Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 99

Wan Spɛshal It

Wan Spɛshal It

I DƆN pas tu dez frɔm we Jizɔs bin go na Mawnt Ɔliv. Naw na Tɔsde nɛt. Jizɔs ɛn in 12 apɔsul dɛn dɔn kam na dis big rum we de na wan ɔpgarɛt, fɔ kam it di Pasova it. Di man we de kɔmɔt na do, na Judas. I de go tɛl di prist dɛn aw fɔ ol Jizɔs.

Di de bifo ɔl dis apin, Judas go to di prist dɛn ɛn aks dɛn se: ‘Wetin una go gi mi if a ɛp una fɔ ol Jizɔs?’ Dɛn tɛl am se: ‘Wi go gi yu 30 silva mɔni.’ So Judas de go naw to dɛn man ya fɔ mek dɛn kam ol Jizɔs. Yu nɔ tink se na bad tin dis?

We dɛn dɔn it di Pasova it, Jizɔs bigin wan ɔda spɛshal it. I gi in apɔsul dɛn bred ɛn tɛl dɛn se: ‘Una it am, bikɔs i min mi bɔdi we a go sakrifays fɔ una.’ Dɔn, i gi dɛn wayn ɛn tɛl dɛn se: ‘Una drink am, bikɔs i min mi blɔd we a go sakrifays fɔ una.’ Di Baybul kɔl dis spɛshal it, ‘di ivintɛm it fɔ mɛmba di Lɔd.’

Di Izrɛlayt dɛn bin de it di Pasova it fɔ lɛ dɛn mɛmba di tɛm we Gɔd in enjɛl bin pas oba dɛn os dɛn na Ijipt. Di enjɛl kil ɔl di Ijipshian dɛn fɔs pikin dɛn bɔt i nɔ kil di Izrɛlayt dɛn pikin dɛn. Bɔt naw Jizɔs want lɛ in disaypul dɛn mɛmba am, ɛn i want lɛ dɛn mɛmba di day we i day. So i tɛl dɛn fɔ de du dis sem tin ɛvri ia fɔ mɛmba am.

We dɛn dɔn it dis ivintɛm it, Jizɔs tɛl in apɔsul dɛn fɔ biliv am tranga tranga wan. Afta ɔl dis, dɛn siŋ fɔ prez Gɔd, dɔn de go. Di ples bin dɔn dak, i tan lɛk se na bin midulnɛt. Lɛ wi si usay dɛn go.