Go dayrɛkt to di men tin

Go dayrɛkt to di say we di difrɛn difrɛn atikul dɛn de

Jiova Lɛk di Wan dɛn we De “Bia Frut pan ɔl we Tin Nɔ Izi fɔ Dɛn”

Jiova Lɛk di Wan dɛn we De “Bia Frut pan ɔl we Tin Nɔ Izi fɔ Dɛn”

“Di sid dɛn we fɔdɔm na fayn dɔti, na pipul . . . we de bia frut pan ɔl we tin nɔ izi fɔ dɛn.”—LYUK 8:​15.

SIŊ DƐN: 68, 72

1, 2. (a) Wetin mek wi brɔda ɛn sista dɛn we de kɔntinyu fɔ prich na say usay bɔku pipul dɛn nɔ de lisin de ɛnkɔrej wi? (Luk di pikchɔ nia dis atikul in taytul.) (b) Wetin Jizɔs bin tɔk bɔt di prich we i bin de prich “na di say we i gro ɔp”? (Luk di futnot.)

SAJIO ɛn in wɛf Olinda na payɔnia dɛn we de na Amɛrika. Dɛn ɔl tu dɔn pas 80 ia. Dis biɛn tɛm, i nɔ kin izi fɔ dɛn fɔ waka bikɔs dɛn fut dɛn kin at. Bɔt jɔs lɛk aw dɛn dɔn de du fɔ lɔng tɛm, sɛvin oklɔk na mɔnin, dɛn kin waka go na wan opin say usay bɔku pipul dɛn kin gɛda na di tɔŋ usay dɛn de. Dɛn kin tinap nia wan say usay bɔs kin lɛf pipul dɛn ɛn dɛn kin gi wi buk ɛn magazin dɛn to di pipul dɛn we de pas. Bɔku pipul dɛn kin mek lɛk se dɛn nɔ de si dɛn, bɔt Sajio ɛn Olinda kin stil tinap na di say usay dɛn kin tinap ɛn smayl to di wan dɛn we kin luk dɛn. Aftanun tɛm, dɛn kin waka wan wan ɛn go na os. We do klin bak, sɛvin oklɔk, dɛn kin go bak na di say usay di bɔs kin go lɛf pipul dɛn.  Dɛn kin kɔntinyu fɔ prich lɛk dis fɔ siks dez insay di wik te di ia dɔn.

2 Jɔs lɛk Sajio ɛn Olinda, bɔku fetful brɔda ɛn sista dɛn de we dɔn de prich fɔ lɔng tɛm na di say usay dɛn de, pan ɔl we bɔku pipul dɛn nɔ de lisin. Sɔntɛm di say we yu de prich tan lɛk di say we Sajio ɛn Olinda de prich. If na so i bi, wi de tɛl yu tɛnki fɔ we yu dɔn kɔntinyu fɔ prich pan ɔl we i nɔ izi fɔ yu. * (Luk di futnot.) Yu ɛgzampul dɔn de ɛnkɔrej bɔku brɔda ɛn sista dɛn, ɛn ivin di wan dɛn we dɔn de sav Jiova fɔ lɔng tɛm. Notis wetin sɔm sakit ovasia dɛn bin dɔn tɔk: “We a de prich wit dɛn fetful brɔda ɛn sista dɛn ya, dɛn ɛgzampul de gi mi mɔ trɛnk.” “Di we aw dɛn fetful de ɛnkɔrej mi fɔ kɔntinyu fɔ bia ɛn gɛt maynd na mi prichin wok.” “Dɛn ɛgzampul de rili mek a gladi.”

3. Us tri kwɛstyɔn dɛn wi de kam tɔk bɔt? Wetin mek?

3 Insay dis atikul, wi go ansa tri kwɛstyɔn dɛn: Wetin mek sɔntɛnde wi at kin pwɛl? Wetin i min fɔ bia frut? Wetin go ɛp wi fɔ kɔntinyu fɔ bia frut pan ɔl we tin nɔ izi? We wi no di ansa to dɛn kwɛstyɔn dɛn ya, dat go ɛnkɔrej wi fɔ kɔntinyu fɔ du di prichin wok we Jizɔs bin gi wi fɔ du.

WETIN MEK WI AT KIN PWƐL?

4. (a) Aw Pɔl bin fil fɔseka di bad we we bɔku Ju pipul dɛn bin biev? (b) Wetin mek Pɔl bin fil da we de?

