Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 7

Tray fɔ Bi Pɔsin We Ɔmbul ɛn Du Tin we Go Mek Jiova Gladi

Tray fɔ Bi Pɔsin We Ɔmbul ɛn Du Tin we Go Mek Jiova Gladi

“Ɔl udat de du wetin PAPA GƆD [“Jiova,” NW] want fɔ kɔntinyu fɔ du so . . . ɛn put dɛnsɛf dɔŋ fɔ du wetin i want.”—ZƐF. 2:​3.

SIŊ 80 “Tes ɛn Si se Jiova Gud”

WETIN WI GO LAN? *

1-2. (a) Wetin di Baybul tɔk bɔt Mozis? Wetin i bin du? (b) Us rizin wi gɛt fɔ tray fɔ bi pɔsin we ɔmbul?

DI Baybul tɔk bɔt Mozis se in “na bin pɔsin we put insɛf dɔŋ pas ɔlman we liv na di wɔl.” (Nɔm. 12:​3) Fɔ se dis min se Mozis bin wik, i bin de fred fɔ disayd fɔ du sɔntin, ɛn fred fɔ tinap tranga wan we ɔda pipul dɛn de agens am? Na da we de sɔm pipul dɛn de tɔk bɔt pɔsin we ɔmbul. Bɔt dat nɔto tru. Mozis bin strɔng, i bin de disayd fɔ du tin dɛn, ɛn i bin gɛt maynd. Jiova bin ɛp am fɔ go mit di pawaful kiŋ we bin de na Ijipt, i bin lid lɛk 3,000,000 pipul dɛn fɔ pas na di ɛmti land usay pɔsin nɔ go ebul fɔ liv, ɛn i bin ɛp di pipul dɛn na Izrɛl fɔ win di fɛt agens dɛn ɛnimi dɛn.

2 Wi nɔ gɛt di sem prɔblɛm dɛn we Mozis bin gɛt, bɔt ɛvride wi kin mit wit pipul dɛn ɔ tin dɛn kin apin to wi we kin mek i nɔ izi fɔ lɛ wi ɔmbul. Bɔt pan ɔl dat, wi gɛt pawaful rizin fɔ tray fɔ gɛt dis kwaliti. Jiova prɔmis se “di wan dɛn we ɔmbul go gɛt di wɔl.” (Sam 37:​11, NW) Yu go se yu na pɔsin we ɔmbul? Yu tink se ɔda pipul dɛn go si yu as ɔmbul pɔsin? Bifo wi ansa dɛn impɔtant kwɛstyɔn dɛn ya, wi nid fɔ no wetin i min fɔ bi ɔmbul pɔsin.

WETIN I MIN FƆ BI PƆSIN WE ƆMBUL?

3-4. (a) Aw pɔsin we ɔmbul tan lɛk? (b) Us 4 kwaliti dɛn wi nid if wi want fɔ bi pɔsin we ɔmbul? Wetin mek?

3 Fɔ bi pɔsin we ɔmbul * tan lɛk fayn fayn pikchɔ we dɛn  drɔ. Aw? Jɔs lɛk aw pɔsin we de drɔ de yuz fayn fayn kɔlɔ dɛn fɔ drɔ, na so wisɛf nid fɔ gɛt fayn fayn kwaliti dɛn fɔ bi ɔmbul pɔsin. Sɔm pan dɛn kwaliti dɛn ya na fɔ obe, nɔ de vɛks kwik, ɛn fɔ gɛt maynd. Wetin mek wi nid dɛn kwaliti dɛn ya if wi want fɔ du tin we go mek Jiova gladi?

4 Na ɔmbul pipul dɛn nɔmɔ go du wetin Gɔd want. Wan pan di tin dɛn we Gɔd want wi fɔ du na fɔ bi pɔsin we nɔ de vɛks kwik. (Mat. 5:​5, NW; Gal. 5:​23) We wi de du wetin Gɔd want, wi de mek Setan vɛks. So bɔku pipul dɛn na Setan in wɔl et wi pan ɔl we wi ɔmbul ɛn wi nɔ de vɛks kwik. (Jɔn 15:​18, 19) Na dat mek wi nid fɔ gɛt maynd fɔ tinap tranga wan agens Setan.

5-6. (a) Wetin mek Setan et pipul dɛn we ɔmbul? (b) Us kwɛstyɔn dɛn wi go ansa?

