Go dayrɛkt to di men tin

Go dayrɛkt to di say we di difrɛn difrɛn atikul dɛn de

Fɔ Kɔrɛkt Pɔsin Na Wan We we Gɔd De Sho se I Lɛk Wi

Fɔ Kɔrɛkt Pɔsin Na Wan We we Gɔd De Sho se I Lɛk Wi

“Jiova de kɔrɛkt di wan dɛn we i lɛk.”—DI IBRU PIPUL DƐN 12:​6, NW.

SIŊ DƐN: 123, 86

1. Wetin di Baybul kin min we i tɔk bɔt fɔ kɔrɛkt pɔsin?

WETIN yu kin tink bɔt we yu yɛri di wɔd “kɔrɛkt”? Bɔku pipul dɛn kin tink se na fɔ pɔnish pɔsin, bɔt fɔ kɔrɛkt pɔsin min pas dat. Di Baybul se fɔ kɔrɛkt pɔsin na fayn tin ɛn sɔntɛnde we di Baybul kin tɔk bɔt fɔ kɔrɛkt pɔsin i kin tɔk bak bɔt fɔ no mɔ, fɔ gɛt sɛns, fɔ sho lɔv, ɛn fɔ gɛt layf. (Prɔvabs 1:​2-7; 4:​11-13) Dat na bikɔs di kɔrɛkt we Gɔd de kɔrɛkt wi de sho se i lɛk wi ɛn i want wi fɔ gɛt layf we go de sote go. (Di Ibru Pipul Dɛn 12:​6) Pan ɔl we sɔntɛnde di kɔrɛkt we Gɔd de kɔrɛkt wi kin bi pɔnishmɛnt, i nɔ de ɛva du wikɛd tin to wi ɔ min bad tin fɔ wi. Infakt, di minin we impɔtant pas ɔl fɔ di wɔd “kɔrɛkt” kin min fɔ tich, lɛk di tich we mama ɛn papa kin tich dɛn pikin.

2, 3. Ɛksplen aw we yu de kɔrɛkt pɔsin kin min se yu de tich ɛn pɔnish am. (Luk di pikchɔ nia dis atikul in taytul.)

2 Tink bɔt dis ɛgzampul. Wan smɔl bɔbɔ we nem Jɔni bin de ple bɔl na pala. In mama tɛl am se: “Jɔni, yu no se yu nɔ fɔ ple bɔl na pala! Yu go pwɛl sɔntin.” Bɔt Jɔni nɔ bin  lisin to in mama ɛn i kɔntinyu fɔ ple bɔl na pala. Leta, di bɔl go nak di flawa vas ɛn i brok! Wetin Jɔni in mama bin du fɔ kɔrɛkt am? I bin tich am bay we i ɛksplen to am se wetin i du na bad tin. I bin want am fɔ no se i fayn fɔ mek i obe in mama ɛn papa, ɛn i fɔ no se dɛn lɔ dɛn impɔtant ɛn na sɔntin we i ebul fɔ du. Fɔ ɛp Jɔni fɔ lan dis lɛsin, in mama bin disayd se i go fayn fɔ lɛ i pɔnish am bay we i tek di bɔl na in an fɔ sɔm tɛm. Jɔni nɔ bin gladi fɔ dis, bɔt dat bin ɛp am fɔ no se, i go sɔfa if i nɔ lisin to in mama ɛn papa.

3 As Kristian dɛn, wi de na Gɔd in ɔganayzeshɔn. (Fɔs Lɛta to Timoti 3:​15, NW) Wi Papa we na Jiova, gɛt di rayt fɔ disayd wetin rayt ɛn wetin rɔng ɛn fɔ kɔrɛkt wi we wi nɔ gri fɔ obe am. Dɔn, if wi de sɔfa fɔ di tin dɛn we wi de du, di kɔrɛkt we Jiova de kɔrɛkt wi wit lɔv go ɛp wi fɔ mɛmba wetin mek i impɔtant fɔ obe am. (Lɛta Fɔ Galeshya 6:​7) Gɔd lɛk wi pasmak ɛn i nɔ want wi fɔ sɔfa.—Pita In Fɔs Lɛta 5:​6, 7.

