Go dayrɛkt to di men tin

Go dayrɛkt to di say we di difrɛn difrɛn atikul dɛn de

Wi De fɔ Jiova!

Wi De fɔ Jiova!

“Dɛn pipul we PAPA GƆD [“Jiova,” NW] dɔn pik fɔ bi in yon gɛt in blɛsin; nain na di PAPA GƆD we dɛn fɔ wɔship.”—SAM 33:​12.

SIŊ DƐN: 40, 50

1. Wetin mek wi go se na Jiova gɛt ɔltin? (Luk di pikchɔ nia dis atikul in taytul.)

NA Jiova gɛt ɔltin! Na in “gɛt ɔp di skay te rich ɔp ɔp ɛvin, ɛn di ath ɛn ɔl wetin de de.” (Ditarɔnɔmi 10:​14; Rɛvɛleshɔn 4:​11) Bikɔs na Jiova mek ɔl mɔtalman, na dat mek na in gɛt wi ɔl. (Sam 100:​3) Bɔt pan ɔl di pipul dɛn we dɔn ɛva de na dis wɔl, Gɔd dɔn pik sɔm fɔ bi in yon spɛshal pipul dɛn.

2. Frɔm wetin de insay di Baybul, udat dɛn na Jiova in spɛshal pipul dɛn?

2 Fɔ ɛgzampul, Sam 135 bin kɔl di fetful Izrɛlayt dɛn we bin de wɔship Jiova trade trade, “in prayvet prɔpati.” (Sam 135:​4) Dɔn bak, Osia bin tɔk se sɔm pipul dɛn we nɔto bin Izrɛlayt dɛn go bi Jiova in pipul dɛn. (Osia 2:​23, NW) Dis tin we Osia bin tɔk bin apin di tɛm we Jiova bin bigin fɔ pik pipul dɛn we nɔto Izrɛlayt dɛn fɔ rul wit  Krays na ɛvin. (Di Apɔsul Dɛn Wok [Akt] 10:​45; Lɛta Fɔ Rom 9:​23-26) Dɛn kɔl dɛn wan dɛn we Gɔd anɔynt wit in oli spirit, “oli neshɔn.” Dɛn na Jiova in “spɛshal” prɔpati. (Pita in Fɔs Lɛta 2:​9, 10, NW) Bɔt we ɔl dɛn fetful Kristian dɛn tide we gɛt di op fɔ de na dis wɔl sote go? Jiova kɔl dɛn “mi pipul dɛn” ɛn “mi pipul dɛn we a dɔn pik.”—Ayzaya 65:​22.

3. (a) Udat dɛn tide gɛt spɛshal padi biznɛs wit Jiova? (b) Wetin wi go tɔk bɔt insay dis atikul?

3 Tide, di “ship dɛn we nɔ bɔku,” we gɛt di op fɔ de na ɛvin ɛn di “ɔda ship” we gɛt di op fɔ de na dis wɔl sote go, de wɔship Jiova togɛda as “wan grup.” (Lyuk 12:​32; Jɔn 10:​16, NW) Wi want fɔ sho Jiova se wi rili gladi we wi gɛt dis spɛshal padi biznɛs wit am. Insay dis atikul, wi go tɔk bɔt aw wi go sho Jiova se wi gladi fɔ dis spɛshal ɔnɔ we i gi wi.

WI DE GI WI LAYF TO JIOVA

4. Aw wi go sho Jiova se wi gladi fɔ we i alaw wi fɔ bi in padi? Aw Jizɔs bin du sɔntin lɛk dat?

4 Wi de sho Jiova se wi gladi we wi gi wi layf to am ɛn baptayz. Dɔn ɔlman go no se na Jiova gɛt wi ɛn wi rɛdi fɔ obe am. (Di Ibru Pipul Dɛn 12:​9) Jizɔs bin du sɔntin lɛk dat we i bin baptayz. I bin gi insɛf to Jiova pan ɔl we i kɔmɔt frɔm neshɔn we bin dɔn gi dɛnsɛf to Jiova. I bin tan lɛk se i de tɛl Gɔd se: “A de ɛnjɔy fɔ du wetin yu want.”—Sam 40:​7, 8.

