Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 9

Aw Jiova Bin De Sho Lɔv ɛn Du Tin Tret Trade Trade na Izrɛl?

Aw Jiova Bin De Sho Lɔv ɛn Du Tin Tret Trade Trade na Izrɛl?

“PAPA GƆD lɛk pɔsin we de du tin tret wan wit am ɛn nɔ miks pan bɛnbɛn; PAPA GƆD [“Jiova,” NW] in lɔv fɔ mɔtalman nɔ de chenj.”—SAM 33:​5.

SIŊ 3 Jiova De Gi Wi Trɛnk, Op, ɛn Kɔnfidɛns

WETIN WI GO LAN? *

1-2. (a) Wetin wi ɔl want? (b) Wetin wi go shɔ bɔt?

WI Ɔl want mek pɔsin lɛk wi. Ɛn wi ɔl want lɛ dɛn trit wi fayn. If dɛn nɔ lɛk wi ɛn nɔ de trit wi fayn, wi go fil lɛk se wi nɔ gɛt wan valyu ɛn wi nɔ gɛt op.

2 Jiova no se wi want lɔv ɛn wi want lɛ dɛn du tin tret wan wit wi. (Sam 33:​5) Wi biliv tranga wan se wi Gɔd rili lɛk wi ɛn i want lɛ dɛn trit wi fayn. Wi si dis klia wan we wi tek tɛm luk di Lɔ we Jiova bin gi Mozis fɔ gi di Izrɛlayt dɛn. If yu at rili pwɛl bikɔs ɔda pipul dɛn nɔ trit yu di rayt we ɛn wit lɔv, duya tink bɔt aw di Lɔ we Gɔd bin gi Mozis * bin sho aw Jiova bisin bɔt in pipul dɛn.

3. (a) Frɔm wetin de na Lɛta Fɔ Rom 13:​8-10, wetin wi go lan we wi stɔdi di Lɔ we Gɔd bin gi Mozis? (b) Us kwɛstyɔn dɛn wi go ansa na dis atikul?

3 We wi stɔdi di Lɔ we Gɔd bin gi Mozis, wi go si aw Jiova rili lɛk wi. (Rid Lɛta Fɔ Rom 13:​8-10.) Insay dis atikul, wi go lan bɔt sɔm pan di lɔ dɛn we Gɔd bin gi di Izrɛlayt dɛn ɛn wi go ansa dɛn kwɛstyɔn dɛn ya: Wetin mek wi go se lɔv na di men tin we di Lɔ de tɔk bɔt? Wetin mek wi go se di Lɔ bin de ɛnkɔrej di pipul dɛn fɔ du tin tret? Aw di wan dɛn we bin de oba di pipul dɛn bin fɔ du wetin di Lɔ se? Ɛn udat dɛn mɔ di Lɔ bin de protɛkt? Di ansa to dɛn kwɛstyɔn dɛn de go ɛnkɔrej wi, gi wi op, ɛn mek wi go nia  wi Papa we lɛk wi mɔ ɛn mɔ.—Akt 17:​27; Rom 15:​4.

DI LƆ WE GƆD BIN GI MOZIS BIN DE TƆK BƆT LƆV

4. (a) Wetin mek wi go se lɔv na di men tin we di Lɔ we Gɔd bin gi Mozis de tɔk bɔt? (b) Frɔm wetin de na Matyu 22:​36-40, (NW) us lɔ dɛn Jizɔs bin tɔk bɔt?

4 Wi go se di Lɔ we Gɔd bin gi Mozis de tɔk bɔt lɔv bikɔs na lɔv de mek Jiova de du ɔl wetin i de du. (1 Jɔn 4:​8) Ɔl di lɔ dɛn we Jiova bin gi Mozis bin kɔmɔt frɔm di tu men lɔ dɛn we na fɔ lɛk Gɔd, ɛn fɔ lɛk yu neba. (Lɛv. 19:​18; Dit. 6:​5; rid Matyu 22:​36-40, NW.) So wi fɔ no se ɛni wan pan di 600 lɔ dɛn ɛn ɔda wan dɛn de tich wi sɔntin bɔt di lɔv we Jiova gɛt. Lɛ wi tɔk bɔt sɔm ɛgzampul dɛn.

