Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI BƆT PƆSIN IN LAYF

Wan Jɛntri we Mi Mama ɛn Papa Gi Mi Ɛp Mi fɔ Go Bifo As Kristian

Wan Jɛntri we Mi Mama ɛn Papa Gi Mi Ɛp Mi fɔ Go Bifo As Kristian

MIDULNƐT, mi ɛn wan ɔda brɔda bin tinap nia di Riva Nayja. Riva Nayja na wan big riva we wayd lɛk wan mayl (1.6 km) ɛn di wata bin de rɔn wit spid. Da tɛm de wɔ bin de na Nayjiria, so fɔ krɔs di Riva Nayja nɔ bin sef atɔl. Bɔt pan ɔl dat, wi bin nid fɔ tek di risk bɔku tɛm. Wetin bin mek a nid fɔ du tin lɛk dat? Lɛ a tɛl yu bɔt wetin bin apin bifo dɛn bɔn mi.

Insay 1913, mi papa we nem Jɔn Mils bin baptayz na Nyu Yɔk Siti we i bin ol 25 ia. Na Brɔda Rɔsɛl bin gi di baptizim tɔk. Jɔs afta dat, Papa bin go na Trinidad, usay i mared wan sista we bin gɛt zil we nem Kɔnstans Fama. Papa bin ɛp in padi we nem Wiliam R. Brawn fɔ sho di “Photo-Drama of Creation.” Na dis dɛn kɔntinyu fɔ du te dɛn sɛn Brɔda ɛn Sista Brawn na Wɛst Afrika insay 1923. Dɔn, mi mama ɛn papa we bin gɛt di op fɔ go na ɛvin bin kɔntinyu fɔ sav Jiova na Trinidad.

MAMA ƐN PAPA WE LƐK WI

Mi mama ɛn papa bin bɔn nayn pikin dɛn. Dɛn nem di fɔs pikin Rutafɔd bikɔs na dat na bin di prɛsidɛnt fɔ Watch Tower Bible and Tract Society in nem. We dɛn bɔn mi insay Disɛmba 30, 1922, dɛn bin gi mi Kletin Wudwɔt in nem we na bin di ɛditɔ fɔ The Golden Age (we wi de kɔl naw Awake!). Wi mama ɛn papa mek wi ɔl go skul, bɔt dɛn bin de pe atɛnshɔn mɔ pan di tin dɛn we go mek wi go bifo pan Gɔd biznɛs. Mama bin rili sabi fɔ ɛksplen di Skripchɔ dɛn di kayn we we go mek pɔsin ɔndastand ɛn biliv wetin di Baybul se. Dɔn, Papa bin lɛk fɔ tɛl wi stori dɛn frɔm di Baybul, i bin de yuz in wan ol bɔdi we i de ɛksplen fɔ mek di stori rial to wi.

Dɛn bin gɛt di bɛnifit fɔ dɛn gud wok. Pan di fayv bɔy pikin dɛn, tri pan wi bin atɛnd Giliad Skul. Tri pan wi sista dɛn bin payɔnia fɔ lɔng tɛm na Trinidad ɛn Tobago. Wi mama ɛn papa yuz di tin dɛn we dɛn bin de tich wi ɛn dɛn fayn ɛgzampul fɔ plant wi “na PAPA GƆD [“Jiova,” NW] in os.” Dɛn ɛnkɔrejmɛnt bin ɛp wi fɔ kɔntinyu fɔ de na Jiova in “yad” ɔ os.—Sam 92:​13.

Na wi os dɛn bin de ɔganayz di prichin wok. Payɔnia dɛn bin de kam de ɛn bɔku tɛm dɛn bin de tɔk bɔt Brɔda Jɔj Yɔŋ, we na bin wan mishɔnari we kɔmɔt na Kanada ɛn kam  na Trinidad. Mi mama ɛn papa dɛn bin de gladi fɔ tɔk bɔt dɛn payɔnia patna dɛn we na Brɔda ɛn Sista Brawn we bin dɔn muf go na Wɛst Afrika. Ɔl dɛn tin ya bin mek a bigin fɔ prich we a bin ol tɛn ia.

