Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI BƆT PƆSIN IN LAYF

A Stat As Po Pɔsin bɔt Naw A Jɛntri

A Stat As Po Pɔsin bɔt Naw A Jɛntri

Dɛn bɔn mi na wan bod os we gɛt wan rum na wan smɔl tɔŋ we nem Libati, Indiana, insay Amɛrika. Mi mama ɛn papa bin dɔn bɔn wan bɔy pikin ɛn tu gyal pikin dɛn bifo dɛn bɔn mi. Leta, mi mama bin bɔn mi tu smɔl brɔda dɛn ɛn mi smɔl sista.

Di bod os usay dɛn bin bɔn mi

WE A bin de go skul, bɔku tin dɛn nɔ chenj. Yu klasmet dɛn we yu stat skul wit na dɛn bak yu go dɔn skul wit. Yu kin no bɔku pupil dɛn nem na di tɔŋ, ɛn dɛnsɛf go no yu nem.

Mi na bin wan pan di sɛvin pikin dɛn we mi mama ɛn papa bin bɔn, ɛn a  bin lan fɔ du fam wok we a bin yɔŋ

Libati na tɔŋ we bin gɛt smɔl smɔl fam dɛn we bin de arawnd am, ɛn di men tin we dɛn bin de plant na kɔn. Di tɛm we dɛn bɔn mi, mi papa bin de wok fɔ wan fama we bin de na di tɔŋ. As yɔŋ bɔy, a bin lan fɔ drayv traktɔ ɛn fɔ du ɔda fam wok dɛn.

A nɔ ɛva gɛt yɔŋ papa. Mi papa bin ol 56 ia di tɛm we dɛn bɔn mi, ɛn mi mama bin ol 35 ia. Bɔt mi papa bin strɔng ɛn gɛt wɛlbɔdi. I bin lɛk fɔ du tranga wok dɛn ɛn i bin tich ɔl in pikin dɛn fɔ lɛk dat. I nɔ ɛva de wok bɔku mɔni, bɔt wi bin gɛt say fɔ de, klos fɔ wɛr, ɛn bɔku tin fɔ it. Ɛn i bin de spɛn tɛm wit wi ɔltɛm. Mi papa bin ol 93 ia we i day. Mi mama in bin ol 86 ia. Dɛn ɔl tu nɔ bin de sav Jiova. Bɔt wan pan mi brɔda dɔn de sav as ɛlda fetful wan frɔm 1972.

WE A BIN SMƆL

Mi mama na pɔsin we bin rili lɛk Gɔd biznɛs. I bin de kɛr wi go na wan Baptist chɔch ɛvri  Sɔnde. Di fɔstɛm we a yɛri bɔt di Triniti tichin na we a bin ol 12 ia. So a aks mi mama se: “Aw Jizɔs go bi Pikin ɛn Papa di sem tɛm?” A mɛmba we i ansa mi se: “Mi pikin yu nɔ go ɔndastand. Wi ɔl nɔ go ɔndastand am.” Fɔ tru na tin we a nɔ ɛva ɔndastand. Stil, we a ol lɛk 14 ia, dɛn baptayz mi na wan smɔl watasay. Dɛn dɔk mi insay di wata tri tɛm: wan fɔ di Papa, wan fɔ di Pikin, ɛn wan fɔ di oli spirit!

1952—We a ol 17 ia bifo a jɔyn soja

We a bin de ay skul, a bin gɛt padi we na bɔksa, ɛn i bin mek a stat fɔ du bɔksin. So a stat fɔ du di trenin, ɛn a bin bi mɛmba fɔ wan bɔksin ɔganayzeshɔn, we dɛn kɔl di Golden Gloves. A nɔ bin rili gud pan bɔksin, so afta sɔm tɛm, a bin stɔp fɔ du bɔksin. Leta dɛn bin kɔl mi fɔ jɔyn di Amɛrikin Ami ɛn dɛn bin sɛn mi na Jamani. We a bin de de, mi bɔsman dɛn bin sɛn mi go na wan skul fɔ sojaman dɛn bikɔs dɛn bin de tink se a go bi gud lida. Dɛn bin want mi fɔ tek soja wok as mi wok. Bɔt a nɔ bin want fɔ kɔntinyu fɔ du di soja wok. So afta we a wok fɔ tu ia, a lɛf di soja wok insay 1956. Jɔs afta dat, a bin jɔyn wan ɔda difrɛn ami.

