Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 4

“Gɔd in Spirit wit Wi Yon Spirit De Tɔk di Sem Tin”

“Gɔd in Spirit wit Wi Yon Spirit De Tɔk di Sem Tin”

“Gɔd in Spirit wit wi yon spirit de tɔk di sem tin se wi na Gɔd in pikin dɛn.”—ROM 8:​16.

SIŊ 25 Jiova Gɛt Spɛshal Pipul Dɛn

WETIN WI GO LAN? *

Insay Pɛntikɔst, Jiova bin gi in oli spirit wan spɛshal we to lɛk 120 Kristian dɛn (Luk na paregraf 1 ɛn 2)

1-2. Us wɔndaful tin bin apin di de fɔ Pɛntikɔst insay di ia 33?

NA BIN Sɔnde mɔnin na Jerusɛlɛm insay di ia 33, ɛn da de de na bin Pɛntikɔst. Na bin lɛk 120 disaypul dɛn bin de togɛda ɔp wan rum na wan os. (Akt 1:​13-15; 2:​1) Sɔm dez bifo da tɛm de, Jizɔs bin dɔn tɛl dɛn fɔ de na Jerusɛlɛm bikɔs dɛn go gɛt wan spɛshal gift. (Akt 1:​4, 5) Wetin bin apin afta dat?

2 “Wantɛm, dɛn yɛri nɔys lɛkɛ big briz.” Di nɔys bin de ɔlsay na di os. Dɔn, di disaypul dɛn si “tin dɛn lɛkɛ lili lili faya” pantap dɛn ed dɛn, ɛn “Gɔd in Spirit kam insay dɛn ɔl.” (Akt 2:​2-4) Na dis kayn spɛshal we Jiova bin put in oli spirit pan dɛn disaypul dɛn de. (Akt 1:​8) Dɛn na bin di fɔs pipul dɛn we Jiova anɔynt wit in oli spirit * ɛn gi dɛn di op fɔ rul wit Jizɔs na ɛvin.

WETIN KIN APIN WE GƆD ANƆYNT SƆMBƆDI?

3. Wetin mek di Kristian dɛn we dɛn bin anɔynt wit oli spirit insay Pɛntikɔst nɔ bin gɛt wan dawt fɔ se Gɔd dɔn anɔynt dɛn?

3 If yu na bin wan pan di disaypul dɛn we bin gɛda ɔp da rum de da de de, yu nɔ fɔ dɔn ɛva fɔgɛt wetin bin apin. Sɔntin we tan lɛk smɔl smɔl faya bin kam pantap yu ed, ɛn yu bin stat fɔ tɔk difrɛn langwej dɛn! (Akt 2:​5-12) Yu nɔ go gɛt wan dawt fɔ se Jiova dɔn  anɔynt yu wit in oli spirit. Bɔt fɔ se dis wɔndaful tin kin apin to ɔl di wan dɛn we Jiova de anɔynt wit in oli spirit di sem we ɛn di sem tɛm? Nɔ, nɔto so i bi. Aw wi no dat?

4. Fɔ se na ɔl di anɔyntɛd wan dɛn insay di fɔstɛm Kristian dɛn tɛm Gɔd bin anɔynt di sem tɛm? Ɛksplen.

4 Lɛ wi tɔk bɔt ustɛm pɔsin kin bi anɔyntɛd. Nɔto di 120 Kristian dɛn nɔmɔ Gɔd bin anɔynt wit in oli spirit di de fɔ Pɛntikɔst insay di ia 33. Leta da sem de de, na bin lɛk 3,000 ɔda pipul dɛn bin gɛt di oli spirit we Jizɔs bin dɔn prɔmis se i go gi dɛn. Gɔd bin anɔynt dɛn we dɛn baptayz. (Akt 2:​37, 38, 41) Bɔt afta dat, nɔto ɔl anɔyntɛd Kristian dɛn Gɔd bin anɔynt di tɛm we dɛn bin de baptayz. Gɔd bin anɔynt di Samɛritan dɛn afta sɔm tɛm we dɛn baptayz. (Akt 8:​14-17) Ɛn di we aw Gɔd bin anɔynt Kɔniliɔs ɛn di wan dɛn we bin de na in os bin rili strenj, bikɔs i bin anɔynt dɛn ivin bifo dɛn baptayz.—Akt 10:​44-48.

