Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 4

Wetin Wan Simpul ɛn Spɛshal Mitin De Tich Wi bɔt Wan Kiŋ na Ɛvin?

Wetin Wan Simpul ɛn Spɛshal Mitin De Tich Wi bɔt Wan Kiŋ na Ɛvin?

“Dis min mi bɔdi. . . . dis min mi ‘blɔd we mek di agrimɛnt.’”—MAT. 26:​26-28, NW.

SIŊ 16 Prez Gɔd fɔ In Pikin we I Anɔynt

WETIN WI GO LAN? *

1-2. (a) Wetin mek wi nɔ sɔprayz fɔ no se Jizɔs bin yuz simpul we fɔ mek wi mɛmba in day? (b) Us kwaliti dɛn Jizɔs gɛt we wi go tɔk bɔt?

YU GO ebul fɔ ɛksplen wetin kin apin na di Mɛmorial we wi kin gɛt wan tɛm pan ia fɔ mɛmba Krays in day? Bɔku pan wi go mɔs mɛmba di tin dɛn we kin apin na di Mɛmorial. Wetin mek? Na bikɔs di program rili simpul. Bɔt dis na impɔtant program. So wi kin aks, ‘Wetin mek di program rili simpul?’

2 Di tɛm we Jizɔs bin de na dis wɔl, pipul dɛn bin sabi am se i bin de tich di tru ɛn impɔtant tin dɛn simpul wan, klia wan, ɛn izi wan fɔ lɛ pipul dɛn ɔndastand. (Mat. 7:​28, 29) I bin du di sem tin, bay we i bin sho wi simpul we fɔ mɛmba di day we i day fɔ wi. Lɛ wi tek tɛm tink bɔt dis Mɛmorial * program ɛn sɔm pan di tin dɛn we Jizɔs bin tɔk ɛn du. Wi go rili kam fɔ ɔndastand aw Jizɔs bin ɔmbul, gɛt maynd, aw i lɛk wi, ɛn wi go lan aw wi kin falamakata am fayn fayn wan.

JIZƆS ƆMBUL

Di bred ɛn di wayn na di Mɛmorial de mɛmba wi se Jizɔs gi in layf fɔ wi ɛn i de rul naw as wi Kiŋ na ɛvin (Luk na paregraf 3 to 5)

3. Frɔm wetin de na Matyu 26:​26-28 (NW), aw Jizɔs bin mek di Mɛmorial simpul? Wetin di bred ɛn di wayn tinap fɔ?

3 Jizɔs bin de wit in 11 fetful apɔsul dɛn we i bin mek di Mɛmorial fɔ in day. I bin tek wetin bin lɛf frɔm di Pasova it ɛn mek dis simpul program. (Rid Matyu 26:​26-28, NW.) I bin yuz jɔs di bred ɛn wayn we dɛn  bin gɛt. Jizɔs bin tɛl in apɔsul dɛn se dɛn tu tin dɛn de tinap fɔ in pafɛkt bɔdi ɛn blɔd, we i nɔ go te igen i go sakrifays fɔ dɛn. I go bi se di apɔsul dɛn nɔ bin sɔprayz fɔ si aw dis nyu impɔtant program bin simpul. Wetin mek?

4. Aw di advays we Jizɔs bin gi Mata ɛp wi fɔ ɔndastand wetin mek i bin mek di Mɛmorial simpul?

4 Tink bɔt wetin bin apin insay di tɔd ia we Jizɔs bin de du in prichin wok, we i bin go fɛn in tayt padi dɛn we nem Lazarɔs, Mata, ɛn Meri. Dɛn bin sidɔm saful we Jizɔs bin bigin fɔ tich. Mata bin de, bɔt i bin bizi de kuk bɔku it fɔ in strenja. We Jizɔs bin si dis, i bin tek tɛm kɔrɛkt Mata, bay we i bin ɛp am fɔ si se nɔto ɔltɛm i impɔtant fɔ mek bɔku bɔku it. (Lyuk 10:​40-42) Leta, smɔl tɛm bifo Jizɔs sakrifays in layf fɔ wi, i bin fala in yon advays. I bin mek shɔ se di Mɛmorial simpul. Wetin dis de tɛl wi bɔt Jizɔs?