5-6. Wetin Jiova want mared pipul dɛn fɔ du? Wetin Jiova bisin bɔt? Gi wan ɛgzampul.

5 Nɔ kɔmɔt biɛn di pɔsin we yu mared to, ɛn kia fɔ yu pikin dɛn. Jiova want mared pipul dɛn fɔ rili lɛk dɛnsɛf di kayn we we go mek dɛn lɔv de sote go. (Jɛn. 2:​24; Mat. 19:​3-6) Wan pan di wɔs tin we pɔsin we mared kin du we nɔ de sho lɔv, na we i du mami ɛn dadi biznɛs wit pɔsin we i nɔ mared to. Di nɔmba sɛvin lɔ we de na di Tɛn Kɔmandmɛnt se nɔbɔdi nɔ fɔ lɛf in man ɔ in wɛf ɛn du mami ɛn dadi biznɛs wit ɔda pɔsin we i nɔ mared to. (Dit. 5:​18) If pɔsin du dis, i dɔn “sin to PAPA GƆD” ɛn na wikɛd tin i du to in man ɔ wɛf. (Jɛn. 39:​7-9) Di pɔsin we in man ɔ wɛf nɔ fetful to go fil bad fɔ lɔng lɔng tɛm.

6 Jiova rili bisin bɔt aw maredman ɛn mareduman dɛn de trit dɛnsɛf. I bin rili want fɔ lɛ dɛn trit di Izrɛlayt uman dɛn fayn. Maredman we rɛspɛkt di Lɔ go lɛk in wɛf ɛn i nɔ go jɔs dayvɔs am fɔ ɛni smɔl tin. (Dit. 24:​1-4; Mat. 19:​3, 8) Bɔt if dɛn gɛt siriɔs prɔblɛm ɛn di man dayvɔs in uman, i fɔ gi am dayvɔs pepa ɔ satifiket. Dis dayvɔs pepa de protɛkt di uman fɔ lɛ dɛn nɔ lay pan am se i du mami ɛn dadi biznɛs di we aw Gɔd nɔ want. Dɔn bak, bifo di man gi in wɛf di dayvɔs pepa, i bin nid fɔ tɔk wit di ɛlda dɛn na di siti. Dat go mek di ɛlda dɛn gɛt di chans fɔ ɛp di man ɛn in wɛf fɔ lɛ dɛn mared nɔ skata. Nɔto ɔltɛm Jiova bin de yuz di ɛlda dɛn ɛn prɔfɛt dɛn fɔ du sɔntin we Izrɛlayt man dayvɔs in wɛf jɔs fɔ satisfay insɛf. Bɔt Jiova kin si di we aw di uman kin sɔfa ɛn kray, ɛn I ɔndastand aw i de fil.—Mal. 2:​13-16.

(Luk na paregraf 7 ɛn 8) *

7-8. (a) Wetin Jiova bin tɛl mama ɛn papa dɛn fɔ du? (Luk di pikchɔ na di frɔnt pej.) (b) Us lɛsin dɛn wi lan?

7 Di Lɔ mek wi no bak se Jiova rili want pikin dɛn fɔ gladi ɛn fɔ fil sef. Jiova bin tɛl mama ɛn papa dɛn se dɛn fɔ gi dɛn pikin dɛn wetin dɛn nid as dɛn de gro, ɛn dɛn fɔ ɛp dɛn fɔ gɛt tayt padi biznɛs wit am. Mama ɛn papa dɛn fɔ yuz ɛni chans we dɛn gɛt fɔ ɛp dɛn pikin dɛn fɔ ɔndastand ɛn valyu Jiova in Lɔ dɛn ɛn fɔ lɛk am. (Dit. 6:​6-9; 7:​13) Wan pan di rizin dɛn we mek Jiova bin de pɔnish di Izrɛlayt dɛn na bikɔs dɛn bin de trit sɔm pan dɛn pikin dɛn bad bad wan. (Jɛr. 7:​31, 33) Mama ɛn papa dɛn nɔ bin fɔ jɔs si dɛn pikin dɛn lɛk prɔpati we dɛn kin kialɛs ɔ nɔ trit fayn, bɔt dɛn fɔ si dɛn lɛk gift we Jiova gi dɛn we dɛn fɔ valyu.—Sam 127:​3.

