Go dayrɛkt to di men tin

Go dayrɛkt to di say we di difrɛn difrɛn atikul dɛn de

Yu De Kɔntinyu fɔ Luk to Jiova?

Yu De Kɔntinyu fɔ Luk to Jiova?

“PAPA GƆD wi de luk ɔp to yu, we sidɔm na ɛvin.”—SAM 123:​1.

SIŊ DƐN: 143, 124

1, 2. Wetin i min fɔ luk to Jiova?

WI DE na di tɛm we tin “traŋa.” (Sɛkɛn Lɛta To Timoti 3:​1) Ɛn bifo Jiova dɔnawe wit di wikɛd pipul dɛn ɛn briŋ kam tru tru kolat na di wɔl, layf go kɔntinyu fɔ tranga pas aw i de naw. Na dat mek wi fɔ aks wisɛf dis kwɛstyɔn, ‘Udat a de luk to fɔ ɛp ɛn dayrɛkt mi?’ Wantɛm wantɛm wi go se, “Na Jiova,” ɛn dat na di bɛst ansa.

2 Wetin i min fɔ luk to Jiova? Aw wi go mek shɔ se wi de kɔntinyu fɔ luk to am we wi gɛt prɔblɛm? Trade trade, wan pan di man dɛn we rayt di Baybul bin ɛksplen wetin mek wi rili nid fɔ luk to Jiova we wi nid ɛp. (Rid Sam 123:​1-4.) I bin tɔk se we wi luk to Jiova, wi go tan lɛk savant we de luk to in masta. Aw? Savant de luk to in masta ɔ abop pan am fɔ gi am tin fɔ it ɛn fɔ protɛkt am. Bɔt i fɔ wach in masta ɔltɛm fɔ ɔndastand wetin in masta want  am fɔ du, ɛn i fɔ du am. Semweso, wi fɔ tek tɛm stɔdi Gɔd in Wɔd ɛvride fɔ mek wi go ɔndastand wetin Jiova want wi fɔ du, ɛn wi fɔ du wetin i tɛl wi. Dɔn wi go shɔ se Jiova go ɛp wi di tɛm we wi nid ɛp.—Lɛta Fɔ Ɛfisɔs 5:​17.

3. Wetin kin ambɔg wi fɔ mek wi stɔp fɔ luk to Jiova?

3 Pan ɔl we wi no se wi fɔ luk to Jiova, sɔntɛnde sɔntin kin mek wi stɔp fɔ luk to am. Na dat bin apin to wan pan Jizɔs in padi we nem Mata. I bin stɔp fɔ luk to Jiova bikɔs “di os wok bin de mɔna” am. (Lyuk 10:​40-42) If sɔntin bin mek Mata we na bin fetful pɔsin stɔp fɔ luk to Jiova pan ɔl we Jizɔs bin de wit am, wi nɔ fɔ sɔprayz fɔ se wisɛf sɔntin go mek wi stɔp fɔ luk to Jiova. So wetin go mek wi stɔp fɔ luk to Jiova? Insay dis atikul, wi go tɔk bɔt aw di tin we ɔda pipul dɛn kin du kin mek wi stɔp fɔ luk to Jiova. Ɛn wi go lan aw wi go kɔntinyu fɔ luk to Jiova.

WAN FETFUL MAN BIN LƆS IN CHANS

4. Wetin mek wi sɔprayz fɔ no se Mozis bin lɔs di chans fɔ go na di land we Gɔd bin dɔn prɔmis?

4 Mozis bin de luk to Jiova fɔ dayrɛkt am. Di Baybul tɛl wi se “i nɔ bin gri fɔ tɔn bak, i bin de go lɛkɛ pɔsin we de si Gɔd we mɔtalman nɔ de si.” (Rid Di Ibru Pipul Dɛn 11:​24-27.) I tɔk bak se “wande Izrɛl nɔ gɛt prɔfɛt we tan lɛkɛ Mozis, we PAPA GƆD [“Jiova,” NW] de tɔk to fes to fes.” (Ditarɔnɔmi 34:​10) Bɔt pan ɔl we Mozis na bin Jiova in tayt padi, i bin lɔs di chans fɔ go na di land we Gɔd bin dɔn prɔmis. (Di Nɔmba Dɛm 20:​12) Wetin bin apin?