5. We di Mɛmorial program simpul, wetin dat de tich wi bɔt Jizɔs? Wetin dis gɛt fɔ du wit Lɛta fɔ Filipay 2:​5-8 (NW)?

5 Jizɔs bin sho se i ɔmbul pan ɔltin we i bin de tɔk ɛn du. So wi nɔ sɔprayz we Jizɔs bin sho se i rili ɔmbul di las nɛt we i bin spɛn na dis wɔl as mɔtalman. (Mat. 11:​29) Jizɔs bin no se i de kam mek di sakrifays we pas ɔl na mɔtalman istri ɛn Jiova gɛt fɔ gi am layf bak fɔ bi kiŋ na ɛvin. Pan ɔl we Jizɔs bin no dis, i nɔ mek pipul dɛn put tumɔs atɛnshɔn pan am bay we i go mek big big program fɔ mɛmba di day we i de day. Bifo dat, i bin tɛl in disaypul dɛn se dɛn fɔ mɛmba am wan tɛm insay di ia bay we dɛn de mek dis simpul program. (Jɔn 13:​15; 1 Kɔr. 11:​23-25, NW) Dis simpul program bin sho se Jizɔs nɔto prawd pɔsin. Wi gladi fɔ no se wi Kiŋ na ɛvin ɔmbul ɛn dat na wan pan in men kwaliti dɛn.—Rid Lɛta fɔ Filipay 2:​5-8, NW.

6. Aw wi go falamakata Jizɔs fɔ put wisɛf dɔŋ we wi gɛt prɔblɛm?

6 Aw wi go falamakata Jizɔs fɔ bi ɔmbul pɔsin? Na bay we wi de put ɔda pipul dɛn biznɛs bifo wi yon. (Fil. 2:​3, 4) Tink bak bɔt Jizɔs in las nɛt na dis wɔl. Jizɔs bin no se i nɔ go te igen i go sɔfa ɛn day; bɔt i bin rili wɔri bɔt in fetful apɔsul dɛn, we go lɛf de kray fɔ am. So i bin spɛn in las nɛt de tich, ɛnkɔrej, ɛn tɔk to dɛn fɔ lɛ dɛn  at nɔ pwɛl. (Jɔn 14:​25-31) Jizɔs bin sho se i bisin mɔ bɔt ɔda pipul dɛn pas insɛf. Dis na fayn ɛgzampul fɔ wi!

JIZƆS GƐT MAYND

7. Aw Jizɔs bin sho se i gɛt maynd jɔs afta we i sho aw fɔ mek di Mɛmorial?

7 Jɔs afta we Jizɔs bin sho aw fɔ mek di Mɛmorial, i bin sho se i rili gɛt maynd. Aw i bin du dat? Jizɔs bin gri fɔ du wetin in Papa want pan ɔl we i bin no se dɛn go kil am fɔ shemful shemful kraym. (Mat. 26:​65, 66; Lyuk 22:​41, 42) Jizɔs bin kɔntinyu fɔ de biɛn Jiova so dat i go ɔnɔ In nem, sɔpɔt In rayt fɔ rul, ɛn i mek am pɔsibul fɔ lɛ di wan dɛn we dɔn ripɛnt gɛt layf we go de sote go. Dɔn bak, Jizɔs bin mek di wan dɛn we de fala am rɛdi fɔ di tin dɛn we go mit dɛn.

8. (a) Wetin Jizɔs bin tɛl in fetful apɔsul dɛn? (b) Afta we Jizɔs day, aw in disaypul dɛn bin fala in ɛgzampul fɔ gɛt maynd?

