Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 111

Wan Bɔbɔ we Bin De Slip

Wan Bɔbɔ we Bin De Slip

YU NO wetin de apin naya? Wetin du di bɔbɔ we ledɔm na grɔn? Luk di pipul dɛn we de kɔmɔt insay di os. Wan pan dɛn na Pɔl. Yu de si Timoti? Fɔ se na da winda di bɔbɔ kɔmɔt we i fɔdɔm?

Yɛs, na de i kɔmɔt we i fɔdɔm. Pɔl bin de tɔk to di disaypul dɛn na Troas. I bin no se i go te bifo i si dɛn bak, ɛn i bin gɛt fɔ go di ɔda de. So i tɔk to dɛn te midulnɛt.

Di bɔbɔ we fɔdɔm nem Yutikɔs. I bin sidɔm na di winda we Pɔl bin de tɔk. I sidɔm de te i bigin slip. Na de i kɔmɔt ɔp na di tri stori os in winda, ɛn fɔdɔm na grɔn. So na dat mek dɛn pipul ya wɔri so. Dɛn fred se di bɔbɔ go dɔn day. Ɛn we dɛn es am, dɛn si se i dɔn day.

We Pɔl no se di bɔbɔ dɔn day, i ledɔm pan am ɛn put in an rawnd am. Dɔn i tɛl di pipul dɛn se: ‘Una nɔ wɔri. I dɔn gɛt layf bak!’ Na mirekul Pɔl du so. I mek di bɔbɔ gɛt layf bak. Dis mek di pipul dɛn gladi.

Di pipul dɛn go na di ɔpgarɛt bak. Dɛn go it, ɛn Pɔl kɔntinyu fɔ tɔk to dɛn te di ɔda de. Yu tink se Yutikɔs go slip bak we Pɔl de tɔk? Leta, Pɔl, Timoti ɛn di ɔda wan dɛn we de go wit dɛn, go na di bot. Yu no usay dɛn de go?

Pɔl jɔs dɔn dɔn di tɔd tɛm we i de go rawnd fɔ prich, ɛn i de go bak usay i kin de. We Pɔl bin de go rawnd di tɔd tɛm fɔ prich, i bin de na Ɛfisɔs fɔ tri ia. So dis patrol bin lɔng pas di sɛkɔn wan.

We di bot kɔmɔt na Troas, i go de na Maylitɔs fɔ sɔm tɛm. Bikɔs Ɛfisɔs de nia Maylitɔs, Pɔl sɛn kɔl di man dɛn we de bifo di Kristian dɛn na Ɛfisɔs, fɔ kam mit am na Maylitɔs. I sɛn kɔl dɛn fɔ mek i kam tɔk to dɛn fɔ di las tɛm. We di tɛm rich fɔ lɛ di bot go, di man dɛn we kɔmɔt na Ɛfisɔs fil am bad.

Leta, di bot go na Sizeria, ɛn Pɔl go de na Filip in os. Na Filip in os i bin de we wan prɔfɛt we nem Agabɔs go wɔn am. I se dɛn go ol Pɔl we i go na Jerusɛlɛm. Ɛn na so i bi we Pɔl go na Jerusɛlɛm. Dɔn, we Pɔl dɔn tek tu ia na jel na Sizeria, dɛn kɛr am go na Rom fɔ mek di kiŋ na Rom we nem Siza, jɔj am. Lɛ wi si wetin apin we i bin de go na Rom.