5, 6. (a) Wetin Jiova bin tɔk we Jizɔs bin baptayz? (b) Us ɛgzampul go ɛp wi fɔ ɔndastand aw Jiova de fil we wi gi wi layf to am?

5 Aw Jiova bin fil we Jizɔs bin baptayz? Di Baybul tɔk se: “Wɛn Jɔn bin dɔn baptayz ɔl di pipul dɛn dɛn dɔn, nain i baptayz Jizɔs insɛf. Wɛn Jizɔs bin de pre, ɛvin opin ɛn Gɔd in Spirit tek dɔv shep kam dɔŋ pan am ɛn dɛn yɛri vɔys we kɔmɔt na ɛvin de tɔk se, ‘Yu na mi yon Pikin we a lɛk ɛn a gladi fɔ yu.’” (Lyuk 3:​21, 22) Bifo dis tɛm, na Jiova bin gɛt Jizɔs. Bɔt Jiova bin gladi we i si se Jizɔs bin rɛdi fɔ yuz in layf fɔ sav In wangren. Jiova kin gladi bak we wi gi wi layf to am ɛn i go blɛs wi.—Sam 149:​4.

6 Bɔt na Jiova gɛt ɔltin! So wetin wi go gi am? Imajin wan papa we gi in gyal pikin wan fayn it. Dɔn di pikin tek sɔm pan di it ɛn gi in papa. Pan ɔl we na di papa gɛt di it, i go stil gladi fɔ di gift we in pikin gi am. Dis sho se in pikin lɛk am. Da it we in pikin gi am, valyu to am pas ɔl di ɔda it dɛn we i gɛt. Semweso, Jiova kin gladi we wi gi wi layf to am wit ɔl wi at.—Ɛksodɔs 34:​14.

7. Aw Malakay ɛp wi fɔ ɔndastand aw Jiova de fil bɔt di wan dɛn we de sav am wit ɔl dɛn at?

7 Rid Malakay 3:​16. Wetin mek i impɔtant fɔ gi yu layf to Jiova ɛn fɔ baptayz? Na tru se frɔm di tɛm we yu gɛt layf, na Jiova we mek yu gɛt yu. Bɔt jɔs tink bɔt aw Jiova go gladi we yu gri fɔ mek i rul yu ɛn gi yu layf to am! (Prɔvabs 23:​15) Jiova no di wan dɛn we de sav am wit ɔl dɛn at, ɛn i de rayt dɛn nem insay “wan buk” so dat “i go de mɛmba se na dɛn de tink bɔt am.”

8, 9. Wetin Jiova want mek di wan dɛn we dɛn nem de insay in buk, du?

8 If wi want wi nem fɔ kɔntinyu fɔ de  insay Jiova in buk, sɔntin de we wi nid fɔ du. Malakay tɔk se wi fɔ fred Jiova ɛn tink gud gud wan bɔt in nem. If wi wɔship ɛnibɔdi ɔ ɛnitin apat frɔm Jiova, Jiova go pul wi nem kɔmɔt na in buk!—Ɛksodɔs 32:​33; Sam 69:​28.

Ɛvride, wans wi de alayf, wi fɔ pruf bay wetin wi de du fɔ se wi de obe Jiova

9 So i nɔ jɔs du fɔ mek wi prɔmis Jiova fɔ se wi go du wetin i want ɛn fɔ baptayz. Dis na tin dɛn we wi kin du wantɛm nɔmɔ, bɔt fɔ wɔship Jiova na tin we wi de du te wi day. Ɛvride, wans wi de alayf, wi fɔ pruf bay wetin wi de du fɔ se wi de obe Jiova.—Pita in Fɔs Lɛta 4:​1, 2, NW.

