Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 1

Gɔd Go Lɛk Wi Sote Go

Gɔd Go Lɛk Wi Sote Go

“We wi lɛk Gɔd wi de du ɔl wetin i tɛl wi fɔ du. Wetin i tɛl wi fɔ du nɔ traŋa fɔ wi.” —JƆN IN FƆS LƐTA 5:​3.

1, 2. Wetin mek yu lɛk Jiova Gɔd?

YU LƐK Gɔd? Yu rili lɛk am, na dat mek yu dɔn gi yu layf to am. Yu go mɔs fil se in na yu bɛst Padi. Bɔt na Jiova fɔs lɛk yu ivin bifo yu lɛk am. Wi rid insay di Baybul fɔ se: “Wi lɛk Gɔd ɛn wi kɔmpin bikɔs na Gɔd fɔs lɛk wi.”—Jɔn In Fɔs Lɛta 4:​19.

2 Tink bɔt ɔl di we dɛn we Jiova dɔn sho se i lɛk wi. I dɔn gi wi di wɔl we na fayn fayn ples fɔ lɛ wi de ɛn ɔl wetin wi nid fɔ ɛnjɔy layf. (Matyu 5:​43-48; Rɛvɛleshɔn 4:​11) I want wi fɔ gɛt tayt padi biznɛs wit am, ɛn i dɔn mek am pɔsibul fɔ mek wi lan bɔt am. We wi de rid di Baybul, wi de lisin to Jiova. Ɛn we wi de pre to am, in de lisin to wi. (Sam 65:​2) I de yuz in oli spirit fɔ gayd wi ɛn gi wi trɛnk. (Lyuk 11:​13) I ivin sɛn in Pikin we i lɛk fɔ kam na dis wɔl fɔ fri wi frɔm sin ɛn day.—Rid Jɔn 3:​16; Rom 5:​8.

3. Aw wi go kɔntinyu fɔ gɛt tayt padi biznɛs wit Jiova?

3 Tink smɔl bɔt wan pan yu tayt padi dɛn, di wan we dɔn de wit yu di tɛm dɛn we yu gladi ɛn  di tɛm dɛn we yu at pwɛl. Una go nid fɔ tray tranga wan fɔ mek di padi biznɛs kɔntinyu fɔ tayt. Na so bak wi padi biznɛs wit Jiova, we na di bɛst Padi we yu go ɛva gɛt tan lɛk. Wi padi biznɛs wit Jiova go kɔntinyu fɔ de sote go. Na dat mek di Baybul se: “Una go de kɔntinyu fɔ du sɔntin we go mek Gɔd lɛk una.” (Jud in Lɛta 21, NW) Aw wi go du dis? Di Baybul se: “We wi lɛk Gɔd wi de du ɔl wetin i tɛl wi fɔ du. Wetin i tɛl wi fɔ du nɔ traŋa fɔ wi.”—Jɔn In Fɔs Lɛta 5:​3.

“WE WI LƐK GƆD WI DE DU ƆL WETIN I TƐL WI FƆ DU”

4, 5. (a) Wetin i min fɔ “lɛk Gɔd”? (b) Aw yu bin bigin fɔ lɛk Jiova?

4 Wetin di Baybul min we i se: “We wi lɛk Gɔd wi de du ɔl wetin i tɛl wi fɔ du”? I min di we aw wi lɛk Gɔd na wi at. Yu mɛmba di fɔstɛm we yu bigin fɔ lɛk Jiova?

We yu gi yu layf to Jiova ɛn baptayz, yu de sho se yu lɛk am ɛn yu want fɔ obe am sote go

5 Tink bɔt aw yu bin fil we yu bin lan fɔ di fɔstɛm se Jiova want yu fɔ de sote go na di nyu wɔl. Yu bin lan bɔt ɔl wetin Jiova dɔn du fɔ mek dis bi, ɛn yu bin kam fɔ no bɔt di fayn fayn gift we Jiova gi wi we i sɛn in yon Pikin fɔ kam na dis wɔl. (Matyu 20:​28; Jɔn 8:​29; Lɛta Fɔ Rom 5:​12, 18) We yu bin de lan bɔt aw Jiova lɛk yu, yu at bin gladi ɛn yu bak bin bigin fɔ lɛk am.—Rid Jɔn In Fɔs Lɛta 4:​9, 10.

