Go dayrɛkt to di men tin

Go dayrɛkt to di say we di difrɛn difrɛn atikul dɛn de

 LƐSIN 23

Aw Wi De Rayt ɛn Translet Wi Buk Dɛn?

Aw Wi De Rayt ɛn Translet Wi Buk Dɛn?

Raytin Dipatmɛnt we de na Amɛrika

Sawt Koria

Amenia

Burundi

Sri Lanka

Fɔ lɛ wi prich di “Gud Nyuz” to pipul dɛn insay dɛn langwej, wi kin mek buk dɛn na lɛk 750 langwej dɛn so. (Rɛvɛleshɔn 14:6) Dis wok nɔ izi. Bɔt wetin mek wi ebul du am? Wi ebul du am bikɔs wi gɛt pipul dɛn na difrɛn difrɛn kɔntri dɛn we de rayt fɔ wi. Wi gɛt transletɔ dɛn we de wok tranga wan wit ɔl dɛn at. Ɔl di wan dɛn we de rayt ɛn di wan dɛn we de translet fɔ wi na Jiova Witnɛs dɛn.

Wi kin rayt am fɔs insay Inglish. Na di Gɔvnin Bɔdi de oba di wok we di Raytin Dipatmɛnt de du na wi ɛdkwata. Di Raytin Dipatmɛnt kin tɔk wit ɔl di wan dɛn we de rayt fɔ wi ɛn sho dɛn wetin fɔ rayt bɔt. Sɔm pan dɛn pipul ya de na di ɛdkwata ɛn ɔda branch dɛn. Di pipul dɛn we de rayt fɔ wi kɔmɔt na difrɛn difrɛn kɔntri dɛn. Na dat mek wi ebul fɔ rayt bɔt difrɛn tin dɛn. Ɛn na dis mek bɔku pipul dɛn lɛk fɔ rid wi buk dɛn.

Wi kin sɛn am to transletɔ dɛn. We di brɔda dɛn dɔn si se wetin dɛn dɔn rayt, fayn, dɛn kin sɛn am to di transletɔ dɛn we de na difrɛn difrɛn say dɛn na di wɔl. Na dɛn kin translet, chɛk wetin dɛn dɔn translet, ɛn rid am fɔ si if i kɔrɛkt. Dɛn kin fɛn di rayt wɔd dɛn we fɔ yuz so dat dɛn go ebul translet kɔrɛkt wan wetin de insay Inglish na dɛn langwej.—Ɛkliziastis 12:10.

Wi kin yuz kɔmpyuta fɔ du di wok kwik kwik wan. Na tru se kɔmpyuta nɔ go ebul fɔ du di kayn wok we di rayta dɛn ɛn di transletɔ dɛn de du. Bɔt kɔmpyuta kin ɛp dɛn fɔ du dɛn wok kwik kwik wan. Dɛn kin yuz di dikshɔnari dɛn we de insay di kɔmpyuta ɛn bɔku ɔda kɔmpyuta program dɛn fɔ du dɛn wok. Jiova Witnɛs dɛn dɔn mek wan program we dɛn kɔl MEPS, we min Multilanguage Electronic Publishing System. Dis program de arenj di tin dɛn we dɛn dɔn translet so dat dɛn go print dɛn.

Sɔm langwej dɛn de we di pipul dɛn we de tɔk am nɔ plɛnti. Bɔt wi de translet insay dɛn langwej ya. Wetin mek wi de du dis? Wi de du dis bikɔs Jiova “want mek ɔlman sev ɛn mek dɛn no wetin tru.”—Fɔs Lɛta To Timoti 2:3, 4.

  • Aw wi kin rayt wi buk dɛn?

  • Wetin mek wi de translet wi buk dɛn insay bɔku langwej dɛn?