AVƆYD DI TIN DƐN WE PIPUL DƐN NA DI WƆL DE DU

10. Us klia difrɛns fɔ de bitwin udat de sav Jiova ɛn udat nɔ de sav am?

10 Insay di atikul we de bifo dis wan, wi bin lan se Ken, Sɔlɔmɔn, ɛn di Izrɛlayt dɛn bin tɔk se na Jiova dɛn de wɔship bɔt dɛn nɔ bin kɔntinyu fɔ de biɛn am. Dɛn ɛgzampul dɛn ya de tich wi se i nɔ du fɔ jɔs se a de wɔship Jiova. Wi nid fɔ et wetin bad ɛn lɛk wetin gud. (Lɛta Fɔ Rom 12:​9) Jiova tɔk se wi go si klia difrɛns bitwin ‘udat de waka tret wit PAPA GƆD ɛn udat de du wetin in fil fɔ du, bitwin udat de du wetin PAPA GƆD want ɛn udat nɔ de du wetin PAPA GƆD want.’—Malakay 3:​18.

11. Wetin mek i fɔ izi fɔ mek ɔlman si se na Jiova nɔmɔ wi de wɔship?

11 Wi want fɔ tɛl Jiova tɛnki fɔ we i pik wi fɔ bi in pipul dɛn! I fɔ izi fɔ ɔlman fɔ si se wi de na Jiova in say. (Matyu 5:​16; Fɔs Lɛta To Timoti 4:​15) Aks yusɛf dɛn kwɛstyɔn dɛn ya: ‘Ɔda pipul dɛn de si se a de biɛn Jiova wit ɔl mi at? A prawd fɔ tɛl ɔda pipul dɛn se mi na Jiova Witnɛs?’ Tink bɔt aw Jiova in at go pwɛl if wi de shem fɔ tɛl ɔda pipul dɛn se na in gɛt wi.—Sam 119:​46; rid Mak 8:​38.

Di we aw yu de liv yu layf de mek ɔda pipul dɛn no klia wan se yu na Jiova Witnɛs? (Luk na paregraf 12 ɛn 13)

12, 13. Aw sɔm brɔda ɛn sista dɛn dɔn mek i nɔ izi fɔ mek ɔda pipul dɛn no se dɛn na Jiova Witnɛs?

12 I sɔri fɔ si se ivin sɔm Witnɛs dɛn de falamakata “di wɔl in yon spirit.” Dat dɔn mek dɛn nɔ difrɛn frɔm di wan dɛn we nɔ de sav Jiova. (Fɔs Lɛta Fɔ Kɔrint 2:​12) “Di wɔl in yon spirit” de mek pipul dɛn pe atɛnshɔn pan di tin dɛn we dɛn bɔdi want. (Lɛta Fɔ Ɛfisɔs 2:​3) Fɔ ɛgzampul, pan ɔl di advays dɛn we wi kin gɛt, sɔm brɔda ɛn sista dɛn nɔ kin stil drɛs fayn. Dɛn de wɛr klos we tayt pasmak ɛn we de sho sɔm pat dɛn na dɛn bɔdi ivin fɔ go na mitin. Ɔ dɛn kin mek dɛn iastayl dɛn we de mek pipul dɛn wach dɛn pasmak ɔ we de mek dɛn fiba sɔm pipul dɛn na di wɔl. (Fɔs Lɛta To Timoti 2:​9, 10) Dis dɔn mek i nɔ izi fɔ mek ɔda pipul dɛn no if dɛn na Jiova Witnɛs ɔ dɛn nɔto Jiova Witnɛs.—Jems 4:​4.

