Go dayrɛkt to di men tin

Go dayrɛkt to di say we di difrɛn difrɛn atikul dɛn de

Jɔn We De Baptayz Pipul Dɛn—Wan Lɛsin we Go Ɛp Wi fɔ Kɔntinyu fɔ Gɛt Gladi-At

Jɔn We De Baptayz Pipul Dɛn—Wan Lɛsin we Go Ɛp Wi fɔ Kɔntinyu fɔ Gɛt Gladi-At

ƐNI asaynmɛnt de we yu go want fɔ du insay di kɔngrigeshɔn bɔt we yu nɔ ebul fɔ du rayt naw? Sɔntɛm na wok we ɔda pɔsin de du. Ɔ sɔntɛm i kin bi savis asaynmɛnt, ɔ wok we yu bin de du trade. Bɔt yu nɔ ebul fɔ du bɛtɛ tin naw bikɔs yu dɔn de ol, yu nɔ gɛt bɛtɛ wɛlbɔdi, tin de tranga, ɔ yu gɛt famili fɔ kia fɔ rayt naw. Ɔ i go bi se yu bin gɛt fɔ lɛf di asaynmɛnt we yu bin dɔn de du fɔ lɔng tɛm, bikɔs dɛn bin ajɔst sɔm tin dɛn na di ɔganayzeshɔn. Ilɛk us rizin yu gɛt, sɔntɛm yu go de fil se yu nɔ de du ɔl wetin yu want fɔ du fɔ sav Gɔd. If dis kayn tin de apin, na nɔmal tin fɔ lɛ pɔsin fil bad sɔntɛnde. Bɔt wetin go ɛp yu fɔ lɛ yu nɔ de fil bad, vɛks, ɔ bigin kip grɔj na yu at? Aw yu go kɔntinyu fɔ gɛt gladi-at?

Wi go lan wan impɔtant lɛsin bɔt aw wi go kɔntinyu fɔ gɛt gladi-at frɔm Jɔn we bin de baptayz pipul dɛn. Jɔn bin de ɛnjɔy spɛshal asaynmɛnt dɛn, bɔt i nɔ bin no wetin go apin na in layf. Sɔntɛm, i nɔ bin ɛva imajin se I go spɛn mɔ tɛm na jel pas di tɛm we i bin spɛn fɔ du di prichin wok. Stil, Jɔn nɔ bin alaw dat fɔ mek in at pwɛl, ɛn i bin kɔntinyu fɔ gɛt gladi-at te i day. Wetin bin ɛp am? Aw wi go kɔntinyu fɔ gɛt gladi-at ivin if sɔntin apin to wi we go mek wi at pwɛl?

ASAYNMƐNT WE MEK JƆN GƐT GLADI-AT

Arawnd Epril insay di ia 29, Jɔn bin stat di asaynmɛnt we Jiova bin gi am, dat na fɔ pripia di pipul dɛn fɔ di Mɛsaya in kam wan. I bin de tɛl di pipul dɛn se: “Una chenj una we ɛn lɛf fɔ du di bad tin dɛn we una de du, bikɔs Gɔd in rul dɔn kam klos!” (Mat. 3:​2; Lyuk 1:​12-17, NW) Bɔku pipul dɛn bin chenj. Infakt, bɔku bɔku pipul dɛn bin travul kɔmɔt fa say fɔ kam lisin in mɛsej, ɛn plɛnti pan dɛn bin ripɛnt ɛn baptayz. Dɔn, Jɔn bin gɛt maynd fɔ wɔn di bigman dɛn pan Gɔd biznɛs we bin de mek lɛk se dɛn de du wetin rayt pasmak se Gɔd go jɔj dɛn if dɛn nɔ chenj. (Mat. 3:​5-12) Jɔn bin du di tin we impɔtant pas ɔl pan in prichin wok di tɛm we i baptayz Jizɔs arawnd Ɔktoba insay di ia 29. Frɔm da tɛm de, Jɔn bin tɛl ɔda pipul dɛn fɔ fala Jizɔs we na di Mɛsaya.—Jɔn 1:​32-37.

Bikɔs Jɔn bin gɛt spɛshal wok, Jizɔs bin tɔk se: “Jɔn we de baptayz, pas ɔlman we bin dɔn kam na [di] wɔl bifo am.”  (Mat. 11:​11) Wi shɔ se Jɔn bin gladi fɔ di blɛsin dɛn we i bin gɛt. Jɔs lɛk Jɔn, bɔku brɔda dɛn tide dɔn gɛt wɔndaful blɛsin dɛn frɔm Jiova. Fɔ ɛgzampul, wan brɔda we nem Tɛri ɛn in wɛf, Sandra, bin dɔn spɛn ova 50 ia na ful-taym savis. Tɛri bin tɔk se: “A bin gɛt bɔku wɔndaful asaynmɛnt dɛn. A bin sav as payɔnia, Bɛtɛlayt, spɛshal payɔnia, sakit ovasia, distrit ovasia, ɛn naw a dɔn bi spɛshal payɔnia bak.” Wi kin gladi we wi gɛt asaynmɛnt insay Jiova in ɔganayzeshɔn, bɔt wi nid fɔ tray tranga wan fɔ kɔntinyu fɔ gɛt gladi-at ivin we tin chenj na wi layf, jɔs lɛk aw wi go lan frɔm Jɔn in ɛgzampul.