4. (a) Aw Jiova want wi fɔ tren ɔda pipul dɛn? (b) Wetin wi go tɔk bɔt insay dis atikul?

4 We wi de yuz di Baybul fɔ kɔrɛkt wi pikin ɔ wi Baybul studɛnt, na we dat fɔ ɛp am fɔ bi Krays in disaypul. Wi de yuz di Baybul fɔ tich wi Baybul studɛnt dɛn fɔ no wetin rayt ɛn ɛp dɛn fɔ ɔndastand ɛn ‘du ɔl di tin dɛn we Jizɔs tɛl wi fɔ du.’ (Matyu 28:​19, 20; Sɛkɛn Lɛta to Timoti 3:​16) Na da we de Jiova want wi fɔ tren dɛn so dat dɛnsɛf go ɛp ɔda pipul dɛn fɔ bi Krays in disaypul. (Rid Taytɔs 2:​11-14.) Naw wi de kam tɔk bɔt tri impɔtant kwɛstyɔn dɛn: (1) Aw di kɔrɛkt we Gɔd de kɔrɛkt wi de sho se i lɛk wi? (2) Wetin wi kin lan frɔm di wan dɛn we Gɔd bin kɔrɛkt? (3) Aw wi kin falamakata di we aw Jiova ɛn in Pikin de kɔrɛkt pɔsin?

GƆD DE KƆRƐKT WIT LƆV

5. Aw di kɔrɛkt we Jiova de kɔrɛkt wi de sho se i lɛk wi?

5 Jiova de kɔrɛkt wi, i de tich wi, ɛn tren wi bikɔs i lɛk wi. I want wi fɔ de kɔntinyu fɔ kam nia am ɛn gɛt layf we go de sote go. (1 Jɔn 4:​16) I nɔ de ɛva tɛl wi bad wɔd ɔ mek wi fil bad bɔt wisɛf. (Prɔvabs 12:​18) Bifo dat, Jiova de pe atɛnshɔn mɔ pan di gud kwaliti dɛn we wi gɛt, ɛn i dɔn gi wi di fridɔm fɔ disayd wetin wi want fɔ du. Yu de si di we aw Jiova de kɔrɛkt wi bay we i de yuz di Baybul, wi buk ɛn magazin dɛn, wi mama ɛn papa dɛn, ɔ di ɛlda dɛn fɔ sho se i lɛk wi? Infakt, we di ɛlda dɛn de tek tɛm tray fɔ kɔrɛkt wi wit lɔv bifo  wi ivin no se wi dɔn du bad, dat de sho se dɛn lɛk wi ɛn dɛn de falamakata Jiova.Lɛta Fɔ Galeshya 6:​1.

6. Aw di kɔrɛkt we dɛn de kɔrɛkt wi de sho se Gɔd lɛk wi pan ɔl we i min se wi go lɔs di wok we wi gɛt na di kɔngrigeshɔn?

6 Sɔntɛnde, fɔ kɔrɛkt pɔsin kin pas di advays we yu go gi am. If sɔmbɔdi sin siriɔs wan, dɛn de stɔp am fɔ du di wok dɛn we i bin de du na di kɔngrigeshɔn. Ivin we dis apin, di kɔrɛkt we dɛn de kɔrɛkt am de sho se Gɔd lɛk am. Fɔ ɛgzampul, dat go ɛp am fɔ si se i impɔtant fɔ de tek tɛm stɔdi di Baybul, tink gud wan bɔt wetin i dɔn rid, ɛn fɔ de pre. We i de du dɛn tin ya, dat go ɛp am fɔ kɔntinyu fɔ de gɛt tayt padi biznɛs wit Jiova mɔ ɛn mɔ. (Sam 19:​7) As tɛm de go, dɛn kin gi am bak di wok dɛn we i bin de du na di kɔngrigeshɔn. Ivin we pɔsin disfɛloship, dat de sho se Jiova lɛk wi bikɔs i de protɛkt di kɔngrigeshɔn. (Fɔs Lɛta Fɔ Kɔrint 5:​6, 7, 11) Ɛn bikɔs Gɔd de kɔrɛkt wi di rayt we ɔltɛm, dat de ɛp di pɔsin we disfɛloship fɔ no se na siriɔs sin i kɔmit. Dis kin mek di pɔsin ripɛnt.—Di Apɔsul Dɛn Wok [Akt] 3:​19.