5. Frɔm wetin de na Sɛkɛn Lɛta Fɔ Kɔrint 1:​21, 22, wetin de apin to pɔsin we Jiova dɔn anɔynt wit oli spirit?

5 Lɛ wi tɔk bak bɔt wetin kin apin we Gɔd anɔynt sɔmbɔdi wit oli spirit. I nɔ kin izi fɔ sɔm pan di wan dɛn we Gɔd dɔn anɔynt fɔ gri se i dɔn pik dɛn fɔ go na ɛvin. Dɛn kin wɔnda se: ‘Wetin mek Gɔd pik mi?’ Ɔda wan dɛn nɔ kin fil dis kayn we. Bɔt ilɛk aw dɛn de fil, di apɔsul Pɔl bin ɛksplen wetin kin apin to ɔl di wan dɛn we Jiova de anɔynt. I bin tɔk se: “Afta una biliv, Gɔd stamp * una tru am wit di oli spirit we i bin dɔn prɔmis una, we na garanti we i dɔn gi wi bifo tɛm fɔ sho se wi go gɛt wetin i prɔmis.” (Ɛfi. 1:13, 14, NWT) So Jiova kin yuz in oli spirit fɔ sho dɛn Kristian dɛn ya klia wan se i dɔn pik dɛn fɔ go de na ɛvin. Bay da we de, di oli spirit kin mek  dɛn “no se” ɔ pruv to dɛn se tumara bambay dɛn go de na ɛvin sote go, nɔto dis wɔl dɛn go de.—Rid Sɛkɛn Lɛta Fɔ Kɔrint 1: 21, 22.

6. Wetin pɔsin we na anɔyntɛd Kristian nid fɔ du fɔ gɛt wetin Gɔd dɔn prɔmis am?

6 We Jiova anɔynt pɔsin, fɔ se natin nɔ go pwɛl am i go gɛt wetin Jiova dɔn prɔmis am? Nɔ, nɔto so i bi. Di pɔsin go no se Jiova dɔn pik am fɔ go na ɛvin. Bɔt i fɔ mɛmba wetin di Baybul tɔk we se: “Mi Kristian brɔda dɛn, na dat mek una fɔ tray fɔ du di wok we sho se Gɔd kɔl una ɛn pik una fɔ tru; if una du ɔl dɛn tin ya, una nɔ go lɛf fɔ biliv pan Gɔd ɛn tap fɔ waka wit Gɔd.” (2 Pit. 1:​10) So ilɛksɛf Gɔd dɔn pik ɔ kɔl anɔyntɛd Kristian fɔ go na ɛvin, i go gɛt da prɔmis de nɔmɔ if i kɔntinyu fɔ de fetful wan.—Fil. 3:​12-14; Ibru 3:​1; Rɛv. 2:​10.

AW SƆMBƆDI GO NO SE GƆD DƆN ANƆYNT AM?

7. Aw di anɔyntɛd dɛn go no se Gɔd dɔn kɔl dɛn fɔ go na ɛvin?

7 Bɔt aw pɔsin go no se Gɔd dɔn kɔl am fɔ go na ɛvin? Wi si di ansa klia wan frɔm wetin Pɔl bin tɛl di Kristian dɛn na Rom we Gɔd “kɔl fɔ bi in yon pipul.” Pɔl bin tɛl dɛn se: “Di Spirit we Gɔd gi una nɔ mek una bi slev ɛn i nɔ de mek una fred, bɔt i mek una bi Gɔd in pikin dɛn ɛn nain de mek wi se, ‘Papa, mi Papa,’ we wi de kɔl Gɔd. Gɔd in Spirit wit wi yon spirit de tɔk di sem tin se wi na Gɔd in pikin dɛn.” (Rom 1:​7; 8:​15, 16) So Gɔd kin yuz in oli spirit fɔ mek di anɔyntɛd dɛn no klia wan se i dɔn kɔl dɛn fɔ go na ɛvin.—1 Tɛs. 2:​12.

8. Aw 1 Jɔn 2:​20, 27 (NWT), sho se anɔyntɛd Kristian dɛn nɔ nid ɛnibɔdi fɔ tɛl dɛn se Jiova dɔn anɔynt dɛn?

8 Jiova go mek di wan dɛn we i dɔn pik fɔ go na ɛvin nɔ gɛt wan dawt fɔ se i dɔn kɔl dɛn. (Rid 1 Jɔn 2:​20, 27, NWT.) Jɔs lɛk aw Jiova de yuz di kɔngrigeshɔn fɔ tich ɛni wan pan wi, na so i de tich di anɔyntɛd Kristian dɛn. Bɔt dɛn nɔ nid ɛnibɔdi fɔ tɛl dɛn se Jiova dɔn anɔynt dɛn. Wetin mek? Na bikɔs Jiova dɔn yuz in oli spirit we pawaful pas ɛni ɔda tin na dis wan ol wɔl, fɔ mek dɛn no klia wan se i dɔn anɔynt dɛn!