NA FƆ GLADI ƆLTƐM FƆ WETIN JIOVA DE ALAW YU FƆ DU

Wan men tin we bin mek Jɔn we de baptayz pipul dɛn kɔntinyu fɔ gɛt gladi-at na we i bin gladi fɔ di asaynmɛnt dɛn we i bin gɛt. Lɛ wi tɔk bɔt wan ɛgzampul. Afta we Jizɔs baptayz, di pipul dɛn we bin de fala Jɔn bin ridyus bɔt mɔ ɛn mɔ pipul dɛn bin de fala Jizɔs. Jɔn in disaypul dɛn bin wɔri bɔt dis ɛn dɛn bin tɛl am se Jizɔs “de baptayz pipul naw na Riva Jɔdan, ɛn plɛnti plɛnti pipul de go to am fɔ mek i baptayz dɛn!” (Jɔn 3:​26) Jɔn bin ansa dɛn se: “Na di ɔkɔ gɛt di yawo, bɔt di ɔkɔ in padi we tinap klos dɛn go gladi [pasmak] wɛn i yɛri di ɔkɔ de tɔk. Na dat mek a gladi bad.” (Jɔn 3:​29) Jɔn nɔ bin kɔmpit wit Jizɔs; ɔ fil se in wok nɔ gɛt wan valyu bikɔs Jizɔs in wok bin rili impɔtant. Bifo dat, Jɔn bin kɔntinyu fɔ valyu in wok we i bin gɛt as “di ɔkɔ in padi.”

Di we aw Jɔn bin de biev bin ɛp am fɔ kɔntinyu fɔ gɛt gladi-at pan ɔl we in asaynmɛnt nɔ bin izi fɔ am. Fɔ ɛgzampul, Jɔn na bin Nazarayt frɔm di tɛm we i bɔn, so i nɔ fɔ drink wayn. (Lyuk 1:​15) We Jizɔs bin de tɔk bɔt di simpul layf we Jɔn bin de liv, i bin tɔk se: “Wɛn Jɔn bin de wit una, i bin de fast ɛn i nɔ bin de drink wayn.” Bɔt Jizɔs ɛn in disaypul dɛn nɔ bin de ɔnda di lɔ fɔ liv lɛk Nazarayt ɛn dɛn bin de liv nɔmal layf. (Mat. 11:​18, 19) Dɔn, pan ɔl we Jɔn nɔ bin de pafɔm mirekul dɛn, i bin no se Jizɔs in disaypul dɛn ɛn in yon disaypul dɛn we bin de fala am, gɛt di pawa fɔ pafɔm mirekul dɛn. (Mat. 10:​1; Jɔn 10:​41) Jɔn nɔ bin de tink bɔt di we aw Jizɔs in disaypul dɛn difrɛn frɔm in ɛn in disaypul dɛn, bifo dat, i bin de pe atɛnshɔn mɔ pan di wok we Jiova gi am.

If wisɛf valyu di asaynmɛnt we wi de du rayt naw na Jiova in ɔganayzeshɔn, wi go kɔntinyu fɔ gɛt gladi-at. Tɛri we wi bin tɔk bɔt fɔs bin tɔk se: “A bin de pe atɛnshɔn pan ɛni asaynmɛnt we dɛn gi mi.” We i tink bɔt in layf na ful-taym savis, i tɔk se: “Na so so wɔndaful tin dɛn a de tink bɔt, a nɔ gɛt wan rigrɛt.”

Wi go rili gɛt gladi-at if wi tink gud wan bɔt wetin go mek wi asaynmɛnt rili spɛshal. Na big big ɔnɔ wi gɛt fɔ bi “Gɔd in kɔmpin wokman dɛn.” (1 Kɔr. 3:​9, NW) Sɔntin we gɛt valyu go kɔntinyu fɔ luk fayn if wi de kia fɔ am ɔltɛm. Semweso, wi go kɔntinyu fɔ gɛt gladi-at if wi de tink bɔt di big big ɔnɔ we wi gɛt fɔ wok wit Jiova. Wi nɔ go kɔmpia di sakrifays we wi de mek wit ɔda pipul dɛn yon sakrifays. Wi nɔ go tink se di wok we Jiova gi wi nɔ valyu lɛk di wok we i gi ɔda pipul dɛn.—Gal. 6:​4.

PE ATƐNSHƆN PAN DI TIN DƐN WE IMPƆTANT TO JIOVA

Sɔntɛm i go bi se Jɔn bin no se i nɔ go kɔntinyu fɔ du in asaynmɛnt fɔ lɔng tɛm, bɔt i nɔ bin no se na so i go dɔn wantɛm wantɛm. (Jɔn 3:​30) Insay di ia 30, sɔm siks mɔnt afta Jizɔs baptayz, Kiŋ Ɛrɔd bin put Jɔn na prizin. Stil, Jɔn bin du ɔl wetin i ebul fɔ kɔntinyu fɔ prich. (Mak 6:​17-20) Wetin bin ɛp am fɔ kɔntinyu fɔ gɛt gladi-at pan ɔl we tin nɔ bin izi fɔ am? Na we i bin pe atɛnshɔn pan di tin dɛn we impɔtant to Jiova.

