Go dayrɛkt to di men tin

Go dayrɛkt to di say we di difrɛn difrɛn atikul dɛn de

Aw Yu Go Gɛt Pis?

Aw Yu Go Gɛt Pis?

DI WƆL we wi de tide gɛt bɔku strɛs, so i nɔ izi fɔ gɛt pis. Ivin we wi gɛt pis, i izi fɔ mek wi lɔs am. Wetin di Baybul se we go ɛp wi fɔ fɛn tru tru pis we go de sote go? Aw wi go ɛp ɔda pipul dɛn fɔ du di sem tin?

WETIN WI NID FƆ DU?

Fɔ mek wi go ebul fɔ fɛn tru tru pis, wi nid fɔ fil se wi sef ɛn pɔsin de protɛkt wi. Wi nid fɔ gɛt gud padi dɛn, ɛn di tin we impɔtant pas ɔl na dat, wi nid fɔ kam nia Gɔd. Aw wi go du dat?

Jiova in lɔ ɛn advays [prinsipul] dɛn gud fɔ wi ɔltɛm. We wi obe dɛn, wi de sho se wi abop pan Jiova ɛn wi want fɔ gɛt fayn padi biznɛs wit am. (Jɛrimaya 17:​7, 8; Jems 2:​22, 23) Dɔn, Jiova go kam nia wi ɛn gi wi di pis we wi fɔ gɛt. Ayzaya 32:​17 tɔk se: “Fɔseka we pipul de waka tret na PAPA GƆD in yay, kolat go de, ɛn fɔseka we pipul de waka tret na PAPA GƆD in yay, kwayɛtnɛs ɛn trɔst de sote go.” We wi obe Jiova wit ɔl wi at, wi go gɛt tru tru pis.—Ayzaya 48:​18, 19.

We wi de wɔri, dat de mek wi nɔ gɛt pis

Jiova dɔn gi wi wan spɛshal gift fɔ ɛp wi fɔ gɛt pis we go de sote go. Da gift de na in oli spirit.—Di Apɔsul Dɛn Wok [Akt] 9:​31.

GƆD IN SPIRIT DE ƐP WI FƆ GƐT PIS

Di apɔsul Pɔl bin tɔk se pis na wan pan “di kwaliti dɛn we di spirit de ɛp wi fɔ gɛt.” (Lɛta fɔ Galeshya 5:​22, 23, NW) Bikɔs Gɔd in spirit de ɛp wi fɔ gɛt pis, wi nid fɔ alaw di oli spirit fɔ gayd wi if wi want pis. Aw wi go du dat?

Fɔs, wi nid fɔ de rid Gɔd in Wɔd ɔltɛm. (Sam 1:​2, 3) We wi de tink gud gud wan  bɔt wetin wi de rid, di oli spirit go ɛp wi fɔ ɔndastand di we aw Jiova de tink bɔt difrɛn tin dɛn. Fɔ ɛgzampul, wi go lan wetin mek Jiova de mek pis ɔltɛm ɛn wetin mek pis rili impɔtant to am. We wi de du di tin dɛn we wi de rid na di Baybul, dat de mek wi de gɛt pis mɔ ɛn mɔ.—Prɔvabs 3:​1, 2.

Sɛkɔn, wi fɔ pre fɔ Gɔd in oli spirit. (Lyuk 11:​13) Jiova prɔmis se di wan dɛn we de aks fɔ mek i ɛp dɛn go gɛt ‘di pis we Gɔd de gi we pas di we aw mɔtalman ebul ɔndastand, we go gayd dɛn at ɛn dɛn maynd tru Krays Jizɔs.’ (Lɛta Fɔ Filipay 4:​6, 7) We wi kam nia Jiova ɛn abop pan in oli spirit, i go gi wi tru tru pis.—Lɛta Fɔ Rom 15:​13.

