Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 103

Jizɔs Apia to in Disaypul Dɛn

Jizɔs Apia to in Disaypul Dɛn

AFTA Pita ɛn Jɔn kɔmɔt na Jizɔs in grev, na Meri in wan bin lɛf de. I nɔ tu te, Meri bigin kray. Dɔn i luk insay di grev, lɛk aw wi bin si na di las pikchɔ. I si tu enjɛl dɛn insay de. Dɛn aks am se: ‘Wetin mek yu de kray?’

Meri tɛl dɛn se: ‘Dɛn dɔn tek mi Masta in bɔdi, ɛn a nɔ no usay dɛn put am.’ Na de Meri tɔn ɛn si wan man. Di man aks am se: ‘Na udat yu de luk fɔ?’

Meri tink se na di man we de wok na di gadin, ɛn i fil se na in dɔn tek Jizɔs in bɔdi. So i tɛl di man se: ‘If na yu dɔn tek mi Masta in bɔdi, duya tɛl mi usay yu put am.’ Bɔt dis man na Jizɔs. I chenj to difrɛn bɔdi, so Meri nɔ no se na in. Bɔt we i kɔl Meri in nem, Meri no wantɛm se na Jizɔs. So Meri rɔn go tɛl di disaypul dɛn se: ‘A dɔn si di Masta!’

Da sem de de, tu disaypul dɛn bin de go na wan vilej we dɛn de kɔl Ɛmeɔs. We dɛn de go, wan man mit dɛn na rod ɛn bigin waka wit dɛn. Di disaypul dɛn at bin pwɛl we di pipul dɛn dɔn kil Jizɔs. Bɔt we dɛn de go, di man ɛksplen bɔku tin dɛn na di Baybul we mek dɛn fil fayn. Leta we dɛn de it, na in di disaypul dɛn no se na Jizɔs dɛn bin de tɔk to. I nɔ tu te, na de Jizɔs lɔs. So di tu man dɛn rɔn go bak na Jerusɛlɛm, fɔ go tɛl di apɔsul dɛn.

As dis de bi, Jizɔs apia to Pita. Di ɔda wan dɛn gladi we dɛn yɛri se Jizɔs dɔn gɛt layf bak. Bay naw, dɛn tu disaypul dɛn dɔn rich na Jerusɛlɛm. So dɛn go fɛn di apɔsul dɛn, ɛn tɛl dɛn se Jizɔs apia to dɛn we dɛn bin de go na Ɛmeɔs. Da sem tɛm de we dɛn de tɔk, yu no us wɔndaful tin apin?

Luk na di pikchɔ. Jizɔs apia insay di rum we dɛn de, pan ɔl we di domɔt lɔk. In disaypul dɛn gladi bad fɔ si am. Yu no ɔmɔs tɛm Jizɔs dɔn apia to in disaypul dɛn? Na fayv tɛm.

Wan apɔsul we na Tɔmɔs nɔ bin de wit dɛn we Jizɔs apia. So dɛn tɛl am se: ‘Wi dɔn si di Masta!’ Bɔt Tɔmɔs se pas insɛf sɛf si Jizɔs bifo i biliv. Afta et dez, di disaypul dɛn ɔl gɛda bak na wan rum we lɔk. Bɔt naw, Tɔmɔs bin de wit dɛn. Na de Jizɔs apia insay di rum. Na naw Tɔmɔs biliv wetin dɛn bin de tɛl am.