Go dayrɛkt to di men tin

Go dayrɛkt to di say we di difrɛn difrɛn atikul dɛn de

MƆ TIN DƐN FƆ NO

Aw Daniɛl Bin Sho di Tɛm we di Mɛsaya Go Kam?

Aw Daniɛl Bin Sho di Tɛm we di Mɛsaya Go Kam?

DI PRƆFƐT Daniɛl bin dɔn de lɛk 500 ia so bifo dɛn bɔn Jizɔs. Bɔt pan ɔl dat, Jiova bin sho Daniɛl tin dɛn we go ɛp pipul dɛn fɔ no di tɛm we Jizɔs go bi di Mɛsaya. I bin tɛl Daniɛl se: “A wan mek yu no ɛn ɔndastand se, frɔm di tɛm we dɛn tɔk se mek di pipul dɛn kam bak to PAPA GƆD ɛn bil Jerusɛlɛm, te di tɛm we di wan we dɛn dɔn anyɔnt, we na prins, go kam, dat go bi sɛvin wik. Dɛn fɔ siksti tu wik dɛn go bil bak wit skwaya dɛn ɛn dip dip gɔta we go ful wit wata.”—Daniɛl 9:​25.

 Fɔ mek wi ebul no di tɛm we di Mɛsaya go kam, wi fɔ no fɔs di tɛm we di tin dɛn we Daniɛl bin tɔk bɔt di Mɛsaya in kam wan, bigin fɔ apin. Jiova bin tɛl Daniɛl se i go bigin ‘frɔm di tɛm we dɛn go se mek dɛn go bak ɛn bil Jerusɛlɛm.’ Ustɛm dis bin apin? Wan man we nem Nɛimaya, we rayt sɔm pat dɛn na di Baybul, bin tɔk se dɛn bin tɛl dɛn fɔ go bil di wɔl we de rawnd Jerusɛlɛm “twɛnti ia afta Kiŋ Atazaksis bin dɔn bigin rul.” (Nɛimaya 2:​1, 5-8) Pipul dɛn we kin rayt bɔt tin dɛn we bin de apin fɔs fɔstɛm, tɔk se Atazaksis bigin rul 475 ia bifo dɛn bɔn Jizɔs.  So, Atazaksis in 20 ia na pawa na bin 455 ia bifo dɛn bɔn Jizɔs. (475-20=455) Dis dɔn ɛp wi fɔ no se wi fɔ bigin kɔnt frɔm 455 ia bifo dɛn bɔn Jizɔs.

Daniɛl bin sho aw lɔng i go tek bifo “di Mɛsaya we na di Lida go kam.” I bin tɔk bɔt “sɛvin wik, ɛn siksti tu wik.” Sɛvin wik plɔs 62 wik go gi wi 69 wik. Aw lɔng dis go tek? Difrɛn Baybul dɛn se dis nɔto wik we gɛt sɛvin dez bɔt na wik we ɛni de min wan ia. Dat min se, ɛni wik na sɛvin ia. Dɛn fɔstɛm Ju pipul dɛn bin no se sɔntɛnde, wik kin min ia. Fɔ ɛgzampul, ɛvri sɛvin ia, dɛn bin de gɛt Sabat ia. (Ɛksodɔs 23:​10, 11) So, fɔ gɛt di 69 wik we Daniɛl bin tɔk bɔt, na fɔ se 69 tayms 7 ia. Dis go gi wi 483 ia.

Naw na kɔnt nɔmɔ wi fɔ kɔnt. If wi kɔnt di 483 ia we wi jɔs gɛt, frɔm di ia 455 bifo dɛn bɔn Jizɔs, wi go rich di ia 29 afta dɛn bɔn Jizɔs. Na da sem ia de Jizɔs bin baptayz ɛn bi di Mɛsaya! * (Lyuk 3:​1, 2, 21, 22) Di tin we Gɔd bin dɔn tɔk, apin jɔs lɛk aw i bin se. Yu nɔ tink se dis fɔ mek wi biliv Gɔd mɔ?

^ par. 6 Frɔm di ia 455 to di ia 1 bifo dɛn bɔn Jizɔs, wi go gɛt 454 ia. Frɔm di ia 1 to di ia we pipul dɛn se dɛn bɔn Jizɔs, na wan ia. Ɛn frɔm di ia 1 we pipul dɛn se Jizɔs bɔn to di ia 29, na 28 ia. So, 454+1+28=483 ia. Dɛn bin kil Jizɔs di wik we mek 70, insay di ia 33. (Daniɛl 9:​24, 26, NW) Fɔ no mɔ bɔt dis na fɔ rid chapta 11 insay wan buk we dɛn kɔl Pay Attention to Daniel’s Prophecy! Yu kin rid bak pej 899 to pej 901 insay wan ɔda buk we dɛn kɔl Insight on the Scriptures, Vɔlyum 2. Na Jiova Witnɛs dɛn mek dɛn buk ya.