5 Pɔsin we nɔ ɔmbul na pɔsin we prawd, gɛt wamat, ɛn i nɔ de obe Jiova. Na da we de Setan tan. No wɔnda i et pipul dɛn we ɔmbul! Pipul dɛn we ɔmbul de sho aw Setan wikɛd bikɔs dɛn gɛt kwaliti dɛn we in nɔ gɛt. Ɛn wetin pas ɔl na dat dɛn de sho se Setan na layman. Wetin mek? Na bikɔs ilɛk wetin Setan tɔk ɔ du, i nɔ go ebul stɔp pipul dɛn fɔ lɛ dɛn nɔ sav Jiova!—Job 2:​3-5.

6 Ustɛm i nɔ kin izi fɔ bi pɔsin we ɔmbul? Ɛn wetin mek wi fɔ kɔntinyu fɔ bi pɔsin we ɔmbul? Fɔ ansa dɛn kwɛstyɔn dɛn de, wi go tɔk bɔt di ɛgzampul bɔt Mozis, di tri Ibru dɛn we dɛn bin kɛr go na Babilɔn, ɛn Jizɔs.

USTƐM I NƆ KIN IZI FƆ BI PƆSIN WE ƆMBUL?

7-8. Wetin Mozis bin du we ɔda pipul dɛn nɔ bin rɛspɛkt am?

7 We wi gɛt pawa oba pipul dɛn: I nɔ kin izi fɔ di wan dɛn we gɛt pawa oba pipul dɛn fɔ kɔntinyu fɔ put dɛnsɛf dɔŋ, mɔ we di wan dɛn we dɛn de oba nɔ de rɛspɛkt dɛn ɔ tɔk se dɛn nɔ de disayd di rayt tin. Dat dɔn ɛva apin to yu? Wetin yu go du if pɔsin na yu famili biev da kayn we de? Tink bɔt wetin Mozis bin du.

8 Jiova bin pik Mozis fɔ lid di Izrɛlayt dɛn, ɛn Jiova bin gi am di ɔnɔ fɔ rayt di lɔ dɛn fɔ di pipul dɛn na Izrɛl. Di pipul dɛn nɔ bin gɛt wan dawt fɔ se Jiova bin de  sɔpɔt Mozis. Bɔt pan ɔl dat, Mozis in yon brɔda ɛn sista we na Erɔn ɛn Miriam bin fɛn fɔlt pan am ɛn tɔk se i nɔ bin fɔ dɔn mared di uman we i gɛt. I go bi se sɔm pipul dɛn we kin gɛt di kayn ay pozishɔn we Mozis bin gɛt fɔ dɔn vɛks ɛn kip am na dɛn at. Bɔt Mozis nɔ bin du dat, i nɔ bin vɛks wantɛm wantɛm. I bin ivin beg Jiova fɔ lɛ i lɛf fɔ pɔnish Miriam. (Nɔm. 12:​1-13) Wetin mek Mozis bin du dat?

Mozis bin beg Jiova fɔ lɛ i lɛf fɔ pɔnish Miriam (Luk na paregraf 8)

9-10. (a) Wetin Jiova bin ɛp Mozis fɔ no? (b) Wetin di wan dɛn we de oba dɛn famili ɛn di ɛlda dɛn kin lan frɔm Mozis?

9 Mozis bin gri fɔ lɛ Jiova tren am. Fɔ lɛk 40 ia bifo dis tɛm, we Mozis bin de na di kiŋ in os na Ijipt, Mozis nɔ bin ɔmbul. Infakt, i bin gɛt wamat ɛn dat bin mek i kil wan man we i bin tink se de trit in kɔmpin bad. Mozis bin tink se Jiova gri wit wetin i de du. Jiova bin tek 40 ia fɔ ɛp Mozis fɔ no se i nɔ jɔs nid fɔ gɛt maynd fɔ lid di Izrɛlayt dɛn, bɔt i nid fɔ put insɛf dɔŋ. Ɛn fɔ bi pɔsin we ɔmbul, i bin nid bak fɔ obe ɛn nɔ fɔ vɛks kwik. Mozis bin lan dɛn fayn lɛsin dɛn de ɛn i bin bi gud lida.—Ɛks. 2:​11, 12; Akt 7:​21-30, 36.