4 Yu dɔn ɛva fil bad bikɔs di pipul dɛn na di eria usay yu de prich nɔ want fɔ lisin to di mɛsej bɔt di Kiŋdɔm? If na so i bi, yu go ɔndastand aw di apɔsul Pɔl bin de fil. I bin prich fɔ 30 ia, ɛn i bin ɛp bɔku pipul dɛn fɔ bi Kristian. (Di Apɔsul Dɛn Wok [Akt] 14:​21; Sɛkɛn Lɛta Fɔ Kɔrint 3:​2, 3) Pan ɔl dat, i nɔ bin ebul ɛp bɔku pan di Ju pipul dɛn fɔ bi Kristian. Bɔku pan dɛn nɔ bin lisin to Pɔl, ɛn sɔm pan dɛn bin ivin mek i sɔfa. (Di Apɔsul Dɛn Wok [Akt] 14:​19; 17:​1, 4, 5, 13) Aw di bad we we dɛn bin biev bin mek Pɔl fil? I bin tɔk se: “A sɔri bad bad fɔ mi pipul dɛn ɛn di pen we a de fil na mi at fɔ dɛn, nɔ go dɔn.” (Lɛta Fɔ Rom 9:​1-3) Wetin mek Pɔl bin fil dis kayn we? Na bikɔs i bin rili lɛk di prichin wok ɛn i bin lɛk di pipul dɛn. Pɔl bin rili kia fɔ di Ju pipul dɛn ɛn i bin fil bad we dɛn nɔ bin gri fɔ bɛnifit frɔm Gɔd in masi.

5. (a) Wetin kin mek wi prich? (b) Wetin mek na nɔmal tin fɔ mek wi fil bad sɔntɛnde?

5 Jɔs lɛk Pɔl, wi de prich to pipul dɛn bikɔs wi kia fɔ dɛn ɛn wi want fɔ ɛp dɛn. (Matyu 22:​39; Fɔs Lɛta Fɔ Kɔrint 11:​1) Di tin dɛn we dɔn mit wi na layf dɔn mek wi no se fɔ sav Jiova na di bɛst we aw fɔ liv. Ɛn wi want fɔ ɛp ɔda pipul dɛn fɔ si aw dɛn layf go bɛtɛ if dɛn sav Jiova! Na dat mek wi de kɔntinyu fɔ ɛnkɔrej dɛn fɔ lan di trut bɔt Jiova ɛn di tin dɛn we i dɔn prɔmis fɔ du fɔ mɔtalman. I tan lɛk se wi de gi dɛn wan fayn gift ɛn de beg dɛn se: ‘Duya tek dis.’ So we dɛn nɔ gri fɔ tek di gift, na nɔmal tin fɔ mek wi fil ‘pen na wi at’ lɛk aw Pɔl bin fil. Wi de fil dis pen nɔto bikɔs wi nɔ gɛt bɛtɛ fet, bɔt na bikɔs wi rili lɛk pipul dɛn. So pan ɔl we sɔntɛnde  wi at kin pwɛl, wi de kɔntinyu fɔ prich. Yu go gri wit Ɛlina, we dɔn de payɔnia fɔ lɛk 25 ia we tɔk se: “I nɔ izi fɔ mek a du di prichin wok. Bɔt no ɔda wok nɔ de we a go du we go bɛtɛ pas dat.”

WETIN I MIN FƆ BIA FRUT?

6. Us kwɛstyɔn wi de kam ansa naw?

6 Wetin mek wi shɔ se wi go gɛt gladi at pan wi prichin wok ilɛk usay wi de prich? Fɔ ansa dis impɔtant kwɛstyɔn ya, lɛ wi tɔk bɔt tu pan Jizɔs in stori dɛn we de tɔk wetin mek i fayn fɔ “bia frut.” (Matyu 13:​23) Di fɔs stori na bɔt vayn.

7. (a) Insay di stori we Jizɔs bin pul, udat na “di fama,” “di vayn,” ɛn “di branch dɛn”? (b) Us kwɛstyɔn we wi stil nid fɔ ansa?

7 Rid Jɔn 15:​1-5, 8, NW. Insay dis stori, Jizɔs bin ɛksplen se Jiova na “di fama,” Jizɔs na “di vayn,” ɛn in disaypul dɛn na “di branch dɛn.” * (Luk di futnot.) Dɔn Jizɔs bin tɛl in apɔsul dɛn se: ‘If una bia frut, una go sho pipul aw mi Papa wɔndaful, ɛn una go sho se una na mi lanin bɔy dɛn.’ So wetin i min fɔ bia frut? Insay dis stori, Jizɔs nɔ bin sho wetin na di frut, bɔt i tɔk sɔntin we go ɛp wi fɔ fɛn di ansa to da kwɛstyɔn de.