8 Jizɔs bin sho se i gɛt maynd bay we i nɔ bin de tink bɔt wetin gɛt fɔ apin to am, ɛn bay we i bin pe atɛnshɔn to di tin dɛn we in fetful apɔsul dɛn nid. Di simpul program we Jizɔs bin sho dɛn afta we i bin mek Judas go, go mɛmba di wan dɛn we go bi in anɔyntɛd brɔda dɛn bɔt di bɛnifit we Jizɔs in blɔd gɛt ɛn we go bi pat pan di nyu agrimɛnt. (1 Kɔr. 10:​16, 17) Fɔ ɛp dɛn fɔ kɔntinyu fɔ de fetful wan ɛn fɔ de wit Jizɔs na ɛvin, Jizɔs bin tɛl in disaypul dɛn wetin in ɛn in Papa want dɛn fɔ du. (Jɔn 15:​12-15) Jizɔs bin tɛl in apɔsul dɛn bɔt di prɔblɛm dɛn we gɛt fɔ mit dɛn. Dɔn, i bin ɛnkɔrej dɛn fɔ fala in ɛgzampul bay we i bin advays dɛn “nɔ [fɔ] fred!”  (Jɔn 16:​1-4a, 33) Afta lɔng tɛm, Jizɔs in disaypul dɛn bin stil de falamakata in fayn ɛgzampul fɔ put ɔda pipul dɛn yon biznɛs fɔs pas dɛn yon ɛn fɔ gɛt maynd. Pan ɔl we i min se dɛn go sɔfa, dɛn bin stil de sɔpɔt dɛnsɛf wit di difrɛn prɔblɛm dɛn we dɛn bin de gɛt.—Ibru 10:​33, 34.

9. Aw wi go falamakata Jizɔs fɔ sho se wi gɛt maynd?

9 Semweso tide, wi de fala Jizɔs in ɛgzampul bay we wi de sho se wi gɛt maynd. Fɔ ɛgzampul, wi rili nid fɔ gɛt maynd fɔ ɛp wi brɔda ɛn sista we dɛn de mek dɛn sɔfa fɔ wetin dɛn biliv. Sɔntɛnde, dɛn kin put wi brɔda dɛn na jel fɔ natin. We dat apin, wi fɔ du ɔl wetin wi ebul fɔ tɔk fɔ dɛn. (Fil. 1:​14; Ibru 13:​19) Wan ɔda we we wi go sho se wi gɛt maynd na bay we wi de kɔntinyu fɔ prich ɛn nɔ “fred.” (Akt 14:​3) Jɔs lɛk Jizɔs, wi dɔn mekɔp wi maynd fɔ prich di mɛsej bɔt di Kiŋdɔm pan ɔl we pipul dɛn go de agens wi ɛn de mek wi sɔfa. Sɔntɛnde, wi kin si se wi nɔ gɛt maynd. Wetin wi go du?

10. Wetin wi fɔ du insay di wik bifo di Mɛmorial? Wetin mek?

10 Wi kin ɛnkɔrej wisɛf bay we wi de tink bɔt di op we Krays in day dɔn mek pɔsibul fɔ wi. (Jɔn 3:​16; Ɛfi. 1:​7, NW) Insay di wik bifo di Mɛmorial, wi gɛt spɛshal chans fɔ sho se wi gladi fɔ di day we Jizɔs day fɔ wi. Da tɛm de, na tɛm fɔ kɔntinyu de du di Mɛmorial Baybul ridin ɛn tek tɛm tink bɔt di tin dɛn we bin apin di tɛm we Jizɔs fɔ day. Dɔn we wi go di Mɛmorial, wi go ɔndastand mɔ wetin di bred ɛn di wayn tinap fɔ ɛn di spɛshal sakrifays. We wi  ɔndastand wetin Jizɔs ɛn Jiova dɔn du fɔ wi ɛn aw i go bɛnifit wi ɛn di wan dɛn we wi lɛk, wi op we wi gɛt fɔ tumara bambay go strɔng mɔ ɛn mɔ, ɛn dat go ɛp wi fɔ gɛt maynd fɔ bia te di ɛnd kam.—Ibru 12:​3.

11-12. Wetin wi dɔn lan?

11 So wi dɔn lan se di Mɛmorial nɔ jɔs de mek wi mɛmba bɔt di day we Jizɔs day fɔ wi, bɔt i de mɛmba wi bak bɔt in fayn fayn kwaliti dɛn we i gɛt lɛk fɔ gɛt maynd ɛn fɔ ɔmbul. Wi rili gladi fɔ no se Jizɔs de stil sho se i gɛt dɛn kwaliti dɛn ya as wi Ay Prist, we de beg fɔ wi! (Ibru 7:​24, 25) Fɔ sho se wi rili gladi, wi fɔ mɛmba Jizɔs in day jɔs lɛk aw i tɛl wi fɔ du. (Lyuk 22:​19, 20, NW) Wi de du am di sem de we na Naysan 14, we na di de we impɔtant pas ɔl insay di ia.