DƐN “BƆN SƐKƐN TƐM”

9. Frɔm wetin de na Lɛta Fɔ Ɛfisɔs 1:​18, wetin de apin to sɔmbɔdi we Jiova dɔn anɔynt?

9 I nɔ kin izi fɔ bɔku pan Gɔd in savant dɛn tide fɔ ɔndastand wetin kin apin to sɔmbɔdi we Gɔd dɔn anɔynt. Wetin mek? Na bikɔs dɛn nɔto anɔyntɛd dɛn. Gɔd bin mek mɔtalman fɔ de sote go na dis wɔl, nɔto ɛvin. (Jɛn. 1:​28; Sam 37:​29) Bɔt Jiova dɔn pik sɔm pipul dɛn fɔ go na ɛvin. We Jiova anɔynt dɛn, i de rili chenj di op we dɛn gɛt ɛn di we aw dɛn de tink, so dɛn de wet fɔ di layf we dɛn go gɛt na ɛvin.—Rid Lɛta Fɔ Ɛfisɔs 1:​18.

10. Wetin i min fɔ “bɔn sɛkɛn tɛm”? (Luk bak di futnot.)

10 We Jiova anɔynt Kristian dɛn wit oli spirit, dɛn dɔn “bɔn sɛkɛn tɛm,” ɔ bɔn frɔm ɛvin. * Jizɔs in bak bin tɔk se i nɔ pɔsibul fɔ ɛksplen kɔrɛkt wan to sɔmbɔdi we nɔto anɔyntɛd aw i tan lɛk fɔ “bɔn sɛkɛn tɛm,” ɔ “wɛn Gɔd in Spirit gi pɔsin nyu layf.”—Jɔn 3:​3-8.

11. Ɛksplen aw Kristian dɛn kin stat fɔ tink difrɛn we we Gɔd anɔynt dɛn.

 11 Aw Kristian dɛn kin stat fɔ tink difrɛn we we Gɔd anɔynt dɛn? Bifo Jiova anɔynt dɛn Kristian dɛn ya, dɛn bin rili valyu di op we dɛn bin gɛt fɔ de sote go na dis wɔl. Dɛn bin de rili wet fɔ di tɛm we Jiova go pul ɔl di bad bad tin dɛn we de apin ɛn mek dis wɔl bi Paradays. Sɔntɛm dɛn bin de imajin se dɛn go de na dis wɔl ɛn wɛlkɔm bak dɛn fambul dɛn ɔ padi dɛn we bin dɔn day. Bɔt afta we Gɔd dɔn anɔynt dɛn, dɛn bigin fɔ tink difrɛn we. Wetin mek? Nɔto bikɔs dɛn tink se dɛn nɔ go gɛt gladi-at if dɛn de na dis wɔl sote go. Dɛn nɔ bin chenj dɛn maynd bikɔs dɛn at pwɛl ɔ dɛn dɔn sɔfa pasmak. Dɛn nɔ jɔs grap wande ɛn fil se dɛn go gens fɔ liv na dis wɔl sote go. Bifo dat, Jiova yuz in oli spirit fɔ chenj di we aw dɛn de tink ɛn di op we dɛn gɛt we dɛn rili valyu.

12. Frɔm wetin de na Pita In Fɔs Lɛta 1:​3, 4, aw anɔyntɛd Kristian dɛn de fil bɔt di op we dɛn gɛt?

12 Di pɔsin we Gɔd kin dɔn anɔynt kin fil se i nɔ fit fɔ gɛt dis big big ɔnɔ. Bɔt i nɔ de ɛva dawt se Jiova dɔn pik am. Di pɔsin kin rili gladi ɛn i kin tɛl Jiova tɛnki ɛnitɛm we i tink bɔt di op we i gɛt fɔ go de na ɛvin.—Rid Pita In Fɔs Lɛta 1:​3, 4.