8. (a) Insay di stori we Jizɔs pul, wetin mek fɔ “bia frut” nɔ min fɔ mek nyu disaypul dɛn? (b) Wetin na di tru bɔt ɛnitin we Jiova tɛl wi fɔ du?

8 Jizɔs bin tɔk bɔt in Papa se: “I de kɔt ɛni branch we de pan mi we de bia frut.” We min se, fɔ bia frut na di wangren tin we go mek wi bi Jiova in savant dɛn. So insay dis stori, fɔ bia frut nɔ go min fɔ mek nyu disaypul dɛn. (Matyu 28:​19) If na dat i min, dɛn fetful Witnɛs dɛn we nɔ ɛp pɔsin yet fɔ bi wan pan Jizɔs in disaypul go tan lɛk branch we nɔ de bia frut. Bɔt dat nɔ go bi tru! Wetin mek? Na bikɔs wi nɔ go fos pipul dɛn fɔ bi disaypul. Jiova lɛk wi, so i nɔ go ɛva tɛl wi fɔ du sɔntin we wi nɔ go ebul fɔ du. Na wetin nɔmɔ wi ebul fɔ du na in i go tɛl wi fɔ du.—Ditarɔnɔmi 30:​11-14.

9. (a) Aw wi de bia frut? (b) Us stori wi de kam tɔk bɔt naw?

9 Wetin i min fɔ bia frut? I fɔ bi sɔntin we wi ɔl fɔ du. Us wok we Jiova dɔn gi ɔl in savant dɛn fɔ du? Da wok de na fɔ prich di gud nyuz bɔt Gɔd in Kiŋdɔm. * (Luk di futnot.) (Matyu 24:​14) Di stori we Jizɔs bin pul bɔt di fama mek wi ɔndastand dis klia wan. Lɛ wi tɔk bɔt da stori de naw.

10. (a) Wetin na di sid ɛn di grɔn insay di stori we Jizɔs bin pul? (b) Wetin di wit plant de bia?

10 Rid Lyuk 8:​5-8, 11-15. Insay di stori bɔt di fama, Jizɔs bin ɛksplen se di sid “na Gɔd in Wɔd,” ɔ di mɛsej bɔt Gɔd in Kiŋdɔm. Di grɔn na di pɔsin in at. Di sid we fɔdɔm na fayn grɔn bin gɛt rut, i gro, ɛn tɔn plant. Dɔn, di plant “gro ɛn bia plɛnti plɛnti” frut. If da plant de na wit, uskayn frut i bin fɔ bia? Smɔl wit plant? Nɔ, i go bia sid dɛn, ɛn as tɛm de go dɛn go gro ɛn bi wit  plant dɛn. Insay dis stori, wan sid bia 100 sid dɛn. Wetin dis tich wi bɔt wi prichin wok?

Aw wi de “bia frut pan ɔl we tin nɔ izi”? (Luk na paregraf 11)

11. (a) Wetin di stori bɔt di fama tich wi bɔt wi prichin wok? (b) Aw wi de bia nyu sid?

11 We wi mama ɛn papa we na Kristian ɔ ɔda Witnɛs dɛn bin tich wi fɔ di fɔstɛm bɔt Gɔd in Kiŋdɔm, i bin jɔs tan lɛk se dɛn de plant sid na fayn grɔn. Dɛn bin rili gladi we dɛn si se wi biliv wetin dɛn tɛl wi. Da sid de bin kɔntinyu fɔ gro ɛn gro sote i rɛdi fɔ bia frut. Ɛn jɔs lɛk aw di wit plant we wi bin dɔn tɔk bɔt nɔ kin bia nyu plant, bɔt na nyu sid, na so wi nɔ de mek nyu disaypul dɛn, bɔt wi de bia nyu sid. * (Luk di futnot.) Aw wi de du dat? Ɛnitɛm we wi tɛl ɔda pipul dɛn bɔt di Kiŋdɔm, i kin tan lɛk se wi de ad pan di sid dɛn ɛn wi de skata di sid we ɔda pɔsin bin dɔn plant na wi at. (Lyuk 6:​45; 8:​1) So wans wi de kɔntinyu fɔ prich di mɛsej bɔt Gɔd in Kiŋdɔm, wi de “bia frut pan ɔl we tin nɔ izi.”

