Go dayrɛkt to di men tin

Go dayrɛkt to di say we di difrɛn difrɛn atikul dɛn de

 LƐSIN 5

Samiɛl Bin Kɔntinyu fɔ Du Wetin Rayt

Samiɛl Bin Kɔntinyu fɔ Du Wetin Rayt

Frɔm we Samiɛl bin smɔl, i bin de liv ɛn wok na Jiova in Os. Yu no aw Samiɛl go de na Gɔd in Os? Bifo wi tɔk bɔt dat, lɛ wi tɔk bɔt in mama we nem Ana.

I bin dɔn te we Ana want pikin, bɔt i nɔ bin ebul bɔn. So i bin de pre to Jiova ɛn beg am fɔ mek i ɛp am. I bin prɔmis Jiova se if i bɔn bɔy pikin, i go sɛn am fɔ go de ɛn wok na In Os. Jiova bin ansa in prea, ɛn i bin bɔn bɔy pikin. I gi di pikin nem Samiɛl. So we Samiɛl bin ol lɛk tri ɔ 4 ia so, Ana bin kɛr am go na Gɔd in Os fɔ mek i go sav Gɔd de, jɔs lɛk aw i bin dɔn prɔmis.

Ilay na bin di ay prist na Gɔd in Os. In tu bɔy pikin dɛn sɛf bin de wok de. Mɛmba se, Gɔd in Os na di say we pipul dɛn bin de wɔship Gɔd, ɛn pipul dɛn fɔ du gud tin dɛn de. Bɔt Ilay in pikin dɛn bin de du bad bad tin dɛn. Samiɛl bin de si wetin dɛn de du. Yu tink se Samiɛl bin de du bad tin dɛn lɛk aw Ilay in pikin dɛn bin de du?— Nɔ, i bin kɔntinyu fɔ du wetin rayt, jɔs lɛk aw in mama ɛn papa bin dɔn tich am.

Wetin yu tink se Ilay bin fɔ dɔn du to in tu bɔy pikin dɛn?— I bin fɔ dɔn pɔnish. I nɔ bin fɔ dɔn alaw dɛn fɔ wok na Gɔd in Os. Bɔt Ilay nɔ bin du dat. So dis bin mek Jiova vɛks pan in ɛn in tu bɔy pikin dɛn. Jiova bin disayd se i go pɔnish dɛn.

Samiɛl bin tɛl Ilay Jiova in mɛsej

Wan nɛt we Samiɛl bin de slip, i yɛri sɔmbɔdi de kɔl am. Di pɔsin se: ‘Samiɛl!’ Samiɛl rɔn go to Ilay, bɔt Ilay tɛl am se: ‘A nɔ kɔl yu o!’ Dis bin apin tu tɛm bak. Afta i apin di tɔd tɛm, Ilay tɛl Samiɛl se if i yɛri di vɔys igen, lɛ i tɔk se: ‘Duya Jiova, tɔk, a de lisin.’ So na dat Samiɛl bin du. Jiova tɛl Samiɛl se: ‘Tɛl Ilay se a gɛt fɔ kam pɔnish in ɛn in famili fɔ di bad tin dɛn we dɛn dɔn du.’  Yu tink se i bin izi fɔ mek Samiɛl tɛl Ilay dis mɛsej?— Nɔ, i nɔ bin izi. Bɔt pan ɔl we Samiɛl bin de fred, i bin du wetin Jiova bin tɛl am fɔ du. Wetin Jiova bin tɔk, bin apin. Dɛn bin kil Ilay in tu bɔy pikin dɛn, ɛn Ilay insɛf bin day.

Samiɛl na fayn ɛgzampul fɔ wi. I bin de du wetin rayt pan ɔl we i bin de si ɔda pipul dɛn de du wetin bad. We yu, yu go tan lɛk Samiɛl we bin kɔntinyu fɔ du wetin rayt? If yu du dat, yu go mek Jiova ɛn yu mama ɛn papa gladi.

RID DƐN SKRIPCHƆ YA NA YU BAYBUL