10 Tide, di wan dɛn we de oba dɛn famili ɛn di ɛlda dɛn fɔ tray fɔ falamakata Mozis. Dɛn nɔ fɔ vɛks kwik we ɔda pipul dɛn nɔ rɛspɛkt dɛn. Dɛn fɔ put dɛnsɛf dɔŋ ɛn gri se dɛn mek mistek. (Ɛkli. 7:​9, 20) Dɛn fɔ fala wetin Jiova tɛl dɛn bɔt aw fɔ sɔlv prɔblɛm dɛn. Ɛn dɛn fɔ ansa fayn ɔltɛm. (Prɔv. 15:​1) Di wan dɛn we de oba dɛn famili ɛn di ɛlda dɛn we de du tin da we de go mek Jiova gladi, dɛn go ɛp fɔ mek wanwɔd de, ɛn sɛt fayn ɛgzampul bɔt aw fɔ bi ɔmbul pɔsin.

11-13. Us fayn ɛgzampul di tri Ibru dɛn sɛt fɔ wi?

11 We dɛn de mek wi sɔfa: Fɔ lɔng tɛm naw, mɔtalman gɔvmɛnt dɛn dɔn de mek Jiova in pipul dɛn sɔfa. Dɛn kin chaj wi fɔ difrɛn difrɛn “kraym dɛn,” bɔt di tru tin na dat wi de “du wetin Gɔd tɛl wi fɔ du” ɛn nɔ “du wetin mɔtalman tɛl wi fɔ du.” (Akt 5:​29) Dɛn de provok wi, put wi na jel, ɔ ivin bit wi bad bad wan. Bɔt Jiova kin ɛp wi fɔ lɛ wi nɔ tɔn-am-gi, ɛn kɔntinyu fɔ de pisful wan.

12 Tink bɔt di fayn ɛgzampul we di tri Ibru dɛn sɛt fɔ wi di tɛm we dɛn bin kɛr dɛn go na Babilɔn. Dɛn nem dɛn na Ananaya, Mishɛl, ɛn Azaraya. * Di kiŋ na Babilɔn tɛl dɛn fɔ butu bifo di big imej we dɛn mek wit gold. Dɛn bin tek tɛm ɛksplen to di kiŋ wetin mek dɛn nɔ go wɔship di imej. Dɛn bin kɔntinyu fɔ obe  Gɔd pan ɔl we di kiŋ bin trɛtin fɔ bɔn dɛn na ɔt ɔt faya. Jiova bin sev dɛn man dɛn de wantɛm wantɛm, bɔt dɛn nɔ bin jɔs tink se Jiova go du dat fɔ dɛn. Bifo dat, dɛn bin rɛdi fɔ ɛnitin we Jiova go alaw fɔ mek i apin to dɛn. (Dan. 3:​1, 8-28) Dɛn bin sho se pipul dɛn we ɔmbul na pipul dɛn we rili gɛt maynd. Ɛn no kiŋ, no trɛtin, ɛn no pɔnishmɛnt nɔ go mek wi stɔp fɔ wɔship Jiova in wangren.—Ɛks. 20:​4, 5.

13 Aw wi go falamakata di tri Ibru dɛn we pipul dɛn du sɔntin to wi we go mek wi kɔmɔt biɛn Gɔd? Wi de put wisɛf dɔŋ ɛn abop pan Jiova se i go bisin bɔt wi. (Sam 118:​6, 7) We pipul dɛn kin tɔk se wi du sɔntin we wi nɔ du, wi kin ansa fayn wan ɛn wit rɛspɛkt. (1 Pit. 3:​15, 16) Ɛn wi nɔ de gri fɔ du ɛnitin we go ambɔg wi padi biznɛs wit wi Papa we lɛk wi.

We ɔda pipul dɛn tɔk bad bɔt wi, wi de ansa dɛn wit rɛspɛkt (Luk na paregraf 13)

14-15. (a) Wetin kin apin we wi strɛs? (b) Frɔm wetin de na Ayzaya 53:​7, 10, wetin mek wi go se Jizɔs na di bɛst ɛgzampul bɔt sɔmbɔdi we ɔmbul pan ɔl we i bin strɛs?