5-7. Wetin bin apin jɔs afta we di Izrɛlayt dɛn kɔmɔt na Ijipt? Wetin Mozis bin du?

5 Wan siriɔs tin bin apin afta lɛk tu mɔnt we di Izrɛlayt dɛn kɔmɔt na Ijipt, ɛn bifo dɛn rich na Mawnt Saynay. Di pipul dɛn bin stat fɔ grɔmbul bikɔs dɛn nɔ bin gɛt wata. Dɛn bigin fɔ grɔmbul pan Mozis ɛn dɛn bin rili vɛks, dat bin mek “Mozis insɛf pre to PAPA GƆD [“Jiova,” NW] ɛn tɛl am se i nɔ no wetin fɔ du wit di pipul dɛn bikɔs dɛn wan ston am.” (Ɛksodɔs 17:​4) Jiova bin tɛl Mozis klia wan wetin-ɛn-wetin fɔ du. Jiova bin tɛl am fɔ tek di stik we bin de na in an ɛn nak di rɔk na Ɔrɛb. Di Baybul se: “Mozis du wetin PAPA GƆD tɛl am bifo di bigman dɛn na Izrɛl dɛn yay.” Dɔn wata kɔmɔt, di Izrɛlayt dɛn bin gɛt bɔku wata fɔ drink, ɛn di prɔblɛm bin sɔlv.—Ɛksodɔs 17:​5, 6.

6 Di Baybul tɛl wi se Mozis bin kɔl da ples de Masa, we min “fɔ pruv” ɔ “fɔ tɛst,” ɛn Mɛriba, we min “fɔ agyu” ɔ “fɔ kɔmplen.” Wetin mek? Na “bikɔs, na de di Izrɛlayt dɛn bin de kɔmplen ɛn tray fɔ pruv PAPA GƆD [“Jiova,” NW] in pawa we dɛn se dɛn want [fɔ] no if PAPA GƆD [“Jiova,” NW] de wit dɛn ɔ if i nɔ de.”—Ɛksodɔs 17:​7.

7 Aw Jiova bin fil bɔt wetin bin apin na Mɛriba? I bin tan lɛk se na pan am di Izrɛlayt dɛn tɔn dɛn bak nɔto pan Mozis. (Rid Sam 95:​8, 9.) Di tin we di Izrɛlayt dɛn bin du bin rili bad. Bɔt Mozis bin du di rayt tin. I bin luk  to Jiova, ɛn i bin tek tɛm fala ɔl wetin Jiova tɛl am fɔ du.

8. Wetin apin di tɛm we di Izrɛlayt dɛn bin de nia di bɔda fɔ go na di land we Gɔd bin dɔn prɔmis dɛn?

8 Leta, wetin bin apin afta lɛk 40 ia? I bin dɔn lɛf smɔl fɔ lɛ di Izrɛlayt dɛn rich di say usay dɛn bin de go. Dɛn bin rich na wan ples nia Kedɛsh, we de nia di bɔda fɔ go na di land we Gɔd bin dɔn prɔmis dɛn. Dɛn bin de kɔl dis ples bak Mɛriba. * (Luk di futnot.) Wetin mek? Na bikɔs di Izrɛlayt dɛn bin de grɔmbul se wata nɔ de. (Di Nɔmba Dɛm 20:​1-5) Bɔt dis tɛm, Mozis bin mek siriɔs mistek.

9. Wetin Jiova bin tɛl Mozis fɔ du? Wetin Mozis bin du? (Luk di pikchɔ nia dis atikul in taytul.)

9 Wetin Mozis bin du we di pipul dɛn bin mek trangayes? I bin luk bak to Jiova fɔ dayrɛkt am. Bɔt dis tɛm Jiova nɔ tɛl Mozis fɔ nak di rɔk. I bin tɛl am fɔ tek in stik, kɔl di pipul dɛn nia di rɔk, ɛn tɔk to di rɔk. (Di Nɔmba Dɛm 20:​6-8) Yu tink se Mozis bin du wetin Jiova tɛl am? Nɔ, i nɔ bin du dat. Mozis bin rili fil bad ɛn vɛks, dat bin mek i ala pan di pipul dɛn. “I kɔl dɛn rebɛl ɛn aks dɛn if in ɔ in brɔda fɔ [mek] lɛ wata kɔmɔt na di big ston fɔ dɛn.” Dɔn i nak di rɔk, nɔto wantɛm bɔt tu tɛm.—Di Nɔmba Dɛm 20:​10, 11.

