Go dayrɛkt to di men tin

Go dayrɛkt to di say we di difrɛn difrɛn atikul dɛn de

 KWƐSTYƆN 9

A Fɔ Biliv se Ɔltin Jɔs Kam bay Chans?

A Fɔ Biliv se Ɔltin Jɔs Kam bay Chans?

WETIN MEK DIS KWƐSTYƆN IMPƆTANT?

If na tru se ɔltin jɔs kam bay chans, dat min se layf nɔ gɛt ɛni minin. If na tru se Pɔsin de we mek ɔltin, dat min se wi go ebul fɔ gɛt ansa to kwɛstyɔn dɛn we wi kin aks bɔt wi layf ɛn bɔt tumara bambay.

WETIN YU GO DU?

Tink bɔt dis: Alɛks kɔnfyus. I dɔn te we i biliv se Gɔd de ɛn na In mek ɔltin. Bɔt tide in baɔlɔji ticha de tich se ɔltin jɔs kam bay chans ɛn sayɛnsman dɛn dɔn kam fɔ no se dis na tru. Alɛks nɔ want mek ɔda pipul dɛn fil se in na fulman. I de tɔk na in at se, ‘Afta ɔl, if sayɛnsman dɛn dɔn pruv se ɔltin jɔs kam bay chans, udat na mi fɔ dawt dɛn?’

If yu na bin Alɛks, yu bin fɔ gri se ɔltin jɔs kam bay chans jɔs bikɔs skulbuk dɛn tɔk se na tru?

STƆP ƐN TINK!

Pipul dɛn we biliv se ɔltin jɔs kam bay chans ɛn pipul dɛn we biliv se Pɔsin de we mek ɔltin kin kwik fɔ tɔk wetin dɛn biliv, bɔt dɛn nɔ kin rili no wetin mek dɛn biliv am.

  • Sɔm pipul dɛn biliv se Pɔsin de we mek ɔltin jɔs bikɔs na dat dɛn dɔn tich dɛn na chɔch.

  • Sɔm pipul dɛn biliv se ɔltin jɔs kam bay chans jɔs bikɔs na dat dɛn dɔn tich dɛn na skul.

 SIKS KWƐSTYƆN DƐN WE YU FƆ TINK BƆT

Di Baybul se: “Os nɔ de we nɔto pɔsin bil, bɔt na Gɔd mek ɔltin.” (Di Ibru Pipul Dɛn 3:4) Yu tink se i mek sɛns fɔ biliv dis?

Jɔs lɛk aw i nɔ mek sɛns fɔ tɔk se nɔbɔdi nɔ bil dis os, na so i nɔ mek sɛns fɔ tɔk se Pɔsin nɔ de we mek layf

DƐN SE: Ɔltin na di wan ol wɔl jɔs kam we wan big sɔntin lɛk bɔm skata.

1. Udat ɔ wetin mek dis big sɔntin lɛk bɔm skata?

2. Uswan mek sɛns mɔ, dat ɔltin kɔmɔt frɔm natin ɔ dat ɔltin kɔmɔt frɔm sɔmbɔdi?

DƐN SE: Mɔtalman kɔmɔt frɔm animal.

3. If mɔtalman kɔmɔt frɔm animal, fɔ ɛgzampul, babu, wetin mek big difrɛns de bitwin di sɛns we mɔtalman gɛt ɛn di sɛns we babu gɛt?

4. If na pɔsin we gɛt sɛns mek rɔbɔt we nɔ gɛt layf, wetin wi go se bɔt mɔtalman, yu nɔ tink se na Pɔsin we gɛt sɛns mek am?

DƐN SE: Sayɛnsman dɛn dɔn pruv se ɔltin jɔs kam bay chans.

5. Yu tink se di pɔsin we de tɔk dis insɛf sɛf dɔn si di pruf dɛn?

6. Ɔmɔs pipul dɛn biliv se ɔltin jɔs kam bay chans jɔs bikɔs dɛn tɛl dɛn se ɔl di wan dɛn we gɛt sɛns biliv dat?

“If yu de waka na bush ɛn yu si wan fayn os, fɔ se yu go bigin tink se: ‘Dis i wɔndaful o! Na di tik dɛn go dɔn fɔdɔm fɔdɔm na di rayt ples ɛn mek dis os?’ Dat nɔ mek sɛns atɔl. So, wetin mek wi fɔ biliv se ɔltin na di wɔl jɔs kam bay chans?”—Julia.

“Imajin se sɔmbɔdi tɛl yu se sɔntin apin na wan faktri usay dɛn de print we mek ɔl di ink skata na di wɔl ɛn silin dɛn ɛn dɛn jɔs si raytin dɛn we de insay dikshɔnari we gɛt ɔl di wɔd dɛn we yu de tink bɔt. Yu go biliv dat?”—Gwɛn.

 WETIN MEK YU FƆ BILIV SE GƆD DE?

Di Baybul ɛnkɔrej yu fɔ yuz “yu sɛns.” (Prɔvabs 3:21) Dat min se yu nɔ fɔ biliv se Gɔd de, jɔs fɔ dɛn rizin dɛn ya:

  • AW YU DE FIL (A jɔs fil se pɔsin de we gɛt pawa pas ɔlman)

  • WETIN ƆDA PIPUL DƐN TINK (A de liv na say we pipul dɛn lɛk Gɔd biznɛs)

  • WETIN DƐN TICH YU (Mi mama ɛn papa tich mi fɔ biliv Gɔd, no we nɔ de, a jɔs gɛt fɔ biliv)

Bifo dat, yu fɔ gɛt gud rizin we mek yu biliv.

Tɛriza bin se: “We a bin de na klas de lisin to wetin di ticha de ɛksplen bɔt aw wi bɔdi de wok, a nɔ gɛt wan dawt se Gɔd de. Ɛni pat na di bɔdi gɛt in yon wok we i de du, ivin di smɔl smɔl pat dɛn, ɛn bɔku tɛm, wi nɔ kin ivin no we dɛn de du dɛn wok. Mɔtalman bɔdi rili wɔndaful!”

Richard bin se: “We a kin si dɛn tɔl tɔl bildin dɛn, dɛn ship dɛn we pipul dɛn kin travul wit fɔ ɛnjɔy dɛnsɛf, ɔ motoka, a kin aks misɛf se, ‘Udat mek dis?’ Fɔ ɛgzampul, na pipul dɛn we gɛt sɛns de mek motoka, bikɔs ɔl di smɔl smɔl pat dɛn pan di motoka nid fɔ wok di rayt we fɔ lɛ di motoka wok fayn. So if na pɔsin mek motoka, dat min se mɔtalman bak na pɔsin mek am.”

Antoni bin se: “Di mɔ we a de stɔdi bɔt sayɛns, na di mɔ a nɔ de biliv se ɔltin jɔs kam bay chans.” I bin tɔk bak se, to am, i at fɔ biliv se ɔltin jɔs kam bay chans pas fɔ biliv se Pɔsin de we mek ɔltin.

TINK BƆT DIS

Pan ɔl we i dɔn te we sayɛnsman dɛn de stɔdi, dɛn stil nɔ fɛn we yet fɔ ɛksplen aw ɔltin kam bay chans di we we go mek ɔl sayɛnsman gri se dis na tru. If sayɛnsman dɛn we fɔ no mɔ bɔt dis nɔ gɛt wanwɔd, yu tink se i bad if yu dawt se ɔltin jɔs kam bay chans?