Go dayrɛkt to di men tin

Go dayrɛkt to di say we di difrɛn difrɛn atikul dɛn de

 SƐKSHƆN 6

Aw Pikin Kin Chenj Mared-Os

Aw Pikin Kin Chenj Mared-Os

“Pikin na blɛsin we PAPA GƆD de gi.”—Sam 127:3

We man ɛn uman bɔn pikin, dɛn ɔl tu kin gladi pasmak pan ɔl we i nɔ kin izi. We una jɔs bi mama ɛn papa, una go sɔprayz fɔ si se una de yuz bɔku pan una tɛm fɔ kia fɔ una pikin. Bikɔs una nɔ de slip bɛtɛ ɛn di we aw una de fil kin chenj smɔl, dat kin mek una mared gɛt sɔm prɔblɛm. Yu ɛn yu man ɔ wɛf gɛt fɔ ridyus sɔm pan di tin dɛn we una bin de du so dat una go ebul kia fɔ una pikin ɛn fɔ avɔyd prɔblɛm dɛn we go ambɔg una mared. Aw di advays we de insay di Baybul go ɛp una?

 1 ƆNDASTAND AW PIKIN KIN CHENJ UNA LAYF

DI BAYBUL SE: “If una lɛk una kɔmpin mɔtalman una go de bia wit dɛn; una go gɛt gud at fɔ dɛn.” Dɔn, lɔv go mek yu ‘nɔ go want mek yu yon biznɛs nɔmɔ go bifo; yu nɔ go de vɛks.’ (Fɔs Lɛta Fɔ Kɔrint 13:4, 5) We yu jɔs bi mama, yu go want fɔ gi ɔl yu atɛnshɔn to una pikin. Bɔt dis kin mek yu man bigin fil lɛk se yu nɔ gɛt in tɛm, so nɔ fɔgɛt se insɛf nid yu atɛnshɔn. We yu peshɛnt ɛn du tin saful, yu go ɛp yu man fɔ si se yu nɔ fɔgɛt bɔt am ɛn dat insɛf de ɛp fɔ kia fɔ una pikin.

“Una dɛn maredman fɔ no se una wɛf nɔ gɛt trɛnk lɛkɛ man, so una fɔ de wit dɛn wit da ɔndastandin de, we rayt.” (Pita In Fɔs Lɛta 3:7) Yu fɔ ɔndastand se yu wɛf go yuz bɔku tɛm fɔ kia fɔ una pikin. I dɔn gɛt nyu wok we go mek i wɔri, taya, ɔ i nɔ gladi. Wan wan tɛm, i go vɛks pan yu, bɔt i go fayn mek yu nɔ vɛks kwik bikɔs “fɔ gɛt peshɛnt bɛtɛ pas fɔ gɛt pawa.” (Prɔvabs 16:32) Sho se yu ɔndastand am ɛn sɔpɔt am.—Prɔvabs 14:29.

DU DIS:

  • Papa Dɛn: Ɛp yu wɛf fɔ kia fɔ di pikin ivin na nɛt. Ridyus di tɛm we yu de spɛn pan ɔda tin dɛn so dat yu go ebul spɛn mɔ tɛm wit yu wɛf ɛn yu pikin

  • Mama Dɛn: Na fɔ gri we yu man want fɔ ɛp yu fɔ kia fɔ di pikin. If i nɔ du am fayn, nɔ mek i fil bad; bɔt na fɔ tek tɛm sho am aw fɔ du am

 2 DU TIN DƐN WE GO MEK UNA KƆNTINYU FƆ LƐK UNASƐF

DI BAYBUL SE: “Dɛn tu go bi wan.” (Jɛnɛsis 2:24) Pan ɔl we ɔda pɔsin dɔn jɔyn una famili, una fɔ stil mɛmba se una na “wan.” Una du ɔl wetin una ebul fɔ mek una nɔ ambɔg una mared.

Mareduman, i fayn fɔ de sho se yu gladi fɔ we yu man de ɛp ɛn sɔpɔt yu. Di we aw yu de tɛl am tɛnki go mek ‘in at kol.’ (Prɔvabs 12:18) Maredman, i fayn fɔ de tɛl yu wɛf se yu lɛk am ɛn yu valyu am. Prez am fɔ di we aw i de kia fɔ di famili.—Prɔvabs 31:10, 28.

“Ɔlman nɔ fɔ jɛs de luk fɔ dɛn yon bɛtɛ wan nɔmɔ, dɛn fɔ de tray fɔ mek bɛtɛ fala dɛn kɔmpin.” (Fɔs Lɛta Fɔ Kɔrint 10:24) Tray ɔltɛm fɔ du wetin yu man ɔ yu wɛf lɛk. Una go de tɛl unasɛf tɛnki, fɛn tɛm fɔ tɔk, ɛn lisin to unasɛf. Nɔ jɔs bisin bɔt yusɛf we i kam pan mami ɛn dadi biznɛs. Tink bɔt yu man ɔ yu wɛf. Di Baybul se: “Uman nɔ fɔ ɛva rifyuz in man, semwe so di man sɛf nɔ fɔ ɛva rifyuz in wɛf.” (Fɔs Lɛta Fɔ Kɔrint 7:3-5) So una fɛn tɛm fɔ sidɔm tɔk bɔt dis. We una peshɛnt ɛn ɔndastand unasɛf, una mared go las.

DU DIS:

  • Una nɔ fɔgɛt fɔ spɛn tɛm togɛda

  • Du smɔl smɔl tin dɛn we go mek yu man ɔ yu wɛf fil lɛk se yu lɛk am; lɛk fɔ tɛks am ɔ fɔ gi am gift

 3 UNA TREN UNA PIKIN

DI BAYBUL SE: “Yu fɔ mɛmba se frɔm we yu smɔl, yu dɔn no dɛn tin we rayt na Gɔd in Buk we de mek yu no se yu fɔ biliv pan Jizɔs fɔ mek yu sev.” (Sɛkɛn Lɛta To Timoti 3:15) Una plan wetin una want fɔ tich di pikin. I ebul fɔ lan ivin we yu nɔ bɔn am yet. We di pikin stil de na bɛlɛ, i ebul fɔ sabi yu vɔys ɛn i kin no we yu gladi ɛn we yu nɔ gladi. I fayn fɔ de rid to am pan ɔl we yu jɔs bɔn am. Ilɛksɛf i nɔ de ɔndastand wetin yu de rid, dat go mek insɛf lɛk fɔ rid we i big.

Nɔ ɛva tink se yu pikin tu smɔl fɔ yɛri we yu de tɔk bɔt Gɔd. Mek i yɛri we yu de pre to Jiova. (Ditarɔnɔmi 11:19) Ivin we yu ɛn in de ple, i fayn fɔ tɔk bɔt di tin dɛn we Gɔd mek. (Sam 78:3, 4) As yu pikin de big, i go si se yu lɛk Jiova; dat go mek insɛf lɛk am ɛn want fɔ lan mɔ bɔt am.

DU DIS:

  • Pre mek Jiova gi yu sɛns fɔ tren yu pikin

  • I fayn fɔ de ripit di men tin we yu want di pikin fɔ no, so dat i go lan am frɔm we i smɔl