Go dayrɛkt to di men tin

Go dayrɛkt to di say we di difrɛn difrɛn atikul dɛn de

 LƐSIN 3

Yu Gɛt Fɔ Lan Bɔt Gɔd

Yu Gɛt Fɔ Lan Bɔt Gɔd

Fɔ bi Gɔd in padi, yu gɛt fɔ lan bɔt am. Yu padi dɛn sabi yu nem? Dɛn de kɔl yu nem? Yɛs, dɛn sabi ɛn de yuz am. Gɔd want mek yu sabi in nem ɛn kɔl am. Na Gɔd in nem Jiova. (Sam 83:18, New World Translation; Matyu 6:9) Yu fɔ lan bɔt wetin i lɛk ɛn wetin i nɔ lɛk. Yu fɔ no di wan dɛn we na Gɔd in padi ɛn di wan dɛn we nɔto in padi. I de tek tɛm fɔ mek yu no sɔmbɔdi. Di Baybul se i fayn fɔ mek wi fɛn tɛm fɔ lan bɔt Jiova.—Lɛta Fɔ Ɛfisɔs 5:15, 16.

Gɔd in padi dɛn fɔ du wetin i want. Tink bɔt yu padi dɛn. If yu de du dɛn tin we dɛn et, yu tink se dɛn go stil bi yu padi? Nɔ-o! Semwe so, if yu want bi Gɔd in padi, yu fɔ du wetin i want.—Jɔn 4:24.

Nɔto ɔl rilijɔn go sho yu aw fɔ bi Gɔd in padi. Jizɔs, we na Gɔd in tayt padi, bin tɔk bɔt tu rod. Wan pan di rod dɛn big ɛn bɔku pipul de waka de. Di wan dɛn we de waka de nɔ go gɛt layf we go mek dɛn de sote go. Di ɔda rod tayt, ɛn na wan-wan pipul dɛn de waka de. Di wan dɛn we de waka de go gɛt layf we go de sote go. Dis min se if yu want bi Gɔd in padi, yu fɔ lan di rayt we fɔ wɔship am.—Lyuk 13:24.