1954 to 1956—A bin spɛn tu ia insay di Amɛrikin Ami

MI NYU LAYF BIGIN

Bifo a lan di trut, a bin de tink di rɔŋ we bɔt aw rial man fɔ bi. Di fim dɛn we a bin de wach ɛn di wan dɛn we de arawnd mi bin de mek a tink dis we. A bin tink se man dɛn we de tɔk bɔt di Baybul nɔto rial man dɛn. Bɔt a bigin fɔ lan sɔm tin dɛn we bin chenj mi layf. Wan de, we a bin de drayv mi fayn fayn rɛd motoka na tɔŋ, tu yɔŋ uman dɛn bin mek sayn to mi fɔ lɛ a go mit dɛn. Na di man we bin mared mi big sista in smɔl sista dɛn. Dɛn tu yɔŋ uman dɛn ya na bin Jiova Witnɛs dɛn. A bin dɔn de tek di Wachtawa ɛn Awake! magazin dɛn na dɛn an, bɔt a bin tink se Di Wachtawa tu at fɔ ɔndastand. Bɔt dis tɛm, dɛn invayt mi fɔ go na dɛn Kɔngrigeshɔn Buk Stɔdi, we na wan smɔl mitin we dɛn kin tɔk bɔt tin dɛn we de na di Baybul ɛn dɛn kin gɛt dis mitin na dɛn os. A bin tɛl dɛn se a go tink bɔt dat. Dɛn smayl ɛn aks mi se, “Yu prɔmis?” A ansa dɛn se: “Yɛs, a prɔmis.”

A bin rigrɛt we a tɔk dat, bɔt a bin tink se a nɔ fɔ pwɛl di prɔmis we a dɔn mek. So da nɛt de a bin go di mitin. A bin kɔle di pikin dɛn mɔ. A nɔ biliv di kayn we aw dɛn sabi di Baybul! Pan ɔl we a bin dɔn de go chɔch wit mi mama ɛvri Sɔnde, a stil nɔ no bɔku tin dɛn na di Baybul. Naw a rili want fɔ lan mɔ, so a bin gri fɔ mek dɛn de stɔdi mi di Baybul. Wan pan di fɔs tin dɛn we a lan na dat Gɔd Ɔlmayti gɛt nem, ɛn in nem na Jiova. Trade trade, we a bin de aks mi mama bɔt Jiova Witnɛs dɛn, i kin jɔs tɛl mi se, “Ah, dɛn de wɔship wan ol pa we nem Jiova.” Bɔt naw a tink se mi yay dɔn rili opin!

A bin go bifo kwik kwik wan bikɔs a no se a dɔn fɛn di trut. Insay Mach 1957, lɛk nayn mɔnts so frɔm we a atɛnd mi fɔs mitin, a bin baptayz. Di we aw a de biev dɔn chenj. A rili gladi fɔ lan frɔm di Baybul bɔt aw rial man fɔ bi. Jizɔs na bin pafɛkt man. I gɛt mɔ trɛnk ɛn pawa pas ɛni ɔda man. Bɔt i nɔ bin put an pan fɛt. Bifo dat, i alaw mɔtalman dɛn fɔ mek i “sɔfa” jɔs lɛk aw dɛn bin dɔn tɔk. (Ayzaya 53:​2, 7) A bin lan se pɔsin we de  fala Krays “fɔ gud to ɔlman.”—Sɛkɛn Lɛta To Timoti 2:​24.