Mozis nɔ bin fala di nyu tin dɛn we Jiova bin tɛl am fɔ du

10. Aw Jiova bin fil we Mozis nɔ bin du wetin i tɛl am?

10 Jiova bin rili vɛks pan Mozis. (Ditarɔnɔmi 1:​37; 3:​26) Wetin mek Jiova bin du dat? Wan rizin na dat Mozis nɔ bin fala di nyu tin dɛn we Jiova bin tɛl am fɔ du.

11. We Mozis bin nak di rɔk, aw dat bin mek di Izrɛlayt dɛn nɔ no se na Jiova bin pafɔm mirekul?

11 Bɔt sɔntɛm ɔda rizin bin de bak we mek Jiova bin vɛks. Di big rɔk dɛn we bin de na di fɔs Mɛriba na ayɛnston dɛn. Ilɛk aw pɔsin nak ayɛnston at at wan, nɔbɔdi nɔ go tink se wata go kɔmɔt de. Bɔt di rɔk dɛn na di sɛkɔn Mɛriba bin rili difrɛn. Bɔku pan dɛn rɔk dɛn de na wan kayn rɔk we dɛn kɔl lyamston. Bikɔs lyamston na wan kayn ston we sɔft, dat kin mek bɔku tɛm wata kin dren go insay ɛn i kin gɛda wata ɔnda grɔn. Dɔn pipul dɛn kin gɛt wata bay we dɛn mek ol pan di rɔk. So we Mozis bin nak di rɔk ɛn nɔ tɔk to di rɔk, yu nɔ tink se di Izrɛlayt dɛn bin de tink se na kɔmɔn tin fɔ lɛ wata kɔmɔt pan rɔk ɛn nɔto Jiova bin pafɔm mirekul? * (Luk di futnot.) Wɛl, wi nɔ go se na so i bi.

 MOZIS NƆ BIN DU WETIN JIOVA TƐL AM FƆ DU

12. Us ɔda rizin bin de we mek Jiova bin vɛks pan Mozis ɛn Erɔn?

12 Ɔda rizin go stil de we mek Jiova bin rili vɛks pan Mozis ɛn Erɔn. Mozis bin “aks dɛn if in ɔ in brɔda fɔ [mek] lɛ wata kɔmɔt na di big ston fɔ dɛn”? We Mozis bin tɔk se “wi,” i go bi se i bin de tɔk bɔt in ɛn Erɔn. Di tin we Mozis bin tɔk nɔ bin sho ɛni rɛspɛkt fɔ Jiova bikɔs i nɔ bin gi Jiova ɔl di prez fɔ di mirekul. Sam 106:​32, 33 tɔk se: “We dɛn rich Mɛriba brij bak, dɛn mek PAPA GƆD vɛks, ɛn na dat mek Mozis gɛt in yon waala; dɛn barɔf sɔm kayn barɔf, we mek Mozis vɛks ɛn tɔk wetin i nɔ fɔ tɔk.” * (Luk di futnot.) (Di Nɔmba Dɛm 27:​14) Mozis nɔ bin gi Jiova di ɔnɔ we I fit fɔ get. Jiova bin tɛl Mozis ɛn Erɔn se: “Una ɔltu nɔ du wetin a tɛl una fɔ du.” (Di Nɔmba Dɛm 20:​24) Dat na bin siriɔs sin!

13. Wetin mek na di rayt tin Jiova bin du we i pɔnish Mozis?

13 Jiova bin no se Mozis ɛn Erɔn fɔ no mɔ bikɔs na dɛn bin de lid In pipul dɛn. (Lyuk 12:​48) Bifo dis tɛm, Jiova nɔ bin alaw wan ol gɛnareshɔn pan di Izrɛlayt dɛn fɔ go na di land we i bin dɔn prɔmis dɛn bikɔs dɛn bin tɔn agens am. (Di Nɔmba Dɛm 14:​26-30, 34) So na di rayt tin Jiova bin du we i bin pɔnish Mozis di sem we bikɔs i nɔ bin du wetin i tɛl am fɔ du. Ɛn jɔs lɛk di ɔda pipul dɛn we bin kɔmɔt biɛn Gɔd, Jiova nɔ bin alaw Mozis fɔ go na di land we i bin dɔn prɔmis dɛn.

