Go dayrɛkt to di men tin

Go dayrɛkt to di say we di difrɛn difrɛn atikul dɛn de

 PAT TRI

We Yu Vɛks—Bikɔs Pɔsin ‘Du Yu Bad’

We Yu Vɛks—Bikɔs Pɔsin ‘Du Yu Bad’

“Wan sista na mi kɔngrigeshɔn lay pan mi se a tif in mɔni. We ɔda pipul dɛn na di kɔngrigeshɔn no bɔt dat, dɛn bigin fɔ sɔpɔt di sista. Afta sɔm tɛm, di sista tɛl mi se i dɔn no naw se nɔto mi tif di mɔni. Pan ɔl we i bin dɔn tɛl mi se i sɔri, a bin tink se a nɔ go ɛva fɔgiv am fɔ wetin i du.”—Linda.

ƐNIBƆDI na di kɔngrigeshɔn dɔn du yu sɔntin we mek yu fil bad lɛk wetin bin apin to Linda? I sɔri fɔ no se sɔm pipul dɛn kin rili fil bad bɔt wetin ɔda pipul dɛn du to dɛn, ɛn dat kin mek dɛn lɛf fɔ go mitin, fil savis, ɛn ivin lɛf fɔ du pasɔnal stɔdi. Dis kayn tin dɔn apin to yu?

Ɛnibɔdi Go Ebul fɔ Stɔp di “Lɛk we Gɔd Lɛk Wi”?

Fɔ tru, i nɔ kin izi fɔ fɔgiv wi kɔmpin Kristian we dɔn du wi bad. Apat frɔm dat, Kristian dɛn fɔ lɛk dɛnsɛf. (Jɔn 13:34, 35) If wi kɔmpin Kristian du wi bad, wi kin pul at pan am ɛn wi kin rili fil bad.—Sam 55:12.

Di Baybul sɛf tɔk se tɛm kin de we wi kɔmpin Kristian dɛn kin “du wi bad.” (Lɛta Fɔ Kɔlɔse 3:13) Pan ɔl dat, we dɛn kayn tin dɛn de apin to wi, i kin at fɔ mek wi bia. Ɛnitin de we go ɛp wi? Lɛ wi tɔk bɔt sɔm advays dɛn na di Baybul:

Wi Papa we de na ɛvin no ɔl wetin de apin. Jiova de si ɔl wetin de apin, ivin we pɔsin trit wi bad ɛn di sɔfa we wi de sɔfa fɔ dat. (Di Ibru Pipul Dɛn 4:13) Apat frɔm dat, Jiova kin fil am we wi de sɔfa. (Ayzaya 63:9) I nɔ de ɛva alaw “trɔbul, traŋa layf,” ɔ ɛnitin, ilɛksɛf na wi kɔmpin Kristian, fɔ stɔp di ‘lɛk we i lɛk wi.’ (Lɛta Fɔ Rom 8:35, 38, 39) So wisɛf nɔ fɔ alaw ɛnibɔdi ɔ ɛnitin fɔ stɔp di lɛk we wi lɛk Jiova.

Fɔ fɔgiv nɔ min se wi nɔ fɔ tɔk we pɔsin du wi bad. We wi fɔgiv di wan dɛn we du wi bad, dat nɔ min se wi de sɔpɔt di pɔsin we du wi bad. Mɛmba se, Jiova nɔ lɛk we pɔsin de sin bɔt i de fɔgiv if gud rizin de fɔ du dat. (Sam 103:12, 13; Abakɔk 1:13) We Jiova de ɛnkɔrej wi fɔ fɔgiv ɔda pipul dɛn, i de tɛl wi se wi fɔ falamakata am. “I nɔ de vɛks sote go.”—Sam 103:9; Matyu 6:14.

We wi fɔgiv, dat go ɛp wi. Aw dat kin ɛp wi? Tink bɔt dis ɛgzampul. Yu tek ston we nɔ gɛt bɛtɛ wet, ol am ɛn stret yu an. Yu nɔ go fil am bɛtɛ if yu ol di ston fɔ shɔt tɛm. Bɔt wetin go apin if yu tray fɔ ol am fɔ lɔng tɛm? Yu tink se yu go ebul fɔ ol am fɔ sɔm minit? Wan awa? Ɔ yu go ebul fɔ ol am fɔ lɔng pas dat? Yu an go mɔs taya! Di ston in wet nɔ chenj. Bɔt di mɔ yu ol am, na di mɔ yu go fil di wet. Na di sem tin kin apin if wi nɔ fɔgiv. If wi kip grɔj na wi at fɔ lɔng tɛm, ilɛk na fɔ smɔl tin, na di mɔ i go de mɔna wi. Na dat mek Jiova de ɛnkɔrej wi fɔ fɔgiv. Fɔ tru, we wi fɔgiv, dat go ɛp wi.—Prɔvabs 11:17.

We wi fɔgiv, dat go ɛp wi

“A Fil lɛk se Na Jiova Insɛf Bin De Tɔk to Mi”

Wetin bin ɛp Linda fɔ fɔgiv in kɔmpin Kristian we nɔ bin trit am fayn? I bin tink gud wan bɔt di rizin dɛn we de na di Baybul we mek i fɔ fɔgiv. (Sam 130:3, 4) Di tin we bin ɛp Linda mɔ, na we i mɛmba se if wi fɔgiv ɔda pɔsin, Jiova sɛf go fɔgiv wi. (Lɛta Fɔ Ɛfisɔs 4:32–5:2) We Linda mɛmba dɛn wɔd dɛn de, dat bin mek i tɔk se: “A fil lɛk se na Jiova insɛf bin de tɔk to mi.”

As tɛm de go, Linda bin ebul fɔ fɔgiv di sista, ɛn naw dɛn ɔl tu na tayt padi. Linda dɔn kɔntinyu fɔ sav Jiova. Mɛmba se na di sem we Jiova want fɔ ɛp yu.