14 We wi strɛs: Wi ɔl kin gɛt difrɛn difrɛn tin dɛn we de mek wi strɛs. Wi go dɔn fil da we de we wi want fɔ tek tɛst na skul ɔ we wi de du wan patikyula wok na wokples. Ɔ wi kin strɛs we wi tink bɔt wi wɛlbɔdi biznɛs lɛk di tritmɛnt we wi fɔ tek ɔ di tɛst we wi fɔ du. We wi strɛs, i nɔ kin izi fɔ lɛ wi put wisɛf dɔŋ. Da tɛm de, tin dɛn we kin apin we nɔ kin at wi kin mek wi bigin fɔ vɛks. Wi nɔ kin tɔk fayn to ɔda pipul dɛn ɛn wi kin trit dɛn bad. If sɔntin ɛva mek wi strɛs, tink bɔt Jizɔs in ɛgzampul.

15 Jizɔs bin rili strɛs we di tɛm bin de nia fɔ lɛ i day. I bin no se i go sɔfa bad bad wan ɛn dɛn go kil am. (Jɔn 3:​14, 15; Gal. 3:​13, NW) Sɔm mɔnt bifo i day, i bin tɔk se i gɛt strɛs. (Lyuk 12:​50, NW) Ɛn we i bin jɔs lɛf sɔm dez bifo i day, Jizɔs bin tɔk se: “Mi at pwɛl.” Wi go si aw Jizɔs bin ɔmbul ɛn aw i bin obe Gɔd as i de tɛl Gɔd aw i de fil we i bin de pre se: “Papa, sev mi frɔm dis tin we gɛt fɔ apin. Bɔt na fɔ dat mek a kam. Papa, mek lɛ yu nem gɛt glori.” (Jɔn 12:​27, 28, NW) We di tɛm bin rich, Jizɔs bin gɛt maynd fɔ alaw Gɔd in ɛnimi dɛn fɔ ol am, ɛn dɛn bin mek i sɔfa ɛn day shemful wan. Pan ɔl we i bin strɛs ɛn i bin de sɔfa bad bad wan, Jizɔs bin put insɛf dɔŋ fɔ du wetin Gɔd want. Wi nɔ gɛt wan dawt fɔ se Jizɔs na di bɛst ɛgzampul bɔt sɔmbɔdi we ɔmbul pan ɔl we i bin strɛs!—Rid Ayzaya 53:​7, 10, NW

Jizɔs na di bɛst ɛgzampul bɔt pɔsin we ɔmbul (Luk na paregraf 16 ɛn 17) *

16-17. (a) Wetin Jizɔs in padi dɛn bin du we fɔ dɔn mek i nɔ izi fɔ am fɔ ɔmbul? (b) Aw wi go falamakata Jizɔs?

16 Di las nɛt bifo Jizɔs day, in tayt padi dɛn bin du sɔntin we bin fɔ dɔn mek i nɔ izi fɔ lɛ Jizɔs ɔmbul. Imajin di strɛs we Jizɔs bin gɛt da nɛt de. Yu tink se Jizɔs go kɔntinyu fɔ de fetful wan te i day? If i nɔ fetful, nɔbɔdi nɔ go gɛt op fɔ gɛt layf. (Rom 5:​18, 19) Di tin we impɔtant pas ɔl na dat, wetin i go du go pwɛl ɔ briŋ gudnem to in Papa. (Job 2:​4) Dɔn, we i bin de it di las it wit in tayt padi dɛn we na in apɔsul dɛn, dɛn bin stat fɔ mek “plaba” bad bad wan bɔt “uswan pan dɛn fɔ bi edman.” Jizɔs bin dɔn kɔrɛkt in padi dɛn bɔt dis bɔku tɛm, ivin da sem ivintɛm de bifo dɛn it! Bɔt Jizɔs nɔ bin vɛks. Bifo dat, i bin ansa dɛn fayn. I bin tek tɛm bak fɔ ɛksplen gud gud wan to dɛn aw dɛn fɔ biev. Ɛn i bin tɛl in padi dɛn tɛnki fɔ we dɛn kɔntinyu fɔ de biɛn am.—Lyuk 22:​24-28; Jɔn 13:​1-5, 12-15.

