Go dayrɛkt to di men tin

Go dayrɛkt to di say we di difrɛn difrɛn atikul dɛn de

STORI BƆT PƆSIN IN LAYF

Wi Fɛn di “Pal we Rili Gɛt Valyu”

Wi Fɛn di “Pal we Rili Gɛt Valyu”

WINSTIN ɛn Pamɛla (Pam) Pen de wok na di Ɔstraleshia branch ɔfis. Pan ɔl we dɛn gɛt gladi-at, dɛn bin dɔn gɛt prɔblɛm dɛn lɛk fɔ tray fɔ sabi difrɛn kɔlchɔ dɛn ɛn fɔ bia di pen we dɛn bin fil di tɛm we Pamɛla in bɛlɛ bin west. Dɛn dɔn kɔntinyu fɔ sho se dɛn lɛk Jiova ɛn in pipul dɛn, ɛn dɛn gladi fɔ du di prichin wok, pan ɔl we dɛn bin gɛt ɔl dɛn prɔblɛm ya. Insay dis intavyu, wi invayt dɛn fɔ tɛl wi bɔt sɔm pan di tin dɛn we dɔn apin to dɛn.

Winstin, duya tɛl wi bɔt aw yu bin ebul fɛn di tru bɔt Gɔd.

A mɛn na wan fam na Kwinsland, insay Ɔstrelia, ɛn mi famili nɔ bin biliv Gɔd. Bikɔs wi nɔ bin de nia ɔda pipul dɛn, a nɔ bin sabi ɛni ɔda pɔsin apat frɔm mi famili we a bin de wit. Frɔm we a ol 12 ia, a bigin fɔ tray fɔ no Gɔd. A bin pre to am ɛn aks am fɔ ɛp mi mek a sabi di tru tin bɔt am. As tɛm de go, a bin lɛf di fam ɛn go fɛn wok na Adiled, na di Sawt pat na Ɔstrelia. We a ol 21 ia, na in a mit Pam di tɛm we a bin go na Sidni fɔ ɔlide, ɛn i bin tɛl mi bɔt di British-Izrɛl rilijɔn grup we biliv se di British pipul dɛn kɔmɔt frɔm di trayb dɛn na Izrɛl we pipul dɛn se bin dɔn lɔs. Dɛn pipul dɛn de biliv se dɛn trayb dɛn de na di tɛn trayb dɛn we bin de na di nɔt pat na Izrɛl we dɛn bin kapchɔ arawnd di ia 800 bifo Krays. So we a go bak na Adiled, a tɔk bɔt da tɔpik de to mi wokmet we bin dɔn bigin stɔdi di Baybul wit Jiova Witnɛs dɛn. A tɔk wit am fɔ sɔm tɛm, ɛn di men tin we wi tɔk bɔt na wetin Jiova Witnɛs dɛn biliv. Afta we wi dɔn fɔ tɔk, a kam fɔ no se Gɔd dɔn ansa di prea we a bin pre we a smɔl. A bin kam fɔ no se a de lan di tru tin bɔt di Wan we mek mi ɛn in Kiŋdɔm! Ɛn a dɔn fɛn di “pal we rili gɛt valyu.”—Mat. 13:​45, 46, NW.

Pam, yusɛf bigin luk fɔ da pal de we yu bin smɔl. Duya tɛl wi aw yu bin ebul fɛn am.

A mɛn na famili we lɛk Gɔd biznɛs insay wan tɔŋ we nem Kɔfs Abɔ, na Nyu Sawt Wels. Mi mama ɛn papa wit mi grani ɛn granpa bin biliv wetin di British-Izrɛl rilijɔn de tich. So frɔm we mi, mi smɔl brɔda, mi big sista, ɛn mi kɔzin dɛn bin de kam ɔp, wi pipul dɛn mek wi biliv se Gɔd rili lɛk ɛnibɔdi we kɔmɔt frɔm di British pipul dɛn famili layn. Bɔt mi nɔ bin biliv dɛn tin dɛn de, ɛn a bin de fil lɛk se a nɔ de nia Gɔd. So we a rich 14 ia, a bin de go na difrɛn difrɛn chɔch dɛn, lɛk di Anglikan chɔch, di Baptist chɔch, ɛn di Sɛvin-dez Advɛntist chɔch. Bɔt dat nɔ bin stil ɛp mi fɔ no Gɔd.