DI KƆRƐKT WE JIOVA DE KƆRƐKT WI DE BƐNIFIT WI

7. Udat na Shɛbna? Us bad abit i bin gɛt?

7 Fɔ ɔndastand wetin mek i impɔtant fɔ kɔrɛkt pɔsin, wi go kam tɔk bɔt tu pipul dɛn we Jiova bin kɔrɛkt. Wan pan dɛn na Shɛbna, we na wan Izrɛlayt man we bin de insay Kiŋ Ɛzikaya in tɛm, ɛn wan ɔda wan na Gream, we na wan brɔda insay wi yon tɛm. Shɛbna bin de “inchaj ɔf di os.” I go bi se na Kiŋ Ɛzikaya in os, ɛn i bin gɛt pawa. (Ayzaya 22:​15) Bɔt Shɛbna bin mek insɛf prawd ɛn i bin want fɔ mek ɔda pipul dɛn tink se i impɔtant. I bin ivin mek dia dia grev fɔ insɛf ɛn rayd pan “fayn fayn chariɔt.”—Ayzaya 22:​16-18.

If wi put wisɛf dɔŋ ɛn rɛdi fɔ ajɔst di we aw wi de biev, Gɔd go blɛs wi (Luk na paregraf 8 to 10)

8. Aw Jiova bin kɔrɛkt Shɛbna? Wetin bin apin?

8 Bikɔs Shɛbna bin tray fɔ gɛt prez fɔ  insɛf, Gɔd bin gi di wok we i gɛt to wan man we nem Ilayakim. (Ayzaya 22:​19-21) Dis bin apin di tɛm we di Kiŋ na Asiria we nem Sɛnakarib bin plan fɔ atak Jerusɛlɛm. Leta, Sɛnakarib bin sɛn wan grup we na soso bigman dɛn ɛn bɔku bɔku sojaman dɛn fɔ mek di Ju pipul dɛn fred ɛn mek Kiŋ Ɛzikaya sɔrɛnda. (Sɛkɛn Kiŋ 18:​17-25) Ɛzikaya bin sɛn Ilayakim ɛn tu ɔda man dɛn fɔ go mit di bigman dɛn we Sɛnakarib sɛn. Wan pan dɛn man ya na bin Shɛbna, we bin dɔn bi sɛktri bay da tɛm de. Frɔm dis tin we bin apin wi si se Shɛbna bin lan in lɛsin se i fɔ put insɛf dɔŋ. Ɛn i nɔ bin vɛks fɔ dat ɔ fil sɔri fɔ insɛf. I bin rɛdi fɔ bi sɛktri, we na pozishɔn we nɔ dat impɔtant. Lɛ wi tɔk bɔt tri lɛsin dɛn we wi kin lan frɔm wetin bin apin to Shɛbna.

9-11. (a) Us impɔtant lɛsin dɛn wi kin lan frɔm Shɛbna? (b) Aw yu fil bɔt di we aw Jiova bin trit Shɛbna?

9 Fɔs, di lɔs we Shɛbna bin lɔs in pozishɔn mek wi mɛmba se “if yu de kak, yu go kapsay.” (Prɔvabs 16:​18) I go bi se wi gɛt spɛshal wok na di kɔngrigeshɔn, ɛn ɔda pipul dɛn go de tink se wi impɔtant. If na so i bi, yu go kɔntinyu fɔ put yusɛf dɔŋ? Wi go mɛmba se ɛnitin we wi ebul fɔ du ɛn ɛni gud tin we wi du na Jiova ɛp wi fɔ du am? (Fɔs Lɛta Fɔ Kɔrint 4:​7) Di apɔsul Pɔl bin wɔn wi se: “Una nɔ tink se una bɛtɛ pas aw una tan, bɔt una fɔ tink lɛkɛ aw soba pipul de tink bɔt dɛnsɛf.”—Lɛta Fɔ Rom 12:​3.