Insay di nɛks ia we na 1958, a bin stat fɔ payɔnia. Bɔt i nɔ tu te, a bin stɔp fɔ shɔt tɛm. Wetin mek? Na bikɔs a bin disayd fɔ mared to Gloria, we na wan pan di tu yɔŋ uman dɛn we bin invayt mi na di buk stɔdi. A nɔ bin ɛva rigrɛt wetin a bin disayd fɔ du. Gloria bin rili valyu to mi, ɛn i stil valyu to mi te tide. To mi, i valyu pas di Op Dayamɔn, ɛn a rili gladi we a mared am! Mek insɛf tɛl una bɔt insɛf:

“A gɛt 16 brɔda ɛn sista dɛn. Mi mama na bin fetful Jiova Witnɛs. I bin day di tɛm we a ol 14 ia. Afta dat, mi papa bigin fɔ stɔdi di Baybul. Bikɔs wi nɔ bin gɛt mama igen, mi papa bin mek wan arenjmɛnt wit wi prinsipal na skul. Mi big sista bin de du in las ia na ay skul, so mi papa bin se if i pɔsibul fɔ mek mi ɛn mi big sista go skul bay tɔn. Bay da we de, wan pan wi go de na os fɔ kia fɔ wi smɔl wan dɛn. Wi go ebul bak fɔ mek it fɔ di famili bifo wi papa kam na os afta wok. Wi prinsipal na skul bin gri, ɛn wi bin kɔntinyu fɔ du dis te mi big sista dɔn skul. Tu famili dɛn we na Jiova Witnɛs dɛn bin stɔdi di Baybul wit wi, ɛn 11 pan wi bin bi Jiova Witnɛs. A bin de ɛnjɔy fil savis, pan ɔl we mi na pɔsin we de shem. Bɔt as tɛm de go, mi man, Sam, dɔn de ɛp mi fɔ mek a lɛf fɔ shem.”

Mi ɛn Gloria bin mared insay Fɛbwari 1959. Wi bin gladi fɔ de payɔnia togɛda. Insay Julay da sem ia de, wi bin apayl fɔ wok na Bɛtɛl. Wi bin rili want fɔ wok na di wɔl ɛdkwata. Wan brɔda we nem Saymɔn Kraka bin intavyu wi. I bin tɛl wi se dɛn tɛm dɛn de, Bɛtɛl nɔ de tek pipul dɛn we mared. Wi bin stil want fɔ wok na Bɛtɛl, bɔt i bin tek lɔng tɛm fɔ mek wi go de.

Wi bin rayt to di wɔl ɛdkwata ɛn tɛl dɛn fɔ sɛn wi na say usay dɛn nid mɔ pɔblisha dɛn. Na wan say nɔmɔ dɛn tɛl wi bɔt: dat na Payn Blɔf, Akansas. Dɛn tɛm dɛn de, na tu kɔngrigeshɔn bin de na Payn Blɔf. Wan kɔngrigeshɔn bin gɛt wayt pɔblisha dɛn ɛn di ɔda kɔngrigeshɔn bin gɛt blak pɔblisha dɛn. Dɛn bin sɛn wi fɔ go usay di blak pɔblisha dɛn de, we bin gɛt 14 pɔblisha dɛn nɔmɔ.

PRƆBLƐM DƐN WE BIN DE

Yu go de wɔnda wetin mek Jiova Witnɛs dɛn sheb di pɔblisha dɛn to blak ɛn wayt. Di ansa na dat natin nɔ bin de fɔ du da tɛm de. Na bin prɔblɛm fɔ lɛ difrɛn kɔlɔ dɛn de togɛda, ɛn fɛt fɛt na bin wan ɔda prɔblɛm bak. Bɔku say, di brɔda dɛn bin de fred se dɛn go pwɛl dɛn Kiŋdɔm Ɔl if tu difrɛn kɔlɔ dɛn de togɛda fɔ wɔship. Dɛn kayn tin dɛn de bin de apin. If blak Jiova Witnɛs de prich frɔm os to os na say usay wayt pipul dɛn de, dɛn go arɛst am ɛn sɔntɛnde dɛn kin bit am. So fɔ lɛ wi go ebul du di prichin wok, wi bi de obe dɛn lɔ dɛn de ɛn op se tin go chenj fɔ gud.

