Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | WETIN MEK WI FƆ ƆNƐS?

Yu Tink se fɔ Bi Ɔnɛs, Dɔn Kɔmɔt na Stayl?

Yu Tink se fɔ Bi Ɔnɛs, Dɔn Kɔmɔt na Stayl?

Itoshi bin de wok na wan kɔmni na Jepan we de ɛp pipul dɛn fɔ gɛt wok. We in ɛn in bɔs bin de chɛk di ripɔt we de sho di mɔni we di kɔmni dɔn spɛn ɛn ɔmɔs mɔni dɛn dɔn gɛt, in bɔs tɛl am se i fɔ dɔn mek lay lay ripɔt. Itoshi ɛksplen se in kɔnshɛns nɔ go alaw am fɔ du dis kayn wok. Fɔseka dat, in bɔs trɛtin am se i go sak am ɛn as tɛm de go, i bin gɛt fɔ lɔs in wok.

Afta sɔm mɔnt, Itoshi in at bin pwɛl fɔseka in wok biznɛs. Fɔ ɛgzampul, wan tɛm we dɛn bin de intavyu am fɔ wok, i bin tɔk se i nɔ go du ɛni kruk wok. Di wan we bin de intavyu am tɔk se, “Di we aw yu de tink rili difrɛn!” Itoshi in famili ɛn in padi dɛn bin ɛnkɔrej am fɔ tinap tranga wan fɔ du wetin rayt, bɔt stil i bigin gɛt sɔm dawt. Fɔ ɛgzampul, Itoshi bin se, “A bin de wɔnda if i mek sɛns fɔ lɛ a de tɔk se a nɔ go du ɛnitin we na kruk fɔseka wetin a biliv.”

Dis tin we apin to Itoshi de mɛmba wi se nɔto ɔlman valyu pɔsin we ɔnɛs. Infakt, sɔm pipul dɛn kin fil se dɛn kayn pipul ya go briŋ kam prɔblɛm, mɔ di wan dɛn we de du biznɛs. Wan uman we de wok na Sawt Afrika tɔk se: “Di pipul dɛn we de arawnd mi nɔ ɔnɛs ɛn sɔntɛnde i nɔ kin izi fɔ lɛ a tinap tranga wan.”

Tide wan we we bɔku pipul dɛn de sho se dɛn nɔ ɔnɛs na we dɛn de lay. Trade, wan masta sabi bukman we nem Rɔbɔt S. Filman na di University of Massachusetts Amherst bin du wan stɔdi. Insay da stɔdi de, i kam fɔ no se we yu kɔnt 100 big pipul dɛn, 60 pan dɛn kin lay wan tɛm we dɛn de tɔk insay tɛn minit. Filman bin se: “Dis tin we a kam fɔ no bin rili sɔprayz mi. Wi nɔ bin de fil se pipul dɛn go de lay so ɛvride.” Bɔku pipul dɛn nɔ lɛk we pɔsin de lay to dɛn, bɔt pan ɔl dat, plɛnti pipul dɛn stil de lay.

Tide wetin mek bɔku pipul dɛn de lay, tif, ɛn du ɔda tin dɛn we nɔ fayn? We pipul dɛn nɔ ɔnɛs, aw dat de ambɔg di wan ol wɔl? Ɛn di kwɛstyɔn we impɔtant mɔ na wetin go ɛp wi fɔ avɔyd dɛn tin ya we nɔ fayn?