WETIN BIN KƆZ DI PRƆBLƐM?

14, 15. Wetin mek Mozis nɔ bin du wetin Jiova tɛl am fɔ du?

14 Wetin mek Mozis nɔ bin du wetin Jiova tɛl am fɔ du? Notis bak wetin Sam 106:​32, 33 tɔk we i se: “We dɛn rich Mɛriba brij bak, dɛn mek PAPA GƆD vɛks, ɛn na dat mek Mozis gɛt in yon waala; dɛn barɔf sɔm kayn barɔf, we mek Mozis vɛks ɛn tɔk wetin i nɔ fɔ tɔk.” Pan ɔl we na Jiova di Izrɛlayt dɛn bin tɔn dɛn bak pan, na Mozis bin vɛks. Mozis nɔ bin kɔntrol insɛf ɛn i nɔ bin tink bɔt wetin go apin bifo i tɔk.

15 Mozis bin stɔp fɔ luk to Jiova bikɔs i bin alaw di tin we di pipul dɛn du fɔ pul in maynd pan di tin dɛn we Jiova tɛl am fɔ du. Di fɔstɛm we di pipul dɛn bin grɔmbul bɔt wata, Mozis bin du di rayt tin. (Ɛksodɔs 7:​6) Bɔt sɔntɛm Mozis bin taya ɛn in at bin pwɛl bad bikɔs di Izrɛlayt dɛn bin dɔn de mek trangayes fɔ lɔng tɛm. I go bi se bifo Mozis tink bɔt aw i go prez Jiova, i bin jɔs de tink bɔt aw i bin de fil nɔmɔ.

Wi fɔ kɔntinyu fɔ luk to Jiova ɛn obe am ɔltɛm

16. Wetin mek wi fɔ tink bɔt wetin Mozis bin du?

16 If fetful prɔfɛt lɛk Mozis bin pul in maynd pan di tin dɛn we Jiova bin tɛl am fɔ du ɛn sin, di sem tin kin apin to wi bak. I bin dɔn lɛf smɔl fɔ lɛ Mozis  rich na di land we Gɔd bin dɔn prɔmis dɛn, ɛn wisɛf nɔ de fa igen fɔ mek wi ɛnta di nyu wɔl. (Pita In Sɛkɛn Lɛta 3:​13) Wi rili nɔ want fɔ lɔs dis wɔndaful chans. Bɔt fɔ ɛnta na di nyu wɔl, wi fɔ kɔntinyu fɔ luk to Jiova ɛn obe am ɔltɛm. (Jɔn In Fɔs Lɛta 2:​17) Us lɛsin wi lan frɔm di mistek we Mozis bin mek?

NƆ ALAW WETIN ƆDA PIPUL DƐN DE DU FƆ MEK YU NƆ DU WETIN JIOVA DE TƐL YU

17. Aw wi go avɔyd fɔ de vɛks we wi at pwɛl?

17 Nɔ vɛks we yu at pwɛl. Sɔntɛnde wi kin gɛt di sem prɔblɛm dɛn ɔltɛm. Bɔt di Baybul tɔk se: “Una lɛ wi nɔ taya fɔ du gud, if wi nɔ taya fɔ du gud, di tɛm go kam we wi go gɛt di pe.” (Lɛta Fɔ Galeshya 6:​9; Fɔs Lɛta Fɔ Tɛsalonayka 3:​13) We sɔntin ɔ sɔmbɔdi de du tin ɔltɛm we de mek wi at pwɛl, wi de tink bifo wi tɔk? Wi de kɔntrol wisɛf ɛn nɔ vɛks pasmak? (Prɔvabs 10:​19; 17:​27; Matyu 5:​22) We ɔda pɔsin du tin we go mek wi vɛks, wi nid fɔ lan fɔ “alaw Gɔd fɔ fɛt fɔ” wi, ɔ alaw Jiova fɔ sho se i vɛks fɔ wetin dɛn du to wi. (Rid Lɛta fɔ Rom 12:​17-21, NW.) Wetin dat min? Bifo wi vɛks, i fayn fɔ peshɛnt ɛn wet fɔ Jiova fɔ du sɔntin bɔt wi prɔblɛm di tɛm we i tink se i fɔ  du am. If wi tray fɔ tɔn-dɛt fɔ wisɛf ɛn nɔ luk to Jiova, wi go sho se wi nɔ gɛt wan rɛspɛkt fɔ am.

