Go dayrɛkt to di men tin

Go dayrɛkt to di say we di difrɛn difrɛn atikul dɛn de

 LƐSIN 14

Wetin Mek Gɔd Gɛt Ɔganayzeshɔn?

Wetin Mek Gɔd Gɛt Ɔganayzeshɔn?

1. Wetin mek Gɔd bin ɔganayz di Izrɛlayt dɛn?

Trade trade, Gɔd gɛda Ebraam in gret gret granpikin dɛn ɛn mek dɛn bi wan ol neshɔn. Dɔn, i gi dɛn lɔ dɛn. I kɔl dɛn pipul ya di Izrɛlayt dɛn. Na dɛn nɔmɔ bin de wɔship Gɔd di rayt we ɛn na dɛn nɔmɔ bin gɛt Gɔd in lɔ dɛn. (Sam 147:19, 20) So pipul dɛn we de ɔlsay na di wɔl go bɛnifit frɔm di Izrɛlayt dɛn.​—Rid Jɛnɛsis 22:18.

Gɔd pik di Izrɛlayt dɛn fɔ bi in witnɛs dɛn. Dis min se dɛn fɔ tɔk bɔt am to ɔda pipul dɛn. Di Izrɛlayt dɛn stori sho wi se pipul dɛn kin bɛnifit we dɛn obe Gɔd in lɔ dɛn. (Ditarɔnɔmi 4:6) So, na frɔm di Izrɛlayt dɛn ɔda pipul dɛn go lan bɔt Gɔd.​—Rid Ayzaya 43:10, 12.

2. Wetin mek tru Kristian dɛn ɔganayz?

Leta, di Izrɛlayt dɛn lɛf fɔ du wetin Jiova want. So Jiova lɛf dɛn ɛn bigin yuz di pipul dɛn na di Kristian kɔngrigeshɔn. Di Izrɛlayt dɛn nɔto Jiova in pipul dɛn igen. Na tru Kristian dɛn naw na Jiova in witnɛs dɛn.​—Rid Di Apɔsul Dɛn Wok [Akt] 15:14, 17.

Jizɔs bin ɔganayz in disaypul dɛn fɔ prich to pipul dɛn. (Matyu 10:7, 11; 24:14; 28:19, 20) Na dɔn dis wok de dɔn so, bikɔs i nɔ go te igen di wɔl go dɔn. Na di fɔs tɛm dis we Jiova dɔn gɛda bɔku pipul dɛn fɔ wɔship am. (Rɛvɛleshɔn 7:9, 10) Tru Kristian dɛn de kam togɛda fɔ ɛnkɔrej ɛn ɛp dɛnsɛf. Ɔlsay na di wɔl, na di sem tin tru Kristian dɛn kin lan frɔm di Baybul we dɛn kin go mitin.​—Rid Di Ibru Pipul Dɛn 10:24, 25.

 3. Aw Jiova Witnɛs dɛn bigin insay wi yon tɛm?

Insay dɛn 1870, sɔm pipul dɛn we bin de stɔdi di Baybul bigin lan bɔt di tru tin dɛn we de na di Baybul. As dɛn de stɔdi, dɛn kam no se Jizɔs bin ɔganayz in disaypul dɛn fɔ prich. So, dɛnsɛf bigin fɔ prich ɔlsay na di wɔl bɔt Gɔd in Kiŋdɔm. Insay 1931, dɛn bigin kɔl dɛnsɛf Jiova Witnɛs.​—Rid Di Apɔsul Dɛn Wok [Akt] 1:8; 2:1, 4; 5:42.

4. Aw Jiova Witnɛs dɛn ɔganayz?

Di tɛm we di apɔsul dɛn bin de, sɔm ɛlda dɛn bin de we mek ɔp wan grup. Na dɛn man ya bin de oba ɔl di kɔngrigeshɔn dɛn. Dɛn bin de tɛl di kɔngrigeshɔn dɛn wetin fɔ du. Dɛn man ya bin no se na Jizɔs na di edman fɔ ɔl di kɔngrigeshɔn dɛn. (Di Apɔsul Dɛn Wok [Akt] 16:4, 5) Semweso tide, Jiova Witnɛs dɛn gɛt sɔm ɛlda dɛn we mek ɔp wan grup we dɛn kɔl di Gɔvnin Bɔdi. Na dɛn de oba ɔl di kɔngrigeshɔn dɛn ɛn Jiova Witnɛs dɛn branch ɔfis dɛn we de translet, print, ɛn sheb buk dɛn we de tɔk bɔt di Baybul. Dɛn buk ya de insay lɛk 600 langwej dɛn so. Di Gɔvnin Bɔdi kin yuz di Baybul fɔ ɛnkɔrej ɛn tɛl ɔl di kɔngrigeshɔn dɛn wetin fɔ du. Na lɛk 100,000 kɔngrigeshɔn dɛn de na di wɔl. Sɔm man dɛn we fit kin bi ɛlda ɔ ovasia na dɛn kɔngrigeshɔn ya. Dɛn man ya de kia fɔ Gɔd in pipul dɛn.​—Rid Pita In Fɔs Lɛta 5:2, 3.

Jiova Witnɛs dɛn ɔganayz fɔ prich di gud nyuz ɛn fɔ ɛp pipul dɛn fɔ bi Jizɔs in disaypul. Wi de falamakata di apɔsul dɛn fɔ prich to pipul dɛn na dɛn os. (Di Apɔsul Dɛn Wok [Akt] 20:20) Wi rɛdi fɔ stɔdi di Baybul wit ɛnibɔdi we want lan di tru bɔt Gɔd. Bɔt Jiova Witnɛs dɛn nɔto ɔganayzeshɔn nɔmɔ o! Wi na wan big famili. Na Jiova na wi Papa. Wi na brɔda ɛn sista dɛn ɛn wi bisin bɔt wisɛf. (Sɛkɛn Lɛta Fɔ Tɛsalonayka 1:3) Bikɔs wi na pipul dɛn we de du wetin Gɔd want ɛn de ɛp ɔda pipul dɛn, na dat mek wi famili gɛt gladi at pas ɔl di ɔda famili dɛn na di wɔl.​—Rid Sam 33:12; Di Apɔsul Dɛn Wok [Akt] 20:35.