Wi prichin wok nɔ bin izi. We wi de prich na say usay blak pipul dɛn de, sɔntɛnde wi kin mistek nak na wayt pɔsin in domɔt. Wi kin gɛt fɔ disayd kwik kwik wan wetin fɔ du. Wi kin tink if wi fɔ prich shɔt mɛsej frɔm di Baybul ɔ jɔs beg di pɔsin ɛn go na di nɛks os? Na so tin bin tan lɛk dɛn tɛm dɛn de.

Na tru se as payɔnia, wi stil nid fɔ fɛn mɔni fɔ liv. Dɛn bin de pe wi tri dɔla fɔ de fɔ bɔku pan di wok dɛn we wi bin de du. Gloria bin gɛt sɔm wok dɛn we i bin de du fɔ pipul dɛn na dɛn os dɛn. Na wan ples, dɛn bin gri fɔ mek a go ɛp am so dat i go dɔn bifo di tɛm. Di famili bin gi wi lɔnch. Na bin dɛn pakɛt it dɛn we dɛn kin kip na frij. Dɛn bin de kɔl am TV dina. Mi ɛn Gloria bin sheb am. Ɛni wik, Gloria bin de go ayɛn fɔ wan ɔda famili. Mi bin de wok na di gadin, was di winda dɛn, ɛn du ɔda smɔl smɔl wok dɛn arawnd di os. Na wan wet famili dɛn os, wi bin de was di winda dɛn, Gloria bin dɛn insay, mi bin de na do. Na ol de wi bin de du am, so dɛn bin gi wi lɔnch. Gloria bin it insay di os bɔt i nɔ bin de nia di famili. Mi bin it na do na di garaj, bɔt a nɔ bin bisin. Di it bin rili fayn. Na bin nays famili, bɔt na di pipul dɛn we bin de arawnd dɛn bin de afɛkt dɛn. A mɛmba wantɛm we wi go na wan fyuɛl steshɔn. Afta wi dɔn ful-ɔp  di tank na wi motoka, a aks wan pan di man dɛn we de wok de we na bin wetman if Gloria kin yuz dɛn tɔylɛt. I wach mi vɛks vɛks wan ɛn tɔk se, “De lɔk.”

GUD TIN DƐN WE WI NƆ GO ƐVA FƆGƐT

Wi bin spɛn wɔndaful tɛm wit wi brɔda dɛn, ɛn wi lɛk wi prichin wok! We wi bin fɔs rich na Payn Blɔf, wi bin de wit wan brɔda we na bin di kɔngrigeshɔn savant dɛn tɛm dɛn de. In wɛf nɔ bin dɔn tek di trut yet, ɛn Gloria bin stat fɔ stɔdi di Baybul wit am. Dɛn tɛm dɛn de, a stat fɔ stɔdi wit dɛn gyal pikin ɛn in man. Di mama ɛn in gyal pikin dɛn ɔl tu bin disayd fɔ sav Jiova ɛn baptayz.

