn bin tɔk se di tin we wi go ebul fɔ du we impɔtant pas ɔl na we wi rɛdi fɔ lɛ Jiova tich wi. Jɛri bin mɛmba se: “A bin tɛl misɛf se, ‘A ebul du dat!’ A bin stat fɔ kray we a kam fɔ si se Jiova de ansa mi prea. I de mek a no se a gɛt sɔntin we valyu fɔ gi, ɛn i bin rɛdi fɔ tich mi fɔ du impɔtant wok!” We Jɛri de tink bɔt wetin bin apin, i tɔk se: “We a bin go fɔ da trenin de a bin de fred, mi at bin pwɛl, ɛn a bin de tink se a nɔ gɛt wan valyu. Bɔt a kɔmɔt de wit kɔnfidɛns, mi at nɔ pwɛl igen, ɛn naw a no se a valyu!”

18. Aw di Baybul sho se Jiova de kɔntinyu fɔ valyu di wan dɛn we de wɔship am as dɛn de ol?

18 As wi de ol, wi fɔ biliv tranga wan se Jiova stil gɛt wok fɔ wi fɔ du. (Sam 92:​12-15) Jizɔs bin tich wi se ilɛksɛf di tin dɛn we wi ebul fɔ du nɔ impɔtant to wi, Jiova valyu ɛnitin we wi de du fɔ sav am. (Lyuk 21:​2-4) So na fɔ pe atɛnshɔn pan wetin yu ebul fɔ du. Fɔ ɛgzampul, yu kin tɔk to ɔda pipul dɛn bɔt Jiova, pre fɔ yu brɔda ɛn sista dɛn, ɛn ɛnkɔrej ɔda pipul dɛn fɔ kɔntinyu fɔ de fetful wan. Jiova de si yu as in kɔmpin wokman, nɔto bikɔs ɔf wetin yu ebul fɔ du bɔt na bikɔs yu rɛdi fɔ obe am.—1 Kɔr. 3:​5-9.

19. Wetin Lɛta Fɔ Rom 8:​38, 39 ɛp wi fɔ biliv?

19 Wi gladi fɔ wɔship Jiova, di Gɔd we rili valyu di wan dɛn we de sav am! I mek wi fɔ du wetin i want, ɛn na tru wɔship de mek wi layf rili gɛt minin. (Rɛv. 4:​11, NWT) Pan ɔl we di pipul dɛn na dis wɔl go si wi as pipul dɛn we nɔ gɛt wan valyu, Jiova nɔ de si wi da we de. (Ibru 11:​16, 38) We wi at pwɛl bikɔs wi sik, tin tranga, ɔ wi dɔn de ol, lɛ wi mɛmba se natin nɔ go mek wi Papa we de na ɛvin stɔp fɔ lɛk wi.—Rid Lɛta Fɔ Rom 8:​38, 39.

^ par. 5 Sɔntin dɔn ɛva apin to yu we mek yu fil se yu nɔ gɛt wan valyu igen? Dis atikul go mek yu mɛmba se Jiova rili valyu yu. I go tɔk bɔt aw yu go kɔntinyu fɔ fil gud bɔt yusɛf ilɛk wetin apin to yu.

SIŊ 30 Mi Papa, Mi Gɔd, ɛn Mi Padi