Go dayrɛkt to di men tin

Go dayrɛkt to di say we di difrɛn difrɛn atikul dɛn de

 MƆ TIN DƐN FƆ NO

Wetin di Baybul Min we I Tɔk bɔt “Babilɔn we Ɔlman No”?

Wetin di Baybul Min we I Tɔk bɔt “Babilɔn we Ɔlman No”?

WAN buk insay di Baybul we na Rɛvɛleshɔn tɔk bɔt plɛnti tin dɛn we gɛt ɔda minin. Fɔ ɛgzampul, dɛn rayt di nem “Babilɔn we ɔlman no” na wan uman we de liv fri layf, in fɔɛd. Di skripchɔ se dis uman sidɔm pan “ɔl dɛn difrɛn difrɛn kɔntri, ɛn ɔl dɛn difrɛn difrɛn pipul.” (Rɛvɛleshɔn 17:​1, 5, 15) No uman nɔ de we ebul fɔ du dis, so wi go se da uman de min sɔntin. So, wetin i min?

Rɛvɛleshɔn 17:​18 tɔk bɔt dis sem uman fɔ se, in na “da big tɔng we gɛt pawa oba dɛn wan we de rul na di wɔl.” Di “tɔŋ” we dɛn tɔk bɔt na dis skripchɔ de tɔk bɔt pipul dɛn we de togɛda ɛn we ɔganayz. Bikɔs dis “big tɔŋ” ebul kɔntrol “dɛn wan we de rul na di wɔl,” so di uman we nem Babilɔn we ɔlman no, go mɔs bi wan kayn ɔganayzeshɔn we gɛt pawa ɛn we de ɔlsay na di wɔl. Dis na ɔganayzeshɔn we  in an de pan rilijɔn, nɔto ɔganayzeshɔn we de pan pɔlitiks ɔ we de bay ɛn sɛl. Lɛ wi tɔk bɔt sɔm skripchɔ dɛn we mek wi se so.

Di uman we nem Babilɔn we ɔlman no, nɔto ɔganayzeshɔn we de pan pɔlitiks bikɔs Gɔd in Wɔd tɔk se “ɔl dɛn wan we de rul na [di] wɔl” we na di wan dɛn we de pan pɔlitiks, “liv fri layf wit” am. I du dat bay we i mek agrimɛnt wit di wan dɛn we de rul dis wɔl ɛn i dɔn du ɔl wetin posibul so dat i go gɛt pawa ɛn kɔntrol dɛn. Na dat mek dɛn kɔl am di “uman we liv fri layf we ɔlman no.”—Rɛvɛleshɔn 17:​1, 2; Jems 4:​4.

Babilɔn we ɔlman no nɔto ɔganayzeshɔn we de bay ɛn sɛl, bikɔs Gɔd in Wɔd tɔk se “dɛn wan we de tredin na dis wɔl” we na di wan dɛn we de bay ɛn sɛl, go de kray di tɛm we dɛn go dɔn kil dis uman. Infakt, di Baybul se di wan dɛn we de rul ɛn di wan dɛn we de bay ɛn sɛl, dɛn ɔl go tinap “fawe” de luk Babilɔn we ɔlman no. (Rɛvɛleshɔn 18:​3, 9, 10, 15-17) So, if Babilɔn we ɔlman no nɔto ɔganayzeshɔn we de pan pɔlitiks ɔ we de bay ɛn sɛl, wi go se in na ɔganayzeshɔn we in an de pan rilijɔn.

Wan ɔda tin we mek wi biliv se Babilɔn we ɔlman no, de pan rilijɔn, na bikɔs di Baybul se i go yuz “wich” fɔ ful ɔl di neshɔn dɛn. (Rɛvɛleshɔn 18:​23) Ɛnti wich gɛt sɔntin fɔ du wit lay lay rilijɔn ɛn kɔmɔt frɔm dɛn dɛbul dɛn, so wi nɔ de sɔprayz we di Baybul tɔk se na insay Babilɔn we ɔlman no “ɔl kayn bad spirit tap.” (Rɛvɛleshɔn 18:​2; Ditarɔnɔmi 18:​10-12) Di Baybul tɔk bak se dis ɔganayzeshɔn de du bad bad tin dɛn to di wan dɛn we de na di tru rilijɔn. I de mek “dɛn wan we bin de tɔk Gɔd in mɛsej” ɛn “ɔl Gɔd in pipul dɛn” sɔfa. (Rɛvɛleshɔn 18:​24) Babilɔn we ɔlman no, et di wan dɛn we de “tɔk opin wan se Jizɔs na dɛn Masta.” I de mek dɛn sɔfa ɛn i ivin de kil dɛn. (Rɛvɛleshɔn 17:​6) So dis uman we na Babilɔn we ɔlman no min ɔl di lay lay rilijɔn dɛn na di wɔl. Dat na ɔl di rilijɔn dɛn we de agens Gɔd ɛn we nɔ de du wetin i want.