Di Baybul dɔn ɛp bɔku bɔku pipul dɛn fɔ chenj di we aw dɛn bin de biev, ɛn naw dɛn de ɛnjɔy pis wit Jiova, dɛn gɛt kolat, ɛn dɛn gɛt pis wit ɔda pipul dɛn. Wetin ɛp dɛn fɔ ebul mek dɛn chenj dɛn ya?

WETIN ƐP SƆM PIPUL DƐN FƆ GƐT TRU TRU PIS?

Bifo sɔm pan wi brɔda ɛn sista dɛn lan di trut, dɛn bin gɛt wamat ɛn dɛn bin lɛk fɛt fɛt. Bɔt dɛn tray tranga wan fɔ chenj, ɛn naw dɛn de du gud, dɛn peshɛnt, ɛn dɛn gɛt pis wit ɔda pipul dɛn. * (Luk di futnot.) (Prɔvabs 29:​22) Lɛ wi si aw wan brɔda we nem Devid ɛn wan sista we nem Rechɛl bin mek dɛn chenj dɛn ya na dɛn layf.

Wi go gɛt pis we wi fala di advays dɛn we de na di Baybul ɛn pre fɔ Gɔd in spirit

Bifo Devid de lan di trut, bɔku tɛm, i bin lɛk fɔ fɛn fɔlt pan ɔda pipul dɛn ɛn i bin de tɔk to in fambul dɛn wit wamat. Bɔt i bin kam fɔ no se i nid fɔ chenj. Aw i bin gɛt pis? Devid tɔk se: “A bigin fɔ fala di advays dɛn we de na di Baybul, ɛn dat bin mek rɛspɛkt de bitwin mi ɛn mi fambul dɛn mɔ ɛn mɔ.”

 Di say we Rechɛl bin mɛn bin afɛkt am. I ɛksplen se: “Ivin naw i nɔ izi fɔ mek a lɛf wamat bikɔs a mɛn na os usay ɔlman bin gɛt wamat.” Wetin bin ɛp Rechɛl fɔ gɛt pis? I se, “A bin de pre ɛn abop pan Jiova.”

Devid ɛn Rechɛl na jɔs tu ɛgzampul dɛn bɔt pipul dɛn we dɔn gɛt pis tide bikɔs dɛn fala di advays dɛn we de na di Baybul ɛn dɛn abop pan di oli spirit. Pan ɔl we wi de na wɔl usay bɔku pipul dɛn gɛt wamat tide, wi stil gɛt pis. Dis go mek i izi fɔ lɛ wi de wit wi fambul dɛn ɛn wi brɔda ɛn sista dɛn na di kɔngrigeshɔn. Bɔt Jiova tɛl wi se wi fɔ “de kwayɛt wan wit ɔlman.” (Lɛta Fɔ Rom 12:​18) Yu tink se dat rili pɔsibul? Wetin mek wi fɔ tray fɔ gɛt pis wit ɔda pipul dɛn?

DU ƆL WETIN YU EBUL FƆ MEK PIS WIT ƆDA PIPUL DƐN

We wi de du wi prichin wok, wi de prich bɔt Gɔd in Kiŋdɔm we gɛt mɛsej bɔt pis. (Ayzaya 9:​6, 7; Matyu 24:​14) Bɔku pipul dɛn lɛk di mɛsej we wi de prich ɛn dɛn kin lisin. Dis dɔn mek di tin dɛn we de apin na di wɔl nɔ de mek dɛn fil se op nɔ de igen ɔ mek dɛn vɛks pasmak. Dɛn dɔn gɛt tru tru op fɔ tumara bambay, ɛn dis dɔn mek dɛn want “fɔ mek ɔlman gɛt kolat.”—Sam 34:​14.