Leta, mi famili muf go na Sidni, ɛn na de a mit Winstin di tɛm we i go de fɔ ɔlide. Jɔs lɛk aw i bin dɔn tɔk, na di tin dɛn we wi bin tɔk bɔt rilijɔn biznɛs bin mek i bigin stɔdi wit Jiova Witnɛs dɛn. Ɛn afta dat, i bin de rayt bɔku skripchɔ dɛn insay di lɛta dɛn we i bin de rayt to mi! Usay tru de fɔ tɔk, dat bin de mek a wɔri, ɛn a bin de ivin vɛks. Bɔt smɔl smɔl, misɛf bin kam fɔ si se na di tru tin dɛn bɔt Gɔd i bin de tɛl mi.

Insay 1962, a muf go na Adiled, so dat a go de nia Winstin. I bin dɔn arenj fɔ lɛ a go de wit wan maredman ɛn in wɛf we nem Tɔmɔs ɛn Janis Sloman. Dɛnsɛf na Jiova Witnɛs dɛn we bin dɔn bi mishɔnari na Papua Nyu Gini. Dɛn pipul dɛn de bin rili gud to mi. A bin jɔs ol 18 ia ɛn dɛn bin rili ɛp mi fɔ no mɔ bɔt Jiova. So misɛf bin bigin fɔ stɔdi Gɔd in Wɔd, ɛn i nɔ tu te a kam biliv se a dɔn fɛn di tru. Afta mi ɛn Winstin mared, wi bigin wantɛm wantɛm fɔ liv layf we gɛt blɛsin we na fɔ sav Jiova, ɛn pan ɔl we wi bin gɛt prɔblɛm dɛn, dis layf we wi de liv dɔn ɛp wi fɔ sho se wi valyu dis fayn pal mɔ ɛn mɔ.

Winstin, duya tɛl wi bɔt wetin apin di tɛm we yu bin jɔs bigin fɔ sav Jiova.

A. Map we de sho di say dɛn we wi bin de go we wi bin de du di sakit wok

B. Stamp dɛn we dɛn kin put pan post kad. Kiribati ɛn Tuvalu, we dɛn bin de kɔl di Gilbat ɛn Ɛlis Ayland dɛn

C. Di fayn Funafuti koral ayland insay Tuvalu. Dis na wan pan di ayland dɛn we wi bin go bifo dɛn sɛn mishɔnari dɛn de

I nɔ tu te afta mi ɛn Pam mared, Jiova bigin fɔ gi wi ‘chans fɔ du big wok’ ɛn fɔ du mɔ na in savis. (1 Kɔr. 16:​9) Brɔda Jak Pɔta we bin de sav as sakit ovasia na wi smɔl kɔngrigeshɔn bin ɛp wi fɔ no di fɔs chans we wi gɛt fɔ wok fɔ Jiova. (In na mi kɔmpin Branch Kɔmiti mɛmba na di Ɔstraleshia branch ɔfis.) Jak ɛn in wɛf Rozlin bin ɛnkɔrej wi fɔ rɛgyula payɔnia, ɛn wi bin ɛnjɔy fɔ du am fɔ fayv ia. We a bin ol 29 ia, dɛn bin aks mi ɛn Pam fɔ go du di sakit wok na di Sawt pat na di Pasifik Ayland dɛn we bin de ɔnda di Fiji branch. Di ayland dɛn na bin Amɛrikan Samoa, Samoa, Kiribati, Naru, Nyu, Tokalau, Tongia, Tuvalu, ɛn Vɛnuatu.

Dɛn tɛm dɛn de, pipul dɛn we bin de na ayland dɛn we de fa frɔm ɔda wan dɛn bin de wach Jiova Witnɛs dɛn wit wan kayn ya, so wi bin nid fɔ tek tɛm. (Mat. 10:​16) Di kɔngrigeshɔn dɛn bin smɔl ɛn sɔm pan dɛn nɔ bin ebul fɔ gi wi say fɔ slip. So wi bin de aks di pipul dɛn we bin de na di vilej dɛn if wi kin de na dɛn os, ɛn dɛn bin de gri fɔ ɛp wi ɔltɛm.

Winstin, yu rili lɛk di transleshɔn wok. Wetin mek yu de fil da we de?