WE A BIGIN FƆ PRICH

Wi magazin dɛn nɔ bin de ayd di tru tin dɛn. Dɛn bin de tɔk bɔt di rɔŋ tin dɛn we dɛn lay lay rilijɔn dɛn bin de tich, dɛn bin de tɔk bɔt wetin dɛn gridi biznɛsman dɛn de du, ɛn dɛn bin de tɔk bɔt dɛn kɔrɔpt gɔvmɛnt dɛn. Dat bin mek insay 1936, di bigman dɛn na chɔch bin mek di gɔvnɔ na Trinidad ban ɔl di buk ɛn magazin dɛn we Watch Tower bin de mek. Wi bin ayd di buk ɛn magazin dɛn ɛn kɔntinyu fɔ yuz dɛn sote dɛn dɔn. Wi bin de yuz posta dɛn ɛn smɔl smɔl pepa dɛn we wi de mach na strit ɛn we wi de rayd baysikul fɔ prich. Wi bin de yuz bak motoka we gɛt lawd spika fɔ prich na Tunapuna ɛn sɔm vilej dɛn na Trinidad. Wi bin de rili ɛnjɔy am! Da tɛm we wi spɛn togɛda fɔ prich bin mek a baptayz we a ol 16 ia.

Di brɔda ɛn sista dɛn we bin de yuz di motoka we gɛt lawd spika fɔ prich na Tunapuna

Di jɛntri we wi famili bin gi wi ɛn dɛn tin dɛn ya we bin apin to mi bin mek a want fɔ bi mishɔnari. A bin de stil tink bɔt dat we a go na Aruba insay 1944 ɛn jɔyn Brɔda Ɛdmɔn W. Kɔmins. Wi bin gladi fɔ gɛda tɛn pipul dɛn fɔ di Mɛmorial insay 1945. Di nɛks ia, wi bin mek di fɔs kɔngrigeshɔn na da ayland de.

A bigin fɔ ɛnjɔy layf difrɛn we we a mared Ɔris

Shɔt tɛm afta dat, a bin prich to wan mi wokmet we nem Ɔris Wiliams. Ɔris bin de rili agyu siriɔs wan fɔ sɔpɔt di tin dɛn we dɛn bin dɔn tich am na in chɔch. Bɔt we Ɔris bin stɔdi di Baybul, i bin kam fɔ lan wetin Gɔd in Wɔd rili tich ɛn i bin baptayz Janwari 5, 1947. As tɛm de go, wi bin kam fɔ lɛk wisɛf ɛn wi mared. Ɔris bin bigin fɔ payɔnia insay Novɛmba 1950. A bigin fɔ ɛnjɔy layf difrɛn we we a mared Ɔris.

DI FAYN SAVIS WE WI ƐNJƆY NA NAYJIRIA

Insay 1955 dɛn bin invayt wi fɔ atɛnd di Giliad Skul. Fɔ pripia fɔ go di Skul, mi ɛn Ɔris bin lɛf di wok dɛn we wi bin de du, sɛl wi os ɛn ɔda prɔpati dɛn, ɛn se baybay to Aruba. Julay 29, 1956, wi bin gradyuet wit di nɔmba 27 klas na Giliad ɛn dɛn bin sɛn wi na Nayjiria.