13. Aw di anɔyntɛd dɛn de fil bɔt layf na dis wɔl?

13 So fɔ se dis min se anɔyntɛd Kristian dɛn want fɔ day? Di apɔsul Pɔl bin ansa da kwɛstyɔn de. I bin kɔmpia dɛn mɔtalman bɔdi to os ɛn tɔk se: “Wɛn wi de insay wi os we de na dis wɔl, dat na wi bɔdi, wi de pini lɛkɛ se na ebi ebi lod wi tot; nɔto fɔ se wi want kɔmɔt insay di bɔdi we wi gɛt na dis wɔl, bɔt wi want mek Gɔd put di bɔdi we kɔmɔt ɛvin pan wi, so dat dis bɔdi ya we de day go gɛt layf we go de sote go.” (2 Kɔr. 5:​4) Dɛn Kristian dɛn ya nɔ gens wit layf na dis wɔl ɛn jɔs want fɔ day kwik kwik wan. Bɔt dɛn de ɛnjɔy layf ɛn dɛn want fɔ sav Jiova wit dɛn famili ɛn padi dɛn ɛvride. Ɛn ilɛk wetin dɛn de du, dɛn want fɔ tink ɔltɛm bɔt di wɔndaful op we dɛn go gɛt tumara bambay.—1 Kɔr. 15:​53; 2 Pit. 1:​4; 1 Jɔn 3:​2, 3, NWT; Rɛv. 20:​6.

JIOVA DƆN ANƆYNT YU?

14. Wetin nɔ de sho se Jiova dɔn anɔynt pɔsin wit in oli spirit?

14 Sɔntɛm yu go de wɔnda if Jiova dɔn anɔynt yu wit in oli spirit. If na so i bi, tink bɔt dɛn impɔtant kwɛstyɔn dɛn ya: Yu kin rili want fɔ du wetin Jiova want pas ɛni ɔda tin? Yu de fil se yu rili gɛt zil fɔ du di prichin wok? Yu de rili ɛnjɔy fɔ stɔdi di Baybul ɛn lan bɔt “di dip tin dɛn bɔt Gɔd”? (1 Kɔr. 2:​10, NWT) Yu de fil se Jiova dɔn rili blɛs yu prichin wok? Yu rili lɛk ɔda pipul dɛn ɛn yu de fil se na yu wok fɔ ɛp dɛn fɔ sav Jiova? Yu dɔn si klia wan se Jiova dɔn ɛp yu pan bɔku bɔku tin dɛn na yu layf? If yu ansa to ɔl dɛn kwɛstyɔn dɛn ya na yɛs, fɔ se dis pruv se Jiova dɔn kɔl yu fɔ go de na ɛvin? Nɔ, nɔto so i bi. Wetin mek? Na bikɔs ɔl Gɔd in savant dɛn kin fil dis sem we, ilɛksɛf dɛn na anɔyntɛd ɔ nɔto anɔyntɛd. Ɛn Jiova kin yuz in oli spirit fɔ gi di sem pawa to ɛni wan pan in savant dɛn, ilɛk us op dɛn gɛt. Infakt, if yu de dawt if yu go go na ɛvin, dat min se Jiova kɔl yu. Di wan dɛn we Jiova dɔn kɔl nɔ de dawt! Dɛn no se Jiova dɔn kɔl dɛn!

Jiova bin yuz in oli spirit fɔ gi Ebraam, Sera, Devid, ɛn Jɔn we bin de baptayz pipul dɛn di pawa fɔ du wɔndaful tin dɛn, bɔt i nɔ bin yuz am fɔ gi dɛn di op fɔ go de na ɛvin (Luk na paregraf 15 ɛn 16) *

15. Aw wi no se nɔto ɔl di wan dɛn we Gɔd dɔn gi in oli spirit i dɔn pik fɔ go de na ɛvin?

 15 Insay di Baybul, wi gɛt bɔku ɛgzampul dɛn bɔt fetful pipul dɛn we Jiova bin gi in oli spirit, bɔt we nɔ bin gɛt di op fɔ go na ɛvin. Jiova bin de yuz in oli spirit fɔ gayd Devid. (1 Sam. 16:​13) Di oli spirit bin ɛp Devid fɔ ɔndastand dip tin dɛn bɔt Jiova ɛn ɛp am bak fɔ rayt sɔm pat dɛn na di Baybul. (Mak 12:​36) Pan ɔl dat, di apɔsul Pita bin tɔk se Devid “nɔ bin go ɔp na ɛvin.” (Akt 2:​34) Di ‘oli spirit bin de pan’ Jɔn we bin de baptayz pipul dɛn. (Lyuk 1:​13-16, NWT) Jizɔs bin se no mɔtalman nɔ de we pas Jɔn, bɔt i tɔk bak se Jɔn nɔto wan pan di wan dɛn we gɛt fɔ go na ɛvin. (Mat. 11:​10, 11) Jiova bin yuz in oli spirit fɔ gi dɛn man dɛn ya pawa fɔ du wɔndaful tin dɛn, bɔt i nɔ bin yuz am fɔ pik dɛn fɔ go de na ɛvin. Fɔ se dis min se dɛn nɔ rili fetful lɛk di wan dɛn we Jiova pik fɔ rul na ɛvin? Nɔ, nɔto so i bi. I jɔs min se Jiova go gi dɛn layf bak fɔ de na Paradays na dis wɔl.—Jɔn 5:​28, 29; Akt 24:​15.