Insay Samoa, a de tich di ɛlda na wan skul fɔ ɛlda dɛn

Da tɛm de, di brɔda dɛn na di Tongia ayland nɔ bin gɛt bɛtɛ trakt ɛn smɔl buk dɛn insay di Tongian langwej we na Polinishian langwej. We di brɔda dɛn bin de go fil savis, dɛn bin de stɔdi pipul dɛn di buk we nem The Truth That Leads to Eternal Life insay Inglish. So na wan skul fɔ ɛlda dɛn we bin de fɔ 4 wiks, tri ɛlda dɛn we nɔ bin sabi bɛtɛ Inglish bin gri fɔ translet di buk we nem The Truth That Leads to Eternal Life insay di Tongian langwej. Na Pam bin tayp wetin dɛn translet, ɛn wi sɛn am na di branch ɔfis na Amɛrika fɔ mek dɛn print am. Wi bin dɔn di wok insay et wiks. Pan ɔl we di transleshɔn nɔ bin fayn bɛtɛ, di buk bin ɛp bɔku pipul dɛn we bin de tɔk di Tongian langwej fɔ lan di tru. Mi ɛn Pam nɔto transletɔ dɛn, bɔt da ɛkspiriɛns de we wi bin gɛt bin mek wi lɛk di wok.

Pam, aw layf na di ayland dɛn bin difrɛn frɔm layf na Ɔstrelia?

Wan pan di say dɛn we wi bin de di tɛm we wi bin de du di sakit wok

I bin rili difrɛn! Na sɔm say dɛn, wi bin gɛt fɔ bia wit di bɔku maskita dɛn, di we aw ples kin wam pasmak, arata dɛn, sik dɛn, ɛn sɔntɛnde, wi nɔ bin gɛt bɛtɛ tin fɔ it. Bɔt pan ɔl dat, we di de kin dɔn, wi kin fil fayn fɔ wach di si we wi kin sidɔm na wi bafa we dɛn kin kɔl fale insay Samoa. We di mun kin shayn, wi kin si di kokonat tik dɛn ɛn di mun kin sho na di wata. Dɛn fayn tɛm dɛn de we wi bin de ɛnjɔy, bin de mek wi tink gud wan ɛn pre. We wi du dat, i kin mek wi lɛf fɔ tink bɔt di bad tin dɛn we bin de apin ɛn tink bɔt di gud tin dɛn we wi bin de ɛnjɔy.

Wi bin kam fɔ lɛk di pikin dɛn, bikɔs dɛn bin fɔni ɛn dɛn bin rili want fɔ no bɔt wi di wetman dɛn. Wantɛm we wi bin go na Nyu, wan smɔl bɔbɔ bin rɔb in an pan di ia we de na Winstin in an ɛn tɔk se, “A lɛk yu fɛda dɛn.” Wɛl, di bɔbɔ nɔ bin dɔn ɛva si ia na pɔsin in an we bɔku so, ɛn i nɔ bin rili no aw fɔ kɔl am!

Wi at bin de pwɛl we wi de si aw di pipul dɛn po ɛn aw tin tranga fɔ dɛn. Dɛn bin de na fayn ples, bɔt dɛn nɔ bin de gɛt bɛtɛ tritmɛnt we i kam to wɛlbɔdi biznɛs ɛn dɛn nɔ bin gɛt bɛtɛ wata fɔ drink. Bɔt wi brɔda dɛn nɔ bin de wɔri bikɔs dɛn bin dɔn yus to dat. Dɛn bin gladi bikɔs dɛn de wit dɛn famili, dɛn gɛt say fɔ wɔship Gɔd, ɛn dɛn gɛt di chans fɔ prez Jiova. Dɛn ɛgzampul ɛp wi fɔ no se wi fɔ pe atɛnshɔn pan wetin rili impɔtant ɛn kɔntinyu fɔ liv simpul layf.

Pam, sɔntɛnde, yu bin de gɛt wata fɔ yusɛf ɛn kuk di we aw yu nɔ bin yus fɔ du am. Aw yu bin ebul fɔ du ɔl dat?