Wi bin gɛt gud gud padi dɛn na di wayt kɔngrigeshɔn. Dɛn kin invayt wi na dɛn os fɔ dina, bɔt na we ples dak nɔmɔ wi kin go de so dat nɔbɔdi nɔ go si wi. Wan ɔganayzeshɔn we nem Ku Klux Klan (KKK) bin de we de sɔpɔt wan kɔlɔ pas in kɔmpin dɛn ɛn dɛn bin de fɛt fɛt. Wan Alowin nɛt, a mɛmba se a si wan man sidɔm na in frɔnt do, ɛn i gladi fɔ drɛs jɔs lɛk aw dɛn KKK dɛn bin de drɛs. Bad bad tin dɛn bin de apin bɔt pan ɔl dat di brɔda dɛn nɔ bin stɔp fɔ du gud. Wan tɛm wi bin nid mɔni fɔ pe transpɔt fɔ go kɔnvɛnshɔn, ɛn wan brɔda bin gri fɔ bay wi 1950 Fɔd so dat wi go ebul atɛnd di kɔnvɛnshɔn. Wan de, afta wan mɔnt, wi bin taya afta wi dɔn waka frɔm os to os ɔnda di san ɛn afta we wi dɔn du bɔku Baybul stɔdi. We wi kam na os wi mit wan sɔprayz. Wi motoka bin pak frɔnt wi os! Di brɔda rayt pan di glas we bin de frɔnt di motoka se, “Una tek una motoka bak na gift frɔm mi. Una brɔda.”

Wan ɔda gud tin de we bin rili tɔch mi at. Insay 1962, dɛn bin invayt wi fɔ atɛnd di Kiŋdɔm Ministri Skul na Sawt Lansing, Nyu Yɔk. Na bin wan ol mɔnt trenin fɔ ovasia dɛn na di kɔngrigeshɔn dɛn, di sakit dɛn, ɛn di distrikt dɛn. Dɛn tɛm dɛn de a nɔ bin gɛt wok, ɛn na smɔl mɔni nɔmɔ wi bin gɛt. Bɔt wan tɛlifon kɔmni na Payn Blɔf bin dɔn intavyu mi fɔ wok. If dɛn tek mi, a go bi di fɔs blakman fɔ wok na da kɔmni. Dɛn bin ɛndɔp fɔ tɛl mi se dɛn go gi mi di wok. Wetin a go du? A nɔ bin gɛt ɛni mɔni fɔ travul go na Nyu Yɔk. A bin de tink gud gud wan bɔt fɔ tek di wok ɛn nɔ go di skul. A bin jɔs want fɔ rayt na Bɛtɛl we sɔntin apin we a nɔ go ɛva fɔgɛt.

Wan sista we de na wi kɔngrigeshɔn, we in man nɔ to bin Jiova Witnɛs, bin nak na mi domɔt wan ali mɔni ɛn gi mi wan ɛnvilɔp. Di ɛnvilɔp bin ful-ɔp wit mɔni. Dis sista ɛn bɔku pan in smɔl smɔl pikin dɛn bin de grap ali mɔnin fɔ go na wan kɔtin fam fɔ go pul gras. Dɛn bin de du dis fɔ lɛ dɛn go gɛt mɔni so dat a go go na Nyu Yɔk. Di sista bin tɔk se, “Go di skul ɛn lan bɔku tin so dat yu go kam bak fɔ kam tich wi!” Leta a bin aks di tɛlifon kɔmni if a kin stat fɔ wok fɔ dɛn fayv wiks afta di tɛm we dɛn bin want lɛ a stat. Dɛn bin ansa mi se, “Nɔ!” Bɔt a nɔ bin bisin. A bin dɔn  disayd wetin fɔ du. A bin gladi we a nɔ bin tek di wok!

Naw lɛ wi tɔk bɔt aw Gloria mɛmba di tɛm we wi bin de na Payn Blɔf: “A bin kam lɛk di say we wi de prich! A bin gɛt 15 to 20 Baybul studɛnt dɛn. So wi kin go prich frɔm os to os na mɔnin ɛn wi kin yuz di balans tɛm fɔ go kɔndɔkt stɔdi dɛn, sɔntɛnde wi kin de te 11 oklok na nɛt. Wi bin rili de ɛnjɔy di prichin wok! A fɔ dɔn rili gladi fɔ kɔntinyu fɔ du am. Fɔ tɔk tru, a nɔ bin rili want fɔ chenj mi wok fɔ du di sakit wok, bɔt Jiova bin kip ɔda tin fɔ wi.” Na dat bin apin.