8 Lɛsin dɛn: Jiova de notis aw maredman ɛn mareduman de trit dɛnsɛf. I want mama ɛn papa dɛn fɔ lɛk dɛn pikin dɛn, ɛn i go jɔj mama ɛn papa dɛn if dɛn nɔ trit dɛn pikin dɛn fayn.

9-11. Wetin mek Jiova bin gi di lɔ bɔt milɛ?

9 Nɔ milɛ. Di las lɔ na di Tɛn Kɔmand-mɛnt bin tɛl di pipul dɛn nɔ fɔ milɛ, ɔ fɔ bigin fɔ tink di rɔŋ we bɔt wetin ɔda pipul dɛn gɛt. (Dit. 5:​21; Rom 7:​7) Jiova bin gi  dis lɔ fɔ tich wan impɔtant lɛsin. I bin want in pipul dɛn fɔ protɛkt dɛn at, we min se dɛn fɔ protɛkt wetin dɛn de tink bɔt, ɛn aw dɛn de fil. I no se bad tin dɛn kin bigin wit di bad tin dɛn we pɔsin de tink bɔt ɛn di bad we dɛn aw i de fil. (Prɔv. 4:​23) If ɛni Izrɛlayt alaw bad tin dɛn fɔ de na in at, i go mɔs bi se i go trit ɔda pipul dɛn bad we. Fɔ ɛgzampul, Kiŋ Devid bin mek da mistek de. In na bin gud man. Bɔt wan tɛm, i bin milɛ ɔda pɔsin in wɛf. Di tin we i bin want bin mek i sin. (Jems 1:​14, 15) Devid bin du mami ɛn dadi biznɛs wit ɔda pɔsin in wɛf, i tray fɔ ful di uman in man, ɛn mek dɛn kil di man.—2 Sam. 11:​2-4; 12:​7-11.

10 Jiova bin de no ɛnitɛm we ɛni Izrɛlayt nɔ obe in lɔ we i gi bɔt milɛ. (1 Kro. 28:​9) Di lɔ we Gɔd bin gi bɔt milɛ bin mek in pipul dɛn no se dɛn fɔ avɔyd fɔ de tink bɔt tin dɛn we go mek dɛn du bad. Dis de sho se wi Papa Jiova gɛt sɛns ɛn i lɛk wi!

11 Lɛsin dɛn: Jiova nɔ jɔs de si wetin wi de du, bɔt i de si wetin rili de na wi at. (1 Sam. 16:​7) Wi nɔ go ebul ayd wetin wi de tink, wetin wi de fil, ɛn wetin wi de du frɔm am. I de luk fɔ di gud tin insay wi at, ɛn i de ɛnkɔrej wi fɔ gɛt dɛn gud kwaliti dɛn de. Bɔt i want wi fɔ no di bad tin dɛn we wi de tink bɔt ɛn kɔntrol dɛn bifo dɛn mek wi du di rɔŋ tin dɛn.—2 Kro. 16:​9; Mat. 5:​27-30, NW.

WAN LƆ WE BIN ƐNKƆREJ PIPUL DƐN FƆ DU TIN TRET

12. Wetin di Lɔ we Gɔd bin gi Mozis bin de tɔk mɔ bɔt?

12 Di Lɔ we Gɔd bin gi Mozis de tich wi se Jiova lɛk fɔ du tin tret. (Sam 37:​28; Ayz. 61:​8) Jiova bin sɛt di bɛst ɛgzampul bɔt aw fɔ trit ɔda pipul dɛn fayn. We di Izrɛlayt dɛn bin de obe di lɔ dɛn we Jiova bin gi dɛn, i bin de blɛs dɛn. Bɔt we dɛn nɔ gri fɔ fala di tin dɛn we Jiova want dɛn fɔ du, dɛn bin sɔfa fɔ dat. Tink bɔt tu pan di lɔ dɛn we de na di Tɛn Kɔmandmɛnt.