Insay Tongia, Pam de bruk wi klos dɛn

Wɛl, a gladi fɔ we mi papa bin dɔn tren mi fɔ du bɔku tin dɛn, lɛk fɔ mek faya, kuk na do, ɛn aw fɔ manej di smɔl tin we wi gɛt. Wantɛm we wi bin go na Kiribati, wi bin go de na wan smɔl os we dɛn bil wit ken stik, ɛn dɛn mek di ruf wit gras. We a bin wan kuk, a dig ol na grɔn fɔ mek faya, ɛn a yuz kokonat kanda fɔ mek di faya kech. A bin de go gɛt wata wit ɔda uman dɛn. We dɛn want fɔ gɛt wata, dɛn de tay smɔl rop pan lɔng stik ɛn tay kɔntena pan di rop fɔ bel di wata. Dɛn kin du am bay tɔn, ɛni uman kin sɛn di rop ɛn i kin sabi bɛn in an di rayt tɛm fɔ lɛ di wata go insay di kɔntena. A bin de fil se na izi tin fɔ du, pas we mi tɔn rich na in a no se i nɔ izi. A bin de sɛn di rop insay di wata bɔku tɛm, bɔt di kɔntena bin jɔs de fɔdɔm pantap di wata, ɛn no wata nɔ de go insay am. Na afta we ɔlman dɔn laf mi dɔn, na in wan pan di uman dɛn go ɛp mi. Bɔt di pipul dɛn bin de ɛp wi ɛn du gud to wi ɔltɛm.

Una ɔl tu bin lɛk di wok we una bin de du na di ayland dɛn. Duya una tɛl wi sɔm spɛshal tin dɛn we una mɛmba bɔt dɛn tɛm dɛn de.

Winstin: Nɔto wantɛm wantɛm wi bin ebul fɔ ɔndastand sɔm pan dɛn kɔstɔm dɛn. Fɔ ɛgzampul, we di brɔda dɛn bin de gi wi tin fɔ it, dɛn de gi wi ɔl di it we dɛn gɛt. Fɔs, wi nɔ bin no se wi fɔ lɛf fɔ dɛn. So wi bin it ɔltin we dɛn gi wi! Bɔt we wi bin kam fɔ no wetin dɛn want wi fɔ du, wi bin de lɛf sɔm fɔ dɛn. Pan ɔl we wi bin de mek mistek, di brɔda dɛn bin de sho se dɛn ɔndastand wi. Ɛn dɛn bin de rili gladi we wi bin de go to dɛn afta lɛk siks mɔnt fɔ sakit visit. Apat frɔm mi ɛn Pam, di brɔda dɛn we bin de na di ayland dɛn nɔ bin de ebul mit wit ɛni ɔda Jiova Witnɛs we nɔ de na dɛn kɔngrigeshɔn.

Insay Nyu Ayland, a de go wit di grup na fil savis

Di fɛn we wi bin de go fɛn dɛn na bin fayn tin we bin de mek di ɔda pipul dɛn we de na dɛn eria no bɔt wi. Bɔku pan di pipul dɛn na di vilej nɔ bin biliv se wi brɔda dɛn gɛt dɛn kɔmpin Jiova Witnɛs dɛn ɔdasay. So we mi ɛn Pam bin de kɔmɔt ovasi fɔ go fɛn wi brɔda dɛn, dat bin de mek di ɔda pipul dɛn kɔle we dɛn de si se wi kia fɔ wisɛf.

Pam: A nɔ go ɛva fɔgɛt di tɛm we wi bin de na Kiribati, di brɔda ɛn sista dɛn we bin de na di kɔngrigeshɔn nɔ bin bɔku. Di wangren ɛlda we bin de de we nem Itinikay Matira bin de du in bɛst fɔ kia fɔ wi. Wantɛm, i kam to wi wit baskɛt we gɛt wangren eg, na in i se, “Dis na fɔ una.” Dɛn tɛm dɛn de, i nɔ bin izi fɔ si fɔl eg. So pan ɔl we na smɔl tin i du fɔ wi, i bin rili tɔch wi at.

Pam, afta sɔm tɛm, yu bin gɛt bɛlɛ, bɔt i bin west. Wetin bin ɛp yu fɔ bia da prɔblɛm de?