17 If dis kayn tin bin apin to yu, wetin yu bin fɔ dɔn du? Wi fɔ falamakata Jizɔs ɛn  kɔntinyu nɔ fɔ gɛt wamat ivin we wi gɛt strɛs. Wi fɔ put wisɛf dɔŋ ɛn obe Jiova in lɔ we i se “una kɔntinyu fɔ de bia wit unasɛf.” (Kɔl. 3:​13, NW) Wi go obe dis lɔ if wi de mɛmba se wi ɔl de tɔk ɛn du tin dɛn we de mek ɔda pipul dɛn vɛks. (Prɔv. 12:​18; Jems 3:​2, 5) Ɛn tray fɔ tɛl ɔda pipul dɛn tɛnki fɔ di gud kwaliti dɛn we dɛn gɛt.—Ɛfi. 4:​29.

WETIN MEK WI FƆ KƆNTINYU FƆ ƆMBUL?

18. Aw Jiova de ɛp di wan dɛn we ɔmbul fɔ disayd di rayt tin? Wetin wi fɔ du?

18 If wi ɔmbul, wi go disayd di rayt tin. We wi gɛt prɔblɛm we nɔ izi fɔ wi fɔ disayd, Jiova go ɛp wi fɔ disayd di rayt we if wi ɔmbul. Jiova prɔmis se i go “lisin to pipul we ɔda pipul nɔ tek mek natin.” (Sam 10:​17) Ɛn i nɔ go jɔs lisin to wi nɔmɔ, i go du mɔ pas dat. Di Baybul prɔmis se: “Udat nɔ fil tu gud bɔt insɛf, i rɛdi fɔ tich am. I de gayd am aw fɔ du wetin rayt.” (Sam 25:​9) Jiova mek dɛn put dɛn tin dɛn de na di Baybul, wi buk ɛn magazin dɛn, * fim dɛn, ɛn di mitin dɛn we “di slev we fetful ɛn gɛt sɛns” de mek fɔ wi. (Mat. 24:​45-47, NW) Wi fɔ gri fɔ lɛ Jiova ɛp wi bay we wi ɔmbul ɛn no se wi nid in ɛp, bay we wi de stɔdi di buk ɛn magazin dɛn we i de gi wi, ɛn bay we wi rɛdi fɔ fala wetin wi de lan.

19-21. Us mistek Mozis bin mek na Kedɛsh? Us lɛsin dɛn wi kin lan frɔm dat?

19 If wi ɔmbul, wi go avɔyd fɔ mek bɔku mistek dɛn. Tink bak bɔt Mozis. Fɔ lɔng tɛm, Mozis bin ɔmbul, ɛn i bin du tin dɛn we bin de mek Jiova gladi. Bɔt afta we di Izrɛlayt dɛn dɔn waka na di ɛmti land usay pɔsin nɔ go ebul fɔ liv fɔ lɛk 40 ia, Mozis bin du sɔntin we mek i nɔ ɔmbul. In sista we sɔntɛm na in bin ɛp fɔ sev in layf na Ijipt, bin jɔs day, ɛn dɛn bin bɛr am na Kedɛsh. Ɛn naw di Izrɛlayt dɛn stat fɔ tɔk bak se dɛn nɔ de kia fɔ dɛn fayn. Dis tɛm dɛn bin de “grɔmbul pan Mozis” se dɛn nɔ gɛt wata. Di pipul dɛn bin grɔmbul pan ɔl we Jiova bin dɔn yuz Mozis fɔ du mirekul dɛn, ɛn pan ɔl we Mozis dɔn de lid dɛn fayn wan fɔ lɔng tɛm. Dɛn nɔ bin jɔs grɔmbul bikɔs bɛtɛ wata nɔ de bɔt dɛn grɔmbul bɔt Mozis lɛk se na in mek dɛn tɔsti.—Nɔm. 20:​1-5, 9-11.

 20 Wamat mek Mozis stɔp fɔ bi ɔmbul pɔsin. Pan ɔl we Jiova bin dɔn tɛl Mozis fɔ tɔk to di rɔk, Mozis bin vɛks we i de tɔk to di pipul dɛn ɛn i tɔk se in go mek mirekul. Dɔn i nak di rɔk tu tɛm ɛn bɔku wata bin kɔmɔt insay di rɔk. Prawd ɛn wamat bin mek i mek big big mistek. (Sam 106:​32, 33) Fɔ da shɔt tɛm we Mozis nɔ bin ɔmbul, dat bin mek Jiova nɔ alaw am fɔ go na di land we I bin dɔn prɔmis dɛn.—Nɔm. 20:​12.

