Wetin di Baybul Se?
Na ɔl prea Gɔd de ansa?
YU GO SE I DE ANSA . . .
Ɔlman in prea
Sɔm pipul dɛn prea
Nɔbɔdi in prea
WETIN DI BAYBUL SE?
“Jiova de nia ɔl di wan . . . dɛn we de kɔl am wit ɔl dɛn at.”—Sam 145:18, NW.
WETIN BAK WI KIN LAN FRƆM DI BAYBUL?
Gɔd nɔ de lisin to di wan dɛn we nɔ de du wetin i want. (Ayzaya 1:15) Bɔt dɛn go sɛtul “di kes” wit Gɔd we dɛn chenj.—Ayzaya 1:18, NW
Fɔ lɛ Gɔd ansa wi prea, wi fɔ pre di we aw i want, jɔs lɛk aw di Baybul tɛl wi.—Jɔn In Fɔs Lɛta 5:14.
Wi fɔ tinap ɔ bɛn wan patikyula we ɔltɛm we wi de pre?
SƆM PIPUL DƐN BILIV SE dɛn fɔ nil dɔŋ, butu dɛn ed, ɔ put dɛn an dɛn togɛda ɔltɛm we dɛn de pre. Wetin yu tink?
WETIN DI BAYBUL SE?
Pipul dɛn we dɔn “sidɔm” ɔ “grap” ɔ we dɔn “lidɔm” ɔ “nil dɔŋ” fɔ pre to Gɔd, Gɔd dɔn ansa dɛn prea. (Fɔs Kronikul 17:16; Sɛkɛn Kronikul 30:27; Ɛzra 10:1; Di Apɔsul Dɛn Wok [Akt] 9:40) Gɔd nɔ tɛl wi fɔ tinap ɔ bɛn wan patikyula we fɔ pre.
WETIN BAK WI KIN LAN FRƆM DI BAYBUL?
Gɔd de lisin to di wan dɛn we de put dɛnsɛf dɔŋ.—Sam 138:6.
Yu kin pre insay ɛni langwej, ɔ ivin na yu at.—Sɛkɛn Kronikul 6:32, 33; Nɛimaya 2:1-6.