We Jɔn bin de na prizin, i bin de yɛri nyuz bɔt aw Jizɔs in prichin wok bin de go bifo. (Mat. 11:​2; Lyuk 7:​18) Jɔn bin biliv tranga wan se Jizɔs na di Mɛsaya, bɔt sɔntɛm i bin de wɔnda aw Jizɔs go du ɔl di tin dɛn we di Skripchɔ dɛn bin dɔn tɔk se di Mɛsaya go du. Bikɔs na di Mɛsaya gɛt fɔ bi kiŋ, fɔ se i nɔ go  te igen Jizɔs go stat fɔ rul? Fɔ se dis go mek Jɔn fri frɔm prizin? Jɔn bin rili want fɔ no mɔ bɔt wetin Jizɔs go du, so i bin sɛn tu pan in disaypul dɛn fɔ aks Jizɔs se: “If in na di pɔsin we in bin de tɔk se go kam ɔ if dɛn fɔ luk rod fɔ ɔda pɔsin.” (Lyuk 7:​19) We dɛn bin kam bak, i go bi se Jɔn bin de tek tɛm lisin we dɛn bin de tɔk bɔt di mirekul dɛn we Jizɔs bin de pafɔm fɔ mɛn di wan dɛn we sik, ɛn Jizɔs bin sɛn dɛn bak fɔ tɛl Jɔn se: “Dɛn blɛnyay pipul de si, dɛn pipul we nɔ bin ebul waka, de waka, dɛn wan we gɛt bad sik na dɛn skin dɔn wɛl, dɛn dɛf pipul dɔn yɛri, dɛn dayman dɔn gɛt layf bak, ɛn dɛn po pipul dɔn yɛri di Gud Nyuz.”—Lyuk 7:​20-22.

Di tin dɛn we Jɔn in disaypul dɛn bin tɛl am bin rili ɛnkɔrej am. Dat bin sho klia wan se Jizɔs de du di tin dɛn we dɛn bin dɔn tɔk se di Mɛsaya go du. Pan ɔl we Jizɔs nɔ bin mek Jɔn kɔmɔt na prizin, Jɔn bin no se in asaymɛnt stil gɛt valyu. I bin gɛt rizin fɔ gladi, pan ɔl we tin nɔ bin izi fɔ am.

We wi de pe atɛnshɔn pan di gud nyuz we wi de yɛri bɔt aw wi brɔda ɛn sista dɛn de du di prichin wok ɔlsay na di wɔl, dat go ɛp wi fɔ kɔntinyu fɔ gɛt gladi-at

Jɔs lɛk Jɔn, if wi de pe atɛnshɔn mɔ fɔ sav Jiova, wi go ebul fɔ bia ɛn gɛt gladi-at. (Kɔl. 1:​9-11) Wi go ebul fɔ du dis bay we wi de rid di Baybul ɛn tink gud gud wan bɔt wetin wi dɔn rid, ɛn wi fɔ mɛmba se di wok we wi de du na Gɔd in ɔganayzeshɔn gɛt valyu. (1 Kɔr. 15:​58) Sandra bin tɔk se: “We a de rid wan chapta na di Baybul ɛvride, dat dɔn ɛp mi fɔ kam nia Jiova mɔ ɛn mɔ. I de ɛp mi nɔ fɔ pe atɛnshɔn pan misɛf bɔt fɔ pe atɛnshɔn pan Jiova in wok.” Dɔn, we wi de pe atɛnshɔn pan di nyuz we wi de yɛri bɔt di wok we wi brɔda ɛn sista dɛn de du fɔ Jiova, dat go ɛp wi fɔ lɛ wi stɔp fɔ tink bɔt wisɛf nɔmɔ. Sandra bin tɔk bak se: “Di program dɛn we wi de gɛt ɛni mɔnt na JW TV de ɛp wi fɔ kam nia wi brɔda ɛn sista dɛn na di ɔganayzeshɔn, ɛn dat de mek wi kɔntinyu fɔ gɛt gladi-at we wi de du wi asaynmɛnt.”

Insay da shɔt tɛm we Jɔn we bin de baptayz pipul dɛn bin du di prichin wok, i bin de prich “wit di sem spirit ɛn pawa we Ilayja bin gɛt,” ɛn jɔs lɛk Ilayja, “na bin man we gɛt filin lɛk wi.” (Lyuk 1:​17, NW; Jems 5:​17) If wi falamakata Jɔn in ɛgzampul fɔ valyu wi wok ɛn pe atɛnshɔn fɔ sav Jiova, wisɛf go kɔntinyu fɔ gɛt gladi-at na wi prichin wok ilɛk wetin apin.