21 Wi lan impɔtant lɛsin dɛn frɔm dis ɛgzampul. Fɔs, wi fɔ wok tranga wan fɔ kɔntinyu fɔ bi pɔsin we ɔmbul. If wi stɔp fɔ tray fɔ bi pɔsin we ɔmbul, i go izi fɔ lɛ wi mek prawd ɛn dat go mek wi tɔk sɔntin we nɔ mek sɛns. Sɛkɔn, strɛs kin mek i nɔ izi fɔ lɛ wi kɔntinyu fɔ bi pɔsin we ɔmbul, so wi fɔ tray tranga wan fɔ bi pɔsin we ɔmbul pan ɔl we sɔntin de mɔna wi.

22-23. (a) Wetin mek wi fɔ kɔntinyu fɔ bi pɔsin we ɔmbul? (b) Wetin Zɛfinaya 2:​3 tɔk bɔt?

22 If wi ɔmbul, dat go protɛkt wi. I nɔ go te igen, Jiova go pul ɔl di wikɛd pipul dɛn na dis wɔl ɛn na di wan dɛn nɔmɔ we ɔmbul go lɛf. Dɔn ɔlsay na di wɔl go gɛt tru tru pis. (Sam 37:​10, 11) Yu tink se yu go bi wan pan di wan dɛn we ɔmbul? Yu go bi wan pan dɛn if yu du wetin Jiova bin tɛl prɔfɛt Zɛfinaya fɔ rayt.—Rid Zɛfinaya 2:​3.

23 Wetin mek Zɛfinaya 2:​3 tɔk se: “Sɔntɛm we i de jɔj i go sɔri fɔ dɛn”? Wetin da vas tɔk nɔ min se Jiova nɔ ebul fɔ protɛkt di wan dɛn we lɛk am ɛn we want fɔ du wetin go mek i gladi. Bifo dat, i de sho se wi nid fɔ du sɔntin fɔ lɛ Jiova protɛkt wi. I pɔsibul fɔ lɛ wi sev di de we Jiova de “jɔj” ɛn fɔ de sote go if wi du ɔl wetin wi ebul naw fɔ bi pɔsin we ɔmbul ɛn mek Jiova gladi.

SIŊ 120 Falamakata Krays We Nɔ De Vɛks Kwik

^ par. 5 Dɛn nɔ bɔn wi as ɔmbul pipul dɛn. Wi fɔ lan fɔ bi pɔsin we ɔmbul. Wi kin si se wi ɔmbul we wi de du tin wit pipul dɛn we nɔ gɛt wan prɔblɛm, bɔt i nɔ kin izi fɔ wi fɔ kɔntinyu fɔ bi ɔmbul pɔsin we wi de wit prawd pipul dɛn. Dis atikul go tɔk bɔt sɔm tin dɛn we wi nid fɔ avɔyd fɔ lɛ wi go gɛt dis fayn kwaliti.

^ par. 3 WƆD WE DƐN ƐKSPLEN: Fɔ bi pɔsin we ɔmbul. Pipul dɛn we ɔmbul kin gud we dɛn de du tin wit ɔda pipul dɛn, ɛn dɛn kin tray nɔ fɔ vɛks kwik pan ɔl we ɔda pipul dɛn du sɔntin we fɔ mek dɛn vɛks. Dɛn kayn pipul dɛn de nɔ kin prawd; dɛn de si se ɔda pipul dɛn impɔtant pas dɛn. We dɛn tɔk se Jiova ɔmbul, i min se i de trit pipul dɛn we i gɛt pawa pas wit lɔv ɛn sɔri-at.

^ par. 12 Di pipul dɛn na Babilɔn bin gi di tri Ibru dɛn dɛn nem ya Shedrak, Mishak, ɛn Abɛdnigo.—Dan. 1:​7.

^ par. 18 Fɔ ɛgzampul, rid di atikul we gɛt di taytul “Make Decisions That Honor God,” we de na di Epril 15, 2011, Wachtawa.

^ par. 59 SMƆL TIN BƆT DI PIKCHƆ: Pej 12: Jizɔs nɔ vɛks ɛn i tek tɛm fɔ kɔrɛkt in disaypul dɛn afta we dɛn dɔn agyu bɔt udat impɔtant pas in kɔmpin.