Go dayrɛkt to di men tin

Go dayrɛkt to di say we di difrɛn difrɛn atikul dɛn de

 LƐSIN 9

Aw Yu Famili Go Gɛt Gladi At?

Aw Yu Famili Go Gɛt Gladi At?

1. Aw mared go briŋ gladi at na di famili?

Jiova na Gɔd we gladi ɔltɛm, so i want lɛ famili dɛn gɛt gladi at. (Fɔs Lɛta to Timoti 1:11, NW) Na in mek mared. I impɔtant fɔ lɛ pipul dɛn rɛjista dɛn mared to gɔvmɛnt. Dis go mek dɛn ɛn dɛn pikin dɛn ɛnjɔy dɛn famili. Kristian dɛn fɔ rɛjista dɛn mared lɛk aw di lɔ na dɛn kɔntri se.​—Rid Lyuk 2:1, 4, 5

Aw Gɔd want mared fɔ de? Gɔd want lɛ maredman ɛn mareduman de togɛda te go. Jiova nɔ want lɛ maredman ɛn mareduman lɛf dɛn man ɔ wɛf ɛn go kip ɔda pɔsin. (Di Ibru Pipul Dɛn 13:4) I et we mared de skata. (Malakay 2:16) Bɔt if di maredman ɔ di mareduman du mami ɛn dadi biznɛs wit ɔda pɔsin, Jiova kin alaw dɛn fɔ skata ɛn mared to ɔda pɔsin.​—Rid Matyu 19:3-6, 9.

2. Aw maredman ɛn mareduman fɔ trit dɛnsɛf?

Jiova mek man ɛn uman fɔ ɛp dɛnsɛf insay mared. (Jɛnɛsis 2:18) Na di man de pantap di famili. Na in fɔ fɛn tin fɔ it, klos fɔ wɛr ɛn say fɔ slip fɔ in famili. Ɛn na in fɔ tich dɛn bɔt Gɔd. Di man fɔ lɛk in wɛf lɛk aw i lɛk insɛf. Maredman ɛn mareduman dɛn fɔ lɛk ɛn rɛspɛkt dɛnsɛf. No maredman ɛn mareduman nɔ de we nɔ de mek mistek. So if dɛn want fɔ ɛnjɔy dɛn mared, dɛn fɔ de fɔgiv dɛnsɛf.​—Rid Lɛta Fɔ Ɛfisɔs 4:31, 32; 5:22-25, NW, 33; Pita In Fɔs Lɛta 3:7.

3. Mared pipul dɛn fɔ skata we dɛn de gɛt af-af prɔblɛm?

If af-af prɔblɛm de na di mared-os, di man ɛn di uman fɔ tray fɔ sho lɔv to dɛnsɛf. (Fɔs Lɛta Fɔ Kɔrint 13:4, 5) Di Baybul nɔ advays mared pipul dɛn fɔ pat we dɛn gɛt af-af prɔblɛm.​—Rid Fɔs Lɛta Fɔ Kɔrint 7:10-13.

 4. Wetin Gɔd want fɔ pikin dɛn?

Jiova want lɛ pikin dɛn gɛt gladi at. I de gi dɛn gud advays we go mek dɛn ɛnjɔy dɛn layf. I want mek pikin dɛn lisin to dɛn mama ɛn papa dɛn. (Lɛta Fɔ Kɔlɔse 3:20) Jiova want mek pikin dɛn no se if dɛn want fɔ ɛnjɔy dɛn layf, dɛn fɔ du wetin in ɛn in Pikin se.​—Rid Ɛkliziastis 11:9–12:1; Matyu 19:13-15; 21:15, 16.

5. Wetin mama ɛn papa dɛn fɔ du fɔ mek dɛn pikin dɛn gɛt gladi at?

Mama ɛn papa dɛn fɔ wok tranga wan fɔ mek dɛn pikin dɛn gɛt tin fɔ it, say fɔ slip ɛn klos fɔ wɛr. (Fɔs Lɛta To Timoti 5:8) Bɔt fɔ lɛ una pikin dɛn gɛt gladi at, una fɔ tich dɛn fɔ lɛk Gɔd ɛn fɔ falamakata am. (Lɛta Fɔ Ɛfisɔs 6:4) If una de sho se una lɛk Gɔd, una pikin dɛn go falamakata una. We una mɛn una pikin dɛn di we aw Gɔd want, dɛn go kɔmɔt fayn tumara bambay.​—Rid Ditarɔnɔmi 6:4-7; Prɔvabs 22:6.

I fayn fɔ lɛ mama ɛn papa dɛn tɔk fayn to dɛn pikin dɛn ɛn prez dɛn we dɛn du gud. Dɛn fɔ sho dɛn pikin dɛn aw fɔ du di rayt tin ɛn pɔnish dɛn we dɛn du bad. Dis go mek dɛn pikin dɛn nɔ put an pan ɛnitin we go mek dɛn nɔ ɛnjɔy dɛn layf tumara bambay. (Prɔvabs 22:15) Bɔt fɔ pɔnish yu pikin nɔ min se yu fɔ pɔnish am bad bad wan.​—Rid Lɛta Fɔ Kɔlɔse 3:21.

Jiova Witnɛs dɛn dɔn rayt bɔku bɔku buk dɛn fɔ ɛp mama, papa ɛn dɛn pikin dɛn. Di tin dɛn we dɛn rayt na dɛn buk ya kɔmɔt na di Baybul.​—Rid Sam 19:7, 11.