12. (a) Wetin wi lan frɔm Jizɔs in stori bɔt di vayn ɛn di fama? (b) Aw yu fil bɔt wetin yu dɔn lan?

12 Wetin wi lan frɔm di stori dɛn we Jizɔs bin pul bɔt di vayn ɛn di fama? Wi lan se fɔ “bia frut” nɔ min se pas pipul dɛn lisin to di mɛsej we wi de prich. Bɔt i min se wi de kɔntinyu fɔ prich. Pɔl bin tɔk sɔntin we tan lɛk dat we i bin ɛksplen se: “Ɔlman go gɛt di pe fɔ di wok we i du.” (Fɔs Lɛta Fɔ Kɔrint 3:​8) Jiova go blɛs wi fɔ di wok we wi de du, nɔto fɔ wetin go apin we wi wok. Matilda we dɔn payɔnia fɔ 20 ia tɔk se, “A kin gladi fɔ no se Jiova de blɛs di wok we a de du.”

AW WI GO KƆNTINYU FƆ BIA NA WI PRICHIN WOK?

13, 14. Frɔm wetin de na Lɛta Fɔ Rom 10:​1, 2, us rizin bin mek Pɔl nɔ bin ɛva stɔp fɔ prich?

13 Wetin go ɛp wi fɔ “bia frut pan ɔl we tin nɔ izi”? Lɛ wi tek tɛm luk Pɔl in ɛgzampul gud gud wan. Wi no se Pɔl bin fil bad bikɔs di Ju pipul dɛn nɔ bin gri fɔ lisin to di mɛsej bɔt di Kiŋdɔm. Bɔt pan ɔl dat, Pɔl nɔ bin ɛva stɔp fɔ prich to dɛn. I bin ɛksplen aw i fil bɔt  dɛn Ju pipul dɛn de we i se: “A de pre wit ɔl mi at mek Gɔd go sev mi Ju pipul dɛn. A want mek Gɔd sev dɛn bad bad. A kin tɔk fɔ dɛn se, dɛn wan pliz Gɔd bad wan, bɔt dɛn nɔ no di rayt we.” (Lɛta Fɔ Rom 10:​1, 2) So wetin mek Pɔl bin kɔntinyu fɔ prich?

14 Fɔs, Pɔl tɔk se i bin want fɔ prich to di Ju pipul dɛn bikɔs i “want mek Gɔd sev dɛn bad bad.” I bin rili want mek dɛn sev. (Lɛta Fɔ Rom 11:​13, 14) Sɛkɔn, i tɔk se i ‘de pre wit ɔl in at mek Gɔd go sev dɛn.’ Pɔl bin beg Jiova fɔ ɛp di Ju dɛn wan bay wan fɔ mek dɛn lisin to di mɛsej bɔt di Kiŋdɔm. Tɔd, Pɔl bin tɔk se: “Dɛn wan pliz Gɔd bad wan.” Pɔl bin si di gud tin we di pipul dɛn bin de du, ɛn i bin si se dɛn go kam fɔ sav Jiova. I bin no se dɛn Ju pipul dɛn de we gɛt zil go kam fɔ bi disaypul dɛn we gɛt zil fɔ Krays jɔs lɛk am.

15. Aw wi go falamakata Pɔl? Gi sɔm ɛgzampul dɛn.

15 Aw wi go falamakata Pɔl? Fɔs, wi fɔ rili want fɔ fɛn “ɔl di wan dɛn we rili want fɔ du wetin Gɔd want” ɛn we want fɔ “gɛt layf we go de sote go.” Sɛkɔn, wi fɔ beg Jiova fɔ ɛp pipul dɛn we want fɔ no bɔt am fɔ lisin we wi go prich to dɛn. (Di Apɔsul Dɛn Wok [Akt] 13:​48; 16:​14) Na dat Silvana we dɔn de payɔnia fɔ lɛk 30 ia dɔn du. I tɔk se: “Bifo a go na ɛni os na di say we  a de prich, a kin pre to Jiova, fɔ ɛp mi fɔ tink gud bɔt di pipul dɛn we a de go prich to.” Wi kin pre bak fɔ mek di enjɛl dɛn ɛp wi fɔ mek wi fɛn pipul dɛn we want fɔ lisin. (Matyu 10:​11-13; Rɛvɛleshɔn 14:​6) Rɔbɔt, we dɔn de payɔnia pas 30 ia naw, bin tɔk se, “Fɔ wok wit di enjɛl dɛn we no wetin de apin to di pipul dɛn we wi de prich to kin rili mek a gladi.” Tɔd, wi fɔ tray fɔ si di gud tin we pipul dɛn de du, ɛn wi fɔ si dɛn as pipul dɛn we go kam fɔ sav Jiova. Kal, we na ɛlda we dɔn baptayz pas 50 ia naw, tɔk se, “A kin luk fɔ ɛni smɔl sayn we de sho se di pɔsin rɛdi fɔ lisin to mi, lɛk if i wach mi ɛn smayl, ɔ if i aks mi kwɛstyɔn we sho se i want no mɔ.” If wi du dɛn tin dɛn ya, wi go de “bia frut pan ɔl we tin nɔ izi,” jɔs lɛk Pɔl.

