Go dayrɛkt to di men tin

Go dayrɛkt to di say we di difrɛn difrɛn atikul dɛn de

 LƐSIN 10

Aw Yu Go Ebul No di Tru Rilijɔn?

Aw Yu Go Ebul No di Tru Rilijɔn?

1. Na wangren tru rilijɔn de?

“Una tek tɛm wit dɛn prɔfɛt we nɔ de tɔk tru.”​—MATYU 7:15.

Na wangren rilijɔn Jizɔs bin tich in disaypul dɛn bɔt. I se i tan lɛk rod. Ɛnibɔdi we waka de go gɛt layf we go de sote go. Jizɔs se: “Di pipul dɛn we dɔn fɛn am ɛn we go fɛn am, nɔ plɛnti.” (Matyu 7:14) Di wɔship we Gɔd de gri fɔ, na di wan we de na di Baybul. Ɔlman we de na tru rilijɔn biliv di sem tin.​—Rid Jɔn 4:23, 24; 14:6; Lɛta Fɔ Ɛfisɔs 4:4, 5.

Wach di fim we gɛt di taytul: Na Ɔlkayn Wɔship Gɔd De Gri Fɔ?

2. Wetin Jizɔs tɔk bɔt lay lay Kristian dɛn?

“Dɛn de se dɛn no Gɔd, bɔt di tin dɛn we dɛn de du sho se dɛn nɔ no am.”​—TAYTƆS 1:16.

Jizɔs bin se prɔfɛt dɛn we nɔ de tɔk tru go mek tru Kristian dɛn lɛf fɔ du di rayt tin. We yu si dɛn, yu go fil se dɛn de wɔship Gɔd di rayt we. Dɛn de mek lɛk se dɛn na tru Kristian. Bɔt yu go ebul no se dɛn nɔto tru Kristian. Aw yu go ebul du dat? Na tru Kristian dɛn nɔmɔ gɛt fayn kwaliti dɛn.​—Rid Matyu 7:14-23.

3. Aw wi go ebul no di wan dɛn we na tru Kristian dɛn?

Lɛ wi tɔk bɔt fayv tin dɛn we go ɛp wi fɔ no dɛn:

  • Tru Kristian dɛn de rɛspɛkt di Baybul. Dɛn de tray fɔ du wetin de na di Baybul. So tru rilijɔn difrɛn frɔm ɔda rilijɔn dɛn we de tich wetin dɛn fil fɔ tich. (Matyu 15:7-9) Tru Kristian dɛn nɔ de tɛl pipul dɛn fɔ du wan tin we dɛn de du ɔda tin.​—Rid Jɔn 17:17; Sɛkɛn Lɛta To Timoti 3:16, 17.

  •   Tru Kristian dɛn de rɛspɛkt Gɔd in nem. Jizɔs bin de sho se i rɛspɛkt Gɔd in nem we i bin de tɔk to pipul dɛn bɔt am. I bin de ɛp dɛn fɔ no Gɔd ɛn bin de tich dɛn fɔ pre mek ɔlman rɛspɛkt Gɔd in nem. (Matyu 6:9) Yu sabi ɛni rilijɔn na yu eria we de tɔk bɔt Gɔd in nem?​—Rid Jɔn 17:26; Lɛta Fɔ Rom 10:13, 14.

  • Tru Kristian dɛn de prich bɔt Gɔd in Kiŋdɔm. Gɔd sɛn Jizɔs fɔ prich di gud nyuz bɔt in Kiŋdɔm. Na Gɔd in Kiŋdɔm nɔmɔ go ebul sɔlv mɔtalman prɔblɛm. Jizɔs kɔntinyu fɔ tɔk bɔt di Kiŋdɔm te i day. (Lyuk 4:43; 8:1; 23:42, 43) I se di wan dɛn we de fala am, fɔ prich bɔt di Kiŋdɔm. If pɔsin kam tɔk to yu bɔt Gɔd in Kiŋdɔm, us rilijɔn yu go fil se i de?​—Rid Matyu 24:14.

  • Tru Kristian dɛn nɔ de put an pan tin dɛn we ɔda pipul dɛn de du. Yu go ebul no tru Kristian dɛn, bikɔs dɛn nɔ de put an pan pɔlitiks ɔ ɛni kɔnfyushɔn we de apin. (Jɔn 17:16; 18:36) Dɛn nɔ de du di bad bad tin dɛn we pipul dɛn de du, ɛn dɛn nɔ de falamakata di bad abit we pipul dɛn gɛt.​—Rid Jems 4:4.

  • Tru Kristian dɛn lɛk dɛnsɛf. Dɛn lan na di Baybul se dɛn fɔ rɛspɛkt ɔlman. Lay lay rilijɔn de sɔpɔt pipul dɛn fɔ go fɛt wɔ, bɔt di tru rilijɔn nɔ de du dat. (Mayka 4:1-3, NW) Tru Kristian dɛn de yuz dɛn taym ɛn mɔni fɔ ɛp ɔda pipul dɛn.​—Rid Jɔn 13:34, 35; Jɔn In Fɔs Lɛta 4:20.

4. Us rilijɔn na di tru rilijɔn?

Us rilijɔn de tich wetin de na di Baybul, de rɛspɛkt Gɔd in nem, ɛn de tich se na Gɔd in Kiŋdɔm nɔmɔ go ebul sɔlv mɔtalman prɔblɛm? Udat dɛn de sho se dɛn lɛk dɛnsɛf ɛn nɔ de put an pan wɔ?​—Rid Jɔn In Fɔs Lɛta 3:10-12.