DI SAKIT WOK

We wi bin de payɔnia na Payn Blɔf, wi bin aplay fɔ bi spɛshal payɔnia. Wi bin rili fil se dɛn go pik wi. Wetin mek? Na bikɔs wi bin no se wi distrikt ovasia bin want wi fɔ go ɛp wan kɔngrigeshɔn na Tɛksas, ɛn i bin want wi fɔ go de fɔ go sav as spɛshal payɔnia dɛn. Wi bin lɛk dat. So wi bin wet te, ɛn wi bin de op se wi go gɛt di ansa, bɔt ɛnitɛm wi chɛk wi melbɔks wi de mit am ɛmti. Dɔn wan de, wan lɛta bin kam. Dɛn pik wi fɔ go du di travlin wok! Dat bin apin Janwari 1965. Da sem tɛm de dɛn bin pik Brɔda Liɔn Wiva we na di kɔdinatɔ naw na di Branch Kɔmiti na Amɛrika, fɔ bi sakit ovasia.

A bin de fred fɔ bi sakit ovasia. Lɛk wan ia so bifo dis, di distrikt ovasia, we na bin Jems A. Tɔmsin Jiniɔ bin aks mi sɔm kwɛstyɔn dɛn fɔ si if a fit fɔ di wok. I bin tek tɛm ɛksplen to mi usay a fɔ du mɔ, ɛn i bin sho mi sɔm tin dɛn we pɔsin fɔ du fɔ bi gud sakit ovasia. Jɔs afta a stat di sakit wok, a kam fɔ no se a bin rili nid da advays de. Afta we dɛn pik mi, na Brɔda Tɔmsin na di fɔs distrit ovasia we a fɔ wok wit. A bin lan bɔku tin frɔm da fetful brɔda de.

A rili valyu di ɛp we machɔ brɔda dɛn bin ɛp mi

Dɛn tɛm dɛn de, na smɔl trenin nɔmɔ sakit ovasia dɛn bin de gɛt. A bin de wach di sakit ovasia fɔ wan wik we wi go visit wan kɔngrigeshɔn. Dɔn insɛf de wach mi fɔ wan wik we wi go visit di ɔda kɔngrigeshɔn. I bin gi mi sɔm advays dɛn ɛn sɔm tin dɛn we go gayd mi. Bɔt afta dat, na mi wangren bin de go. A mɛmba we a bin tɛl Gloria se, “Yu tink se i fɔ rili lɛf wi naw?” As tɛm de go, a kam fɔ no sɔntin we impɔtant. Yu go gɛt gud brɔda dɛn ɔltɛm fɔ ɛp yu if yu alaw dɛn fɔ ɛp yu. A stil valyu di ɛp we a bin gɛt frɔm machɔ brɔda dɛn lɛk J. R. Brawn, we na bin travlin ovasia, ɛn Frɛd Rɔsk we bin de na Bɛtɛl.

Da tɛm de bɔku pipul dɛn bin de si se wan kɔlɔ bɛtɛ pas ɔda wan. Wan tɛm di KKK bin ol wan rale na wan tɔŋ we wi bin go visit na Tɛnesi. A mɛmba  ɔda tɛm we wi de fil savis we wi stɔp fɔ it smɔl tin na wan rɛstɔrant. We a go fɔ yuz di tɔylɛt, wan man we vɛks ɛn we bin gɛt bɔku tatu dɛn we de sho se wan kɔlɔ impɔtant pas di ɔda wan bin fala mi. Bɔt wan wayt brɔda, we gɛt bɔdi ɛn ayt pas wi tu bin kam insay de. Di brɔda aks mi se: “Ɔltin oke, Brɔda Ad?” Di ɔda kɔstɔma kɔmɔt de kwik kwik wan ɛn i nɔ yuz di tɔylɛt igen. Ɔl dɛn tɛm ya, a dɔn si se di rial rizin we mek pipul dɛn kin fil se dɛn kɔlɔ bɛtɛ pas ɔda kɔlɔ nɔto bikɔs dɛn kɔlɔ difrɛn bɔt na di sin we de insay wi ɔl. Ɛn a dɔn lan se ilɛk us kɔlɔ ɛni brɔda gɛt, na brɔda stil ɛn i go ivin day fɔ yu if nid de.