A bin gɛt bɛlɛ insay 1973 we mi ɛn Winstin bin de na di Sawt Pasifik. So wi bin kam bak na Ɔstrelia, bɔt di pikin bin day afta 4 mɔnt. Winstin insɛf yon at bin rili pwɛl, bikɔs na mi ɛn in bin gɛt di pikin. Afta sɔm tɛm, mi at nɔ bin pwɛl lɛk aw i bin pwɛl fɔs, bɔt na afta we di Epril 15, 2009 Wachtawa bin kɔmɔt na in mi at nɔ bin pwɛl igen. Di kwɛstyɔn we bin de na di say we se “Questions From Readers” na: “Ɛni op de fɔ se pikin we day na in mama in bɛlɛ go gɛt layf bak?” Di atikul bin ɛp wi fɔ no se ɔltin lɛf to Jiova, bikɔs in na Gɔd we de du wetin rayt. I go pul ɔl di pen we wi de fil we wi de na dis wikɛd wɔl, di lɔv we i gɛt fɔ wi go mek i yuz in Pikin fɔ “pwɛl Setan in wok.” (Jɔn In Fɔs Lɛta 3:​8) Di atikul bin ɛp wi bak fɔ valyu di “pal” we wi gɛt as Jiova in pipul dɛn. Dis op we wi gɛt de rili mek wi gɛt kɔrej!

Afta we wi pikin bin day, wi bigin yuz bɔku pan wi tɛm fɔ sav Jiova bak. Wi wok na di Bɛtɛl na Ɔstrelia fɔ sɔm mɔnt, dɔn wi bigin du sakit wok bak. Insay 1981, afta we wi du di sakit wok na Nyu Sawt Wels ɛn Sidni fɔ 4 ia, dɛn invayt wi fɔ go wok na Bɛtɛl na Ɔstrelia ɛn na de wi dɔn de wok frɔm da tɛm de.

Winstin, duya tɛl wi if di tin dɛn we bin apin to yu na di Sawt pat na di Pasifik Ayland dɛn, de ɛp yu pan di wok we yu de du as mɛmba na di Ɔstraleshia Branch Kɔmiti?

Yɛs, i de ɛp mi difrɛn difrɛn we dɛn. Fɔs, na di Bɛtɛl na Ɔstrelia de kia fɔ di wok na Amɛrikan Samoa ɛn Samoa. Afta dat, dɛn bin mek di Bɛtɛl na Nyu Ziland ɛn di Bɛtɛl na Ɔstrelia kam togɛda fɔ bi wan. So naw di Bɛtɛl na Ɔstraleshia de kia fɔ di wok na Ɔstrelia, Amɛrikan Samoa ɛn Samoa, di Kuk Ayland Dɛn, Nyu Ziland, Nyu, Timo-Lɛst, Tokalau, ɛn Tongia. A dɔn ebul go na sɔm pan dɛn ples dɛn ya as branch rɛprizɛntetiv. Di ɛkspiriɛns we a gɛt di tɛm we a wok wit di brɔda ɛn sista dɛn we de na dɛn ayland dɛn de dɔn rili ɛp mi, ɛn a de yuz am naw we a de wok fɔ dɛn na di branch ɔfis.

Winstin ɛn Pam we dɛn de na di Bɛtɛl na Ɔstraleshia

Di las tin we a go lɛk fɔ tɔk na dat fɔ lɔng tɛm, mi ɛn Pam dɔn kam fɔ no se nɔto big pipul dɛn nɔmɔ de tray fɔ no Gɔd. Di tin dɛn we dɔn apin to wi dɔn mek wi no se ivin yɔŋ pipul dɛn de luk fɔ di “pal we rili gɛt valyu.” Dɛn de luk fɔ am ivin we i bi se dɛn famili nɔ go want fɔ no bɔt wetin dɛn de luk fɔ. (2 Kiŋ 5:​2, 3; 2 Kro. 34:​1-3) Fɔ tru, Jiova na Gɔd we rili lɛk wi, ɛn i want fɔ mek wi ɔl gɛt layf, ilɛksɛf wi yɔŋ ɔ ol!

Na 50 ia dɔn pas we mi ɛn Pam bin bigin fɔ tray fɔ no Gɔd, ɛn wi nɔ bin no se na dis wi go no. Di tru tin we wi dɔn lan bɔt Gɔd in Kiŋdɔm tan lɛk pal we rili gɛt valyu! Wi dɔn mekɔp wi maynd se wi go kɔntinyu fɔ ol dis pal wit tu an!