 13 Ɔda we dɛn de bak we sɔm Witnɛs dɛn nɔ kin sho se dɛn difrɛn frɔm di pipul dɛn na di wɔl. Fɔ ɛgzampul, we sɔm kin go pati, dɛn kin dans ɛn biev sɔm kayn we we nɔ fayn fɔ Kristian dɛn. Ɔda wan dɛn dɔn post dɛn pikchɔ dɛn ɛn rayt kɔmɛnt dɛn na say dɛn lɛk fesbuk, whatsap, twita ɛn ɔda say dɛn we de sho se dɛn nɔ de tink lɛk aw Jiova de tink. I go bi se dɛn nɔ go kɔrɛkt dɛn na di kɔngrigeshɔn fɔ siriɔs sin, bɔt dɛn go ambɔg dɛn brɔda ɛn sista dɛn we de tray tranga wan fɔ difrɛn frɔm di pipul dɛn na di wɔl.—Rid Pita In Fɔs Lɛta 2:​11, 12.

Nɔ alaw di wan dɛn we nɔ de na Jiova in say fɔ afɛkt wetin yu de du

14. Wetin wi fɔ du fɔ protɛkt wi spɛshal padi biznɛs wit Jiova?

14 Dɛn mek ɔl wetin de na di wɔl fɔ mek wi pe atɛnshɔn pan “di bad we de na pɔsin in at we de mek i put at pan sɔm tin dɛn, dɛn tin we pɔsin kin want bad bad wɛn i si dɛn, ɛn ɔl dɛn tin na di wɔl we de mek pɔsin prawd.” (Jɔn In Fɔs Lɛta 2:​16) Na Jiova gɛt wi, so wi difrɛn. Wi “fɔ lɛf fɔ liv lɛkɛ pipul we nɔ no am, wi fɔ lɛf dɛn bad tin we wi want du na di wɔl, ɛn lan fɔ kɔntrol wisɛf, fɔ waka tret, ɛn fɔ waka wit am na dis wɔl.” (Taytɔs 2:​12) Ɔl wetin wi de du na wi layf, aw wi de tɔk, it, drink, drɛs, ɛn wok, fɔ mek ɔlman si klia wan se na Jiova gɛt wi.—Rid Fɔs Lɛta Fɔ Kɔrint 10:​31, 32.

“UNA LƐK UNA KƆMPIN WIT ƆL UNA AT”

15. Wetin mek wi fɔ du gud to wi brɔda ɛn sista dɛn ɛn trit dɛn wit lɔv?

15 Wi de sho se wi valyu wi padi biznɛs wit Jiova bay di we aw wi de trit  wi brɔda ɛn sista dɛn. Na Jiova gɛt dɛn jɔs lɛk wi. If wi mɛmba dis, ɔltɛm wi go de du gud to dɛn ɛn trit dɛn wit lɔv. (Fɔs Lɛta Fɔ Tɛsalonayka 5:​15) Aw dis impɔtant? Jizɔs bin tɛl in lanin bɔy dɛn se: “If una lɛk una kɔmpin, ɔlman go no se una na mi lanin bɔy dɛn.”—Jɔn 13:​35.

16. Wetin wi lan bɔt di lɔv we Jiova gɛt fɔ in pipul dɛn frɔm di Lɔ we i bin gi Mozis?

16 Wan ɛgzampul na di Lɔ we Gɔd bin gi Mozis, go ɛp wi fɔ ɔndastand aw wi fɔ trit wi brɔda ɛn sista dɛn na di kɔngrigeshɔn. Insay Jiova in tɛmpul, dɛn bin gɛt tin dɛn we dɛn bin de yuz fɔ wɔship nɔmɔ. Di Lɔ bin ɛksplen klia wan aw di Livayt dɛn fɔ kia fɔ dɛn tin dɛn de, ɛn dɛn go kil ɛnibɔdi we nɔ fala wetin di lɔ se. (Di Nɔmba Dɛn 1:​50, 51) If Jiova bin rili bisin bɔt aw pipul dɛn fɔ trit dɛn tin dɛn ya we dɛn de yuz fɔ wɔship am, yu nɔ tink se i go bisin mɔ bɔt aw pipul dɛn de trit di wan dɛn we dɔn gi dɛn layf to am ɛn we de biɛn am? I mek wi no aw wi valyu to am we i tɔk se: ‘If ɛnibɔdi ambɔg wi, nain dɛn ambɔg bikɔs wi nain bɔlyay.’—Zɛkaraya 2:​8.