13-14. Wetin di fɔs tu lɔ dɛn na di Tɛn Kɔmandmɛnt tɛl di Izrɛlayt dɛn fɔ du? Aw di Izrɛlayt dɛn bin de bɛnifit we dɛn bin de obe di lɔ dɛn?

13 Wɔship Jiova in wangren. Di fɔs tu lɔ dɛn na di Tɛn Kɔmandmɛnt bin tɛl di Izrɛlayt dɛn fɔ wɔship Jiova in wangren, ɛn i bin wɔn dɛn fɔ lɛ dɛn nɔ wɔship lay lay gɔd dɛn. (Ɛks. 20:​3-6) Jiova nɔ bin gi dɛn lɔ dɛn ya fɔ bɛnifit insɛf. Bɔt na fɔ bɛnifit in pipul dɛn. We in pipul dɛn kɔntinyu fɔ de biɛn am, dɛn bin de go bifo. Bɔt we dɛn stat fɔ wɔship di gɔd dɛn we di ɔda neshɔn dɛn bin de wɔship, dɛn bin sɔfa.

14 Tink bɔt di Kenanayt dɛn. Bifo dɛn wɔship di tru Gɔd we gɛt layf, dɛn bin de wɔship lay lay gɔd dɛn we nɔ gɛt layf. Dat bin mek dɛn lɔs di rɛspɛkt we dɛn bin gɛt. (Sam 115:​4-8) Dɛn bin de du mami ɛn dadi biznɛs dɔti we ɛn sakrifays dɛn pikin dɛn pan dɛn wɔship. Semweso, we di Izrɛlayt dɛn bin kɔmɔt biɛn Jiova ɛn disayd fɔ wɔship lay lay gɔd dɛn, dɛn bin lɔs di rɛspɛkt we dɛn bin gɛt ɛn dɛn famili dɛn bin sɔfa. (2 Kro. 28:​1-4) Di wan dɛn we bin de oba di pipul dɛn bin lɛf fɔ fala di we aw Jiova de du tin tret. Dɛn nɔ bin de yuz dɛn pawa di rayt we, ɛn dɛn bin de mek di wan dɛn we wik ɛn we nɔ gɛt pɔsin fɔ ɛp dɛn sɔfa. (Izi. 34:​1-4) Jiova bin wɔn di Izrɛlayt dɛn se i go jɔj ɔl di wan dɛn we de du bad bad tin dɛn to uman ɛn pikin dɛn we nɔ gɛt pɔsin fɔ ɛp dɛn. (Dit. 10:​17, 18; 27:​19) Bɔt Jiova bin blɛs in pipul dɛn di tɛm we dɛn bin de biɛn am ɛn we dɛn bin de trit dɛnsɛf fayn.—1 Kiŋ 10:​4-9.

Jiova lɛk wi ɛn i kin no we dɛn nɔ trit wi fayn (Luk na paregraf 15)

15. Us lɛsin dɛn we lan bɔt Jiova?

 15 Lɛsin dɛn: Wi nɔ fɔ blem Jiova we di wan dɛn we se dɛn de sav am nɔ gri fɔ fala wetin i want ɛn du bad to in pipul dɛn. Bɔt Jiova lɛk wi ɛn i no we wi de sɔfa bikɔs dɛn nɔ trit wi di rayt we. I de rili fil di pen we wi de fil pas di we aw mama de fil fɔ in yɔŋ bebi we de sɔfa. (Ayz. 49:​15) Pan ɔl we Jiova nɔ go du sɔntin wantɛm wantɛm, leta i go jɔj di wan dɛn we nɔ ripɛnt ɛn we nɔ stɔp fɔ de trit ɔda pipul dɛn bad.

AW DƐN FƆ APLAY DI LƆ?

16-18. Wetin-ɛn-wetin di Izrɛlayt dɛn go du we dɛn go nid fɔ fala di Lɔ we Gɔd bin gi Mozis? Us lɛsin dɛn wi lan?

