Go dayrɛkt to di men tin

Go dayrɛkt to di say we di difrɛn difrɛn atikul dɛn de

 LƐSIN 13

Timoti Bin Want fɔ Ɛp Pipul Dɛn

Timoti Bin Want fɔ Ɛp Pipul Dɛn

Timoti na bin yɔŋ man we bin lɛk fɔ ɛp pipul dɛn. I bin de go bɔku say dɛn fɔ du dis. Dis bin mek i rili ɛnjɔy in layf. Yu go want fɔ no aw Timoti bin ɛnjɔy in layf?—

Timoti in mama ɛn in grani bin tich am bɔt Jiova

Timoti bin mɛn na wan tɔŋ we dɛn kɔl Listra. We i bin smɔl, in grani we nem Lɔys ɛn in mama we nem Yunis, bin bigin tich am bɔt Jiova. As Timoti de big, i bin want fɔ ɛp pipul dɛn fɔ lan bɔt Jiova.

We Timoti na bin yɔŋ man, Pɔl bin aks am fɔ mek dɛn ɔl tu go prich na ɔdasay dɛn. Yu tink se Timoti bin gri fɔ go? Yɛs, i bin gri fɔ go. I bin rɛdi fɔ go ɛp pipul dɛn.

 Timoti bin go wit Pɔl na wan tɔŋ na Masidonia we dɛn kɔl Tɛsalonayka. Fɔ go na dis tɔŋ, dɛn bin gɛt fɔ waka fɔ lɔng tɛm, dɔn dɛn tek bot. We dɛn rich de, dɛn bin ɛp bɔku pipul dɛn fɔ lan bɔt Jiova. Bɔt sɔm pipul dɛn bin vɛks ɛn bin ivin tray fɔ du bad tin to dɛn. So Pɔl ɛn Timoti bin kɔmɔt de ɛn go prich na ɔda ples dɛn.

Timoti bin gladi ɛn i bin rili ɛnjɔy in layf

Afta sɔm tɛm, Pɔl bin tɛl Timoti se mek i go bak na Tɛsalonayka fɔ go si aw di brɔda dɛn de du. Timoti bin mek maynd fɔ go bak na da bad tɔŋ de bikɔs i bin wɔri bɔt di brɔda dɛn we bin de de. We i kɔmɔt de, i kam bak to Pɔl fɔ tɛl am di gud tin dɛn we di brɔda dɛn de du.

Timoti ɛn Pɔl bin prich togɛda fɔ lɔng tɛm. Wan tɛm Pɔl bin rayt se na Timoti na di bɛst pɔsin we i go ebul sɛn fɔ ɛp di kɔngrigeshɔn dɛn. Timoti bin lɛk Jiova, ɛn i bin lɛk pipul dɛn.

Yu lɛk pipul dɛn ɛn want fɔ ɛp dɛn fɔ lan bɔt Jiova?— If yu ansa na yɛs, yu go gladi, ɛn yu go ɛnjɔy yu layf jɔs lɛk Timoti.