Go dayrɛkt to di men tin

Go dayrɛkt to di say we di difrɛn difrɛn atikul dɛn de

 LƐSIN 6

Wi Go Ɛva Si di Wan dɛn We Dɔn Day?

Wi Go Ɛva Si di Wan dɛn We Dɔn Day?

1. Us gud nyuz de bɔt dayman?

We Jizɔs bin de na di wɔl, in padi we nem Lazarɔs, bin day. Lazarɔs bin de na wan vilej we dɛn kɔl Bɛtani we de nia Jerusɛlɛm. Jizɔs go na Bɛtani 4 dez afta Lazarɔs day. Dɔn, Lazarɔs in sista dɛn we nem Meri ɛn Mata go wit Jizɔs na Lazarɔs in grev. I nɔ tu te, bɔku pipul dɛn kam gɛda de. Jizɔs gi Lazarɔs layf bak. Aw yu tink se Meri ɛn Mata bin fil?​—Rid Jɔn 11:21-24, 38-44.

Mata bin no di gud nyuz we de na Gɔd in Wɔd bɔt dayman. I bin no se Jiova go gi layf bak to di wan dɛn we dɔn day.​—Rid Job 14:14, 15.

2. Wetin kin apin to pɔsin we dɔn day?

Gɔd bin tɛl Adam se: “Na dɔti a bin tek mek yu, ɛn na dɔti yu go go bak we yu day.”​—JƐNƐSIS 3:19.

Na dɔti Gɔd yuz fɔ mek mɔtalman. (Sam 103:14) Wi nɔto spirit. We wi day, natin nɔ de kɔmɔt insay wi, ɛn wi bren nɔ de wok igen. Wi nɔ de ebul tink bɔt natin. Pɔsin we dɔn day nɔ no natin igen. So, na dat mek Lazarɔs nɔ bin tɔk natin bɔt wetin apin to am we i bin day.​—Rid Sam 146:4; Ɛkliziastis 9:5, 6, 10.

Yu tink se Gɔd de bɔn pipul dɛn na faya afta dɛn day? Di Baybul dɔn tɛl wi se dayman nɔ no natin. Dis dɔn mek wi no se ɛl faya na lay lay tichin we de mek pipul dɛn de blem Gɔd fɔ tin we i nɔ de du. Gɔd de fil bad we dɛn de tɔk se i de put pipul dɛn na ɛl faya.​—Rid Jɛrimaya 7:31.

Wach di fim we gɛt di taytul: Wetin Kin Apin to Pɔsin we Dɔn Day?

 3. Dayman go ebul tɔk to wi?

Dayman nɔ de tɔk ɛn i nɔ de yɛri. (Sam 115:17) Bɔt sɔm enjɛl dɛn bad. (Jud In Lɛta 6) Dɛn enjɛl ya kin mek lɛk pɔsin we dɔn day ɛn tɔk to pipul dɛn. Jiova se wi nɔ fɔ tɔk to pɔsin we dɔn day.​—Rid Ditarɔnɔmi 18:10, 11.

4. Udat dɛn go gɛt layf bak?

Bɔku pipul dɛn we dɔn day go gɛt layf bak ɛn gɛt di chans fɔ de na dis wɔl. Sɔm pipul dɛn bak we nɔ no Gɔd ɛn we de du bad tin dɛn, go gɛt layf bak.​—Rid Sam 37:29; Di Apɔsul Dɛn Wok [Akt] 24:15.

Di wan dɛn we go gɛt layf bak go ebul lan di tru tin bɔt Gɔd ɛn du wetin Jizɔs se. (Rɛvɛleshɔn 20:11-13) If dɛn du gud tin dɛn, dɛn go de na dis wɔl sote go.​—Rid Jɔn 5:28, 29.

5. Wetin wi lan bɔt Jiova we wi no se i go gi layf bak to di wan dɛn we dɔn day?

Gɔd sɛn in Pikin fɔ kam day fɔ wi so dat di wan dɛn we dɔn day go ebul gɛt layf bak. Dis de tɛl wi se Jiova lɛk wi ɛn i de sɔri fɔ wi. We di wan dɛn we dɔn day gɛt layf bak, udat yu go want si?​—Rid Jɔn 3:16; Lɛta Fɔ Rom 6:23.