Go dayrɛkt to di men tin

Go dayrɛkt to di say we di difrɛn difrɛn atikul dɛn de

 LƐSIN 7

Wetin Na Gɔd in Kiŋdɔm?

Wetin Na Gɔd in Kiŋdɔm?

1. Wetin na Gɔd in Kiŋdɔm?

Wetin mek Jizɔs na di rayt pɔsin fɔ rul wi?​—MAK 1:40-42.

Gɔd in Kiŋdɔm na gɔvmɛnt we de na ɛvin. Dis gɔvmɛnt go pul ɔl mɔtalman gɔvmɛnt ɛn na in go bigin rul. Gɔd go yuz dis gɔvmɛnt fɔ mek wetin i want, bi na ɛvin ɛn na di wɔl. Na gud nyuz fɔ no se Gɔd go yuz in Kiŋdɔm fɔ du dɛn tin ya. I nɔ go te igen, Gɔd in Kiŋdɔm go mek mɔtalman gɛt ɔl di tin dɛn we dɛn want. I go mek ɔl di pipul dɛn we go de na di wɔl gɛt wanwɔd.​—Rid Daniɛl 2:44; Matyu 6:9, 10; 24:14.

Ɛni kiŋdɔm fɔ gɛt kiŋ. Jiova dɔn pik in Pikin we na Jizɔs Krays fɔ bi Kiŋ na in Kiŋdɔm.​—Rid Rɛvɛleshɔn 11:15.

Wach di fim we gɛt di taytul: Wetin na Gɔd in Kiŋdɔm?

2. Wetin mek Jizɔs na di rayt pɔsin fɔ rul wi?

Jizɔs na di rayt pɔsin fɔ rul wi bikɔs na pɔsin we gud ɛn i nɔ de fred fɔ du wetin rayt. (Matyu 11:28-30) Jizɔs gɛt di pawa fɔ ɛp pipul dɛn bikɔs i go de na ɛvin we i de rul di wɔl. Afta Jizɔs gɛt layf bak, i go na ɛvin ɛn sidɔm de wet na Jiova in rayt an. (Di Ibru Pipul Dɛn 10:12, 13) Leta, Gɔd gi am di pawa fɔ bigin rul.​—Rid Daniɛl 7:13, 14.

3. Udat dɛn go rul wit Jizɔs?

Di wan dɛn we go rul wit Jizɔs na pipul dɛn we di Baybul kɔl “Gɔd in oli pipul dɛn.” (Daniɛl 7:27, NW) Na Jizɔs in fetful apɔsul dɛn na di fɔs oli pipul dɛn we Gɔd pik. Jiova stil de pik fetful man ɛn uman dɛn fɔ bi in oli pipul dɛn. We dɛn pipul ya day, Gɔd de gi dɛn layf bak ɛn mek dɛn gɛt spirit bɔdi. Na da kayn bɔdi de Jizɔs bin gɛt afta i day.​—Rid Jɔn 14:1-3; Fɔs Lɛta Fɔ Kɔrint 15:42-44.

 Ɔmɔs pipul dɛn gɛt fɔ go na ɛvin? Jizɔs se dɛn na “ship dɛn we nɔ plɛnti.” (Lyuk 12:32) Na 144,000 pipul dɛn gɛt fɔ go na ɛvin. Na Jizɔs ɛn dɛn pipul ya gɛt fɔ rul di wɔl.​—Rid Rɛvɛleshɔn 14:1.

4. Wetin apin we Jizɔs bigin rul?

Jizɔs bigin rul insay di ia 1914. * Di fɔs tin we i du, i pul Setan ɛn in dɛbul dɛn na ɛvin ɛn ib dɛn na di wɔl. So Setan vɛks bad ɛn i bigin du bad bad tin dɛn na di wɔl. (Rɛvɛleshɔn 12:7-10, 12) Frɔm da tɛm de, di bad bad tin dɛn we de apin to mɔtalman dɔn bɔku. Tin dɛn lɛk wɔ, angri, bad bad sik ɛn we di grɔn de opin. Ɔl dɛn tin ya na “sayn” we de sho se i nɔ go te igen Gɔd in Kiŋdɔm go bigin rul.​—Rid Lyuk 21:7, 10, 11, 31.

5. Wetin Gɔd in Kiŋdɔm de du naw ɛn wetin i gɛt fɔ du tumara bambay?

Gɔd in Kiŋdɔm dɔn mek di gud nyuz dɔn rich bɔku say na di wɔl. Dis dɔn mek bɔku bɔku pipul dɛn we de na difrɛn difrɛn kɔntri dɛn gɛt wanwɔd. Plɛnti pipul we ɔmbul dɔn sho se dɛn want de ɔnda Gɔd in Kiŋdɔm. Natin nɔ go du dɛn pipul ya we Gɔd in Kiŋdɔm de kam pul ɔl di bad pipul dɛn na di wɔl. So ɛnibɔdi we want de ɔnda Gɔd in Kiŋdɔm fɔ du wetin Jizɔs se.​—Rid Rɛvɛleshɔn 7:9, 14, 16, 17.

Di Kiŋdɔm go rul fɔ 1,000 ia ɛn i go mek ɔl wetin Gɔd bin want du fɔ mɔtalman, bi. Di wan ol wɔl go tɔn Paradays. Afta dat, Jizɔs go gi di Kiŋdɔm bak to in Papa. (Fɔs Lɛta Fɔ Kɔrint 15:24-26) Udat yu go want tɛl bɔt Gɔd in Kiŋdɔm?​—Rid Sam 37:10, 11, 29.

 

^ par. 6 If yu want fɔ no mɔ bɔt wetin di Baybul bin dɔn tɔk bɔt 1914, na fɔ rid pej 217 to pej 219 na wan buk we dɛn kɔl Wetin Wi Go Lan Frɔm di Baybul?