Bɔt nɔto ɔlman kin lɛk wi mɛsej, mɔ fɔ di fɔstɛm. (Jɔn 3:​19) Ilɛk wetin pipul dɛn du, Gɔd de gi wi in oli spirit. Dat de ɛp wi fɔ kɔntinyu fɔ gɛt pis ɛn sho rɛspɛkt we wi de prich. We wi de du dis, wi de fala Jizɔs in advays we se: “Ɛni os we una go, una fɔ se, ‘Mek Gɔd blɛs una.’ If di pipul dɛn na di os gladi fɔ una, di wɔd dɛn we una blɛs dɛn wit, go tap na di os; bɔt if dɛn nɔ gladi fɔ una, di blɛsin we una gi dɛn go kam bak to una.” (Matyu 10:​11-13) We wi de biev dis kayn we, wi go kɔntinyu fɔ gɛt pis ilɛk wetin ɔda pipul dɛn se ɔ du. Ɛn wi de mɛmba se wi go stil gɛt di chans fɔ ɛp dɛn pipul dɛn de tumara bambay.

Wi de ɛp fɔ mek pis de bay we wi de sho rɛspɛkt we wi de tɔk to gɔvmɛnt wokman dɛn, ivin if dɛn nɔ lɛk di wok we wi de du. Fɔ ɛgzampul, insay wan kɔntri na Afrika, di gɔvmɛnt nɔ bin de alaw wi fɔ bil Kiŋdɔm Ɔl dɛn. Di brɔda dɛn bin no se dɛn fɔ tray fɔ sɔlv di prɔblɛm pisful wan. Dɛn bin sɛn wan brɔda we bin dɔn bi mishɔnari na da kɔntri de fɔ go tɔk to di ambasedɔ na Lɔndɔn insay Ingland, ɛn tɛl am bɔt di pisful wok we Jiova Witnɛs dɛn de du.

Di brɔda bin tɔk se: “We a rich na di risɛpshɔn tebul, a si di we aw di uman we bin de na di risɛpshɔn tebul bin drɛs. Wantɛm wantɛm a kam fɔ no se di uman kɔmɔt frɔm wan trayb we a bin dɔn lan dɛn langwej. So a bin grit am insay in langwej. Dis bin mek di uman sɔprayz ɛn i bin aks mi se, ‘Wetin mek yu kam fɛn wi?’ A bin tek tɛm tɛl am se a bin want fɔ si di ambasedɔ. I bin kɔl di ambasedɔ. Di ambasedɔ bin kɔmɔt na do ɛn grit mi insay di lokal langwej. Afta dat, i bin tek tɛm lisin to mi we a de ɛksplen tɛl am bɔt di pisful wok we Jiova Witnɛs dɛn de du.”

Afta we di ambasedɔ bin yɛri wetin di brɔda tɛl am, i bin kam fɔ ɔndastand wi wok gud gud wan ɛn i nɔ bin et wi igen. Afta sɔm tɛm, di gɔvmɛnt bin chenj wetin dɛn bin dɔn disayd ɛn dɛn bin alaw Jiova Witnɛs dɛn fɔ bil Kiŋdɔm Ɔl dɛn. Di brɔda dɛn bin rili gladi! Dis dɔn sho klia wan se we wi trit ɔda pipul dɛn wit rɛspɛkt, dat de ɛp fɔ mek pis de.

ƐNJƆY PIS WE GO DE SOTE GO

Tide, Jiova in pipul dɛn de ɛnjɔy di pis we Jiova de gi, we dɛn de wɔship am na say usay pis de. Wi ɔl kin ad to da pis de bay we wi de du ɔl wetin wi ebul fɔ gɛt pis na wi layf. Dɔn wi go shɔ se Jiova gladi fɔ wetin wi de du. Ɛn insay in nyu wɔl, i go gi wi pis we go de sote go.—Pita In Sɛkɛn Lɛta 3:​13, 14.

^ par. 13 Wi go tɔk bɔt aw fɔ du gud insay di ɔda atikul we go kam we na wan pan di nayn atikul dɛn we de tɔk bɔt di “kwaliti dɛn we di spirit de ɛp wi fɔ gɛt.”