Wit di Bɛtɛl famili na Legɔs, insay Nayjiria, 1957

We wi tink bak bɔt wetin bin apin, Ɔris bin tɔk se: “Jiova in spirit kin ɛp pɔsin fɔ ajɔst to di ɔp-ɛn-dɔŋ we de pan mishɔnari layf. Mi man bin want fɔ bi mishɔnari bɔt mi nɔ bin ɛva want dat. A bin fɔ lɛk fɔ de na os ɛn mɛn pikin dɛn. Bɔt a bin chenj di we aw a de tink we a kam fɔ no se di tɛm rili ɔjɛnt fɔ prich di gud nyuz. Bay di tɛm we wi gradyuet frɔm Giliad, a bin dɔn rili rɛdi ɛn mekɔp mi maynd fɔ prich as mishɔnari. As wi bin de go insay di ship we nem Kwin Meri, Brɔda Wɔt Tɔntin we bin de wok wit Brɔda Nɔ bin wev ɛn tɛl wi sef jɔni. I bin tɛl wi se wi de go sav na Bɛtɛl. A bin blo kam dɔŋ ɛn tɔk se ‘Ebo, nɔto dat a bin want.’ Bɔt a bin ajɔst kwik kwik wan ɛn kam fɔ lɛk Bɛtɛl, usay a bin du difrɛn wok dɛn. Di wok we a bin ɛnjɔy pas ɔl na fɔ wok na risɛpshɔn, we na fɔ wɛlkɔm di wan dɛn we de kam na Bɛtɛl. A lɛk pipul dɛn, ɛn dis wok bin de mek a mit wit di brɔda dɛn na Nayjiria. Bɔku pan dɛn kin rich na Bɛtɛl taya taya wan, tɔsti wan, angri wan, ɛn wit soso dɔst pan dɛn bɔdi. A bin de gladi fɔ gi dɛn wetin dɛn nid ɛn mek dɛn fil fayn. Ɔl dis na wok we a de du fɔ Jiova, ɛn na dat mek a gladi ɛn satisfay.” Fɔ tru, ɛni wok we wi bin de du de mek wi kɔntinyu fɔ go bifo fɔ sav Jiova.

Na wan famili gɛt-to-gɛda na Trinidad insay 1961, Brɔda Brawn bin tɛl wi sɔm pan di fayn fayn ɛkspiriɛns dɛn we i bin gɛt na Afrika. Dɔn a bin tɔk bɔt aw wi de gro na Nayjiria. Brɔda Brawn put in an rawnd mi ɛn tɛl mi papa se: “Jɔni, yu nɔ ɛva go na Afrika, bɔt Wudwɔt dɔn go de!” Mi papa bin tɔk se: “Kɔntinyu Wɔt! Kɔntinyu!” Da kayn ɛnkɔrejmɛnt frɔm dɛn brɔda dɛn we dɔn sav Jiova fɔ lɔng tɛm bin mek a rili want fɔ wok fɔ Jiova mɔ ɛn mɔ.

Wiliam “Baybul” Brawn ɛn in wɛf, Antonia, bin rili ɛnkɔrej wi

Insay 1962, a bin gɛt di chans fɔ gɛt mɔ trenin na di nɔmba 37 klas na Giliad fɔ 10 mɔnt. Brɔda Wilfrɛd Guch we na bin di branch ovasia na Nayjiria bin atɛnd di nɔmba 38 klas ɛn dɛn bin sɛn am na Ingland. So a bin gɛt di wok fɔ de oba di branch na Nayjiria. A bin falamakata Brɔda Brawn in ɛgzampul fɔ travul go bɔku say dɛn na Nayjiria, ɛn a bin  kam fɔ lɛk ɛn sabi bɔku pan di Nayjirian brɔda dɛn. Pan ɔl we dɛn nɔ gɛt bɔku pan di tin dɛn we ɔda pipul dɛn gɛt na ɔda kɔntri dɛn we gɛt mɔni, di gladi-at ɛn di satisfay we dɛn satisfay wit wetin dɛn gɛt bin sho klia wan se fɔ gɛt layf we gɛt minin nɔ min se pas pɔsin gɛt bɔku mɔni ɔ prɔpati dɛn. We wi tink bɔt wetin bin de mit dɛn, i bin wɔndaful fɔ si se dɛn bin klin, nit, ɛn drɛs fayn na di mitin dɛn. We dɛn kin kam fɔ kɔnvɛnshɔn, bɔku pan dɛn kin yuz trɔk dɛn ɛn motaka dɛn we dɛn kɔl bolekajas * (lokal bɔs dɛn we dɛn mek we opin na ɔl tu di sayd dɛn). Bɔku tɛm dɛn bɔs dɛn de kin gɛt smɔl smɔl fɔni wɔd dɛn we dɛn rayt pan dɛn. Wan pan dɛn wɔd dɛn de na: “Little drops of water make a mighty ocean.

