Go dayrɛkt to di men tin

Go dayrɛkt to di say we di difrɛn difrɛn atikul dɛn de

 PAT 4

We Yu Fil Bad bɔt Yusɛf—“Was Mi Sin Kɔmɔt pan Mi”

We Yu Fil Bad bɔt Yusɛf—“Was Mi Sin Kɔmɔt pan Mi”

“Di nyu wok we a gɛt bin de mek a gɛt bɔku mɔni, bɔt i bin de mek a du bɔku tin dɛn we Kristian dɛn nɔ fɔ du. A bin bigin fɔ sɛlibret ɔlide dɛn, put an pan pɔlitiks, ɛn ivin go na chɔch. A bin lɛf fɔ sav Jiova fɔ 40 ia. As tɛm de go, a bigin fil se Jiova nɔ go fɔgiv mi. A fil se a nɔ go ebul fɔ fɔgiv misɛf. Afta ɔl di tin dɛn we a bin dɔn lan na di trut, a stil kɔmɔt na di ɔganayzeshɔn.”—Mata.

WE PƆSIN du bad ɛn bigin fil bad bɔt insɛf, i kin tan lɛk ebi ebi lod. Kiŋ Devid bin rayt se: “Mi sin dɛn so bɔku, dɛn tu ebi fɔ mi.” (Sam 38:4) Sɔm Kristian dɛn de wɔri tumɔs bikɔs dɛn de fil bad bɔt dɛnsɛf ɛn dɛn ivin biliv se Jiova nɔ go ɛva fɔgiv dɛn. (Sɛkɛn Lɛta Fɔ Kɔrint 2:7) Yu tink se dat na tru? Ilɛksɛf na bad bad tin yu du, yu tink se yu dɔn de fa frɔm Jiova fɔ mek i fɔgiv yu? Nɔ, nɔto so i bi!

“Una Kam Lɛ Wi Tɔk di Kes we De Bitwin Mi ɛn Una”

Jiova nɔ de lɛf di wan dɛn we de ripɛnt we dɛn du bad. I kin ivin tray fɔ ɛp dɛn! Insay di parebul bɔt di pikin we west in papa in prɔpati, Jizɔs bin kɔmpia Jiova to papa we lɛk in pikin pan ɔl we di pikin lɛf di famili ɛn go liv bad layf. Afta sɔm tɛm, di pikin disayd fɔ kam bak na os. Di Baybul se: “I bin stil de fawe wɛn in papa si am. In papa sɔri fɔ am, so i rɔn go mit am, i grip am ɛn kis am.” (Lyuk 15:11-20) Yu want fɔ go nia Jiova bɔt yu de fil se yu “stil de fawe” frɔm am? Lɛk di papa we de na di parebul we Jizɔs bin pul, Jiova de rili sɔri fɔ yu. Jiova go rili gladi fɔ if yu kam bak.

Wetin go apin if yu fil se di tin we yu du rili bad ɔ dɛn rili bɔku fɔ mek Jiova fɔgiv yu? Duya tink bɔt wetin Jiova se na Ayzaya 1:18 (NW). I bin tɔk se: “Una kam lɛ wi tɔk di kes we de bitwin mi ɛn una. Pan ɔl we una sin tan lɛk rɛd rɛd klos, a go mek am wayt lɛk shatin.” So, pan ɔl we yu sin dɛn go tan lɛk rɛd rɛd klos, Jiova stil ebul fɔ fɔgiv yu.