16. Us op we bɔku pan Gɔd in savant dɛn tide de wet fɔ?

16 Bɔku pan Gɔd in savant dɛn tide we de na dis wɔl nɔ gɛt di op fɔ go de na ɛvin. Jɔs lɛk Ebraam, Sera, Devid, Jɔn we bin de baptayz pipul dɛn, ɛn bɔku bɔku ɔda man ɛn uman dɛn we bin de di tɛm we dɛn bin de rayt di Baybul, dɛn de wet fɔ di tɛm we dɛn go de na dis wɔl ɔnda Gɔd in Kiŋdɔm.—Ibru 11:​10.

17. Us kwɛstyɔn dɛn wi go tɔk bɔt insay di nɛks atikul?

17 Bikɔs sɔm anɔyntɛd wan dɛn stil de na dis wɔl wit Gɔd in pipul dɛn tide, dat de mek wi kin gɛt sɔm kwɛstyɔn dɛn. (Rɛv. 12:​17) Fɔ ɛgzampul, aw anɔyntɛd wan dɛn fɔ si dɛnsɛf? If sɔmbɔdi na yu kɔngrigeshɔn bigin fɔ it di bred ɛn drink di wayn na di Mɛmorial, aw yu fɔ trit am? Ɛn wetin yu go du if di wan dɛn we de se dɛn na anɔyntɛd de bɔku mɔ ɛn mɔ? Yu tink se yu fɔ wɔri bɔt dat? Wi go ansa dɛn kwɛstyɔn dɛn ya insay di nɛks atikul.

^ par. 5 Frɔm Pɛntikɔst insay di ia 33 te to dis wi yon tɛm, Jiova dɔn de gi sɔm Kristian dɛn wan wɔndaful op, we na fɔ rul wit in Pikin na ɛvin. Bɔt aw dɛn Kristian dɛn ya no se Jiova dɔn pik dɛn fɔ gɛt dis wɔndaful blɛsin? Wetin kin apin we Jiova kɔl sɔmbɔdi fɔ go na ɛvin? Dis atikul gɛt sɔntin fɔ du wit wan atikul we de insay di Janwari 2016 Wachtawa. Dis atikul go ansa dɛn impɔtant kwɛstyɔn dɛn de.

^ par. 2 WƆD WE DƐN ƐKSPLEN: Fɔ anɔynt wit oli spirit: Jiova de yuz in oli spirit fɔ pik di wan dɛn we de rul wit Jizɔs na ɛvin. Gɔd de yuz in oli spirit fɔ prɔmis di pɔsin bɔt di op we i gɛt tumara bambay, ɔ ‘garanti we i dɔn gi bifo tɛm.’ (Ɛfi. 1:​13, 14, NWT) Dɛn Kristian dɛn ya kin tɔk se di oli spirit “de tɔk” ɔ mek dɛn no klia wan se dɛn gɛt di op fɔ go na ɛvin.—Rom 8:​16.

^ par. 5 WƆD WE DƐN ƐKSPLEN: Stamp. We Jiova stamp pɔsin, dat nɔ min se di stamp go de sote go. Jiova go mek di pɔsin no dat shɔt tɛm bifo i day fetful wan ɔ shɔt tɛm bifo di big big trɔbul bigin.—Ɛfi. 4:​30; Rɛv. 7:​2-4; Luk “Questions From Readers” insay di Epril 2016 Wachtawa.

^ par. 10 Fɔ no mɔ bɔt wetin i min fɔ “bɔn sɛkɛn tɛm,” luk di Epril 1, 2009 Wachtawa, pej 3 to pej 12.

SIŊ 27 Gɔd Go Sho In Pikin Dɛn

^ par. 57 SMƆL TIN BƆT DI PIKCHƆ: Ilɛksɛf wi de na prizin fɔ wetin wi biliv ɔ wi fri fɔ prich ɛn tich ɔda pipul dɛn di trut, wi ɔl de wet fɔ di tɛm we wi go de na dis wɔl ɔnda Gɔd in Kiŋdɔm.