18. Wetin wi fɔ mɛmba we wi de fala di tin dɛn we Jiova de tɛl wi fɔ du?

18 Tek tɛm fala di nyu tin dɛn we dɛn tɛl yu fɔ du. Wi de fala fetful wan di nyu tin dɛn we Jiova de tɛl wi fɔ du? Wi nɔ fɔ kɔntinyu fɔ de du tin di we aw wi bin dɔn de du am trade jɔs bikɔs na so wi dɔn yus fɔ du. Bifo dat, wi fɔ kwik fɔ fala ɛni nyu tin we Jiova de yuz in ɔganayzeshɔn fɔ tɛl wi. (Di Ibru Pipul Dɛn 13:​17) Dɔn, wi fɔ tek tɛm “fala dɛn tin we rayt nɔmɔ,” ɛn wi “nɔ fɔ du ɛni ɔda tin.” (Fɔs Lɛta Fɔ Kɔrint 4:​6) We wi tek tɛm fala di tin dɛn we Jiova de tɛl wi, wi go kɔntinyu fɔ luk to am.

Us lɛsin wi lan frɔm di tin we Mozis bin du we ɔda pipul dɛn mek mistek? (Luk na paregraf 19)

19. Aw wi go avɔyd di mistek we ɔda pipul dɛn de du fɔ pwɛl wi padi biznɛs wit Jiova?

19 Nɔ alaw ɔda pipul dɛn mistek fɔ pwɛl yu padi biznɛs wit Jiova. If wi kɔntinyu fɔ luk to Jiova, wi nɔ go pwɛl wi padi biznɛs wit am ɔ vɛks we ɔda pipul dɛn du wi sɔntin. Dis rili impɔtant mɔ if wi gɛt wok lɛk Mozis insay Gɔd in ɔganayzeshɔn. Wi ɔl nid fɔ wok tranga wan ɛn obe Jiova so dat wi go sev. (Lɛta Fɔ Filipay 2:​12) Bɔt di mɔ wok we wi gɛt, na di mɔ Jiova want wi fɔ du di rayt tin. (Lyuk 12:​48) If wi rili lɛk Jiova, natin nɔ go mek wi pwɛl wi padi biznɛs wit am ɔ mek i stɔp fɔ lɛk wi.—Sam 119:​165; Lɛta Fɔ Rom 8:​37-39.

20. Wetin wi fɔ mekɔp wi maynd fɔ du?

20 Wi de insay di tɛm we tin rili tranga. So i rili impɔtant fɔ lɛ wi kɔntinyu fɔ luk to Jiova we na di Gɔd “we sidɔm na ɛvin,” so dat wi go ɔndastand wetin i want wi fɔ du. Wi nɔ fɔ ɛva alaw di tin dɛn we ɔda pipul dɛn de du fɔ pwɛl wi padi biznɛs wit Jiova. Di tin we bin apin to Mozis rili tich wi impɔtant lɛsin. Bifo wi vɛks pasmak we ɔda pipul dɛn mek mistek, lɛ wi tray tranga wan fɔ “de luk ɔp to PAPA GƆD [“Jiova,” NW], te i av masi pan wi.”—Sam 123:​1, 2.

^ par. 8 Dis Mɛriba bin difrɛn frɔm di Mɛriba we bin de nia Rɛfidim we dɛn bin kɔl bak Masa. Bɔt dɛn bin kɔl dɛn tu say dɛn ya Mɛriba bikɔs na de di Izrɛlayt dɛn bin de we dɛn bin de grɔmbul, ɔ kɔmplen.—Luk sɛkshɔn 7 na di Buk we Go Ɛp Yu fɔ Stɔdi Gɔd in Wɔd.

^ par. 11 Wan masta sabi bukman we stɔdi bɔt Baybul bin tɔk se akɔdin to wan Ju tradishɔn, di trangayes pipul dɛn bin tɔk se nɔto mirekul bikɔs Mozis bin no se da rɔk de gɛt wata. So dɛn bin want am fɔ du di mirekul bak pan ɔda rɔk. Bɔt dis na bin jɔs tradishɔn.

^ par. 12 Luk di atikul we gɛt di taytul “Questions From Readers” we de na di Ɔktoba 15, 1987, Wachtawa.