Jiova kin notis we wi fri an, we wi fɔgiv, ɛn we wi du gud to strenja dɛn

17. Wetin Jiova de pe atɛnshɔn to ɛn yɛri?

17 Malakay bin tɔk se Jiova de pe atɛnshɔn to ɛn i de “yɛri” aw in pipul dɛn de trit dɛn kɔmpin dɛn. (Malakay 3:​16) Jiova no udat na in yon. (Sɛkɔn Lɛta to Timoti 2:​19, NW) I rili no ɔltin we dɛn de du ɛn ɔl wetin dɛn de tɔk. (Di Ibru Pipul Dɛn 4:​13) We wi nɔ du gud to wi brɔda ɛn sista dɛn, Jiova kin no. Bɔt wi shɔ fɔ se Jiova kin notis we wi fri an, we wi fɔgiv, ɛn we wi du gud  to strenja dɛn.—Di Ibru Pipul Dɛn 13:​16; Pita In Fɔs Lɛta 4:​8, 9.

JIOVA “NƆ DE KƆMƆT BIƐN IN PIPUL” DƐN

18. Aw wi go tɛl Jiova tɛnki fɔ we i pik wi fɔ bi in pipul dɛn?

18 Wi want fɔ sho Jiova se wi gladi fɔ we i gɛt wi ɛn fɔ we wi bi in pipul dɛn. Wi no se i mek sɛns we wi disayd fɔ gi wi layf to am. Pan ɔl we wi de “wit pipul we wikɛd ɛn we de liv bad layf ɔltɛm,” wi go stil bi “Gɔd in pikin dɛn we gɛt klin at ɛn we nɔ miks pan sin” ɛn wi “yon layf fɔ tan lɛkɛ layt fɔ dɛn.” (Lɛta Fɔ Filipay 2:​15) So wi dɔn mekɔp wi maynd fɔ avɔyd fɔ du ɛnitin we Jiova et. (Jems 4:​7) Dɔn wi lɛk ɛn rɛspɛkt wi brɔda ɛn sista dɛn bikɔs na Jiova gɛt dɛn bak.—Lɛta Fɔ Rom 12:​10.

19. Aw Jiova de blɛs di wan dɛn we na in yon?

19 Di Baybul prɔmis wi se Jiova “nɔ de kɔmɔt biɛn in pipul” dɛn. (Sam 94:​14) Wi rili shɔ se dis go bi. I nɔ mata wetin apin, Jiova go de wit wi. Ilɛksɛf wi day, i nɔ go fɔgɛt wi. (Lɛta Fɔ Rom 8:​38, 39) Di Baybul tɔk se: “If wi de alayf, wi liv fɔ Jiova, ɛn if wi day wi day fɔ Jiova. So ilɛksɛf wi de alayf ɔ wi day, wi na Jiova in yon.” (Lɛta fɔ Rom 14:​8, NW) Wi de wet fɔ di tɛm we Jiova go gi layf bak to ɔl in fetful padi dɛn we dɔn day. (Matyu 22:​32) Dɔn ivin naw wi de ɛnjɔy bɔku wɔndaful gift dɛn frɔm wi Papa. Jɔs lɛk aw di Baybul se “dɛn pipul dɛn we PAPA GƆD [“Jiova,” NW] dɔn pik fɔ bi in yon gɛt blɛsin; nain na di PAPA GƆD we dɛn fɔ wɔship.”—Sam 33:​12.