6. Wetin i min fɔ lɛk sɔmbɔdi? Wetin di lɛk we yu lɛk Gɔd dɔn mek yu du?

6 Bɔt da we de we yu bin de fil se yu lɛk Gɔd, na  bin jɔs di biginin. Fɔ ɛgzampul, we wi lɛk sɔmbɔdi, i nɔ kin jɔs du fɔ se “A lɛk yu.” Lɔv de mek wi want fɔ du tin dɛn we de mek di pɔsin gladi. Semweso, di we aw yu lɛk Jiova kin mek yu want fɔ liv yu layf di we we go mek i gladi. As yu de lɛk am mɔ ɛn mɔ, yu go gi yu layf to am ɛn baptayz. We yu du dis, yu dɔn prɔmis fɔ sav Jiova sote go. (Rid Lɛta Fɔ Rom 14:​7, 8.) Aw yu go kɔntinyu fɔ kip da prɔmis de?

“WI DE DU ƆL WETIN I TƐL WI FƆ DU”

7. Wetin wi go du if wi lɛk Jiova? Wetin na sɔm pan in lɔ dɛn?

7 Bikɔs wi lɛk Jiova, “wi de du ɔl wetin i tɛl wi fɔ du.” Aw wi de du dis? Wi de obe am. Insay di Baybul, wi de lan aw Jiova want wi fɔ liv. Fɔ ɛgzampul, i tɛl wi se i bad fɔ drink te wi chak, fɔ tif ɔ lay, fɔ du mami ɛn dadi biznɛs wit pɔsin we wi nɔ mared to, ɔ fɔ wɔship ɛni ɔda tin apat frɔm am.—Fɔs Lɛta Fɔ Kɔrint 5:​11; 6:​18; 10:​14; Lɛta Fɔ Ɛfisɔs 4:​28; Lɛta Fɔ Kɔlɔse 3:​9.

8, 9. Aw wi go no wetin Jiova want wi fɔ du we wi nɔ gɛt no patikyula lɔ insay di Baybul? Gi wan ɛgzampul.

8 Bɔt fɔ du wetin go mek Jiova gladi, wi nɔ jɔs nid fɔ obe in lɔ dɛn. I nɔ gi wi lɔng list we gɛt lɔ dɛn we de tɔk bɔt ɛvri tin we wi de du na layf. Sɔntɛnde, no patikyula lɔ nɔ go de na di Baybul fɔ sɔntin we wi want fɔ du. Aw wi go ebul fɔ disayd fɔ du di rayt tin? (Lɛta Fɔ Ɛfisɔs 5:​17) Insay di Baybul, wi kin si advays dɛn [prinsipul] we na tru tin dɛn we de tich wi aw Jiova de si tin. As wi de rid di  Baybul, wi de kam fɔ si Jiova as rial Pɔsin. Wi de lan aw Jiova de tink, wetin i lɛk, ɛn wetin i et.—Rid Sam 97:​10; Prɔvabs 6:​16-19; luk Ɛndnot 1 na pej 239.

9 Fɔ ɛgzampul, aw wi go disayd wetin fɔ wach na tɛlivishɔn ɔ na di Intanɛt? Jiova nɔ go tɛl wi wetin wi fɔ du. Bɔt di advays dɛn ɔ tin dɛn we i tɛl wi go ɛp wi fɔ disayd wetin fɔ du. Bɔku pan di we aw pipul dɛn de ɛnjɔy dɛnsɛf tide ful-ɔp wit fɛt fɛt ɛn mami ɛn dadi biznɛs. Insay di Baybul, Jiova tɛl wi se “i nɔ lɛk udat lɛk fɔ du bad,” ɛn i go “jɔj dɛn wan we [de] liv fri layf.” (Sam 11:​5; Di Ibru Pipul Dɛn 13:​4) Aw dɛn advays dɛn ya go ɛp wi fɔ disayd di rayt we? We wi no se Jiova et sɔntin ɔ i de si am as sɔntin we gɛt fɔ du wit mami ɛn dadi biznɛs di we aw i nɔ want, wi fɔ avɔyd am.