12 Wi kin lan wan ɔda kwaliti we bin mek Jizɔs day fɔ wi frɔm di we aw di Mɛmorial bin simpul. We i bin de na dis wɔl, bɔku pipul dɛn bin no am fɔ dis kwaliti. Wetin na dis kwaliti?

JIZƆS LƐK WI

13. Aw Jɔn 15:​9 ɛn Jɔn In Fɔs Lɛta 4:​8-10 tɔk bɔt di lɔv we Jiova ɛn Jizɔs dɔn sho? Udat dɛn de bɛnifit frɔm di lɔv we dɛn de sho?

13 Jizɔs bin falamakata gud gud wan di kayn lɔv we Jiova gɛt fɔ wi pan ɛnitin we i de du. (Rid Jɔn 15:​9; 1 Jɔn 4:​8-10.) Di tin we pas ɔl na dat, Jizɔs bin rɛdi fɔ gi in layf fɔ wi. Ilɛk wi na anɔyntɛd ɔ di “ɔda ship,” wi de bɛnifit frɔm di lɔv we Jiova ɛn Jizɔs dɔn sho wi bay di sakrifays we Jizɔs bin mek fɔ wi. (Jɔn 10:​16; 1 Jɔn 2:​2) Tink bak, bɔt di tin dɛn we wi de yuz fɔ di Mɛmorial; dat de sho di kayn lɔv we Jizɔs gɛt fɔ in disaypul dɛn ɛn di we aw i bin bisin bɔt dɛn. Aw?

Jizɔs bin sho se i lɛk wi bay we i bin mek di Mɛmorial simpul wan di kayn we we pipul dɛn go du am fɔ lɔng tɛm, ilɛk usay dɛn de (Luk na paregraf 14 to 16) *

14. Aw Jizɔs bin sho se i lɛk in disaypul dɛn?

14 Jizɔs bin sho se i lɛk in anɔyntɛd brɔda dɛn bay we i nɔ bin mek big big program, bɔt i mek simpul wan fɔ de mɛmba am. As tɛm de go, dɛn anɔyntɛd disaypul dɛn ya bin nid fɔ de mek di Mɛmorial ɛni ia, ɛn dɛn bin de du am difrɛn say dɛn, ivin na jel. (Rɛv. 2:​10) Yu tink se dɛn bin ebul fɔ obe Jizɔs? Yɛs, dɛn bin ebul!

15-16. Aw sɔm pan wi brɔda ɛn sista dɛn bin ebul fɔ mek di Mɛmorial pan ɔl we i nɔ bin izi fɔ dɛn?

15 Frɔm di apɔsul dɛn tɛm te to wi yon tɛm, tru Kristian dɛn dɔn tray tranga wan fɔ de mɛmba Jizɔs in day. Dɛn bin de fala di we aw Jizɔs bin tich dɛn fɔ mek di Mɛmorial pan ɔl we sɔntɛnde i nɔ rili izi fɔ dɛn. Tink bɔt dɛn ɛgzampul dɛn ya. We Brɔda Arɔld Kiŋ bin de in wangren na wan prizin na Chayna, i bin gɛt fɔ fɛn we fɔ du di Mɛmorial. I bin tek tɛm fɔ lɛ nɔbɔdi nɔ si am we i bin de yuz wetin i gɛt fɔ pripia di bred ɛn di wayn fɔ di Mɛmorial. I bin tek tɛm kɔnt di det fɔ di Mɛmorial. We di tɛm rich fɔ di Mɛmorial, in wangren bin siŋ, pre, ɛn gi tɔk frɔm di Baybul.

