Go dayrɛkt to di men tin

Go dayrɛkt to di say we di difrɛn difrɛn atikul dɛn de

 MƆ TIN DƐN FƆ NO

Na Insay Disɛmba dɛn Bɔn Jizɔs?

Na Insay Disɛmba dɛn Bɔn Jizɔs?

DI Baybul nɔ tɔk bɔt di tɛm we dɛn bɔn Jizɔs. Bɔt i tɔk bɔt di tin dɛn we go ɛp wi fɔ no se nɔto insay Disɛmba dɛn bɔn Jizɔs.

Lɛ wi tɔk bɔt aw di wɛda kin de insay Disɛmba na Bɛtliɛm, usay dɛn bɔn Jizɔs. Di Ju pipul dɛn gɛt wan mɔnt we nem Kizlɛv we kin de arawnd Novɛmba ɛn Disɛmba na wi yon kalɛnda. Insay da mɔnt de, di ples kin kol ɛn ren kin kam. Di mɔnt we de afta am na Tibɛt we kin de arawnd Disɛmba ɛn Janwari na wi yon kalɛnda. Na da tɛm de, di ples kin kol pas ɔl di ɔda tɛm dɛn insay di ia, ɛn sno kin ivin fɔdɔm. Lɛ wi si wetin di Baybul tɔk bɔt di wɛda we kin de na da ples de.

 Wan pan di pipul dɛn we rayt di Baybul we nem Ɛzra, tɔk bɔt wan mɔnt na di Ju kalɛnda we dɛn kɔl Kizlɛv. I se insay da mɔnt de, di ples kin kol, ɛn ren kin kam. Ɛzra tɔk bak se bɔku pipul dɛn bin kam gɛda na Jerusɛlɛm “di de we mek twɛnti insay di mɔnt we mek nayn [Kizlɛv].” Afta dat, i tɔk se di pipul dɛn bin de “trimbul . . . bikɔs plɛnti ren bin de kam.” Di pipul dɛn we gɛda sɛf tɔk se Kizlɛv “na di sizin we ren kin kam, ɛn pɔsin nɔ go ebul fɔ tinap na do.” (Ɛzra 10:​9, 13, NW; Jɛrimaya 36:​22) Na dat mek di shɛpad dɛn we bin de na da say de, nɔ bin de mek dɛn ɛn dɛn ship dɛn de na do na nɛt insay Disɛmba.

Bɔt di Baybul tɔk se shɛpad dɛn bin de na do de mɛn dɛn ship dɛn di nɛt we Jizɔs bɔn. Lyuk sho se shɛpad dɛn we bin de nia Bɛtliɛm, bin “sidɔm de wach dɛn ship [“na do,” NW], na bin nɛt.” (Lyuk 2:​8-12) So wi dɔn si se, di shɛpad dɛn bin sidɔm de wach dɛn ship dɛn na nɛt. Yu tink se shɛpad dɛn go sidɔm de mɛn dɛn ship dɛn na do, insay Disɛmba we ren kin kam ɛn we di ples kin kol na Bɛtliɛm? Nɔ, dɛn nɔ go du dat. So di tin dɛn we di Baybul se apin di tɛm we dɛn bɔn Jizɔs, dɔn sho klia wan se nɔto insay Disɛmba dɛn bɔn am. *

Gɔd in Wɔd sho wi di tɛm we Jizɔs bin day bɔt i nɔ sho wi di tɛm we dɛn bɔn am. Dis mek wi mɛmba wetin Kiŋ Sɔlɔmɔn bin tɔk. I se: “Gudnem bɛtɛ pas dia dia pafyum, ɛn di de we pɔsin day bɛtɛ pas di de we i bɔn.” (Ɛkliziastis 7:​1) So wi nɔ fɔ sɔprayz if di Baybul nɔ ɛksplen bɔku tin dɛn bɔt di tɛm we Jizɔs bɔn, bɔt ɛksplen bɔku tin dɛn bɔt di prich we i bin de prich, ɛn di day we i kam day fɔ wi.

Di tɛm we dɛn bɔn Jizɔs, shɛpad dɛn bin de na do na nɛt wit dɛn ship dɛn

^ par. 6 If yu want fɔ no mɔ, na fɔ rid pej 176 to pej 179 na wan buk we dɛn kɔl Reasoning From the Scriptures. Na Jiova Witnɛs dɛn mek dis buk.