Go dayrɛkt to di men tin

Go dayrɛkt to di say we di difrɛn difrɛn atikul dɛn de

 LIV YU LAYF LƐK KRISTIAN

Aw Wi Go Ebul fɔ Lɛk Gɔd ɛn Wi Neba Dɛn?

Aw Wi Go Ebul fɔ Lɛk Gɔd ɛn Wi Neba Dɛn?

Pan ɔl we Kristian dɛn nɔ de ɔnda di Lɔ we Gɔd bin gi Mozis, di tu lɔ dɛn we pas ɔl di ɔda lɔ dɛn; we na fɔ lɛk Gɔd ɛn wi nɛba, tɔk bɔt di men tin we Gɔd want wi fɔ du. (Mat 22:​37-39) Dɛn nɔ de bɔn wi wit da kayn lɔv de. Na tray wi de tray fɔ gɛt am. Aw? Wan impɔtant we fɔ gɛt da lɔv de, na we wi de rid di Baybul ɛvride. We wi tink bɔt di difrɛn kwaliti dɛn we Gɔd gɛt we di Baybul tɔk bɔt, wi go “ɛnjɔy [Jiova] in gudnɛs.” (Sam 27:​4) Dat go mek wi de lɛk am mɔ ɛn mɔ ɛn wi go bigin tink lɛk am. Dis go mek wi obe Gɔd in lɔ dɛn, ivin di lɔ we se wi fɔ sho se wi lɛk ɔda pipul dɛn pas aw wi lɛk wisɛf. (Jɔn 13:​34, 35; 1Jɔ 5:​3) Luk tri we dɛn we go mek yu ɛnjɔy fɔ rid di Baybul mɔ:

  • Yuz yu maynd, yu yay, yu yes, ɛn tray fɔ imajin wetin bin apin. Imajin se yu de de. Wetin yu bin fɔ si, yɛri, ɛn smɛl? Aw yu tink se di wan dɛn we bin de de bin de fil?

  • Yuz difrɛn we dɛn. Luk sɔm we dɛn we go ɛp: Yu kin rid lawd wan, ɔ fala frɔm yu Baybul we yu de lisin to odio rɛkɔdin. Bifo yu jɔs rid di chapta dɛn lɛk aw dɛn de, yu kin rid bɔt wan tɔpik ɔ wan pɔsin we dɛn tɔk bɔt na di Baybul. Fɔ ɛgzampul, yu kin yuz Apɛndiks A7 ɔ B12 na di New World Translation of the Holy Scriptures fɔ rid bɔt Jizɔs. Rid di wan ol chapta we di deli tɛks kɔmɔt frɔm. Rid di Baybul buk dɛn lɛk aw dɛn rayt dɛn.

  • Rid fɔ ɔndastand. I bɛtɛ fɔ rid, ɔndastand, ɛn tink gud wan bɔt wan chapta ɛvride pas we yu de rid bɔku chapta dɛn bikɔs yu want fɔ rid di Baybul dɔn. Tink bɔt di say we i apin. Stɔdi gud wan bɔt di tin dɛn we bin apin. Yuz di map ɛn di majinal refrɛns dɛn. Tray fɔ no mɔ bɔt wan tin we yu nɔ ɔndastand. If yu ebul, na fɔ yuz di sem tɛm we yu de yuz fɔ rid fɔ tink gud wan bɔt wetin yu dɔn rid.