16 Di Lɔ we Gɔd bin gi Mozis bin gɛt fɔ du wit bɔku tin dɛn na di Izrɛlayt dɛn layf, so i bin rili impɔtant fɔ lɛ di bigman dɛn we dɛn pik fɔ jɔj Jiova in pipul dɛn jɔj dɛn di rayt we. Dɛn nɔ bin jɔs gɛt di wok fɔ jɔj di pipul dɛn bɔt tin dɛn we gɛt fɔ du wit dɛn wɔship to Jiova, bɔt dɛn bin gɛt di wok bak fɔ jɔj dɛn we dɛn gɛt plaba ɛn we dɛn kɔmit kraym. Tink bɔt dɛn ɛgzampul dɛn ya.

17 If ɛni Izrɛlayt kil sɔmbɔdi, dɛn nɔ fɔ kil am wantɛm wantɛm. Di ɛlda dɛn na di siti bin de tray fɔ no wetin apin bifo dɛn disayd if dɛn fɔ kil am ɔ nɔ fɔ kil am. (Dit. 19:​2-7, 11-13) Di ɛlda dɛn bin de jɔj bak bɔku ɔda tin dɛn we bin de apin ɛvride. Dɛn bin de jɔj kes dɛn we gɛt fɔ du wit prɔpati biznɛs ɛn prɔblɛm dɛn we mared pipul dɛn kin gɛt. (Ɛks. 21:​35; Dit. 22:​13-19) We di ɛlda dɛn de jɔj fia wan ɛn di Izrɛlayt dɛn obe di Lɔ, ɔlman bin de bɛnifit, ɛn dɛn bin de briŋ ɔnɔ to Jiova.—Lɛv. 20:​7, 8; Ayz. 48:​17, 18.

18 Lɛsin dɛn: Ɛnitin we wi de du na layf impɔtant to Jiova. I want wi fɔ sho lɔv ɛn du tin tret wit ɔda pipul dɛn. Ɛn i de notis wetin wi de tɔk ɛn wetin wi de du, ivin we wi de na os wi wangren.—Ibru 4:​13.

19-21. (a) Aw di ɛlda dɛn ɛn di jɔj dɛn fɔ trit Gɔd in pipul dɛn? (b) Aw di Lɔ we Gɔd bin gi Mozis bin protɛkt di pipul dɛn? Us lɛsin dɛn wi lan?

19 Jiova bin want fɔ protɛkt in pipul dɛn frɔm di ɔda neshɔn dɛn we de nia dɛn fɔ lɛ dɛn nɔ kɔrɔpt dɛn. So Jiova bin want di ɛlda dɛn ɛn jɔj dɛn fɔ mek di pipul dɛn fala di Lɔ, ɛn i bin want dɛn fɔ du so fia wan. Bɔt di wan dɛn we de jɔj nɔ fɔ trit Jiova in pipul dɛn bad ɔ strikt pan dɛn. Bifo dat, dɛn fɔ lɛk fɔ du tin tret.—Dit. 1:​13-17; 16:​18-20.

20 Jiova gɛt sɔri-at fɔ in pipul dɛn, so i put lɔ dɛn fɔ protɛkt dɛn ɔl fɔ lɛ dɛn nɔ trit dɛn bad. Fɔ ɛgzampul, di Lɔ bin mek am pɔsibul fɔ lɛ dɛn nɔ lay pan pɔsin fɔ kraym we i nɔ kɔmit. Di pɔsin we dɛn go ripɔt gɛt di rayt fɔ no udat ripɔt am. (Dit. 19:​16-19; 25:​1) Ɛn bifo dɛn tɔk se i gilti, tu witnɛs dɛn fɔ pruv se i du bad. (Dit. 17:​6; 19:​15) Wetin wi go se bɔt di  Izrɛlayt we kɔmit kraym ɛn na wangren pɔsin nɔmɔ si am fɔ gi witnɛs? Di pɔsin nɔ fɔ ɛva tink se dɛn nɔ go pɔnish am fɔ di bad tin we i du. Jiova si wetin i du. Insay di famili, na di papa dɛn bin de oba di famili bɔt nɔto ɔltin dɛn bin de gɛt rayt fɔ du. Sɔm prɔblɛm dɛn we dɛn bin de gɛt insay di famili, di ɛlda dɛn na di siti bin gɛt di wok fɔ disayd wetin fɔ apin.—Dit. 21:​18-21.