10 Sɛkɔn, di kɔrɛkt we Jiova bin kɔrɛkt Shɛbna bin sho se i biliv se Shɛbna go chenj. (Prɔvabs 3:​11, 12) Dis na lɛsin fɔ di wan dɛn we dɔn lɔs spɛshal wok we dɛn bin de du na di kɔngrigeshɔn. Bifo dɛn at wam ɔ dɛn fil bad, dɛn fɔ kɔntinyu fɔ gi Jiova dɛn bɛst. Dɛn kin disayd if dɛn go si di kɔrɛkt we Jiova kɔrɛkt dɛn as lɔv fɔ dɛn. Mɛmba se wi Papa go blɛs wi if wi kɔntinyu fɔ put wisɛf dɔŋ. (Rid Pita In Fɔs Lɛta 5:​6, 7.) Di kɔrɛkt we Jiova de kɔrɛkt wi wit lɔv go mol wi if wi put wisɛf dɔŋ ɛn if wi tan lɛk kle we izi fɔ shep.

11 Tɔd, wi kin lan fayn fayn lɛsin frɔm di aw Jiova bin trit Shɛbna. Pan ɔl we di we aw Jiova de kɔrɛkt wi de sho se i et sin, di we aw i de kɔrɛkt wi de sho bak se i lɛk di pɔsin we sin. Jiova de luk fɔ di gud tin dɛn we pipul dɛn de du. If yu na mama ɔ papa ɔ ɛlda, yu go falamakata di aw Jiova de kɔrɛkt pɔsin?—Jud In Lɛta 22, 23.

12-14. (a) Wetin sɔm pipul dɛn de du we Jiova kɔrɛkt dɛn? (b) Aw Gɔd in Wɔd bin ɛp wan brɔda fɔ chenj di we aw i bin de biev? Wetin bin apin we i chenj?

12 I sɔri fɔ no se sɔm pipul dɛn kin rili vɛks we dɛn kɔrɛkt dɛn ɛn dat kin mek dɛn kɔmɔt biɛn Gɔd ɛn di kɔngrigeshɔn. (Di Ibru Pipul Dɛn 3:​12, 13) Dat min se nɔbɔdi nɔ go ɛp dɛn? Nɔ! Mek wi tɔk bɔt Gream in ɛgzampul. Dɛn bin disfɛloship am ɛn leta i bin bi Jiova Witnɛs bak. Bɔt afta dat i stɔp fɔ prich ɛn fɔ go di mitin dɛn. Wan ɛlda bin tray fɔ mek padi wit Gream, ɛn as tɛm de go Gream bin tɛl di ɛlda fɔ stɔdi di Baybul wit am.

13 Di ɛlda bin tɔk se: “Gream bin gɛt wan prɔblɛm we na fɔ mek prawd. I nɔ  bin de tink gud bɔt di ɛlda dɛn we bin disfɛloship am. So we wi stat di stɔdi, wi bin tɔk bɔt skripchɔ dɛn we de tɔk bɔt prawd ɛn di bad tin we kin apin to pɔsin we prawd. Gɔd in Wɔd bin tan lɛk mirɔ to Gream. Ɛn naw we i luk insɛf insay de, i nɔ bin lɛk wetin i de si! Di we aw dis bin afɛkt am bin rili wɔndaful! Afta we i kam fɔ no se di prawd we aw i bin de fil bin tan lɛk “bod” na in yay we mek i nɔ bin de si, ɛn di prɔblɛm we bin gɛt na di bad we aw i bin de fil bɔt di ɛlda dɛn, dat bin gɛt fɔ mek i chenj kwik kwik wan. I bin bigin fɔ atɛnd ɔl di mitin dɛn bak, i stɔdi Gɔd in Wɔd gud gud wan, ɛn i bin mek am abit fɔ de pre ɛvride. I bin gri bak se na in gɛt di wok fɔ ɛp in famili fɔ go bifo pan Gɔd biznɛs, ɛn dis bin mek in wɛf ɛn in pikin dɛn gladi.”—Lyuk 6:​41, 42; Jems 1:​23-25.

