Go dayrɛkt to di men tin

Go dayrɛkt to di say we di difrɛn difrɛn atikul dɛn de

 KWƐSTYƆN 5

Wetin A Go Du if Dɛn De Buli Mi na Skul?

Wetin A Go Du if Dɛn De Buli Mi na Skul?

WETIN MEK DIS KWƐSTYƆN IMPƆTANT?

Na bikɔs di tin we yu go du we dɛn buli yu kin mek tin bɛtɛ ɔ wɔs.

WETIN YU GO DU?

Tink bɔt dis: Tɔmɔs nɔ want fɔ go skul tide, ɛn i nɔ ivin want fɔ go skul tumara. Infakt, i nɔ want fɔ go skul igen igen. I dɔn pas tri mɔnt we dis prɔblɛm bigin. In kɔmpin dɛn na skul bin de go ɛn tɔk lay lay tin dɛn bɔt am. Ɛn dɛn bigin fɔ kɔl am ɔlkayn nem. Sɔntɛnde, sɔmbɔdi go nak Tɔmɔs in tɛks buk dɛn na in an ɛn mek lɛk se na mistek, ɔ wan pɔsin na wan grup we de biɛn am go push am, ɛn te i de tɔn, i nɔ kin no udat du am. Yɛstade, Tɔmɔs in kɔmpin dɛn tray fɔ buli am mɔ we dɛn sɛn wan mesɛj na di Intanɛt fɔ trɛtin am . . .

If yu na bin Tɔmɔs, wetin yu go du?

STƆP ƐN TINK!

I nɔ min se yu nɔ go ebul fɔ du ɛnitin! Fɔ tru, yu go ebul mek pɔsin we de buli yu ɔ tek advantej pan yu lɛf fɔ ambɔg yu pan ɔl we yu nɔ fɛt am. Aw dis go pɔsibul?

  •   NƆ DU NATIN. Di Baybul se: “Fulman kwik fɔ sho in tɛmpa gbangbaode, bɔt udat gɛt sɛns de peshɛnt ɛn kɔntrol insɛf.” (Prɔvabs 29:11) If yu peshɛnt ɛn kɔntrol yusɛf, di wan dɛn we de buli yu go gens.

  • NƆ TƆN AM GI AM BAK. Di Baybul se: “If pɔsin du una bad, una nɔ fɔ tɔn di bad gi am bak.” (Lɛta Fɔ Rom 12:17) If yu disayd fɔ tɔn am gi am bak, yu go jɔs mek tin wɔs.

  • AVƆYD TRƆBUL. Di Baybul se: “Udat gɛt sɛns, nain de si denja i ayd pan am.” (Prɔvabs 22:3) Tray tranga wan fɔ avɔyd pipul dɛn we de kɔz trɔbul ɛn avɔyd say dɛn usay dɛn go buli yu.

  • TRAY FƆ DU SƆNTIN WE DƐN NƆ BIN DE TINK SE YU GO DU. Di Baybul se: “We pɔsin vɛks, if yu tɔk fayn to am, i nɔ go vɛks igen.” (Prɔvabs 15:1) Yu kin ivin tray fɔ mek fɔn. Fɔ ɛgzampul, if pɔsin we want fɔ buli yu tɔk se yu bɔmp pasmak, yu kin tɔk se, “A tink se mi bɔdi go kam dɔŋ!”

  • GO YU YON WE. Wan 19 ia ol titi we nem Nɔra tɔk se: “We yu nɔ tɔk natin, i de sho se yu machɔ ɛn yu strɔng pas di pɔsin we de mɔna yu. I de sho bak se yu ebul fɔ kɔntrol yusɛf ɛn dis na sɔntin we di pɔsin we de buli yu nɔ ebul fɔ du.”—Sɛkɛn Lɛta To Timoti 2:24.

  • TRAY FƆ BILIV YUSƐF MƆ. Di wan dɛn we de buli pipul dɛn kin no di wan dɛn we nɔ de tink di rayt we bɔt dɛnsɛf ɛn we nɔ go du natin we dɛn buli dɛn. Bɔt bɔku pipul dɛn we de buli yu go lɛf fɔ du dat we dɛn si se dɛn nɔ ebul yu.

  • TƐL SƆMBƆDI. Sɔmbɔdi we na bin ticha bin tɔk se: “A de tɛl ɛnibɔdi we dɛn de buli fɔ tɛl pɔsin. Na di rayt tin fɔ du, ɛn i go mek dɛn nɔ buli ɔda pɔsin.”

We yu biliv yusɛf, dat kin mek yu strɔng pas di pɔsin we de buli yu