16 Lɛ wi tɔk bɔt wan ɔda ɛgzampul. Sɔm sista dɛn we bin de na prizin insay Wɔl Wɔ Tu bin put dɛn layf pan denja fɔ mek di Mɛmorial. Bɔt bikɔs di tin dɛn we dɛn bin yuz bin rili simpul, dɛn bin ebul fɔ mek di Mɛmorial ɛn nɔbɔdi nɔ notis dɛn. Dɛn bin tɔk se: “Wi ɔl bin tinap togɛda rawnd wan stul we bin kɔba wit wayt klos, ɛn di bred ɛn wayn  bin de pantap di stul. Wi bin layt kandul na di rum bikɔs di ilɛktrik layt bin fɔ dɔn mek pipul dɛn no wetin wi bin de pan. . . . Wi bin ripit di prɔmis we wi bin dɔn mek to wi Papa fɔ se wi go yuz ɔl wi trɛnk fɔ ɔnɔ in oli nem.” Dis na fayn we we dɛn sho se dɛn gɛt fet! Ɛn dis de sho di kayn lɔv we Jizɔs bin sho bay we i bin mek am pɔsibul fɔ wi fɔ mek di Mɛmorial pan ɔl we i nɔ rili izi fɔ wi!

17. Us kwɛstyɔn dɛn wi go aks wisɛf?

17 We di Mɛmorial de kam, i go fayn fɔ lɛ wi aks wisɛf dɛn kwɛstyɔn dɛn ya: ‘Aw a go tek tɛm falamakata Jizɔs fɔ sho lɔv? A de tink mɔ bɔt wetin mi brɔda ɛn sista dɛn nid pas wetin a nid? A de tink se mi brɔda ɛn sista dɛn fɔ du mɔ pas wetin dɛn ebul fɔ du? Ɔ a no wetin dɛn nɔ ebul fɔ du?’ Lɛ wi falamakata Jizɔs ɔltɛm ɛn ‘lɛk wisɛf lɛkɛ brɔda ɛn sista.’—1 Pit. 3:​8.

GO DE MƐMBA DƐN LƐSIN DƐN YA FAYN FAYN WAN

18-19. (a) Wetin wi go biliv tranga wan bɔt? (b) Wetin yu dɔn mekɔp yu maynd fɔ du?

18 I nɔ go te igen, di arenjmɛnt fɔ de ol di Mɛmorial fɔ mɛmba Krays in day go dɔn. We Jizɔs go “kam” insay di gret tribyuleshɔn, i go gɛda “dɛn pipul we i dɔn pik fɔ bi in yon” fɔ go na ɛvin. Ɛn da tɛm de wi go stɔp fɔ de mek di Mɛmorial.—1 Kɔr. 11:​26; Mat. 24:​31.

19 Ivin afta we wi nɔ go de du di Mɛmorial igen, wi shɔ se Jiova in pipul dɛn go gladi fɔ mɛmba dis simpul program we de sho aw Jizɔs bin rili ɔmbul, gɛt maynd, ɛn lɛk wi. Da tɛm de, di wan dɛn we bin dɔn atɛnd dis wɔndaful program go tɛl ɔl di pipul dɛn we go de alayf, so dat dɛnsɛf go bɛnifit. Bɔt fɔ lɛ wi go bɛnifit frɔm dis program, wi fɔ mekɔp wi maynd fɔ falamakata Jizɔs fɔ lɛk wisɛf, ɔmbul, ɛn gɛt maynd. If wi du dat, wi go biliv tranga wan se Jiova go blɛs wi.—2 Pit. 1:​10, 11.

SIŊ 13 Jizɔs Krays Sɛt Fayn Ɛgzampul fɔ Wi

^ par. 5 I nɔ go te igen wi go atɛnd di Ivintɛm It fɔ Mɛmba di day we Jizɔs Krays day fɔ wi. Dis simpul program de tich wi bɔku tin bɔt aw Jizɔs ɔmbul, gɛt maynd, ɛn lɛk wi. Insay dis atikul wi go tɔk bɔt aw wi go falamakata dɛn fayn fayn kwaliti dɛn ya we Jizɔs bin sho.

^ par. 2 WƆD WE DƐN ƐKSPLEN: Mɛmorial min fɔ du spɛshal tin fɔ mɛmba impɔtant tin we bin apin ɛn fɔ ɔnɔ sɔmbɔdi.

^ par. 56 SMƆL TIN BƆT DI PIKCHƆ DƐN: Pej 22-23: Pipul dɛn we de sho aw di fɔstɛm fetful Kristian dɛn bin de mek di Mɛmorial na wan kɔngrigeshɔn; insay di let 1800; na Nazi kamp; ɛn insay wi yon tɛm na wan opin Kiŋdɔm Ɔl na Sawt Amɛrika insay dray sizin.