Go dayrɛkt to di men tin

Go dayrɛkt to di say we di difrɛn difrɛn atikul dɛn de

 LƐSIN 15

Wetin Mek Yu fɔ Kɔntinyu fɔ Lan bɔt Jiova?

Wetin Mek Yu fɔ Kɔntinyu fɔ Lan bɔt Jiova?

1. Us bɛnifit yu go gɛt if yu kɔntinyu fɔ stɔdi di Baybul?

Ɔl di difrɛn difrɛn tin dɛn we wi dɔn tɔk bɔt na di Baybul dɔn mek yu lɛk Jiova mɔ, nɔto so? Na fɔ kɔntinyu fɔ de lan bɔt Jiova so dat yu go de lɛk am mɔ ɛn mɔ. (Pita In Fɔs Lɛta 2:2) Yu go gɛt layf we go de sote go, if yu kɔntinyu fɔ kam nia Gɔd. Yu go du dis we yu stɔdi di Baybul.​—Rid Jɔn 17:3; Jud In Lɛta 21.

As yu de kɔntinyu fɔ lan bɔt Gɔd, na so yu go de biliv am mɔ. Di biliv we yu biliv Gɔd go mek yu du tin dɛn we go mek i gladi fɔ yu. (Di Ibru Pipul Dɛn 11:1, 6) I go mek yu lɛf ɛni bad tin we yu bin de du.​—Rid Di Apɔsul Dɛn Wok [Akt] 3:19.

2. Aw yu go yuz wetin yu dɔn lan bɔt Gɔd fɔ ɛp ɔda pipul dɛn?

Yu go ebul bi Jiova in padi

Wi ɔl kin gladi fɔ tɛl ɔda pipul dɛn bɔt wetin wi dɔn lan. As yu de kɔntinyu fɔ stɔdi di Baybul, na so yu de no aw fɔ yuz am fɔ ɛksplen to pipul dɛn wetin mek yu biliv Gɔd, ɛn fɔ tɛl dɛn bɔt di gud nyuz.​—Rid Lɛta Fɔ Rom 10:13-15.

Bɔku pipul dɛn kin lɛk fɔ prich fɔs to dɛn padi ɛn dɛn fambul dɛn bɔt di gud nyuz. Bɔt na fɔ tek tɛm we yu de tɔk to dɛn. Nɔ tɛl dɛn se di tin dɛn we dɛn biliv nɔ kɔrɛkt, bɔt na fɔ tɛl dɛn bɔt di fayn tin dɛn we Gɔd dɔn prɔmis. Na fɔ mɛmba se pipul dɛn kin lan mɔ frɔm di tin dɛn we yu de du pas di tin dɛn we yu de se.​—Rid Sɛkɛn Lɛta to Timoti 2:24, 25.

3. Us chans yu go gɛt we yu kam nia Gɔd?

We yu kɔntinyu fɔ stɔdi di Baybul, dat go ɛp yu fɔ kam nia Gɔd mɔ ɛn mɔ. As tɛm de go, yu go gɛt di chans fɔ bi Jiova in padi. Ɛn yu go ebul fɔ jɔyn in famili.​—Rid Sɛkɛn Lɛta Fɔ Kɔrint 6:18.

 4. Aw yu go kɔntinyu fɔ lan bɔt Gɔd?

Yu go no aw fɔ du wetin Gɔd want we yu kɔntinyu fɔ stɔdi di Baybul. (Di Ibru Pipul Dɛn 5:13, 14) Tɛl ɛni Jiova Witnɛs fɔ stɔdi di Baybul wit yu. I go yuz wan buk we dɛn kɔl Wetin Wi Go Lan Frɔm di Baybul? Di mɔ yu lan bɔt Gɔd, na di mɔ yu layf go bɛtɛ.​—Rid Sam 1:1-3; 73:27, 28.

Jiova na Gɔd we gladi ɔltɛm. Na frɔm am di gud nyuz kɔmɔt. (Fɔs Lɛta to Timoti 1:11, NW) Yu go ebul go nia Gɔd mɔ, we yu go nia in pipul dɛn. (Di Ibru Pipul Dɛn 10:24, 25) We yu kɔntinyu fɔ du wetin Jiova want, yu go gɛt layf we go de sote go. Fɔ go nia Gɔd na di bɛst tin we yu go ɛva du.​—Rid Fɔs Lɛta to Timoti 6:19.