14 Di ɛlda bin kɔntinyu fɔ tɔk se: “Wan de, Gream bin tɛl mi sɔntin we bin rili tɔch mi at. I tɛl mi se, ‘A bin dɔn no di trut fɔ lɔng tɛm, ɛn a bin de ivin sav as payɔnia. Bɔt na naw a go se a rili lɛk Jiova.’” I nɔ tu te, dɛn bin tɛl Gream fɔ de ɛp wit di mayk dɛn na mitin, ɛn i bin rili gladi fɔ du am. Di ɛlda tɔk se: “In ɛgzampul bin tich mi se, we pɔsin put insɛf dɔŋ bay we i gri fɔ lɛ Gɔd kɔrɛkt am, i de gɛt bɔku blɛsin!”

FALAMAKATA GƆD ƐN KRAYS WE YU DE KƆRƐKT PƆSIN

15. Wetin wi go du fɔ mek wi go kɔrɛkt pɔsin gud gud wan?

We ɔda pipul dɛn si se yu ɔmbul, dɛn go rɛspɛkt yu ɛn i go izi fɔ mek dɛn lisin to di advays we yu de gi dɛn

15 If wi want fɔ bi gud tich dɛn, fɔs wi fɔ bi gud studɛnt dɛn. (Fɔs Lɛta To Timoti 4:​15, 16) Semweso, if yu na pɔsin we Jiova de yuz fɔ kɔrɛkt ɔda pipul dɛn, yu fɔ kɔntinyu fɔ put yusɛf dɔŋ ɛn alaw Jiova fɔ gayd yu. We ɔda pipul dɛn si se yu ɔmbul, dɛn go rɛspɛkt yu ɛn i go izi fɔ mek dɛn lisin to di advays we yu de gi dɛn. Wi kin lan frɔm Jizɔs in ɛgzampul.

16. Wetin wi lan bɔt Jizɔs frɔm di we aw i bin de kɔrɛkt ɛn tich in disaypul dɛn?

16 Jizɔs bin de obe in Papa ɔltɛm, ivin di tɛm we i nɔ bin rili izi fɔ am. (Matyu 26:​39) I bin tɛl di wan dɛn we de lisin to am se di tin dɛn we i de tich ɛn di sɛns we i gɛt kɔmɔt frɔm in Papa. (Jɔn 5:​19, 30) Jizɔs bin ɔmbul ɛn i bin de obe, ɛn dat bin ɛp am fɔ tich wit sɔri at. Pipul dɛn we bin rili want fɔ lan bin de ɛnjɔy fɔ de arawnd am. (Rid Matyu 11:29.) Di fayn we aw Jizɔs bin de tɔk to pipul dɛn bin de ɛnkɔrej di wan dɛn we dɛn at pwɛl. (Matyu 12:​20) I bin de tek tɛm kɔrɛkt in apɔsul dɛn wit lɔv, pan ɔl we dɛn bin de du tin we fɔ mek i vɛks pan dɛn bikɔs dɛn bin de aygu bɔt uswan pan dɛn impɔtant pas dɛn ɔl.—Mak 9:​33-37; Lyuk 22:​24-27.

