Go dayrɛkt to di men tin

Go dayrɛkt to di say we di difrɛn difrɛn atikul dɛn de

 MƆ TIN DƐN FƆ NO

Wetin Na di Tru Bɔt di Papa, di Pikin, ɛn di Oli Spirit?

Wetin Na di Tru Bɔt di Papa, di Pikin, ɛn di Oli Spirit?

PIPUL dɛn we biliv di Triniti kin tɔk se Gɔd na tri pɔsin. Dɛn se di tri pipul dɛn na di Papa, di Pikin, ɛn di Oli Spirit. Ɛn dɛn biliv bak se dɛn tri pipul ya ikwal, dɛn ɔl na ɔlmayti, ɛn dɛn ɔl nɔ gɛt biginin. So dɛn pipul ya biliv se di Papa, di Pikin, ɛn di Oli Spirit dɛn ɔl na Gɔd. Bɔt pan ɔl dat, dɛn se na wangren Gɔd de.

 Bɔku pipul dɛn we biliv di Triniti go tɛl yu se dɛn nɔ ebul fɔ ɛksplen dis tichin. Bɔt stil, dɛn fil se di Triniti na tin we de na di Baybul. Di impɔtant tin na dat di wɔd “Triniti” nɔ de na di Baybul atɔl. Bɔt yu tink se di Baybul tɔk ɛnitin we sho se di Papa, di Pikin, ɛn di Oli Spirit dɛn ɔl ikwal? Fɔ ansa da kwɛstyɔn de, lɛ wi tɔk bɔt wan skripchɔ we di wan dɛn we biliv di Triniti kin yuz fɔ sho se di Baybul tɔk bɔt Triniti.

DI ‘WƆD ƐN GƆD NA WAN’

Jɔn 1:​1 se: “Bifo Gɔd mek di wɔl, di wan we dɛn kɔl di Wɔd bin dɔn de, i bin de wit Gɔd, in ɛn Gɔd na wan.” Insay da sem chapta de, di apɔsul Jɔn sho wi klia wan se “di Wɔd” na Jizɔs. (Jɔn 1:​14) Bɔt bɔku Baybul dɛn se di Wɔd na Gɔd. Dis dɔn mek sɔm pipul dɛn tink se di Pikin ɛn di Papa na di sem Gɔd.

Mɛmba se na insay Grik fɔs dɛn bin rayt dis pat na di Baybul. Leta, pipul dɛn translet dɛn insay ɔda langwej dɛn. Bɔt nɔto ɔl di wan dɛn we translet di Baybul tɔk se di ‘Wɔd ɛn Gɔd na wan.’ Wetin mek? Na di we aw dɛn bin ɔndastand di Grik we dɛn bin rayt di Baybul insay na in mek dɛn nɔ translet am so. So dɛn se dɛn fɔ translet dis pat difrɛn we. Aw dɛn translet am? Dɛn se: “Di Wɔd na bin gɔd.” (The New Testament in an Improved Version) “Di Wɔd bin de wit Gɔd ɛn i bin tan lɛk am.” (The Translator’s New Testament) Dɛn Baybul ya sho wi se di Wɔd nɔto Gɔd insɛf. * Bɔt wetin mek dɛn kɔl di Wɔd “gɔd”? Na bikɔs na in de pantap di ɔda pipul dɛn we Jiova mek. Di wɔd “gɔd” we dɛn yuz naya, min “pɔsin we gɛt pawa.”

TRAY FƆ NO MƆ

Bɔku pipul dɛn nɔ ɔndastand di Grik we dɛn rayt di Baybul insay. So aw pɔsin go ebul no wetin rili di apɔsul Jɔn bin min? Lɛ wi se wan skul ticha ɛksplen wan tɔpik to in skulpikin dɛn. Bɔt di skulpikin dɛn ɔl nɔ ɔndastand di  ticha di sem we. Aw dɛn go ebul ɔndastand wetin rili di ticha bin tɔk? Dɛn fɔ aks di ticha fɔ ɛksplen mɔ. We di ticha go dɔn ɛksplen mɔ, dis go ɛp dɛn fɔ ɔndastand di tɔpik fayn fayn wan. Semweso, fɔ mek yu go ɔndastand wetin Jɔn 1:​1 min, yu fɔ rid di ɔda tin dɛn we Jɔn rayt. Dɛn tin ya go ɛp yu fɔ no mɔ bɔt di pawa we Jizɔs gɛt. We yu lan mɔ bɔt dis tɔpik, dat go ɛp yu fɔ no if yu fɔ biliv di Triniti ɔ nɔ fɔ biliv am.

