Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ

We Pɔsin we Wi Lɛk Day

We Pɔsin we Wi Lɛk Day

“Nɔ . . .  kray, bebi. . .  Gɔd no wetin bɛst.”

Dɛn tɔk dɛn wɔd ya na wan uman in yes we nem Bibi. I bin de na in papa in bɛrin. In papa bin day pan motoka aksidɛnt.

Bibi bin dɔn rili yus to in papa. Di pɔsin we bin tɔk na Bibi in yes na padi to di famili ɛn i nɔ bin min bad, bɔt wetin i tɛl Bibi nɔ bin kɔrej am, bifo dat, i mek in at pwɛl mɔ ɛn mɔ. Bibi bin de tɔk to insɛf se: “Mi papa in day nɔto di bɛst tin.” Afta lɔng tɛm dɔn pas, Bibi bin ɛksplen bɔt wetin apin to am, insay wan buk. Di tin dɛn we i rayt bin sho klia wan se in at stil pwɛl.

Bibi kam fɔ si se i kin tek lɔng tɛm fɔ lɛ pɔsin bia di pen we in pɔsin day, mɔ if di pɔsin we day na pɔsin we i rili yus to. Di Baybul se day na “di las ɛnimi.” (Fɔs Lɛta Fɔ Kɔrint 15:​26, NW) We day kin kam, wi nɔn nɔ kin ebul fɔ stɔp am. I kin kam di tɛm we wi nɔ rɛdi, ɛn kɛr di wan dɛn we wi rili lɛk. Wi nɔn nɔ ebul fɔ stɔp di prɔblɛm dɛn we day kin kam wit. So wi nɔ go sɔprayz if wi kɔnfyus ɔ wi nɔ no wetin fɔ du, we wi de tray fɔ bia di pen we wi kin fil we pɔsin we wi lɛk day.

Sɔntɛm yu go dɔn wɔnda ɛn aks se: ‘Aw lɔng i go tek fɔ lɛ a bia di pwɛl at? Aw sɔmbɔdi go ebul bia we in pɔsin we i lɛk day? Aw a go kɔrej sɔmbɔdi we in pɔsin day? Ɛni op de fɔ di wan dɛn we wi lɛk we dɔn day?’