Go dayrɛkt to di men tin

Go dayrɛkt to di say we di difrɛn difrɛn atikul dɛn de

 SƐKSHƆN 1

Una Abop pan Gɔd fɔ Mek Una Gɛt Gladi At na Una Mared-Os

Una Abop pan Gɔd fɔ Mek Una Gɛt Gladi At na Una Mared-Os

“Wɛn Gɔd mek di wɔl, i mek tu kayn pipul, man ɛn uman.” —Matyu 19:4

Na Jiova * mek di fɔs mared. Di Baybul tɛl wi se i mek di fɔs uman ɛn “briŋ am kam to di man.” Adam bin so gladi dat i bin tɔk se: “Dis na bon we kɔmɔt pan mi yon bon, ɛn flɛsh we kɔmɔt pan mi yon flɛsh.” (Jɛnɛsis 2:22, 23) Jiova stil want mek mared pipul dɛn gladi.

We yu jɔs mared, yu go de tink se ɔltin go fayn ɛn una nɔ go gɛt wan prɔblɛm. Bɔt ivin man ɛn wɛf we rili lɛk dɛnsɛf, go stil gɛt prɔblɛm dɛn. (Fɔs Lɛta Fɔ Kɔrint 7:28) Insay dis buk, yu go si fayn advays dɛn we de na di Baybul. If yu du wetin dɛn advays ya se, yu go gɛt gladi at na yu mared-os.—Sam 19:8-11.

 1 DU DI WOK WE JIOVA DƆN GI YU

DI BAYBUL SE: Na di man de oba in wɛf.—Lɛta Fɔ Ɛfisɔs 5:23.

If yu na maredman, Jiova want mek yu trit yu wɛf fayn. (Pita In Fɔs Lɛta 3:7) I mek di uman fɔ ɛp yu, ɛn i want lɛ yu lɛk am ɛn mek i fil gud bɔt insɛf. (Jɛnɛsis 2:18) Di lɛk we yu lɛk yu wɛf fɔ mek yu rɛdi fɔ du wetin i want fɔs, bifo yu du wetin yu want.—Lɛta Fɔ Ɛfisɔs 5:25-29.

If yu na mareduman, Jiova want mek yu rɛspɛkt yu man ɛn ɛp am fɔ du di wok we Jiova dɔn gi am. (Fɔs Lɛta Fɔ Kɔrint 11:3; Lɛta Fɔ Ɛfisɔs 5:33) Sɔpɔt am we i disayd fɔ du sɔntin ɛn du wetin i se wit ɔl yu at. (Lɛta Fɔ Kɔlɔse 3:18) If yu du dat, yu go de du fayn tin to yu man ɛn to Jiova.—Pita In Fɔs Lɛta 3:1-6.

DU DIS:

  • Aks yu man ɔ yu wɛf wetin i tink se yu fɔ du fɔ mek yu bi gud man ɔ gud wɛf. Tek tɛm lisin ɛn du ɔl wetin i tɛl yu

  • Na fɔ peshɛnt. I go tek sɔm tɛm fɔ mek una lan aw fɔ mek di ɔda pɔsin gladi

2 SHO SE YU BISIN BƆT AW YU MAN Ɔ YU WƐF DE FIL

DI BAYBUL SE: Yu fɔ de tink bɔt wetin yu man ɔ yu wɛf lɛk. (Lɛta Fɔ Filipay 2:3, 4) Trit yu man ɔ yu wɛf lɛk se yu valyu am ɛn mɛmba se Jiova want mek in pipul dɛn “gud to ɔlman.” (Sɛkɛn Lɛta To Timoti 2:24) “Wɔd we pɔsin nɔ tink bɔt bifo i pul am na mɔt, kin kɔt shap lɛk sɔd, bɔt [udat] gɛt sɛns, wɛn i tɔk i kin mek pɔsin at kol.” So tek tɛm pik wetin yu de tɔk. (Prɔvabs 12:18) Jiova in spirit go mek yu tɔk saful ɛn sho se yu gɛt lɔv.—Lɛta Fɔ Galeshya 5:22, 23; Lɛta Fɔ Kɔlɔse 4:6.

DU DIS:

  • Bifo una tɔk bɔt ɛni siriɔs prɔblɛm we una gɛt, pre mek Jiova ɛp yu nɔ fɔ vɛks ɛn fɔ mek yu si tin di we aw di ɔda pɔsin de si am

  • Tink gud wan bɔt wetin yu want fɔ tɔk ɛn aw yu go tɔk am

 3 UNA DU TIN WIT WANWƆD

DI BAYBUL SE: We una mared, una tu go tan lɛk “wan pɔsin.” (Matyu 19:5) Bɔt stil, una na tu difrɛn pipul dɛn ɛn una de tink difrɛn we. So na fɔ lan fɔ de ɔndastand aw di ɔda pɔsin de tink ɛn aw i de fil. (Lɛta Fɔ Filipay 2:2) I fayn fɔ gɛt wanwɔd mɔ we una want fɔ disayd fɔ du sɔntin. Di Baybul se: “I fayn fɔ gɛt gud advays we yu mekɔp yu plan.” (Prɔvabs 20:18) Una fɔ alaw wetin di Baybul se fɔ ɛp una we una gɛt impɔtant tin fɔ disayd bɔt.—Prɔvabs 8:32, 33.

DU DIS:

  • Tɛl yu man ɔ yu wɛf ɛnitin, ivin di we aw yu de fil

  • Tɔk wit yu man ɔ yu wɛf fɔs bifo yu gri fɔ du sɔntin wit ɔda pɔsin

^ par. 4 Di Baybul sho se Gɔd in nem na Jiova.