21 Lɛsin dɛn: Jiova sɛt di bɛst ɛgzampul fɔ wi, ɛn i de du ɔltin fia wan. (Sam 9:​7) I de blɛs di wan dɛn we obe in lɔ dɛn ɔltɛm, bɔt i de pɔnish di wan dɛn we de yuz dɛn pawa di rɔŋ we. (2 Sam. 22:​21-23; Izi. 9:​9, 10) Sɔm pipul dɛn kin du bad bad tin dɛn ɛn i kin tan lɛk se natin nɔ de apin. Bɔt we Jiova si se di rayt tɛm dɔn rich, i go mek shɔ se di ɛlda dɛn no bɔt dɛn ɛn ɛp dɛn di rayt we. (Prɔv. 28:​13) Ɛn if dɛn nɔ ripɛnt, i nɔ go te igen dɛn go no se “i go bad fɔ di pɔsin we Gɔd we gɛt layf sote go, go kɔndɛm.”—Ibru 10:​30, 31.

UDAT DƐN MƆ DI LƆ BIN DE PROTƐKT?

We di ɛlda dɛn bin de sɛtul plaba, dɛn bin nid fɔ falamakata di kayn we aw Jiova de sho lɔv ɛn du tin tret (Luk na paregraf 22) *

22-24. (a) Udat dɛn mɔ di Lɔ bin de protɛkt? Wetin dis tich wi bɔt Jiova? (b) Us wɔnin de na Ɛksodɔs 22:​22-24?

22 Di Lɔ bin de protɛkt mɔ di wan dɛn we nɔ ebul fɔ protɛkt dɛnsɛf, lɛk di pikin dɛn we dɛn mama ɛn papa dɔn day, di uman dɛn we dɛn man dɛn dɔn day, ɛn fɔrina dɛn. Jiova bin tɛl di jɔj dɛn we bin de na Izrɛl se: “Dɛn fɔ mek shɔ se nɔbɔdi nɔ tek advantej pan pɔsin bikɔs na trenja, ɔ dɛn pikin we dɛn mami ɛn dadi dɔn day,  ɛn wɔn dɛn nɔ fɔ tek uman we in man dɔn day in klos we i de tek slip fɔ ol fɔ mɔni we i go wan lɛnt.” (Dit. 24:​17) Jiova bin sho se i rili bisin bɔt di wan dɛn we nɔ ebul protɛkt dɛnsɛf na di say usay dɛn de. Ɛn i bin de pɔnish di wan dɛn we nɔ bin de trit dɛn fayn.—Rid Ɛksodɔs 22:​22-24.

23 Dɔn bak, di Lɔ bin de protɛkt ɔlman na di famili fɔ lɛ dɛn nɔ du mami ɛn dadi biznɛs wit dɛn fambul. (Lɛv. 18:​6-30) Jiova in pipul dɛn bin fɔ si dis kayn kraym as dɔti tin jɔs lɛk aw Jiova de si am, ɛn dɛn nɔ fɔ tan lɛk di ɔda neshɔn dɛn we bin de arawnd dɛn we bin de alaw dɛn kayn tin dɛn de.

24 Lɛsin dɛn: Jiova want ɔl di wan dɛn we i dɔn gi di wok fɔ de oba pipul dɛn fɔ rili bisin bɔt ɔl di wan dɛn we dɛn de oba. I et kraym dɛn we gɛt fɔ du wit mami ɛn dadi biznɛs, ɛn i want fɔ mek shɔ se dɛn protɛkt ɛn du tin tret wit ɔlman, mɔ di wan dɛn we nɔ ebul fɔ protɛkt dɛnsɛf.