Dɛn wɔd dɛn de rili mek sɛns! Di tray we ɔlman de tray rili impɔtant ɛn wisɛf bin du wi yon fɔ ɛp di brɔda dɛn na Nayjiria. Insay 1974, Nayjiria bin bi di fɔs kɔntri apat frɔm Amɛrika fɔ gɛt 100,000 pɔblisha dɛn. Di wok bin de rili go bifo!

Di tɛm we ɔl dɛn bɔku bɔku pipul dɛn bin de kam na di trut insay 1967 to 1970, wɔ bin de bak na Nayjiria. Fɔ sɔm mɔnt, wi brɔda dɛn we bin de na di Biafran pat na di Nayja Riva nɔ bin ebul fɔ kam na di branch ɔfis ɛn pɔsin nɔ bin ebul fɔ kɔmɔt na di branch ɔfis fɔ go de. Bɔt wi bin gɛt di wok fɔ kɛr buk, magazin, ɛn ɔda tin dɛn ɛn fɔ tɛl dɛn wetin fɔ du. Jɔs lɛk aw a bin se fɔs, wi bin pre ɛn abop pan Jiova, ɛn wi bin ebul fɔ krɔs di riva bɔku tɛm.

A mɛmba klia wan aw wi bin de put wi layf pan denja fɔ krɔs di Riva Nayja; sik dɛn bin de, sojaman dɛn we bin de fred ɛn kwik fɔ shut bin de, ɛn ɔda bad bad tin dɛn bin de apin. I nɔ bin izi fɔ pas usay di gɔvmɛnt sojaman dɛn bin de, bɔt i bin fiaful mɔ fɔ pas na di ɔda say na di riva usay di rebɛl dɛn bin de. Wantɛm, a krɔs di Riva Nayja na nɛt wit kenu we di wata bin de rɔn wit ful spid, frɔm Asaba to Ɔnicha ɛn go bak fɔ ɛnkɔrej di wan dɛn we de oba di kɔngrigeshɔn na Enugu. Wi bin go bak fɔ ɛnkɔrej di ɛlda dɛn na Aba usay dɛn nɔ bin de alaw di pipul dɛn fɔ put layt ɔn na nɛt, so dat dɛn ɛnimi dɛn nɔ go si dɛn. Na Pɔt Akɔt, wi bin dɔn wi mitin kwik wit prea we di gɔvmɛnt sojaman dɛn bin skata usay di rebɛl dɛn bin dɔn blɔk fɔ ɛnta di tɔŋ.

Dɛn mitin dɛn de bin rili impɔtant fɔ ɛnkɔrej wi brɔda dɛn se Jiova lɛk dɛn ɛn i bisin bɔt dɛn, dɔn fɔ mek dɛn no klia wan se dɛn nɔ nid fɔ put an pan di wɔ ɛn dɛn fɔ gɛt wanwɔd. Di brɔda dɛn na Nayjiria bin rili bia te da fiaful wɔ de dɔn. Di lɔv we di brɔda dɛn bin gɛt bin strɔng pas di we aw pipul dɛn bin et dɛn kɔmpin dɛn we de na ɔda trayb, ɛn dɛn bin kɔntinyu fɔ gɛt wanwɔd as tru Kristian dɛn. Na big big chans wi bin gɛt fɔ de wit wi brɔda dɛn insay da tranga tɛm de!

