Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 106

Wan Enjɛl Fri di Apɔsul Dɛn

Wan Enjɛl Fri di Apɔsul Dɛn

LUK di enjɛl we de opin di jel domɔt. Di man dɛn we i de fri, na Jizɔs in apɔsul dɛn. Lɛ wi si wetin mek dɛn put dɛn na jel.

Afta di oli spirit kam pan Jizɔs in disaypul dɛn, sɔntin apin wan aftanun we Pita ɛn Jɔn bin de go na di tɛmpul na Jerusɛlɛm. We dɛn rich nia wan domɔt we de na di tɛmpul, dɛn mit wan man we nɔ ebul waka frɔm we dɛn bɔn am. Dɛn kin kɛr dis man go na di tɛmpul ɛvride, fɔ go beg mɔni to di wan dɛn we kin go de. We di man si Pita ɛn Jɔn, i beg dɛn fɔ gi am sɔntin. Wetin di apɔsul dɛn du?

Dɛn tinap ɛn luk di man. Dɔn Pita tɛl am se: ‘A nɔ gɛt mɔni fɔ gi yu, bɔt a go gi yu wetin a gɛt. Bay Jizɔs in pawa, grap ɛn waka!’ Pita ol di man in raytan, ɛn di man grap ɛn bigin waka wantɛm wantɛm. We di pipul dɛn si wetin apin, dɛn sɔprayz ɛn dɛn gladi bad fɔ dis wɔndaful mirekul.

Pita tɛl dɛn se: ‘Na Gɔd we gi Jizɔs layf bak, na in gi wi di pawa fɔ du dis mirekul.’ We in ɛn Jɔn de tɔk, sɔm edman dɛn pan Gɔd biznɛs kam de. Dɛn vɛks bikɔs Pita ɛn Jɔn de tɛl di pipul dɛn se Jizɔs dɔn gɛt layf bak. So dɛn ol dɛn ɛn put dɛn na jel.

Di ɔda de, di edman dɛn pan Gɔd biznɛs ol wan big mitin. Dɛn briŋ Pita ɛn Jɔn ɛn di man we dɛn mɛn, na di mitin. Di edman dɛn pan Gɔd biznɛs aks dɛn se: ‘Na udat gi una di pawa fɔ mek dis man ya waka?’

Pita tɛl dɛn se na Gɔd we gi Jizɔs layf bak, na in gi dɛn di pawa fɔ du dis mirekul. Di prist dɛn nɔ no wetin fɔ du. Dɛn nɔ go se nɔto tru, bikɔs dɛnsɛf no se dis wɔndaful tin we apin, na mirekul. So dɛn wɔn di apɔsul dɛn mek dɛn lɛf fɔ tɔk bɔt Jizɔs, dɔn dɛn mek dɛn go.

Bɔt di apɔsul dɛn kɔntinyu fɔ prich bɔt Jizɔs, ɛn mɛn di wan dɛn we sik. Pipul dɛn ɔlsay bigin yɛri bɔt di mirekul dɛn we dɛn de du. So plɛnti pipul dɛn we de nia Jerusɛlɛm briŋ di wan dɛn we sik fɔ lɛ di apɔsul dɛn mɛn dɛn. Dis mek di edman dɛn pan Gɔd biznɛs jɛlɔs di apɔsul dɛn. So dɛn ol dɛn ɛn put dɛn na jel. Bɔt di apɔsul dɛn nɔ te na jel.

Na nɛt, wan enjɛl opin di jel, lɛk aw yu de si na di pikchɔ. Di enjɛl tɛl dɛn se: ‘Una go tinap na di tɛmpul ɛn kɔntinyu fɔ tɔk to di pipul dɛn.’ We mɔnintɛm rich, di edman dɛn pan Gɔd biznɛs sɛn sɔm man dɛn fɔ go pul di apɔsul dɛn na jel. Bɔt di apɔsul dɛn nɔ bin de de. Leta, di man dɛn si di apɔsul dɛn de tich na di tɛmpul. So dɛn ol dɛn ɛn kɛr dɛn go na di Ju Ay kɔt.

Di edman dɛn pan Gɔd biznɛs tɛl dɛn se: ‘Wi nɔ dɔn wɔn una mek una lɛf fɔ tɔk bɔt Jizɔs? Bɔt una dɔn mek ɔlman na Jerusɛlɛm yɛri bɔt am.’ Di apɔsul dɛn tɛl dɛn se: ‘Na wetin Gɔd tɛl wi fɔ du na in wi go du, wi nɔ go du wetin mɔtalman want wi fɔ du.’ So dɛn kɔntinyu fɔ prich di gud nyus. Yu nɔ tink se i fayn fɔ mek wi falamakata di apɔsul dɛn?