FAYN ƐNDIN

Wi du di sakit wok fɔ 12 ia ɛn di distrikt wok fɔ 21 ia. Na bin fayn tɛm ɛn wi bin gɛt bɔku blɛsin dɛn, ɛn bɔku fayn fayn ɛkspiriɛns dɛn. Bɔt wan ɔda blɛsin bin de wet fɔ wi. Insay Ɔgɔst 1997, wi drim bin kam tru afta lɔng tɛm. Dɛn bin invayt wi fɔ go sav na Bɛtɛl na Amɛrika. Dat na bin 38 ia afta di fɔstɛm we wi bin apayl. Di nɛks mɔnt afta dat, wi stat wi Bɛtɛl savis. A bin tink se di brɔda dɛn we bin de bifo di wok na Bɛtɛl bin jɔs want mi fɔ wok de fɔ shɔt tɛm, bɔt nɔto dat bin apin.

Gloria bin valyu to mi we a mared am, ɛn i stil valyu to mi

Di fɔs say we a bin wok na di Savis Dipatmɛnt. A bin lan bɔku tin! Di brɔda dɛn we de de kin gɛt bɔku tranga ɛn kɔni kɔni kwɛstyɔn dɛn we di ɛlda dɛn ɛn sakit ovasia dɛn we de ɔlsay na di kɔntri kin aks. A rili gladi fɔ di we aw dɛn brɔda dɛn ya bin peshɛnt fɔ ɛp mi we dɛn bin de tren mi. If dɛn sɛn mi fɔ go wok de bak, a go stil gɛt bɔku tin fɔ go lan frɔm dɛn brɔda dɛn de.

Mi ɛn Gloria lɛk Bɛtɛl. Wi bin dɔn yus fɔ wek kwik ɔltɛm, ɛn dat bin ɛp wi we wi de na Bɛtɛl. Afta lɛk wan ia so, dɛn pik mi fɔ bi pɔsin we de ɛp na di Savis Kɔmiti fɔ di Gɔvnin Bɔdi fɔ Jiova Witnɛs dɛn. Dɔn insay 1999, dɛn bin pik mi fɔ bi mɛmba na di Gɔvnin Bɔdi. A dɔn lan bɔku tin we a de du dis wok. Bɔt di lɛsin we impɔtant pas ɔl na dat na Jizɔs Krays de bifo ɔlman na di kɔngrigeshɔn, nɔto mɔtalman.

Frɔm 1999, a dɔn gɛt di ɔnɔ fɔ wok as mɛmba na di Gɔvnin Bɔdi

We a kin tink bɔt mi layf, sɔntɛnde a kin fil lɛk di prɔfɛt Emɔs. Jiova bin si dis shɛpad we bin put insɛf dɔŋ de du wan simpul wok we na fɔ avɛst fig dɛn. Dis fig na it we na po pipul dɛn nɔmɔ de it am. Bɔt Gɔd bin pik Emɔs fɔ bi prɔfɛt ɛn i bin blɛs am fɔ di wok we i bin du. (Emɔs 7:​14, 15) Semweso, Jiova bin si mi, we na da po fama na Libati insay Indiana in bɔy pikin. Ɛn Jiova dɔn rili blɛs mi, di blɛsin bɔku a nɔ go ebul fɔ tɔk ɔl na ya! (Prɔvabs 10:​22) We a bin yɔŋ, tin nɔ bin izi fɔ wi, wi bin po, bɔt a rili fil gud bikɔs mi ɛndin fayn. A gɛt bɔku blɛsin dɛn we a nɔ ebul fɔ imajin!