Fɔ ɛgzampul, mek wi rid wetin Jɔn rayt na Jɔn chapta 1, vas 18. I se: “Nɔbɔdi nɔ si [Ɔlmayti] Gɔd wande.” Bɔt pipul dɛn dɔn si Jizɔs we na di Pikin. Na dat mek Jɔn se: “Di Wɔd [Jizɔs] kam bi mɔtalman, ɛn tap wit wi . . . Wi si di wɔndaful ɔna ɛn pawa we i gɛt.” (Jɔn 1:​14) So yu tink se di Pikin ɛn di Ɔlmayti Gɔd na di sem? Jɔn tɔk bak se di Wɔd bin de “wit Gɔd.” Bɔt aw pɔsin go de wit ɔda pɔsin, dɔn in na da sem pɔsin de? Apat frɔm dat, insay Jɔn 17:​3, Jizɔs sho klia wan se in ɛn in Papa nɔto di sem. I kɔl in Papa “di wangren tru Gɔd.” We di apɔsul Jɔn bin de tɔk bɔt di tin dɛn we i dɔn rayt, i bin se i rayt dɛn “fɔ mek una biliv se Jizɔs na di Mɛsaya, Gɔd in Pikin.” (Jɔn 20:​31) So yu si, di Baybul nɔ se Jizɔs na Gɔd, bɔt i se Jizɔs na Gɔd in Pikin. Dis dɔn ɛp wi fɔ ɔndastand Jɔn 1:​1. Jizɔs we na di Wɔd na “gɔd,” bikɔs na in de pantap di ɔda pipul dɛn we Jiova mek; bɔt in nɔto Ɔlmayti Gɔd.

TRAY FƆ MEK SHƆ

Tink bak bɔt da ticha ɛn di skulpikin dɛn. Lɛ wi se sɔm pan di skulpikin dɛn stil de dawt, ivin we di ticha dɔn ɛksplen mɔ. Wetin dɛn fɔ du? Dɛn fɔ go to ɔda ticha ɛn aks am fɔ mek insɛf ɛksplen mɔ bɔt di sem tɔpik. If di sɛkɔn ticha tɛl dɛn se wetin di fɔs ticha bin tɔk na tru, bɔku pan di skulpikin dɛn nɔ go dawt igen. Semweso, if yu nɔ shɔ bɔt wetin Jɔn rayt na di Baybul bɔt udat na Jizɔs ɛn di Ɔlmayti Gɔd, na fɔ rid wetin ɔda pɔsin rayt bɔt dɛn. Lɛ wi si wetin Matyu bin rayt. We i bin de tɔk bɔt di tɛm we di wɔl go dɔn, i bin tɛl wi wetin Jizɔs tɔk. Jizɔs bin tɔk se: “Nɔbɔdi nɔ  no di de ɔ di awa we dɛn tin ya go bi. Gɔd in enjɛl dɛnsɛf ɛn Gɔd in Pikin insɛf nɔ no di de ɔ di awa, na di Papa in wangren no di de ɛn di awa we dat go bi.” (Matyu 24:​36) Aw dis skripchɔ sho se Jizɔs nɔto Ɔlmayti Gɔd?

Jizɔs se di Papa sabi pas aw di Pikin sabi. If Jizɔs na bin Ɔlmayti Gɔd, i bin fɔ sabi di sem tin we in Papa sabi. So dat min se di Pikin ɛn di Papa nɔto di sem. Bɔt sɔm pipul dɛn go se: ‘Na we Jizɔs bin de na di wɔl, na in mek i tɔk so. In na bin mɔtalman.’ Bɔt ilɛksɛf dat na tru, wetin wi go tɔk bɔt di oli spirit? If insɛf na Ɔlmayti Gɔd, wetin mek Jizɔs nɔ se di oli spirit sɛf sabi wetin Gɔd sabi?

As yu de kɔntinyu fɔ stɔdi di Baybul, yu go lan bɔku ɔda skripchɔ dɛn we de tɔk bɔt dis tɔpik. Ɔl dɛn skripchɔ ya go sho yu di tru tin bɔt di Papa, di Pikin, ɛn di oli spirit.—Sam 90:​2; Di Apɔsul Dɛn Wok [Akt] 7:​55; Lɛta Fɔ Kɔlɔse 1:​15; Prɔvabs 8:​22.

^ par. 7 Fɔ no mɔ bɔt Jɔn 1:​1, na fɔ rid pej 24 to pej 25 insay di Novɛmba 1, 2008 Wachtawa. Na Jiova Witnɛs dɛn mek am.