NƆ BLO!

16, 17. (a) Us lɛsin wi lan frɔm Ɛkliziastis 11:​6? (b) Aw wi prichin wok kin afɛkt di wan dɛn we de wach wi?

16 Wi nɔ fɔ ɛva fɔgɛt aw wi prichin wok go afɛkt pipul dɛn, pan ɔl we i go tan lɛk se nɔbɔdi nɔ de lisin. (Rid Ɛkliziastis 11:​6.) Pipul dɛn de wach wi. Dɛn de notis se wi de drɛs fayn, wi na nays pipul dɛn, ɛn wi lɛk pipul dɛn. Dis kin mek dɛn kɔle wi, ɛn as tɛm de go, ivin di wan dɛn we bin de tink bad bɔt wi kin stat fɔ tink gud bɔt wi. Sajio ɛn Olinda bin kam fɔ si se dis na tru.

17 Sajio bin tɔk se: “Fɔ sɔm tɛm, wi nɔ bin ebul fɔ de go na di opin say usay bɔku pipul dɛn kin gɛda bikɔs wi bin sik. We wi bigin fɔ go de bak, pipul dɛn we de pas bin de aks wi, ‘Wetin apin?’ Wi mis una.’” Olinda bin de smayl we i de tɔk se: “Di bɔs drayva dɛn bin de wev to wi ɛn sɔm pan dɛn bin de ala de tɔk se, ‘Una de du wɛl!’ Dɛn bin ivin de aks wi fɔ wi magazin dɛn.” Sajio ɛn Olinda bin rili sɔprayz we wan man kam mit dɛn na di kat we dɛn bin de yuz fɔ prich, i gi dɛn wan bɔnch flawa, ɛn i tɛl dɛn tɛnki fɔ di wok we dɛn de du.

18. Wetin mek yu dɔn mekɔp yu maynd fɔ “bia frut pan ɔl we tin nɔ izi”?

18 Wans wi nɔ blo fɔ tɛl ɔda pipul dɛn bɔt Gɔd in Kiŋdɔm, wi stil de du impɔtant wok fɔ ‘tɛl ɔlman di gud nyuz.’ (Matyu 24:​14) Di tin we impɔtant pas ɔl na dat wi de gɛt gladi at fɔ no se wi de du sɔntin we de mek Jiova gladi. I lɛk ɔl di wan dɛn we de “bia frut pan ɔl we tin nɔ izi”!

^ par. 2 Ivin Jizɔs bin tɔk se fɔ prich “na di say we i gro ɔp” nɔ bin izi. Dɛn bin rayt dis insay di 4 buk dɛn we nem Matyu, Mak, Lyuk, ɛn Jɔn.—Matyu 13:​57; Mak 6:​4; Lyuk 4:​24; Jɔn 4:​44.

^ par. 7 Pan ɔl we di branch dɛn na dis stori tinap fɔ di Kristian dɛn we de go na ɛvin, i gɛt lɛsin dɛn fɔ ɔl Gɔd in savant dɛn.

^ par. 9 Fɔ “bia frut” kin min bak fɔ gɛt “di kwaliti dɛn we di spirit” de gi. Bɔt dis atikul ɛn di ɔda wan go tɔk bɔt aw “wi de yuz wi mɔt fɔ tɔk” ɔ fɔ prich bɔt Gɔd in Kiŋdɔm.—Lɛta Fɔ Galeshya 5:​22, 23; Di Ibru Pipul Dɛn 13:​15, NW.

^ par. 11 Sɔm ɔda tɛm dɛn, Jizɔs bin yuz di ɛgzampul fɔ plant ɛn avɛst fɔ tɔk bɔt di wok fɔ mek disaypul dɛn.—Matyu 9:​37; Jɔn 4:​35-38.