Insay 1969, na Brɔda Miltin Ɛnshɛl bin bi di chiaman fɔ di “Peace on Earth” Intanashɔnal Asɛmbli we wi bin gɛt na Yanki Stediɔm, insay Nyu Yɔk. Na mi bin de nia am fɔ ɛp am ɛn a bin lan bɔku tin. Dis bin rili fayn bikɔs insay 1970 wi bin gɛt di “Men of Goodwill” Intanashɔnal Asɛmbli na Legɔs, insay Nayjiria. Na Jiova nɔmɔ bin ɛp wi fɔ mek da Asɛmbli de kɔmɔt fayn, bikɔs wi jɔs kɔmɔt pan wɔ. Na bin di fɔstɛm fɔ gɛt dis kayn wɔndaful program we wi bin gɛt insay 17 langwej dɛn, ɛn na 121,128 pipul dɛn bin atɛnd. Brɔda Nɔ, Brɔda Ɛnshɛl, ɛn ɔda visitɔ dɛn we bin chata plen dɛn frɔm Amɛrika ɛn Ingland bin kam fɔ di asɛmbli ɛn dɛn bin si we 3,775 pipul dɛn bin baptayz fɔ bi nyu disaypul dɛn. Frɔm Pɛntikɔst, dis na bin di fɔs tɛm we bɔku bɔku pipul dɛn bin baptayz fɔ bi tru Kristian. Da tɛm de na bin wan pan di tɛm we a bin rili bizi na mi layf bikɔs a bin ɛp fɔ ɔganayz di program. Di pɔblisha dɛn na Nayjiria bin de bɔku kwik kwik wan pas ɔda kɔntri dɛn!

Na di “Men of Goodwill” Intanashɔnal Asɛmbli usay 121,128 pipul dɛn bin atɛnd we de tɔk 17 difrɛn langwej dɛn ɛn ivin Ibo

I bin pas 30 ia we wi sav na Nayjiria, ɛn insay dɛn tɛm dɛn de, a bin de ɛnjɔy fɔ de sav wan wantɛm as travlin ovasia ɛn zon ovasia na Wɛst Afrika. Di mishɔnari dɛn bin rili gladi we a bin de lisin to dɛn wan bay wan ɛn ɛnkɔrej dɛn! A bin gladi fɔ ɛp dɛn fɔ no se wi nɔ fɔgɛt dɛn! Dis wok ɛp mi fɔ no se we wi sho se wi bisin bɔt wi brɔda ɛn sista dɛn, dat na di men tin we go mek dɛn sav Jiova ɛn kɔntinyu  fɔ mek Jiova in ɔganayzeshɔn strɔng ɛn gɛt wanwɔd.

Na Jiova nɔmɔ bin ɛp wi fɔ bia wit di prɔblɛm dɛn we di wɔ bin briŋ kam ɛn di sik dɛn we bin de. Wi bin si aw Jiova bin de blɛs wi ɔltɛm. Ɔris bin tɔk se:

“Bɔku tɛm wi ɔl tu bin de sik maleria. Wande, Wɔt bin fent ɛn dɛn bin kɛr am go na wan ɔspitul na Legɔs. Dɛn bin tɛl mi se sɔntɛm i nɔ go liv, bɔt a tɛl Jiova tɛnki fɔ we i nɔ bin day! We i bin kam to, i bin tɔk to di nɔs we bin de nia am bɔt Gɔd in Kiŋdɔm. Leta, mi ɛn Wɔt bin go fɛn Mista Muambui we na bin di nɔs fɔ ɛnkɔrej am fɔ stɔdi di Baybul. I bin tek di trut ɛn leta i bin bi ɛlda na Aba. Misɛf dɔn ebul fɔ ɛp bɔku pipul dɛn fɔ tek di trut, ivin strɔng strɔng Muslim dɛn dɔn bi Jiova in savant dɛn. Wi bin rili gladi fɔ sabi ɛn lɛk di pipul dɛn na Nayjiria, dɛn kɔlchɔ, dɛn kɔstɔm dɛn, ɛn dɛn langwej.”

Di lɛsin we wi lan na dat, fɔ go bifo fɔ sav Jiova na ɔda kɔntri wi nid fɔ lɛk wi brɔda ɛn sista dɛn ilɛk aw dɛn kɔlchɔ difrɛn frɔm wi yon.