10, 11. Wetin mek wi de obe Jiova?

10 Wetin mek wi fɔ obe Jiova? Nɔto jɔs fɔ mek i nɔ pɔnish wi ɔ fɔ avɔyd di prɔblɛm dɛn we wi go gɛt we wi disayd fɔ du tin we nɔ rayt. (Lɛta Fɔ Galeshya 6:​7) Wi de obe Jiova bikɔs wi lɛk am. Jɔs lɛk pikin we want fɔ mek in papa gladi, wi want fɔ mek wi Papa we de na ɛvin, gladi. Natin nɔ de we de mek wi fil fayn pas fɔ no se Jiova gladi fɔ wi!—Sam 5:​12; Prɔvabs 12:​2; luk Ɛndnot 2 na pej 239.

11 Wi nɔ jɔs de obe Jiova di tɛm we tin izi ɔ bikɔs no ɔda we nɔ de. Ɛn wi nɔ de pik uswan pan in lɔ dɛn wi de obe ɛn uswan wi nɔ de obe. (Ditarɔnɔmi  12:​32) Bifo dat, wi go obe ɔl di lɔ dɛn we Jiova de gi wi lɛk di man we rayt di Sam buk we i se: “A lɛk yu lɔ dɛn, a de ɛnjɔy dɛn.” (Sam 119:​47; Lɛta Fɔ Rom 6:​17) Wi want fɔ tan lɛk Noa we bin sho se i lɛk Jiova bay we i du ɔl wetin Jiova tɛl am fɔ du. Di Baybul tɔk se: “Noa du ɔl wetin PAPA GƆD tɛl am fɔ du.” (Jɛnɛsis 6:​22) Yu want Jiova fɔ tɔk dat bɔt yu?

12. Aw wi go mek Jiova gladi?

12 Aw Jiova de fil we wi de obe am? Wi de mek “i gladi.” (Prɔvabs 11:​20, NW; 27:​11) Jɔs tink bɔt dat! Wi de mek di Wan we mek di wan ol wɔl gladi we wi obe am. Bɔt i nɔ de fos wi fɔ du dat. Bifo dat, i dɔn gi wi fridɔm fɔ du wetin wi want fɔ du. We min se wi fri fɔ disayd fɔ du wetin gud ɔ bad. Jiova want di lɛk we wi lɛk am fɔ mek wi disayd fɔ du wetin rayt so dat wi go ebul fɔ liv bɛtɛ layf.—Ditarɔnɔmi 30:​15, 16, 19, 20; luk Ɛndnot 3 na pej 239.

“WETIN I TƐL WI FƆ DU NƆ TRAŊA FƆ WI”

13, 14. Aw wi no se Gɔd in lɔ dɛn nɔ at fɔ obe? Gi ɛgzampul.

13 Wetin wi go du if wi tink se Jiova in lɔ dɛn rili at fɔ obe ɔ dɛn de mek wi nɔ gɛt di fridɔm fɔ disayd wetin wi want fɔ du? Di Baybul tɛl wi klia wan se: “Wetin i tɛl wi fɔ du nɔ traŋa fɔ wi.” (Jɔn In Fɔs Lɛta 5:​3) Di Grik wɔd we dɛn yuz fɔ “traŋa” min “ebi.” Insay ɔda skripchɔ dɛn, dɛn yuz dis wɔd fɔ sho at at lɔ dɛn ɔ pipul dɛn we de tray fɔ  kɔntrol ɔda pipul dɛn ɛn du bad to dɛn. (Matyu 23:​4; Di Apɔsul Dɛn Wok [Akt] 20:​29, 30, NW) Di New English Translation put am dis we: “In lɔ dɛn nɔ de ib wi dɔŋ.” Jiova in lɔ dɛn nɔ “ebi” we min se dɛn nɔ rili at fɔ lɛ wi obe. I nɔ de ɛva aks wi fɔ du wetin wi nɔ ebul fɔ du.