DI LƆ ‘DE SHO WI AW DƐN GUD TIN WE GƐT FƆ KAM GO TAN’

25-26. (a) Aw fɔ sho lɔv ɛn fɔ du tin tret tan lɛk layf ɛn di briz we wi de blo na dis wɔl? (b) Wetin wi go tɔk bɔt na di ɔda atikul we go kam insay di Me 2019 Wachtawa?

25 Fɔ sho lɔv ɛn fɔ du tin tret tan lɛk layf ɛn di briz we wi de blo na dis wɔl; dɛn ɔl tu de wok togɛda. We wi biliv tranga wan se Jiova de trit wi di rayt we, dat go mek wi lɛk am mɔ ɛn mɔ. Ɛn we wi lɛk Gɔd ɛn lɛk in lɔ dɛn, dat go mek wi lɛk ɔda pipul dɛn ɛn trit dɛn di rayt we.

26 Di Lɔ we Gɔd bin gi Mozis bin ɛp di Izrɛlayt dɛn fɔ gɛt tayt padi biznɛs wit Jiova. Bɔt Gɔd in pipul dɛn nɔ nid fɔ obe di Lɔ igen afta we Jizɔs bin dɔn du ɔl wetin di Lɔ se. Ɛn dɛn bin chenj wit sɔntin we bɛtɛ pas am. (Rom 10:​4) Di apɔsul Pɔl se di Lɔ bin de “sho wi aw dɛn gud tin we gɛt fɔ kam, go tan.” (Ibru 10:​1) Di ɔda atikul we go kam insay di Me 2019 Wachtawa go tɔk bɔt sɔm pan dɛn gud tin dɛn ya, ɛn wetin mek fɔ sho lɔv ɛn du tin tret rili impɔtant insay di Kristian kɔngrigeshɔn.

SIŊ 109 Lɔv Fɔ Rili Kɔmɔt na Wi At

^ par. 5 Dis na di fɔs atikul pan di 4 atikul dɛn we go tɔk bɔt wetin mek wi go biliv se Jiova bisin bɔt wi. Di ɔda tri atikul dɛn go kam insay di Me 2019 Wachtawa. Di taytul fɔ dɛn atikul dɛn de go bi “Aw Jiova De Sho Lɔv ɛn Du Tin Tret Insay di Kristian Kɔngrigeshɔn?,” “Aw fɔ Sho Lɔv ɛn Du Tin Tret wit di Wan Dɛn We Dɛn Du Bad Tin To?,” ɛn “Aw Jiova De Ɛnkɔrej di Wan Dɛn We Dɛn Dɔn Du Mami ɛn Dadi Biznɛs wit Frɔm We dɛn Smɔl?

^ par. 2 WƆD WE DƐN ƐKSPLEN: Dɛn kin kɔl di 600 Lɔ dɛn ɛn ɔda wan dɛn we Jiova bin gi Mozis fɔ gi di Izrɛlayt dɛn “di Lɔ,” “Mozis in Lɔ,” “di Lɔ we Gɔd bin gi Mozis,” ɛn “di kɔmandmɛnt dɛn.” Dɔn bak, dɛn kin kɔl di fɔs fayv buk dɛn na di Baybul (Jɛnɛsis to Ditarɔnɔmi) di Lɔ. Sɔntɛnde, dɛn kin yuz dis fɔ min ɔl di Ibru Skripchɔ dɛn.

FRƆNT PEJ: Jiova bin want pikin dɛn fɔ fil sef ɛn fɔ lɛ dɛn mama ɛn papa protɛkt dɛn we dɛn de mɛn ɛn tich dɛn

^ par. 60 SMƆL TIN BƆT DI PIKCHƆ DƐN: Wan Izrɛlayt mama ɛn in gal pikin dɛn de kuk ɛn dɛn gladi we dɛn de tɔk. Dɔn biɛn dɛn, di papa de tren in bɔy pikin fɔ kia fɔ di ship dɛn.

^ par. 64 SMƆL TIN BƆT DI PIKCHƆ DƐN: Di ɛlda dɛn na di siti get de ɛp wan bɔbɔ ɛn in mama we i man dɔn day we wan biznɛsman dɔn trit dɛn bad.