17. Us kwaliti dɛn go ɛp di ɛlda dɛn fɔ kia gud gud wan fɔ di kɔngrigeshɔn?

 17 Ɛnitɛm we di ɛlda dɛn de yuz di advays dɛn we de na di Baybul fɔ kɔrɛkt pɔsin, dɛn nid fɔ falamakata Krays. We dɛn de du dis, dat de sho se dɛn want Gɔd ɛn in Pikin fɔ gayd dɛn. Di apɔsul Pita bin rayt se: “Una fɔ kia fɔ dɛn pipul we Gɔd lɛf na una an lɛkɛ shɛpad we de mɛn ship. Una nɔ fɔ du lɛkɛ se na fos dɛn de fos una, una fɔ kia fɔ dɛn wit opin at; ɛn una nɔ fɔ wok fɔ mɔni nɔmɔ, bɔt bikɔs una gladi fɔ wok. Una nɔ fɔ de trit dɛn pipul ya we Gɔd gi una fɔ kia fɔ, lɛkɛ slev, bɔt una fɔ de du gud we go mek di pipul dɛnsɛf want fɔ tan lɛkɛ una.” (Pita In Fɔs Lɛta 5:​2-4) Di ɛlda dɛn we gladi fɔ put dɛnsɛf dɔŋ fɔ lisin to Gɔd ɛn Krays go bɛnifit, ɛn ivin di wan dɛn we dɛn de kia fɔ go bɛnifit.—Ayzaya 32:​1, 2, 17, 18.

18. (a) Wetin Jiova want mama ɛn papa dɛn fɔ du? (b) Aw Gɔd de ɛp mama ɛn papa dɛn?

18 Wetin wi go se bɔt aw fɔ kɔrɛkt ɛn tren pɔsin na di famili? Jiova tɛl di wan dɛn we de bifo na di famili se: “Una nɔ fɔ du una pikin dɛn tin we go mek dɛn vɛks, bɔt una fɔ gi dɛn Kristiɛn trenin.” (Lɛta Fɔ Ɛfisɔs 6:​4) Yu tink se fɔ tren ɛn kɔrɛkt pɔsin rili impɔtant? Prɔvabs 19:​18, (NW) sho se di we we yu de kɔrɛkt yu pikin go mek i gɛt layf ɔ mek i day. Jiova gi mama ɛn papa dɛn di wok fɔ kɔrɛkt dɛn pikin dɛn. If dɛn nɔ kɔrɛkt dɛn pikin dɛn, dɛn go ansa to Jiova fɔ dat! (Fɔs Samiɛl 3:​12-14) Bɔt Jiova de gi mama ɛn papa dɛn di sɛns ɛn di trɛnk we dɛn nid we dɛn pre to am fɔ ɛp dɛn, ɛn we dɛn abop pan in Wɔd ɛn oli spirit fɔ gayd dɛn.—Rid Jems 1:​5.

LAN AW FƆ GƐT PIS ƐN DE SOTE GO

19, 20. (a) Us blɛsin dɛn wi go gɛt if wi alaw Gɔd fɔ kɔrɛkt wi? (b) Wetin wi go tɔk bɔt insay di nɛks atikul?

19 If wi de alaw Jiova fɔ kɔrɛkt wi ɛn falamakata di we aw Jiova ɛn Jizɔs de kɔrɛkt pɔsin, wi go gɛt bɔku bɔku blɛsin dɛn! Pis go de na wi famili ɛn kɔngrigeshɔn dɛn, ɛn ɔlman go ɛnjɔy lɔv, wi go valyu wisɛf, ɛn fil sef. Dis na jɔs wan smɔl we aw wi go ɛnjɔy pis ɛn gladi at tumara bambay. (Sam 72:​7) Di kɔrɛkt we Jiova de kɔrɛkt wi de pripia wi fɔ gɛt layf we go de sote go as wan famili we gɛt pis ɛn wanwɔd, bikɔs Jiova na wi Papa. (Rid Ayzaya 11:​9.) If wi de tink bɔt dis, wi go si wetin i rili min fɔ kɔrɛkt pɔsin, we na wan fayn we we Gɔd de sho se i lɛk wi.

20 Insay di nɛks atikul, wi go lan mɔ bɔt aw fɔ kɔrɛkt pɔsin na di famili ɛn na di kɔngrigeshɔn. Wi go tɔk bɔt aw wi kin kɔrɛkt wisɛf. Ɛn wi go lan bɔt sɔntin we wi fɔ avɔyd we at pas di kɔrɛkt we dɛn go ɛva kɔrɛkt wi.