NYU ASAYNMƐNT

Afta wi dɔn sav na Bɛtɛl na Nayjiria, wi bin gɛt nyu asaynmɛnt fɔ bi mishɔnari na wan fayn ayland we nem Sɛnt Lusia na di Karebian insay 1987. Na bin fayn asaynmɛnt, bɔt wi bin gɛt nyu prɔblɛm dɛn. Sɛnt Lusia nɔ bin tan lɛk Afrika, usay wan man de mared bɔku uman dɛn, dɛn yon prɔblɛm na dat, man ɛn uman de de togɛda we dɛn nɔ mared ligal wan. Gɔd in pawaful wɔd bin ɛp bɔku pan wi Baybul studɛnt dɛn fɔ chenj.

A bin lɛk Ɔris pasmak fɔ ɔl di 68 ia we wi bin dɔn mared

As wi de ol ɛn nɔ gɛt bɛtɛ trɛnk igen, di Gɔvnin Bɔdi bin transfa wi na di wɔl ɛdkwata na Bruklin, insay Nyu Yɔk, na Amɛrika, insay 2005. A de tɛl Jiova tɛnki ɛvride fɔ we i bin gi mi wɔndaful uman lɛk Ɔris. I bin day insay 2015, ɛn a nɔ ebul fɔ ɛksplen di we aw a de fil we a lɔs am. Ɔris in kayn uman at fɔ si, i bin lɛk pipul dɛn, ɛn i bin gɛt bɔku fayn fayn kwaliti dɛn. A bin lɛk am pasmak fɔ ɔl di 68 ia we wi bin dɔn de togɛda. Wi bin kam fɔ no se di men tin we go mek wi gɛt gladi-at na wi mared-os ɛn di kɔngrigeshɔn na we wi gɛt rɛspɛkt fɔ di wan dɛn we de oba wi, we wi fɔgiv wit ɔl wi at, we wi kɔntinyu fɔ put wisɛf dɔŋ, ɛn gɛt di kwaliti dɛn we di oli spirit de gi.

Wi kin abop pan Jiova fɔ ɛp wi fɔ kɔntinyu fɔ sav am we wi at pwɛl ɔ we tin dɛn nɔ apin di we aw wi want. As wi de kɔntinyu fɔ ajɔst, wi kin si se tin kin bɛtɛ ɔltɛm. Ɛn bɛtɛ tin dɛn gɛt fɔ apin tumara bambay!—Ayz. 60:​17; 2 Kɔr. 13:​11.

Insay Trinidad ɛn Tobago, Jiova bin blɛs di wok we mi mama ɛn papa ɛn ɔda brɔda ɛn sista dɛn bin du, ɛn di las ripɔt sho se 9,892 pipul dɛn dɔn jɔyn tru wɔship. Insay Aruba, bɔku brɔda ɛn sista dɛn bin de wok tranga wan fɔ mek di fɔs kɔngrigeshɔn gro mɔ ɛn mɔ, ɛn na da kɔngrigeshɔn de a bin de. Naw, na 14 kɔngrigeshɔn dɛn we du wɛl de na da ayland de. Insay Nayjiria, di pɔblisha dɛn nɔmba dɔn go ɔp to 381,398 we na lɛk wan big big krawd. Ɛn na 783 pipul dɛn de sɔpɔt Jiova in Kiŋdɔm na Sɛnt Lusia.

A dɔn pas 90 ia naw. Sam 92:​14 tɔk bɔt di wan dɛn we dɛn plant na Jiova in os fɔ se: “Pan ɔl we dɛn dɔn ol dɛn go stil de bia, dɛn go luk frɛsh ɔltɛm.” A rili gladi fɔ we a dɔn yuz ɔl mi layf fɔ sav Jiova. Di jɛntri we mi mama ɛn papa gi mi dɔn ɛnkɔrej mi fɔ sav Jiova wit ɔl mi at. Di lɛk we Jiova lɛk mi dɔn mek a kɔntinyu fɔ de “na [mi] PAPA GƆD [“Jiova,” NW] in os” ɔ “yad.”—Sam 92:​13.

^ par. 18 Luk di Mach 8, 1972 Awake! pej 24 to 26.