14 Fɔ ɛgzampul, imajin se yu de ɛp yu padi we de muf go na nyu os. I dɔn pak ɔl in tin dɛn insay bɔks dɛn. Sɔm pan dɛn nɔ ebi ɛn dɛn izi fɔ kɛr go. Bɔt ɔda wan dɛn de we rili ebi ɛn na lɛk tu pipul dɛn go ebul fɔ tot dɛn. Yu tink se yu padi go tɛl yu fɔ mek yu wangren tot di wan dɛn we rili ebi? I nɔ go du dat! Wetin mek? Na bikɔs i nɔ want lɛ sɔntin bad apin to yu. Jɔs lɛk da padi, Jiova nɔ go ɛva tɛl wi fɔ du sɔntin we rili at fɔ wi. (Ditarɔnɔmi 30:​11-14) Jiova no udat wi bi. Di Baybul se: “I no aw i mek wi; i nɔ de fɔgɛt se na dɔti i tek mek wi.”—Sam 103:​14.

15. Wetin mek wi shɔ se Jiova in lɔ dɛn na fɔ wi yon gud?

15 Mozis bin tɛl di Izrɛlayt dɛn se Jiova in lɔ dɛn na fɔ dɛn yon gud ɛn we dɛn obe, dɛn go “gɛt lɔŋ layf.” (Ditarɔnɔmi 5:​28-33; 6:​24) Na di sem tin de apin bak tide. Ɛnitin we Jiova de tɛl wi fɔ du de mek wi layf bɛtɛ. (Rid Ayzaya 48:​17.) Ɔltɛm, wi Papa, Jiova, no wetin gud fɔ wi. (Lɛta Fɔ Rom 11:​33) Di Baybul tɛl wi se: “Gɔd na di wan we nɔ de tap fɔ lɛk ɔltɛm.” (Jɔn In Fɔs Lɛta 4:​8) Dat min se ɛnitin we Jiova de tɔk ɛn du, na bikɔs i lɛk wi.

16. Aw wi no se wi go ebul fɔ obe Jiova pan ɔl we wi nɔ pafɛkt ɛn wi de insay dis wikɛd wɔl?

 16 I nɔ izi ɔltɛm fɔ obe Gɔd. Wi de liv na dis wikɛd wɔl we Setan de rul. Setan de tray fɔ mek pipul dɛn du wetin bad. (Jɔn In Fɔs Lɛta 5:​19) Dɔn bak, wi gɛt fɔ tray tranga wan fɔ avɔyd di bad we dɛn we wi kin tink ɛn fil bikɔs na dɛn de mek wi nɔ obe Gɔd. (Lɛta Fɔ Rom 7:​21-25) Bɔt di lɛk we wi lɛk Jiova kin mek wi ebul fɔ du di rayt tin. I de si di we aw wi de tray tranga wan fɔ obe am, ɛn i de yuz in oli spirit fɔ ɛp wi. (Fɔs Samiɛl 15:​22, 23; Di Apɔsul Dɛn Wok [Akt] 5:​32) Di oli spirit de ɛp wi fɔ gɛt kwaliti dɛn we go mek i izi fɔ lɛ wi obe am.—Lɛta Fɔ Galeshya 5:​22, 23.

17, 18. (a) Wetin wi go lan insay dis buk? (b) Wetin wi go tɔk bɔt insay di nɛks chapta?

17 Insay dis buk, wi go lan bɔt aw wi go liv wi layf di we we go mek Jiova gladi. Wi go lan aw wi go fala in advays dɛn ɛn in lɔ dɛn bɔt wetin rayt ɛn wetin rɔŋ. Mɛmba se Jiova nɔ de ɛva fos wi fɔ obe am. We wi disayd fɔ obe, wi layf kin bɛtɛ ɛn wi go gɛt wɔndaful blɛsin dɛn tumara bambay. Ɛn di tin we pas ɔl na dat, we wi de obe Gɔd, dat de sho di kayn we aw wi lɛk am.—Luk Ɛndnot 4 na pej 239.

18 Jiova dɔn gi wi ɔl kɔnshɛns we de ɛp wi fɔ no wetin rayt ɛn wetin rɔŋ. If wi tren wi kɔnshɛns, i go ɛp wi fɔ “du ɔl wetin i tɛl wi fɔ du.” So wetin na kɔnshɛns, ɛn aw wi go ebul fɔ tren am? Lɛ wi lan aw wi go ebul fɔ du dat insay di nɛks chapta.