Jiova nɔ want yu fɔ de fil bad bɔt yusɛf fɔ di bad tin we yu dɔn du. Aw yu go ebul fɔ bɛnifit frɔm di fɔgiv we Gɔd de fɔgiv ɛn aw fɔ gɛt klin kɔnshɛns? Lɛ wi tɔk bɔt tu tin dɛn we Kiŋ Devid bin du. Fɔs, i se: “A mɔs kɔnfɛs mi sin to PAPA GƆD.” (Sam 32:5) Mɛmba se Jiova dɔn kɔl yu fɔ lɛ yu pre to am ɛn fɔ lɛ yu “kam lɛ una tɔk di kes we de bitwin una.” Gri fɔ du dat. Kɔnfɛs yu sin to Jiova, ɛn tɛl am aw yu de fil. Frɔm wetin bin apin to Devid, i bin pre se: “Was mi sin kɔmɔt pan mi. . . . Yu go gladi fɔ ɛnibɔdi we nɔ de es insɛf ɔp bɔt we de sɔri fɔ in sin ɛn beg yu fɔ fɔgiv am.”—Sam 51:2, 17.

Sɛkɔn, Devid gri fɔ mek Gɔd in prɔfɛt we nem Netan ɛp am. (Sɛkɛn Samiɛl 12:13) Insay wi yon tɛm, Jiova de yuz di ɛlda dɛn fɔ mek pɔsin we ripɛnt gɛt padi biznɛs bak wit am. We yu go to di ɛlda dɛn, dɛn go yuz di Baybul ɛn pre fɔ yu so dat yu nɔ go kɔntinyu fɔ fil bad bɔt yusɛf ɛn fɔ ɛp yu fɔ gɛt tayt padi biznɛs bak wit Jiova.—Jems 5:14-16.

Jiova want yu fɔ gɛt klin kɔnshɛns

 “I Fayn fɔ Da Pɔsin we PAPA GƆD Dɔn Fɔgiv In Sin.”

Na tru se fɔ kɔnfɛs yu sin to Jiova ɛn fɔ go tɔk wit di ɛlda dɛn, na tin we nɔ rili izi fɔ du. Na di sem tin bin apin to Devid. Di Baybul se fɔ sɔm tɛm i “nɔ bin kɔnfɛs” in sin. (Sam 32:3) Bɔt i bin bɛnifit we i kɔnfɛs in sin ɛn du wetin rayt.

Wan impɔtant bɛnifit we Devid bin gɛt na dat, i bin gɛt gladi at bak. Devid bin rayt se: “I fayn fɔ da pɔsin we PAPA GƆD dɔn fɔgiv in sin, PAPA GƆD dɔn fɔgiv am kpatakpata.” (Sam 32:1) I bin pre bak se: “PAPA GƆD, gi mi chans fɔ prez yu, dɔn ɔlsay pan mi go jɔyn fɔ prez yu.” (Sam 51:15) We Devid bin kɔnfɛs in sin ɛn gladi we Gɔd fɔgiv am, dis bin mek i tɛl ɔda pipul dɛn bɔt Jiova.

Jiova want yu fɔ gɛt klin kɔnshɛns. Ɛn Jiova want lɛ yu fil fri we yu de tɛl ɔda pipul dɛn bɔt am, wetin i want fɔ mɔtalman, ɛn mek yu nɔ fil bad bɔt yusɛf. I want mek yu gladi. (Sam 65:1-4) Mɛmba wetin Jiova se: “Una fɔ lɛf fɔ du bad ɛn kam to Gɔd, ɛn Gɔd go padin una fɔ ɔl una sin.”—Di Apɔsul Dɛn Wok [Akt] 3:19.

Na dat bin apin to Mata. I se: “Mi bɔy pikin bin de sɛn di Wachtawa ɛn Awake! magazin dɛn fɔ mi. Smɔl smɔl a bigin kam bak to Jiova. Di tin we bin at pas ɔl, na fɔ beg Jiova fɔ lɛ i fɔgiv mi fɔ ɔl di tin dɛn we a dɔn du. Bɔt leta, a bin gɛt fɔ pre to Jiova ɛn beg am fɔ fɔgiv mi. I at fɔ biliv se i pas 40 ia bifo a kam bak to Jiova. Di tin we apin to mi, pruv se ilɛk i te we pɔsin lɛf Jiova, chans stil de fɔ kam bak to am ɛn sav am.”